Luyadi ku semana, o Jimbangi ja Jihova adibhongolola mu ididi aixana Ididi ya Ubhezelu. Ihi yene mubhanga mu ididi mwenyomo? Ni mbote yahi itukatula se tuya mu yônge yiyi?

•  Ima yahi yene mubhanga mu Kididi kya Ubhezelu?

•  Mukonda dyahi watokala kuya mu yônge?

•  Ihi yamba o minzangala ni akwenu

 O Kididi kya Ubhezelu kifwa inzo mwa longa milongi ya Bibidya. O yônge yabhanga mu ididi yiyi, itena kukukwatekesa:

•   kudilonga o kidi kyalungu ni Nzambi.

•   kwijiya se ihi ilombolola o ima yenemubhita mu ngongo.

•   kukituka muthu wambote.

•    kukala ni makamba akidi.

  O milongi yandakukwatekesa. O milongi ya Bibidya yene mu longa mu yônge ya Jimbangi ja Jihova yandakukwatekesa ‘kukala ni unjimu.’ (Jisabhu 4:5) Kiki kilombolola kwila o Bibidya itena kukukwatekesa kubatula kyambote o maka ku mwenyu wé. O Bibidya itena we kukwatekesa kutambwijila o ibhwidisu ya makota, kala yiyi:

•   O kwila o mwenyu wala ni valolo?

•   O kwila Nzambi mwéne wene mututalesa o hadi?

•   Tuya kwebhi kyoso kitufwa?

 Mu yônge yetu ene mubhanga-mu we madiskulusu kala yá:

•   Mukonda Dyahi twa Tokala o ku Twendesa bhu Kaxi ka Bibidya?

•   Kwebhi ku u Tena ku Sanga Kikwatekesu mu Ithangana ya Bhonzo?

•   O Kikalakalu Kya Utuminu wa Nzambi Phala Eye.

 “Koleka yami ya xikola weza mu kyônge. Mwene waxikama kumoxi ni mwiji wami, twamubhana we madivulu phala kukayela o kyônge. Kyoso kyabhu o kyônge, mwene wangitangela kwila wasangulukile kyavulu ni izwelu ya zwela o jiphange mu ithangana ya ibhwidisu. Mwene wazwela we kwila mu ngeleja yê kene mudilonga kala kitwene mudilonga etu.”—Brenda.

 Eye wa kijidile? Mu Kididi kya Ubhezelu eye uxikama bhwoso bhuwamesena, kikubhingi kufuta kitadi.

 O ukamba ni akwenu wandakuswinisa. O Bibidya itanga kuma kima kimoxi kibhangesa o Jikidistá kudibhongolola ‘o kudiswinisa mudya.’ (Jihebelewu 10:24, 25) O athu mu ngongo adizola ngo ene mudyâ, mukonda dya kiki kikwatekesu kyadikota kukala ni athu ambote, ata ku pholo o vondadi ya Nzambi ni ya akwâ.

 “Kudisukilu dya kizuwa, ngibhwila kyavulu maji o athu mu Kididi kya Ubhezelu angibhangesa kudivwa kyambote. Kyoso kibhwa o kyônge, mu kuvutuka kubhata, ngisanguluka, ngikala ni nguzu phala kusuluka.”—Elisa.

 Eye wa kijidile? Mu ngongo yoso mwala 120.000 ya ilunga ya Jimbangi ja Jihova, adibhongolola mu 60.000 ya ididi ya ubhezelu. Ku muvu atena kutunga 1.500 ya Ididi ya Ubhezelu phala kutambulula o athu amesena kuya mu kyônge. a