ДОРЕН гәләк бәр хԝә кʹәт чахе пеһʹәсийа, кӧ мерʹе ве Ԝесли, йе кӧ 54 сали бу гьран нәхԝәш ә. Дохдьра, мәжийе ԝида гьре дитьн. * Әԝана готьн кӧ жийина ԝи анщах чәнд мәһа ԝе бькʹьшинә. Дорен дьбежә: «Мьн гӧһе хԝә баԝәр нәкьр. Чәнд һʹәфтийа әз нькарбум бьһатама сәр һьше хԝә. Мьн фәʹм нәдькьр, чьма әв йәк гәрәке һәма бьһата сәре мә. Әз ԛәʹ һазьр нибум».

Йазьх, ле чь кӧ һатийә сәре Дори тьштәкә тʹәбйәти йә. Чьмки әм жь нәхԝәшийед гьран хԝәйикьри ниньн у нәжи дькарьн тедәрхьн чь чах әме нәхԝәшкʹәвьн. Хенщи ԝе йәке һежайи пәсна нә әԝ мәрьв, йед кӧ һазьр ьн мьԛати мәрьвед хԝә бьн кʹижан кӧ гьран нәхԝәш ьн. У фәʹмдари йә, ԝәки әв тьштәки һеса нинә. Ле чь нәфәред мале гәрәке бькьн, сәва кӧ бәрдьлийе бьдьнә нәхԝәша у мьԛати ԝан бьн? Чаԝа әԝед кӧ мьԛати мәрьвед хԝә дьбьн, дькарьн емосийед хԝә бьгьрьн? Әм гәрәке һивийа чь бьн, чахе мьрьн незик дьбә? Пешийе ԝәрен әм шеԝьр кьн кӧ чьма дькарә иро зәʹф чәтьн бә мьԛати ԝан бьн, йед кӧ бь нәхԝәшийа гьран нәхԝәш ьн.

Иро медисина дьхәбьтә сәва кӧ нәхԝәшийед гьран бьдә сәкьнандьне у әʹмьре мәрийа һʹәвәки дьреж кә. Гәләк ԛьрнә пешда һәла һе дәԝләтед пешдачуйида жи, әʹмьре мәрийа кьн бу. Мәрьв зу дьмьрийан жь нәхԝәшийед мьрдар у ԛәзийа. Мәрьв нькарьбун бьчуна нәхԝәшхане, чьмки әв йәк синоркьри бу. Ләма жи нәфәред мале малда мьԛати нәхԝәша дьбун, йед кӧ малда жи дьмьрийан.

Иро медисина дькарә чʹарәке бькә, сәва кӧ нәхԝәшийед гьран бь щурʹәки бьдьнә сәкьнандьне, кӧ жийина мәрийа дьреж бә. Һәрге бәре жь бо нәхԝәшийед гьран мәрьв зу дьмьрийан, иро медисина дькарә сәр гәләк сала әʹмьр дьреж кә. Рʹаст ә жийина мә дьреж дьбә, ле мәрьв бь тʹәмами ԛәнщ набә. Гәләк жь ԝан мәрийа ӧса сьст дьбьн, кӧ ԛәԝата ԝан жи нагиһиже мьԛати хԝә бьн. Ле ԝан мәрийарʹа йед кӧ гәрәке мьԛати ԝан нәхԝаша бьн, даһа чәтьн дьбә.

Анәгори Дори, иро жи һәчʹи зәʹф жь мәрийа гәләк дьлшкәсти дьбьн, чахе педьһʹәсьн кӧ мәрьве ԝанә незик гьран нәхԝәш ә. Ԝи чахи гава тӧ гәләк хәмгин и, бьн тьрседа ни, у дәрде хԝә дькʹьшини, чь дькарә али тә бькә пешда хԝә һазьр ки? Хьзмәткʹарәки Хԝәдейи амьн, дӧайед хԝәда гот: «Мә ӧса һин кә әм рʹожед хԝә бьжмьрьн, ԝәки әм дьләки сәрԝахт дәст биньн» (Зәбур 90:12). Бәле, бь дьл у щан Йаһоԝарʹа дӧа бькьн, сәва кӧ мә һин кә бь билани «рʹожед хԝә бьжмьрьн», демәк бькарьбьн даһа баш, рʹожед пашьн тʹәви мәрьвед незик дәрбаз кьн.

Гәрәке пешда хԝә һазьр кьн. Һәрге ԛәԝата мәрьве тәйи незик дьгьһиже кӧ хәбәр дә у әԝ һазьр ә дәрһәԛа нәхԝәшийа хԝә шеԝьр кә, ԝе аԛьлайи бә жь ԝи бьпьрсьн кӧ кʹи ԝе дәԝса ԝи сафикьрьна бькә, чахе әԝ ида ԛӧдум бькʹәвә. Нәфәред мале гәрәке вәкьри хәбәр дьн тʹәви мәрьвед хԝәйә нәхԝәш дәрһәԛа ԝе йәке, кӧ чаԝа әԝана ԝе бәрдәԝам кьн алийе медисьнайеда аликʹарийе бьдьне у чь протседура дәрбаз кьн. Чьмки паше ԛәԝата ԝан ԝе ида нәгьһиже сафикьрьна бькьн. Әв йәк ԝе али нәфәред мале бькә, кӧ хәмед хԝә һәвәки сьвьк кьн у жь һәстед хԝәсущдаркьрьне дур бьн. Чахе тӧ пешда дәрһәԛа ве йәке тʹәви мәрьве хԝә вәкьри хәбәр ди у шеԝьр ки, әԝе али тә бькә, кӧ һʹәчʹи зәʹф дина хԝә бьди ԝе йәке, кӧ мьԛати ԝи би. Кʹьтеба Пироз дьбежә: «Бе ширәт мәрәм у тʹьвдир бәтал дьбьн» (Мәтʹәлок 15:22).

Щабдарийа лапә мәзьн йа ԝан мәрьва йед кӧ мьԛати нәхԝәша дьбьн әԝ ә, ԝәки бәрдьлийе бьдьнә нәхԝәша. Ԝи мәрьви кӧ бәр мьрьне йә, гәрәке бьдьнә баԝәркьрьне ԝәки ԝи һʹьз дькьн у ԝәки әԝ тʹәне нинә. Чаԝа әве йәке бькьн? Ԝирʹа тьштәки бьхунә йан бьстьре, у сәва ве йәке бьжберә әʹдәбйәтед ӧса у кʹьламед ӧса, йед кӧ ԝе дьлбинийе бьдә мәрьве нәхԝәш у һʹале ԝи хԝәш кә. Гәләк мәрьвед нәхԝәш рʹьһʹәт дьбьн, чахе нәфәред мале дәсте ԝан дьгьрьн у бь нәрми ԝанарʹа хәбәр дьдьн.

Ԝе баш бә, тʹьме дина хԝә бьдьне һәла чь щурʹәйи мәрьв тен бал йед нәхԝәш. Һʹәсабәкида ӧса һатьбу готьне: «Бьһистьн, һʹәстәки ӧса нә, чь кӧ мәрьв лап хьлазийе ӧнда дькә. Дьбә кӧ ӧса бе кʹьфше кӧ мәрьв хәԝрʹа чуйә, ләма жи бәр ԝи мәрьви нәбежьн тьштед ӧса, чь кӧ тәйе нәхԝәста хут ԝирʹа бежи».

Һәрге дьбә, тʹәвайи дӧа бькьн. Кʹьтеба Пироз гьли дькә дәрһәԛа ԛәԝьмандьнәке, чахе Паԝлосе  шанди у һәвал-һогьред ԝи кʹәтьн бьн барәки гьран, ӧса кӧ әԝана һевийа хԝә жь жийине ида бьрин. Әԝана кʹижан аликʹари дьгәрʹийан? Паԝлос һәвалед хԝәрʹа гот, кӧ сәва ԝан дӧа бькьн (2 Корьнтʹи 1:8-11). Дӧайед бь дьл у щан ԝәʹде дьлтәнгийе у нәхԝәшийед гьран, гәләк ԛимәт ьн.

Ида фькьра ԝе йәке кӧ мәрьве мә бәр мьрьне йә, гәләк дьлтәнг дькә. Чь жи һәбә, мьрьн тьштәки әʹщеб ә сәва мә. Әм ӧса нәһатьнә әʹфьрандьне, кӧ мьрьне ча пʹарәкә жь жийина хԝә ԛәбул кьн (Рʹомайи 5:12). Хәбәра Хԝәде ль сәр мьрьне дьбежә «дьжмьн» (1 Корьнтʹи 15:26). Ләма жи чахе әм нафькьрьн дәрһәԛа мьрьна мәрьве хԝәйә незик у нәһазьр ьн, әв тьштәки тʹәбйәти йә.

Хенщи ԝе йәке, чахе нәфәред мале бь реали ль сәр дәрәще дьньһерьн у фәʹм дькьн кӧ чь дькарә бьԛәԝьмә, әв йәк дькарә али ԝан бькә тьрса хԝә кем кьн. Ӧса әԝана ԝе бькарьбьн педа дина хԝә бьдьнә ԝе йәке, кӧ бәрдьлийа лазьм бьдьнә мәрьве нәхԝәш. Әԝ кӧ чь дькарә бьԛәԝьмә бәр мьрьне, те готьне дь ве чаргошеда « Һʹәфтийед Пашьнә Жийине». Һәмьки нә һʹәму мәрьв йед кӧ бәр мьрьне нә, хԝә ӧса тʹәхмин дькьн чаԝа кӧ дь ве чаргошеда те готьне. Чьмки гәләк жь нәхԝәша йед кӧ ида бәр мьрьне бун, тʹәне һьнәк жь ԝан гӧһастьн ль сәр хԝә тʹәхмин кьрьнә.

Паши мьрьна мәрьве незик, ԝе аԛьлайи бә хәбәр дьн тʹәви һәвале хԝәйи незик, йе кӧ пешда һазьр бу аликʹарийе бьдә мә. Дьбә кӧ ԝе лазьм бә, ԝәки нәфәред мале жи бьдьнә баԝәркьрьне, кӧ мәрьве ԝанә мьри ида начәрчьрә. Әʹфьрандаре инсанәте жи бь һʹьзкьрьн мә дьдә баԝәркьрьне: «Мьри . . . тьштәки ньзаньн» (Ԝаиз 9:5).

Гәләк фәрз ә итʹбарийа хԝә Хԝәде биньн, нә кӧ тʹәне ԝи чахи гава мәрьве мә гьран нәхԝәш ә, ле ӧса жи чахе әм дьлтәнг дьбьн паши мьрьна мәрьве хԝә. Хԝәде дькарә али тә бькә бь гьли у кьред мәрьвед дьн. Дорен дьбежә: «Әз һин бум инкʹар нәкьм аликʹарийа мәрийа. Әԝ аликʹарийа кӧ мә станд, мә ԛәԝи кьр. Мьн мере хԝәва ӧса хԝә тʹәхмин дькьр, кӧ те бежи Йаһоԝа хԝәха мәрʹа дьгот: ‹Әз тʹәви тә мә, кӧ ве дәрәщеда али тә бькьм›. Әз әве йәке тʹӧ щар бир накьм».

Бәле, Йаһоԝа Хԝәде Аликʹарчийе бь итʹбар ә. Әԝ Сазкʹаре мә йә, у әԝ фәʹм дькә еш у дәрде мә. Әԝ дькарә у дьхԝазә аликʹарийа лазьм у һелане бьдә мә, сәва кӧ әм бькарьбьн чәтнайед хԝәда тәйах кьн. Ле һе баш әԝ ә, кӧ әԝи соз дайә ԝәки зутьрәке ԝе мьрьне бьдә һьлдане у бь мьлйона мәрьва йед кӧ бира ԝида ньн, ԝе рʹакә (Йуһʹәнна 5:28, 29; Әʹйанти 21:3, 4). Һьнге әме ԝәк Паԝлосе шанди бькарьбьн бежьн: «Мьрьн, кʹане ԛиле жәʹра тә? Мьрьн, кʹане сәркʹәтьна тә» (1 Корьнтʹи 15:55).