Гава Иса Мәсиһ Шива Хӧдан щара пешьн дәрбаз кьр, 70 шагьрт ԝедәре нибун. Ле әв йәк найе һʹәсабе кӧ Иса ида әԝана ԛәбул нәдькьрьн, йан жи ԝана Иса һиштьбун чубун. Мәʹни әв бу кӧ Иса дьхԝәст әв евара мәхсус тʹәне тʹәви шандийед хԝә дәрбаз кә.

Иса һьм 12 шанди, һьм жи 70 шагьртед хԝәйә дьн һʹәз дькьр. Серида Иса жь нава гәләк шагьртед дьнда хԝәрʹа 12 кәс бьжартьн, у әԝана нав кьрьн шанди (Луԛа 6:12-16). Гава «Иса гази Донздәһа кьр» у «әԝ шандьн, ԝәки дәрһәԛа Пʹадшатийа Хԝәде гьли кьн у мәрьва ԛәнщ кьн», әԝ ль Щәлиле бу (Луԛа 9:1-6). Паше, гава Иса ль Щьһустане бу, әԝи «70 шагьртед дьн бьжартьн у әԝ дӧдӧ-дӧдӧ пешийа хԝә шандьн» (Луԛа 9:51; 10:1). Ләма жи, гәләк щийа шагьртед Иса һәбун, йед кӧ мьзгини бәла дькьрьн.

Щьһуйед кӧ бьбунә шагьртед Иса Щәжьна Дәрбазбуне диса жи һәр сал дәрбаз дькьрьн, ча кʹьфш ә тʹәви малбәтед хԝә (Дәркʹәтьн 12:6-11, 17-20). Гава мьрьна Иса незик дьбу, әԝ тʹәви шандийед хԝә чу Оршәлиме. Ле әԝи гази һʹәму шагьртед хԝә йед жь Щьһустане, Щәлиле у Пәреайе нәкьр, ԝәки тʹәви ԝан Щәжьна Дәрбазбуне кʹьфш кә. Әшкәрә йә, ԝәки ве еваре, Иса дьхԝәст тʹәви шандийед хԝә тʹәне бә. Әԝи готә ԝан: «Әз һʹьзрәт бум кӧ тʹәви ԝә хԝарьна Щәжьна Дәрбазбуне бьхԝьм, пешийа кӧ әз бьчәрчьрьм» (Луԛа 22:15).

Иса заньбу кӧ әԝе мина «Бәрхе Хԝәде, йе кӧ гӧне дьнйайе һьлдьдә» бьмьрә (Йуһʹәнна 1:29). Әв йәк ль бажаре Оршәлиме ԛәԝьми, демәк щийе кӧ бь сәда сала ԛӧрбан Хԝәдерʹа һатьбунә дайине. Азайа кӧ бь сайа мьрьна Иса һатә дайине, жь азайа кӧ бь сайа бәрхе кӧ малбәтед Исраели шәва дәркʹәтьна жь Мьсьре хԝарьбун, мәзьнтьр бу (1 Корьнтʹи 5:7, 8). Ԛӧрбанбуна Иса мәщал да Донздәһ шандийед ԝи, кӧ әԝана бьбьнә һʹиме щьвата Мәсиһийа (Әфәси 2:20-22). Кʹьтеба Пироз дәрһәԛа бажаре Оршәлимейә пироз ӧса дьбежә: «Донздәһ һʹимед сура бажер һәбун, ль сәр ԝан һәр донздәһа навед һәр донздәһ шандийед Бәрх ньвисар бун» (Әʹйанти 21:10-14). Бәле, шандийед амьн пеканина ԛьрара Хԝәдеда роләкә фәрз дьлистьн. Ләма жи, әм фәʹм дькьн ԝәки чьрʹа Иса дьхԝәст кӧ әԝана Щәжьна Дәрбазбуне йа пашьн тʹәви ԝи дәрбаз кьн, пәй кʹижанирʹа бона Шива Хӧдан һазьр бун.

Ԝе еваре, 70 шагьрт у шагьртед дьн ԝедәре нибун. Диса жи, һʹәму шагьртед амьн жь Шива Хӧдан кʹар дьстандьн. Һʹәму кәсед кӧ бь рʹӧһʹе пироз һатьнә бьжартьне, кʹәтьнә пәймана пʹадшатийе, дәрһәԛа чь жи Иса ԝе еваре шандийед хԝәрʹа гот (Луԛа 22:29, 30).