ЙОМАРА у бьред ԝе Марсело у Һивер, Гӧатәмалайеда гӧндәки бьчʹукда дьжин. Йомарайе тʹәви Шәʹдед Йаһоԝа дәстпекьр Кʹьтеба Пироз һин бә. Ԝәхт шунда, һәрдӧ бьред ԝе жи дәстпекьрьн Кʹьтеба Пироз һин бьн. Ле проблемәк һәбу. Һәрсек жи кор бун у ԝана ньзаньбу бь ньвисара Браиле бьхуньн. Ләма жи, кʹе тʹәви ԝана һинбуна Кʹьтеба Пироз дәрбаз дькьр, ԝанрʹа абзаса у рʹезед жь Кʹьтеба Пироз дьхԝәндьн.

Чуйина сәр щьвата жи бона ԝан гәләк чәтьн бу. Ԝана нькарьбу тʹәне һәрʹьн Ода щьвате, йа кӧ рʹийа 40 дәԛа бу. Ле хушк-бьред щьвате али ԝан дькьрьн кӧ әԝана һәрʹьн сәр һʹәму щьвина. Гава ԝана дәстпекьр сәр щьвина Бьжин у Хьзмәт кьн пе дәрса дәрен, хушк-бьра али ԝан дькьрьн, ԝәки әԝана хәбәред дәрса хԝә әзбәри кьн.

Сала 2019-да жь мәһа Гӧлане, щьвин ида гӧнде ԝанда дьһатьнә дәрбазкьрьне. Ԝи чахи, жьн у мерәки кӧ пешәнгед һәртʹьм бун, дәрбази ԝи гӧнди бун. Рʹаст ә ԝана ньвисара Браиле ньзаньбу, ԝана хԝәрʹа нет дани, ԝәки ԝан һәрсека хԝәндьн у ньвисандьна Браиле һин кьн. Әԝ жьн у мер чунә кʹьтебханәке у ԝана хԝәрʹа кʹьтеб дәстхьстьн, ԝәки ньвисара Браиле һин бьн, сәва кӧ мәрьвед дьн һин бькьн.

Чәнд мәһ шунда, Йомара, Марсело у Һивер, дькарьбун ньвисара Браиле һеса бьхуньн. a Бь ви щурʹәйи, әԝана рʹӧһʹанида пешда чун. Ньһа әԝ һәрсек ча пешәнгед һәртʹьм хьзмәт дькьн. Ӧса жи, Марсело буйә бәрдәстийе щьвате. Тʹәмамийа һʹәфтийеда, һәрсек бь хирәт Йаһоԝарʹа хьзмәт дькьн. Хирәта ԝан, кәсед дьн жи һелан дькә.

Әԝана бона һʹьзкьрьн у аликʹарийа щьвате гәләк рʹази нә. Йомара ӧса дьбежә: «Жь ве рʹожева кӧ мә Шәʹдед Йаһоԝа нас кьр, әԝана нишани мә дькьн, ԝәки бь рʹасти мә һʹьз дькьн». Марсело ӧса дьбежә: «Щьвата мәда достед мәйә гәләк баш һәнә, у әм бунә нәфәред малбәтәкә жь щурʹә-щурʹә мьләта, йа кӧ бь һʹьзкьрьна хԝә йәктийеда йә». Йомара у һәрдӧ бьред ԝе һʹьзрәта ԝе рʹоже нә, гава бь чʹәʹвед хԝә бьвиньн кӧ дьнйа ԝе чаԝа бьбә щьнәт! (Зәбур 37:10, 11; Ишайа 35:5)