Һьнәк мәрьв дьфькьрьн, ԝәки Ньвисаред Пироз һатийә гӧһастьне. Ишайа пʹехәмбәр гот, кӧ хәбәра Хԝәде «абадин дьминә» (Ишайа 40:8). Гәло чь дькарә мә бьдә баԝәркьрьне, ԝәки Хәбәра Хԝәде нәһатийә гӧһастьне?

Хԝәде дькарә Хәбәра хԝә бьпарезә, ԝәки нәйе гӧһастьн. Ԝәʹде бәре, чахе копийед дәстньвисар дьһатьнә лекьрьне, ньвискʹара һәр һʹәрфәкә текста пироз фәсал дьжмартьн, сәва кӧ тьштәк нәйе зедәкьрьне, гӧһастьне у бәрʹдане. Ле диса жи, жь бо нәкʹамьлийе һьнә ньвискʹара шашийед бьчʹук бәрʹданә.

Бь һʹәзара копийед манускриптед кәвьнә Ньвисаред Пироз һәнә. Һәрге жь ԝан копийа йәкеда щӧдәкьрьнәкә бьчʹук жи һәбә, әве копийе дькарьн бәрамбәри копийед дьн бькьн у ӧса тедәрхьн кʹижан копи рʹаст ә. Сәва кӧ һе зедә пебьһʹәсьн, бьньһерʹьн готар «Гәло, Текста Кʹьтеба Пироз Һатийә Гӧһастьне?», кʹижан кӧ сәр jw.org һәйә.

Ԝәрен әм избаткьрьнәке бьньһерʹьн. Сала 1947-да шкәфтәкеда незики Бәʹра Мьри, бедуйина документед кәвьн дитьн, кʹижан кӧ нав кьрьн Кʹьтебед Гӧломәтккьри йа Бәʹра Мьри. Әв ньвисаред кәвьн пʹаред Ньвисаред Пироз бун, кʹижан кӧ дӧ һʹәзар сала зедәтьр һәнә. Леколинкʹара әв манускриптед кәвьн бәрамбәри Ньвисаред Пироз кьрьн, кʹижан кӧ иро щәм мә һәнә. Гәло ԝана чь дит?

Леколинкʹара дитьн, ԝәки текста Хәбәра Хԝәде кʹижан кӧ иро щәм мә һәйә, мина текста орижинале йә. * Жь леколина манускриптед кәвьн һатә избаткьрьне, ԝәки текста Ньвисаред Пироз кӧ иро щәм мә һәйә, нәһатийә гӧһастьне, хут әʹламәтийа жь Хԝәде йә. Әм дькарьн баԝәр бьн, ԝәки Хԝәде Ньвисаред Пироз рʹьнд парьстийә, сәва кӧ нәйе гӧһастьне.

Ләма жи әм дькарьн Хәбәра Хԝәде бь баԝәрийа тʹам бьхуньн у рʹастийа ԝеда дӧдьли нәбьн. Ԝәрен әм ньһа шеԝьр кьн, кӧ әм дәрһәԛа Хԝәде жь пʹехәмбәред ԝи чь дькарьн пебьһʹәсьн.