Чьрʹа Әм Дьчәрчьрьн, Кал-Пир Дьбьн у Дьмьрьн?
Әм бона Әʹфьрандаре хԝә ча зарʹ ьн. У әԝ нахԝазә ԝәки әм кӧл-дәрда бькʹьшиньн. Ле йәкә әм рʹасти гәләк кӧл-дәрда у тәнгасийа тен. Гәло чьрʹа?
Де-Баве Мәйә Пешьн Әԝ Бәла Анинә Сәре Мә
«Аԝа чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (РʹОМАЙИ 5:12).
Хԝәде мәрьвед пешьн, Адәм у Һеԝа пе һʹьшаԛьл у бәдәна беԛьсур әʹфьранд. Әԝи ӧса жи сәр әʹрде щьнәте ԝанрʹа маләкә хԝәш да, бь наве бахчә Еден. Әԝи готә ԝан кӧ хенщи дарәке, әԝана дькарьн һʹәму бәред дара бьхԝьн. Ле Адәм у Һеԝа бәре ве дара ԛәдәхәкьри хԝарьн, у бь ве йәке гӧнә кьрьн (Дәстпебун 2:15-17; 3:1-19). Паши нәгӧһдарикьрьне, Хԝәде ԝана жь бахчә дәрхьст, у әʹмьре ԝан гәләк гьран бу. Ԝәʹдә шунда, зарʹ ԝанрʹа бун, у әʹмьре ԝан жи бь кӧл-дәрда тʹьжә бу. Жь ви чахи әԝана гьшк кал-пир дьбьн у дьмьрьн (Дәстпебун 3:23; 5:5). Әм рʹуйе мәрьвед пешьн, Адәм у Һеԝайеда, нәхԝәш дькʹәвьн, кал-пир дьбьн у дьмьрьн.
Мәләкед Хьраб Кӧл-Дәрдед Мә Зедә Дькьн
«Тʹәмамийа дьнйайе бьн һʹӧкӧме Йе Хьрабда йә» (1 ЙУҺʹӘННА 5:19).
«Йе Хьраб», әԝ һәйә Мире-щьна. Әԝ әʹфрине рʹӧһʹани, кӧ найе дитьне, мьԛабьли Хԝәде рʹабу (Йуһʹәнна 8:44; Әʹйанти 12:9). Паше, һьнә мәләкед дьн жи тʹәви Мире-щьна бунә йәк у пьштгьрийа ԝи кьрьн. Сәр ԝан дьбежьн щьн. Әԝ рʹӧһʹед хьраб, ԛәԝата хԝә дь дьнә хәбате ԝәки мәрьв бьхальфьн, гӧрʹа Әʹфьрандаре хԝә нәкьн у пьшта хԝә бьдьнә ԝи. Бьн һʹӧкӧме ԝанда иро гәләк мәрьв тьштед хьраб дькьн (Зәбур 106:35-38; 1 Тимотʹейо 4:1). Шәйтʹан у щьнед ԝи ша дьбьн гава мәрьв дьчәрчьрьн у кӧл-дәрда дькʹьшиньн.
Щарна Әм жь бо Шашийед Хԝә Дьчәрчьрьн
«Мәрьв чь дьчинә, ԝе жи дьчьнә» (ГАЛАТИ 6:7).
Әм гьшк гәләк щар кӧл-дәрда дькʹьшиньн жь бо гӧнәкʹарийа хԝә у жь бо һʹӧкӧме ве дьнйайе, кӧ бьн дәсте Мире-щьнада йә. Ле мәрьв щара хԝәха нәһәԛ ьн бона кӧл-дәрдед хԝә. Чь щурʹәйи? Әԝана гава тьштед хьраб дькьн у сафикьрьнед беаԛьлайи дькьн, гәләк щар ахьрийа хьраб дьстиньн. Алики дьнва жи, чахе мәрьв тьштед баш дькьн, әԝана ахьрийа баш дьстиньн. Мәсәлә, мер у баве һʹәлал у хәбатһʹьз, кӧ нәфәред хԝә һʹьз дькә, ԝе гәләк тьштед баш бьчьнә у ԝе малбәта хԝә бәхтәԝар кә. Ле йе хӧмарбаз, ичʹкәһʹьз у тʹәмбәл, хԝә у нәфәред хԝә дькә кʹәсибийе. Ләма жи бь билани йә гӧһ бьдьнә Әʹфьрандаре хԝә. Әԝ дьхԝазә әм тьштед баш бьчьньн, у «әʹдьлайеда» бьн (Зәбур 119:165).
Әм «Рʹожед Ахьрийеда» Дьжин
«Рʹожед ахьрийеда . . . мәрьве бьбьнә хԝәһʹьз, пʹәрәһʹьз . . . нә гӧрʹа де-бавада . . . тәмсьст, зӧлмкʹар, нәйаред ԛәнщийе» (2 ТИМОТʹЕЙО 3:1-5).
Иро гәләк мәрьв һәма ви щурʹәйи нә, ча ван рʹезада һатийә пʹехәмбәртикьрьне. Рʹабун-рʹуньштьна ԝан әшкәрә избат дькә ԝәки әм рʹасти жи «рʹожед ахьрийеда» дьжин, йед кӧ бәрбь хьлазийа ве дьнйайе дьбьн. Кʹьтеба Пироз ӧса жи пʹехәмбәрти кьрийә, ԝәки «рʹожед ахьрийеда» шәрʹ, кемасийа хԝарьне, әʹрдһʹәжед мәзьн у нәхԝәши ԝе бәлабуйи бьн (Мәтта 24:3, 7, 8; Луԛа 21:10, 11). Әԝ һәр тьшт гәләк кӧл-дәрд у мьрьне тиньн.
