Һәрге щотед зәwьщи qәдьре һәв заньн, әwана дәрһәqа һәв хәм дькьн, һәла һе жи чахе тьштәкида нәqайил ьн. Кʹьтеба «Tеn Lеssons to Transform Your Marriagе» (10 Дәрс Кӧ Зәwаще Дьшьдиньн), ӧса те готьне: «Щотед ӧса тʹьме дьхәбьтьн сәр wе йәке, кӧ бенә сәр нетәке. Дәwса кӧ хәбәр дьн дәрһәqа нәqайилбуне, әwана бь qәдьр гӧһ дьдьнә һәв, һьлдьдьн һʹәсаб ньһерʹандьна һәв у ӧса сафи дькьн, кӧ һәрдарʹа дәст дьдә».

ПРИНСИПА КʹЬТЕБА ПИРОЗ: «Һʹьзкьрьн . . . йа хwә нагәрʹә» (1 Корьнтʹи 13:4, 5).

Микʹа бәрдәwам дькә: «Qәдьре жьна хwә бьгьрьм бона мьн әw те һʹәсабе, wәки әз ле qимәт кьм у тьштед ӧса нәкьм, чь кӧ wе зийане бьдә wе у зәwаща мә».

Чахе мер-жьн qәдьре һәв нагьрьн, һьнге әwана дәстпедькьн һәв беһʹӧрмәт кьн у һәв ньмьз кьн. Леколинкʹар дьбежьн, кӧ тьштед ӧса нишана wе йәке нә, wәки зәwаща wан wе дьреж нәкʹьшинә.

Браин дьбежә: «Чахе мер бь гьлийед нәбаш кʹӧлфәта хwә рʹәзил дькә йан жи дәрһәqа wе лаqьрдийед нәлайиq дьбежә, бь wе йәке әw qәдьре хwә давежә у жьн ида нькарә итʹбарийа хwә wи бинә».

ХWӘ БЬЩЕРʹЬБИНӘ

Нава һʹәфтийеда гьлийед хwә у кьред хwә контрол бькә. Паше жь хwә бьпьрсә:

• «Тʹәви жьн йан мере хwә әз хwә чаwа кʹьфш дькьм? Һе зедә әз wе йан wи рәʹзил дькьм, йан пʹайа дьдьме?»

• Кʹижан дәрәщада мьн һьндава мер йан жьна хwә, qәдьр да кʹьфше?

ТʹӘВИ МЕР ЙАН ЖЬНА ХWӘ ШЕWЬР КӘ

• Кʹижан шьхӧл у хәбәр дькарьн qәдьре wә әʹйан кьн?

• Кʹижан шьхӧл у хәбәр дькарьн wәрʹа нишан кьн, кӧ qәдьре wә нагьрьн?

ШИРӘТ

• Жере бьньвисә се дәрәща, чьда тәйе бьхwәста кӧ һьндава тәда qәдьр бьдана кʹьфше. Бьра щоте тә жи ӧса бькә. Паше кʹахазед хwә һәврʹа нишан кьн, у бьхәбьтьн сәр wе йәке кӧ дәрәщед кʹьфшкьрида, qәдьр бьдьнә кʹьфше.

• Бьньвисә кӧ чь хәйсәтед мер йан жьна тә, тә хwәш тен. Паше wирʹа бежә, кӧ тӧ чьqас әwан тьшта qимәт дьки.

Меган дьбежә: «Qәдьре мере хwә бьгьрьм бона мьн те һʹәсабе, кӧ бь гьлийед хwә wирʹа бьдьмә кʹьфше, wәки әз wи qимәт дькьм у дьхwазьм wи бәхтәwар кьм. Һәмьки әw тьштәкә нә гәләк мәзьн ә, ле щар-щара тьштед ӧса бьчʹук жи, qәдьре мә һьндава мер дьдьнә кʹьфше».

Фәрз әw нинә һәла һьндава тәда qәдьр дьдьнә кʹьфше йан на, ле фәрз әw ә һәла щоте тә алийе тәда тʹәхмин дькә, wәки тӧ qәдьре wи йан wе дьгьри.

ПРИНСИПА КʹЬТЕБА ПИРОЗ: «Дьлшәwатийе, qәнщийе, мьлуктийе, бәрбьһерийе у сәбьре ль хwә wәргьрьн» (Колоси 3:12).