Ле гәло чьрʹа Хԝәде бона Щьһуйа шәрʹ нәкьр мина бәре? Йан жи чьрʹа Хԝәде ԝанрʹа нә гот кӧ шәрʹ бькьн, сәва кӧ хԝә жь зерандьне аза кьн? Гәло мәʹни әԝ бу кӧ ньһерʹандьна Хԝәде сәр шәрʹ һатьбу гӧһастьн? На. Щьмәʹта Щьһу һатьбу гӧһастьн. Ԝана Кӧрʹе Хԝәде Иса чаԝа Мәсиһ инкʹар кьрьн (Кʹаред Шандийа 2:36). Ләма жи, әԝе щьмәʹте һәләԛәтийа хԝәйә мәхсус тʹәви Хԝәде ӧнда кьр (Мәтта 23:37, 38).

Мьләте Щьһу хԝәйкьрьна Хԝәде ӧнда кьрьн, у изьна ԝан тʹӧнә бу шәрʹ бькьн, чьмки Хԝәде ида пьштгьрийа ԝан нәдькьр. Чаԝа кӧ Иса пʹехәмбәрти кьр, кʹәрәмед Хԝәде жь щьмәʹта Исраел дәрбази щьмәʹта тʹәзә бун. Кʹьтеба Пироз әԝе щьмәʹте ӧса нав дькә, «Исраела Хԝәде» (Галати 6:16; Мәтта 21:43). Әԝ щьмәʹт Мәсиһийед рʹункьри бун, Исраела Хԝәдейә рʹӧһʹани. Әʹйан ә кӧ чьрʹа ԛьрʹна йәкеда ԝанрʹа һатә готьне: «Ньһа һун гәле [щьмәʹта] Хԝәде нә» (1 Пәтрус 2:9, 10, ИМ).

Мәсиһийед ԛьрʹна йәке бунә «щьмәʹта Хԝәде». Ле гәло Хԝәде бона ԝана шәрʹ кьр, сәва кӧ ԝана жь зерандьна Рʹомайа аза кә? Йан гәло Хԝәде изьн да ԝан кӧ әԝана мьԛабьли дьжмьнед хԝә шәрʹ кьн? На, Хԝәде ӧса нә кьр. Ле чьрʹа? Чаԝа кӧ тʹема дьнда һатә кʹьфше, чахе Хԝәде сафи дькьр кӧ гәрәке шәрʹ бьбә, әԝи хԝәха сафи дькьр кӧ әԝ шәрʹ кʹәнге бьбә. Ле Хԝәде бона Мәсиһийед ԛьрʹна йәкеда шәрʹ нәкьр, у нә жи изьн да ԝан кӧ әԝана бькʹәвьнә нава шәрʹа. Әʹйан ә, кӧ ԛьрʹна йәкеда һе әԝ ԝәʹдә нибу кӧ Хԝәде сәва зӧлмийе у зорбәтийе шәрʹ бькә.

Чаԝа щьмәʹта Хԝәдейә бәре, әԝ Мәсиһийед ԛьрʹна йәкеда һивийе бун, кӧ Хԝәде хьлазийа зӧлмийе у зорбәтийе бинә. У ԝи чахи Хԝәде ԝанрʹа нәгот кӧ әԝана хԝәха һәрʹьн шәрʹ бькьн мьԛабьли дьжмьнед хԝә. Әԝ йәк те кʹьфше жь ԝан тьштед кӧ Иса Мәсиһ һин дькьр. Мәсәлә, әԝи пәйчуйед хԝә һелан нәдькьр кӧ һәрʹьнә шәрʹ, ле дәԝсе әԝи ԝанрʹа гот: «Дьжмьнед хԝә һʹьз бькьн у бона ԝан дӧа бькьн, йед кӧ ԝә дьзериньн» (Мәтта 5:44). Чаԝа һатьбу пʹехәмбәртикьрьне, ԛьрʹна йәкеда Оршәлим гәрәке бьһата һьлшандьне бь дәсте ордийа Рʹомайа. Ле Иса шагьртед хԝәрʹа нәгот кӧ әԝана бьминьн у шәрʹ бькьн, ле әԝи ԝанрʹа гот кӧ әԝана гәрәке жь шәһәр бьрʹәвьн. У ԝана ӧса жи кьр (Луԛа 21:20, 21).

Паԝлосе шанди бь рʹебәрийа Хԝәде ньвиси: «Һʹәйфе һьлнәдьн, . . . чьмки ньвисар ә: ‹Һʹәйфһьлдан дәсте мьн ә, әзе һʹәйфе һьлиньм, Хӧдан дьбежә›» (Рʹомайи 12:19). Паԝлос әԝ гьли ԝәкʹьландьн, кʹижан кӧ Хԝәде чәнд ԛьрʹнә  пешда готьбу дь кʹьтеба Ԛануна Кʹаһинтийе 19:18-да у Ԛануна Дӧщари 32:35-да. Чаԝа дь тʹема дәрбазбуйида әм пеһʹәсийан, ԝәʹде бәре Хԝәде һʹәйфа щьмәʹта хԝә һьлдьда, бь ве йәке кӧ али ԝан дькьр сәва әԝана мьԛабьли дьжмьнед хԝә шәрʹ бькьн. Гьлийед Паԝлос дьдьнә кʹьфше, кӧ ньһерʹандьна Хԝәде сәр шәрʹ нәһатә гӧһастьн. Дь ԛьрʹна йәкеда жи, нета Хԝәде дәрһәԛа шәрʹ әԝ бу, кӧ һʹәйфа щьмәʹта хԝә һьлдә у хьлазийа зорбәтийе у зӧлмийе бинә. У чаԝа бәре, Хԝәде хԝәха сафи дькьр кӧ кʹенге әԝ шәрʹ бьбуйа у кʹе гәрәке шәрʹ бькьра.

Әʹйан ә, кӧ Хԝәде нәдьготә Мәсиһийед дь ԛьрʹна йәкеда, кӧ һәрʹьн шәрʹ бькьн. Ле гәло иро Хԝәде мәрьв кʹьфш кьрьнә кӧ һәрʹьн шәрʹ бькьн? Йан жи ньһа әԝ ԝәʹдә йә кӧ Хԝәде бькʹәвә нава шьхӧле хьзмәткʹаред хԝә у дәԝса ԝан шәрʹ бькә? Хԝәде чаԝа иро дьньһерʹә сәр шәрʹ? Тʹема хьлазийеда дь ве рʹеза готарада, әме щаба ԝан пьрса пебьһʹәсьн.