Чь ԝе али тә бькә, кӧ хԝәндьна Кʹьтеба Пироз тәрʹа һʹәԝас бә у ԝәки гәләк кʹаре бьстини? Дина хԝә бьдә ԝан пенщ тьшта, чь кӧ али гәләка кьрьн.

Щики рʹьһʹәт бьвинә. Щики бедәнг хԝәрʹа бьвинә. Демәк ԝедәре гәрәке тьштед ӧса тʹӧнә бьн, жь бо чь жи те нькарьби педа һʹьше хԝә бьди сәр хԝәндьне. Рʹонайа баш у һәва тʹәмьз дькарә али тә бькә, кӧ жь хԝәндьне кʹаре бьвини.

Ньһерʹандьна рʹаст хԝәй кә. Кʹьтеба Пироз жь Баве мәйи әʹзмана йә, ләма жи әме бькарьбьн кʹаре бьвиньн һәрге ньһерʹандьна мә мина йа зарʹа бә. Йане әм гәрәке мина зарʹа һазьр бьн һин бьн. Һәрге ньһерʹандьна ԝә һьндава Кʹьтеба Пироз нәрʹаст ә йан жи бь критики йә, бьхәбьтьн кӧ әве йәке жь хԝә дур хьн, сәва кӧ Хԝәде бькарьбә ԝә һин кә (Зәбур 25:4).

Пешийа хԝәндьне дӧа бькә. Дь Кʹьтеба Пирозда фькьред Хԝәде нә, ләма жи мәрʹа аликʹарийа ԝи лазьм ә сәва кӧ әве кʹьтебе фәʹм бькьн. Хԝәде соз дьдә, кӧ ԝе рʹӧһʹе пироз «бьдә әԝед кӧ жь ԝи дьхԝазьн» (Луԛа 11:13). Рʹӧһʹе пироз дькарә али ԝә бькә фькьред Хԝәде фәʹм бькьн. Һьнә ԝәʹдә шунда һуне бькарьбьн һәла һе «нет-мәрәмед Хԝәдейә кʹур жи» фәʹм бькьн (1 Корьнтʹи 2:10).

Бьхунә кӧ фәʹм бьки. Нета тә гәрәке әԝ нибә кӧ хԝәндьне зу хьлаз ки. Ле кʹур бьфькьрә сәр тьштед хԝәнди. Пьрсед ӧса бьдә хԝә: ‹Чь хәйсәт-һʹӧнӧр әз дьвиньм щәм ԝи мәрьви, дәрһәԛа кʹижани кӧ дьхуньм? Чаԝа әз дькарьм әве йәке жийина хԝәда бьдьмә хәбате?›

Һьнә нета бьдә пешийа хԝә. Сәва кӧ кʹаре бьстини жь хԝәндьна Кʹьтеба Пироз, бьхәбьтә кӧ тьштәки һин би, чь кӧ бь рʹасти дькарә жийина тә бәхтәԝар кә. Мәсәлә, тӧ дькари нетед ӧса дайни пешийа хԝә: ‹Әз дьхԝазьм дәрһәԛа Хԝәде һе зедә пебьһʹәсьм›. ‹Әз дьхԝазьм бьбьмә мәрьвәки баш, йан мерәки баш йан жи жьнәкә баш›. Паше жь Кʹьтеба Пироз сәрһатийед ӧса бьжберә, йед кӧ ԝе али тә бькьн бьгьһижи ԝан нета. *

Әв пенщ ширәт ԝе али тә бькьн кӧ дәстпеки Кʹьтеба Пироз бьхуни. Ле чь тӧ дькари бьки, сәва кӧ хԝәндьна Кʹьтеба Пироз тәрʹа һе һʹәԝас бә? Готара майинда дәрһәԛа ве йәке һьнә ширәт тенә дайине.