Әз һатьмә буйине шәһәре Сийудад Обрегонеда, кʹижан кӧ Мәксикайеда алийе бакӧре йә. Жь нәһә зарʹа әз йе пенща бум. Мә ԛәрахе шәһәр дьжит, кʹидәре кӧ ферма баве мьнә бьчʹук һәбу. Ԝедәре щики хԝәш бу. Малбәта мә бәхтәԝар у йәктийеда дьжит. Йазьх, чахе әз пенщ сали бум, фьртоне ферма баве мьн һьлшанд у әм мәщбур бун дәрбази шәһәрәки дьн бьн.

 Шьхӧле баве мьн рʹьнд дьчу. Әԝ дьхәбьти у пʹәред рʹьнд дьстанд. Ле ӧса жи әԝи дәстпекьр ичке зәʹфи вәхԝә. Әве йәке гәләк хьраб сәр зәԝаща ԝи у мә зарʹа һʹӧкӧм кьр. Мә дәстпекьр жь баве хԝә щьхаре бьдьзьн у бькʹьшиньн. Әз щара пешьн шәш салийа хԝәда сәрхԝәш бум. Зутьрәке де-баве мьн жь һәв ԛәтийан у хәйсәтед мьнә хьраб зедә бун.

 Дийа мьн чу тʹәви мерәки бьжи у әм тʹәви хԝә бьрьн. Әԝи мерьки пʹәрә нәдьда дийа мьн, ле пʹәре кӧ дийа мьн ԛазанч дькьр ӧса һьндьк бу, кӧ тʹера мә нәдькьр. Ләма жи чь хәбат рʹасти мә зарʹа бьһата мә дькьр у анщах әʹбура мә дьбу. Мьн сол дьбьрьԛандьн, һьм жи мьн нан, рʹожнәʹмә, бәнушт у тьштед майин дьфьрот. Ӧса жи әз кʹуча дькʹәтьм у мьн бәр малед йед дәԝләти, щийе гәмареда хԝарьн дьгәрʹийа.

 Чахе әз дәһ сали бум, мерәки гази мьн кьр ԝәки тʹәви ԝи сәр гәмаре бьхәбьтьм. Әз ԝирʹа ԛайил бум у мьн мәкʹтәба хԝә һишт у жь мале чум. Әԝи рʹоже доларәки кемтьр пʹәрә дьда мьн у хԝарьна жь щийе гәмаре дьда мьн. Мьн һʹолькәкеда дьжит, кʹижан кӧ мьн жь тьштед нав гәмаре чекьрьбу. Мәрьвед дәр-доре мьн тьштед нәщайиз хәбәр дьдан у бь әʹмьрәки нәщайиз дьжитьн. Гәләк жь ԝана наркоман у сәрхԝәш бун. Әв ԝәʹдәки лапи хьраб бу жийина мьнда. Һәр евар әз дьгьрийам у жь тьрса дьләрьзим. Мьн гәләк шәрм дькьр, чьмки әз кʹәсиб у нәхԝәнди бум. Мьн ԝәкә се сала щийе гәмареда жит. Паше әз Мәксикайеда дәрбази штатәкә дьн бум. Ԝедәре әз дәштада дьхәбьтим. Мьн кӧлирк, пәмбу, ԛамише шәкьр у картол тʹоп дькьрьн.

 Чар сал шунда әз вәгәрʹийамә Сийудад Обрегоне. Мәтʹәкә мьн кʹижан кӧ һʹәким бу, отʹахәкә хԝә да мьн ԝәки теда бьминьм. Әз ԛә нәрʹьһʹәт бум. Мьн хәԝнед хоф дьдитьн у әз кʹәтьмә депресийе у һәла һе жи щарна бона хԝәкӧштьне дьфькьрим. Шәвәке, мьн Хԝәдерʹа дӧа кьр: «Хӧдан, һәрге тӧ һәйи әз дьхԝазьм тә нас кьм у һʹәта-һʹәтайе тәрʹа ԛӧльх кьм. Һәрге дине рʹаст һәйә, дьхԝазьм бьзаньбьм әв кʹижан ә».

 Мьн тʹьме дьхԝәст дәрһәԛа тьштед рʹӧһʹани пебьһʹәсьм. Һе әз зарʹ бум дьчумә щурʹә-щурʹә дера. Ле жь гьшка әʹщьз бум. Ԝедәре дәрһәԛа Кʹьтеба Пироз зәʹф нәдьһатә готьн у али мьн нәкьрьн кӧ һʹәԝщәтийа хԝәйә рʹӧһʹани рʹази кьм. Һьнә дерада пʹәрә фәрз һʹәсаб дькьрьн. Һәбун дер жи, әндәме кʹижана бенамуси дькьрьн.

 Чахе әз нонздәһ сали бум, мере хушкәкә мьн мьнрʹа гот, ԝәки Шәʹдед Йаһоԝа нишани ԝи кьрьнә, кӧ Кʹьтеба Пироз чь дьбежә дәрһәԛа хәбьтандьна шькьла һʹәбандьнеда. Әԝи мьнрʹа Дәркʹәтьн 20:4, 5 хԝәнд. Ԝедәре те готьне ԝәки әм гәрәке пʹута ченәкьн. Рʹеза 5-да ньвисар ә: «Бәр тʹӧ пʹути та нәби у хӧламтийа ԝан нәки, чьмки әз Хӧдан Хԝәдейе тә Хԝәдеки кʹӧмрʹәш ьм». Паше әԝи жь мьн пьрси: «Һәрге Хԝәде пʹута дьдә хәбате, ԝәки кʹәрәмәта бькә, йан жи дьхԝазә кӧ әм ԝана һʹәбандьнеда бьдьнә хәбате, ле чьрʹа ԛәдәхә дькә, кӧ ԝана һʹәбандьнеда бьдьнә хәбате?» Әве пьрсе әз һелан кьрьм кӧ бьфькьрьм. Паши ԝе йәке мә диса чәнд щара дәрһәԛа тʹемед Кʹьтеба Пироз шеԝьр дькьр. Әв хәбәрдан гәләк мьн хԝәш дьһат у ԝәʹдә жи тебежи дьфьрʹийа.

 Ԝәʹдә шунда әԝи әз бьрьмә щьвата Шәʹдед Йаһоԝа. Гәләк мьн хԝәш һат чь кӧ мьн ԝедәре дит у бьһист. Бәрнамеда щаһьла жи кʹар дькьр у ԝана сәр сене тʹәмьз у һʹьлу хәбәр дьда. Әз фькьрим: «Вьра мәрьв занәбунәкә ча рʹьнд дьстиньн!» Рʹаст ә пʹорʹе мьн дьреж бу у кʹьнщхԝәкьрьна мьн нәщайиз бу, ле Шәʹдед Йаһоԝа бь дьлгәрми әз сьлав дькьрьм. Малбәтәке әз тʹәглиф кьрьн, кӧ паши щьвате һәрʹьм тʹәви ԝан хԝарьне бьхԝьм!

 Бь аликʹарийа Шәʹдед Йаһоԝа, жь һинбуна Кʹьтеба Пироз мьн фәʹм кьр ԝәки Йаһоԝа Баве һʹьзкьри йә у бона мә хәм дькә. Әԝ наньһерʹә, һәла әм кʹәсиб ьн, дәԝләти нә, чь мьләти нә, чь бәрәки нә у мә чь хԝәндьн стандийә. Бь рʹасти Хԝәде фьрԛийе накә ортʹа мәрьва (Кʹаред Шандийа 10:34, 35). Ахьрийеда һʹәԝщед мьнә рʹӧһʹани рʹази бун у ида мьн хԝә беԛимәт һʹәсаб нәдькьр.

 Әʹмьре мьнда гәләк тьшт алийе башда һатьнә гӧһастьн! Мьн тʹәрка щьхаре у ичкәвәхԝарьне да. Ӧса жи мьн ида гьлийе нәщайиз нәдьда хәбате. Бал мьн ида һәстед дьлшкәстибуне тʹӧнә бун, йед кӧ жь бьчʹуктайе бал мьн пешда һатьбун. У мьн ида хәԝнед хоф нәдьдит. Хенщи ԝе йәке мьн алт кьр әԝ һәсте хԝәбеԛимәткьрьне, кʹижан кӧ бьчʹуктайеда жь бо нәхԝандибун у бәрхԝәкʹәтьне щәм мьн пешда һатьбу.

 Жьна мьнә гәләк баш һәйә, кʹижан кӧ зәʹф Йаһоԝа һʹьз дькә у пьштгьрийа мьн дькә. Ньһа әз тʹәшкиләта Шәʹдед Йаһоԝада ча бәрпьрсийаре мьһале хьзмәт дькьм. Әз сәрледана щьвата дькьм, сәва кӧ ԝана ԛәԝи кьм у малбәта хԝәйә рʹӧһʹани һин кьм. Бь сайа ԛәԝата Кʹьтеба Пироз у һинбуна кӧ Хԝәде дьдә, әз ида жь хԝә шәрм накьм.