Кʹьтеба Пироз дьдә кʹьфше, ԝәки әв тьштәкә нормал ә чахе мәрьв хԝә һʹьз дькә, ле гәрәке фәсал бьн, кӧ ве йәкеда ортʹа зерʹин бьвиньн. Һʹьзкьрьна ви щурʹәйи те һʹәсабе дәрһәԛа хԝә хәм бькьн, ԛәдьре хԝә бьзаньбьн у хԝә лайиԛ бьгьрьн (Мәтта 10:31). Кʹьтеба Пироз али мә дькә ньһерʹандьна рʹаст сәр хԝә хԝәйи кьн.

Бәри пешьн әм гәрәке кʹе һʹьз бькьн?

1. Һʹьзкьрьна һьндава Хԝәде гәрәке дьле мәда щийе пешьн бьгьрә. Кʹьтеба Пирозда мәрʹа тʹәмийа сәрәкә һатийә дайине: «Хӧдан Хԝәдейе хԝә һʹьз бькә, бь тʹәмамийа дьле хԝә» (Марԛос 12:28-30; Ԛануна Дӧщари 6:5).

2. Тʹәмийа дӧда жи әв ә: «Һәвале хԝә ԝәкә хԝә һʹьз бькә» (Марԛос 12:31; Ԛануна Кʹаһинтийе 19:18).

3. Кʹьтеба Пирозда тʹәмикә ӧса тʹӧнә кӧ дьбежә, хԝә һʹьз бькә. Ле жь ве тʹәмийа кӧ дьбежә, ԝәки «һәвале хԝә ԝәкә хԝә һʹьз бькә», те кʹьфше, ԝәки әм гәрәке хԝә жи һʹьз бькьн у ԛәдьре хԝә бьзаньбьн.

Иса бәри пешьн кʹе һʹьз дькьр?

Иса пе жийина хԝә да кʹьфше, кӧ чь щурʹәйи Хԝәде, һәвала у хԝә һʹьз бькьн. Әԝи шагьртед хԝә һелан дькьр чʹәʹв бьдьнә ԝи (Йуһʹәнна 13:34, 35).

1. Иса һʹәмуйа зәʹфтьр Баве хԝә Йаһоԝа һʹьз дькьр. Әԝи әʹмьре хԝә тʹәсмили Баве хԝә кьр, ԝәки ԛьрара ԝи бинә сери. Иса гот: «Бьра дьнйа бьзаньбә ԝәки әз Баве һʹьз дькьм у Баве чаԝа тʹәми ль мьн кьрийә әз ӧса дькьм» (Йуһʹәнна 14:31).

2. Иса мәрьва жи һʹьз дькьр. Әԝ дәрһәԛа һʹалхԝәшийа ԝан дьфькьри у әʹмьре хԝә жи бона ԝан да (Мәтта 20:28).

3. Иса хԝә жи һʹьз дькьр, ле дәрһәԛа хԝә зедә нәдьфькьри. Әԝи ԝәʹдә дьдит, кӧ һеса бә, нан бьхԝә у тʹәви шагьртед хԝә ԝәʹдә дәрбаз дькьр (Марԛос 6:31, 32; Луԛа 5:29; Йуһʹәнна 2:1, 2; 12:2).

Гәло әм зьраре дькʹәвьн, чахе һʹәԝщед кәсед дьн датиньн сәр щийе пешьн?

На, чьмки әм дьлԛе Хԝәдеда һатьнә әʹфьрандьне, йе кӧ бь мәрʹдани һʹьзкьрьне дьдә кʹьфше (Дәстпебун 1:27; 1 Йуһʹәнна 4:8). Әв те һʹәсабе, ԝәки әʹйанкьрьна һʹьзкьрьне, әв пʹара жийина мә йә. Һәмьки, фәрз ә кӧ әм хԝә һʹьз бькьн, ле әме дьһа бәхтәԝар бьн, һәрге һәр кәси зәʹфтьр Хԝәде һʹьз бькьн у ԛәнщийе мәрьварʹа бькьн. Кʹьтеба Пирозда те готьне: «Хԝәзи ль дайийа, нә кӧ ль стандийа» (Кʹаред Шандийа 20:35).

Һьнәк дьфькьрьн, кӧ мәрьв һьнге бәхтәԝар ә, гава һʹәчʹи зәʹф дәрһәԛа хԝә дьфькьрә. Бона мәрьвед ӧса, хәбәред «һәвале хԝә һʹьз бькә», һатийә гӧһастьне сәр хәбәред «хԝә һʹьз бькә». Ле сәр һʹиме леколинед ԝан пашԝәхтийа, дьһа сьһʹәт-ԛәԝат у бәхтәԝар ьн әԝ мәрьв, йед кӧ ве тʹәмийа Кʹьтеба Пироз тиньн сери: «Нәбә кӧ йәк кʹара хԝә бьгәрʹә, ле йа һәвале хԝә» (1 Корьнтʹи 10:24).