Мәʹни #1: Чахе аликʹарийе дьди, баԝәр бә тӧйе жи аликʹарийе бьстини!

 Мәрьв мәрʹданийа тә бьвиньн у ԝе һьндава тәда мәрʹданийе бьдьнә кʹьфше. Кʹьтеба Пирозда дәрһәԛа ве йәке ӧса те готьне:

•  «Бьдьн, ԝәрʹа ԝе бе дайине. . . . Чьмки бь чь чапе һун бьпивьн, бь ԝе жи ԝәрʹа ԝе бе пиване» (Луԛа 6:38).

•  «Тӧ һьндава мәрьвада ча би, һьндава тәда жи ԝе ӧса бьн (Луԛа 6:38, Ԝәлгәрʹандьна Модерн йа Инглизи).

 Мәʹни #2: Чахе аликʹарийе дьди, бәри әʹԝльн тӧ али хԝә дьки!

 Гава тӧ бона мәрьва тьштәки баш дьки, тӧ дәстпедьки дьһа ԛәдьре хԝә бьгьри у жь дайине ләзәте дьстини. Кʹьтеба Пирозда дәрһәԛа ве йәке ӧса те готьне:

•  «Хԝәзи ль дайийа, нә кӧ ль стандийа» (Кʹаред Шандийа 20:35).

•  «Ле гава тӧ хԝарьнәке датини, гази фәԛир, сәԛәт, йед дькӧльн у кора кә. Һьнге те хԝәзьли би, чьмки әԝана нькарьн ԛәнщийа тә ль тә вәгәрʹиньн» (Луԛа 14:13, 14).

 Щаһьлед кӧ бона мәрьва хәм дькьн, һʹәму дәра һәнә! Ԝәрен әм дәрһәԛа чәнд мәсәла хәбәр дьн.

 «Чахе щарна әз дьхԝазьм рʹунем у телевизийоне бьньһерʹьм, әз бона де-баве хԝә дьфькьрьм, кӧ ԝе чьԛас вәстийайи бьн гава жь хәбате бен. Һьнге әз рʹадьбьм дьчьм фьраԛа дьшом, пе мәкʹинәйа тʹозһьлдане тʹозе һьлдьдьм у мале дьдьмә һәв. Әз ӧса жи ԛаԝәйе һазьр дькьм бона де-баве хԝә, чьмки әԝана гәләк һʹьз дькьн. Чахе дийа мьн дькʹәвә мале, әԝ дьбежә: Мал ча тʹәмьз ә! У бинәкә ча хԝәш те. Зәʹф рʹази мә ԛиза мьнә ширьн!» Әз һәртʹьм гәләк ша дьбьм, чахе бона де-баве хԝә тьштәки дькьм».—Кейси.

 «Де-баве мьн һәргав пьштгьрийа мьн дькьн у хәм дькьн, ԝәки һʹәму тьштед мьн һәбьн, чьда кӧ әз һʹәԝщә мә. Ләма жи чахе пар проблема ԝанә әʹрәбева гьредайи һәбу, мьн хәрще чекьрьна әʹрәбе һьлда сәр хԝә. Рʹаст ә әв епʹещә пʹәрә бу жь пʹәред мьнә тʹопкьри у ԝана нәдьхԝәст һьлдьн, ле мьн зоре да ԝан. Де-баве мьн һежайи һе зедә тьшт ьн. Әз гәләк дьлша бум, кӧ мьн карьбу тьштәкида али ԝан бькьм».—Һоли.

 Ԝә заньбу? Гәләк щаһьларʹа, йед кӧ Шәʹдед Йаһоԝа нә, хԝәш те кӧ әԝана дькарьн али мәрийа бькьн у Кʹьтеба Пироз ԝана һин кьн. Һьнәк жи дәрбази ԝәлатед дьн бунә, кʹидәре һʹәԝщәтийа мьзгинвана һәйә.

 «Әз жь Дәԝләтед Йәкбуйи дәрбази Мәксикайе бум, сәва кӧ али мәрийа бькьм, кӧ Кʹьтеба Пироз һин бьн. Щарна бона мьн чәтьн ә мәрʹд бьм, чьмки пʹәрә у тьштед мьн һьндьк ьн, ләма жи нькарьм пʹешкʹеши кәсәки бькьм. Ле мьн дит, ԝәки гава әз хьзмәт дькьм, демәк ԝәʹдә у ԛәԝата хԝә бона мәрьва хәрщ дькьм, әв йәк дьһа те ԛимәткьрьне, нә кӧ тьштед материйали».—Еван.

 Тӧ дьхԝази тʹәхмин ки әԝе шабуне кӧ жь дайине те? Жере чәнд мәсәлә һатьнә дайине.

 Тӧ ча дькари али малбәта хԝә бьки:

•  Бь мәкʹинайа тʹозһьлдане тʹозе һьлдә, фьраԛа бьшо, мале бьдә һәв, һивийе нибә һʹәта тәрʹа бежьн

•  Хԝарьне һазьр кә

•  Де-баве хԝәрʹа нәʹмәкә бьчʹук бьньвисә дәрһәԛа ԝе йәке, кӧ тӧ чьԛас ԝана ԛимәт дьки

•  Али хушк йан бьре хԝә бькә, ԝәки дәрсед хԝә бькьн

 Тӧ ча дькари али мәрьвед дьн бьки:

•  Нәʹмәкә бьчʹук бьньвиси ԝи кәсирʹа, кʹижан кӧ нәхԝәш ә

•  Шьхӧле маледа али щинаре хԝәйи әʹмьрда мәзьн бькә

•  Сәрики кәсәки хә, йе кӧ нькарә жь мал дәре

•  Пʹешкʹешәке бьдә мәрьвәки, йе кӧ чәтьнайеда нә

 Ширәт: Бьфькьрә һәла диса чьда тӧ дькари али мәрьва бьки. Паше нете дайнә пешийа хԝә, сәва кӧ ве һʹәфтийе һәма али мәрьвәки бьки. Дьбә кӧ тӧ әʹщебмайи бьмини, кӧ әв йәк ԝе шабунәкә чьԛас мәзьн тәрʹа бинә!

 «Чахе али мәрийа дьки, дьһа бәхтәԝар дьби. Тӧ бь рʹасти хԝә ӧса тʹәхмин дьки, кӧ гьһишти тьштәки у дьвини кӧ мәрьв ча ве йәке ԛимәт дькьн. Аликʹарийе бьди мәрьва, шабунәкә ӧса дькарә тәрʹа бинә, чь кӧ дьбәкә тӧ һивийе нибуйи. Дьбәкә һәла һе жи тӧ тʹәхмин наки, ԝәки тә тьштәк ԛӧрбан кьрийә, чьмки дәԝсе тә гәләк тьшт ԛазанч кьрьнә».—Алана.