Karên Şandiya 17:1-34
17 Pawlos û Sîlas nav Emfîpolîs û Apolonyayêra derbaz bûn û gihîştine Têsalonîkê. Wêderê kinîşteke* Cihûya hebû.
2 Pawlos ça her gav kete kinîştê. Ewî sê rojên Şemiyê* ji Nivîsarên Pîroz tevî wan şêwir dikir.
3 Ewî bi saya van nivîsara îzbat dikir û şirovedikir ku gerekê Mesîh cefa bikişanda, û ji mirinê bihata rakirinê. Ewî usa digot: “Ev Îsa derheqa kîjanî ez wera elam dikim, Mesîh e”.
4 Axiriyêda, hinek ji wan bûne bawermend û tevî Pawlos û Sîlas bûne yek. Usa jî gelek Yûnanên ku Xwedê dihebandin û gelek jinên nav û deng jî bûne bawermend.
5 Lê Cihûya ji hevsûdiyê merivên xirab, yên ku meydanêda bêşixul diçûn-dihatin, top kirin û bajar tevlihev kirin. Wana hicûmî ser mala Yason kir û Pawlos û Sîlas digeriyan, ku wana derxin ber cimetê.
6 Lê gava ewana nedîtin, Yason û çend bira kişandine ber serokên bajêr. Wana bi dengekî bilind got: “Ev merivên ku dinya tevlihev kirine, hatine vira jî,
7 û Yason ewana qebûl kirine mala xwe. Ev hemû meriv miqabilî qanûnên Qeyser radibin û dibêjin, ku padşakî din heye û navê wî Îsa ye”.
8 Gava xelqê û serokên bajêr ev yek bihîstin, tirs kete dilê wan.
9 Û çaxê wana ji Yason û bira kefîl* standin, paşê ewana berdan.
10 Hema wê şevê, bira Pawlos û Sîlas şandine Beroyayê. Gava ewana gihîştine wêderê, çûne kinîşta Cihûya.
11 Cimeta Beroyayê hînbûnêda ji cimeta Têsalonîkê zêdetir xîret bûn. Wana xebera Xwedê bi dil û can qebûl kir û Nivîsarên Pîroz her roj rind lêkolîn dikirin, wekî bivînin hela tiştên ku ewana dibihên rast in, yan na.
12 Lema gelek ji wan bûne bawermend, û nav wanda gelek kulfet û mêrên Yûnanî yên xweyîqedir jî hebûn.
13 Lê gava Cihûyên Têsalonîkê pêhesiyan ku Pawlos Beroyayêda jî xebera Xwedê bela dike, ewana hatine wêderê û cimet miqabilî wan rakirin.
14 Hingê bira derbêra Pawlos şandine ber berê, lê Sîlas û Tîmotêyo wêderê man.
15 Birên ku Pawlos verêdikirin heta Atînayê çûn. Çaxê Pawlos temî da wan, wekî Sîlas û Tîmotêyo zû bêne cem wî, paşî vê yekê ewana vegeriyan.
16 Çaxê Pawlos Atînayêda hîviya wan bû û dît ku bajar bi pûta tije ye, ew eciz bû.
17 Hingê ewî destpêkir kinîştêda tevî Cihûya û merivên din, yên ku Xwedê dihebandin, şêwir ke. Usa jî ewî her roj bazarêda tevî wan meriva xeber dida, yên ku rastî wî dihatin.
18 Lê hine fîlosofên Êpîkûrî û Stoyxî tevî Pawlos ketine dewê. Hineka ji wan digotin: “Ev merivê ku dike bile-bil çi dixwaze bêje?” Hinekên din jî usa digotin: “Tê kifşê ku ew derheqa xudanên xerîb gilî dike”. Wana usa got, çimkî Pawlos mizgîniya derheqa Îsa û rabûna miriya bela dikir.
19 Wana ew anî Dîwana Bilind ya Atînayê* û gotin: “Dikarî mera bêjî ev hînkirina teze, derheqa kîjanî tu xeber didî, çi ye?
20 Çimkî tu tiştên usa dibêjî, çi ku bona guhên me xerîb in. Lema em dixwazin bizanibin ew tişt çi têne hesabê”.
21 Hemû merivên Atînayî û xerîbên ku wêderê diman, wedê xweye aza ser vê yekê xerc dikirin, ku guh didane tiştên teze û derheqa wan tişta xeber didan.
22 Hingê Pawlos nava Dîwana Bilind ya Atînayêda sekinî û got:
“Gelî Atînaya! Her tiştîda tê kifşê, wekî hûn ji merivên din zêdetir xudana ditirsin.
23 Mesele, gava ez bajêrda digeriyam, min rind dîna xwe dida tiştên ku hûn dihebînin, û min qurbangehek dît, ser kîjanî usa nivîsar e: ‘Xwedêkî Nenasra’. Lema jî ez dixwazim wî Xwedayê ku hûn nas nakin, lê dihebînin, wera bidime naskirinê.
24 Ev Xwedayê ku dinya û hemû tiştên wêda çêkirine, Xudanê erd û ezmên e, û ew paristgehada, yên ku bi destên mêriv hatine çêkirinê, najî.
25 Û ew hewce nîne ku meriv alî wî bikin, çimkî ew xwexa jîyînê, bînkişandinê û her tiştî dide hemû meriva.
26 Xwedê ji merivekî hemû milet çêkirin, wekî ewana temamiya rûyê erdê tije kin. Ewî wext kifş kirin û sînor danîn bona ciyê ku meriv bijîn.
27 Ewî usa kir, wekî ewana bi xîret Xwedê bigerin û wî bivînin, çimkî ew nêzîkî me her yekî ye.
28 Bi saya Xwedê em dijîn, dimeşin û hene. Hela hê hine nivîskarên* we jî gotine: ‘Em jî zarên wî ne’.
29 Û hergê em zarên Xwedê ne, em gerekê nefikirin ku Xwedê mîna zêr, yan zîv yan jî kevir e, tiştekî ku bi hiş û hostatiya meriva hatiye çêkirinê.
30 Rast e, berê Xwedê çevê xwe dadida ser nezanebûna usa, lê ew niha merivên hemû derara dibêje, ku ewana gerekê tobe kin.
31 Çimkî ewî rojek kifş kiriye, wekî bi destê merivekî ku ewî bijartiye, bi heqî dîwana temamiya dinyayê bike. Û gava Xwedê ew ji mirinê rakir, hemû merivara îzbat kir ku ev roj wê bê”.
32 Gava wana derheqa rabûna miriya bihîst, ji wan hinek pê keniyan, lê kesên din usa gotin: “Derheqa vê yekê em dixwazin careke din jî guh bidine te”.
33 Hingê Pawlos ji wêderê çû,
34 û hine meriva xwe li wî girtin û bûne bawermend. Nav wanda bûn Diyonîsyo, hakimekî Dîwana Bilind ya Atînayê, kulfeteke bi navê Damerîs û usa jî kesên din.
Спартьн
^ Yan “sînagog”, dêmek ciyê hebandina Cihûya.
^ Ev roj bona Cihûya roja rihetiyê bû.
^ Perê ku tê dayînê wekî girtiya aza kin.
^ Raste-rast “Aryopago”.
^ Raste-rast “şayîr”.
