Job 26:1-14
26 Na Job el fahk,
2 “Ku pwaye kutu kasru uh—
Nga sukasrup ac munas, a kom fahk ma ingan!
3 Saok kas in kasru na wowo
Ac luti lalmwetmet lom an nu sin mwet lalfon se nga uh!
4 Kom nunku mu su ac lohng kas lom ingan?
Su pirikkomyak kom in kaskas ouingan uh?”
[Bildad]
5 “Ngunin mwet misa uh
Rarrar in kof ye faclu.
6 Facl sin mwet misa uh ikakelik oan ye mutun God;
Ac wangin mwe afyuf kosrala ma inge liki ye mutal.
7 God El asroelik acn engyeng in epang,
Ac srupusrak faclu yen wangin ma oan we.
8 God pa nwakla pukunyeng uh ke kof,
Ac liyaung in tia fokelik ke toasriya uh.
9 El sang sie pukunyeng kosrala malem uh ke fong in Mwesr.
10 El filiya pekusra uh raunela faclu
In sraclik kalem liki lohsr uh.
11 Ke el kai sru ma loango acn lucng,
Sru uh ac kusrusryak ac rarrar ke sangeng.
12 Ku lal uh pa kutangla meoa uh;
Ac ke usrnguk lal El kunausla Rahab—ma sulallal soko ma muta inkof uh.*
13 Momong lal uh pa oru acn engyeng uh in kalem,
Ac paol pa uniya kosro sulallal su srike in kaingla uh.*
14 Tusruktu ma inge akkalemye kutu srisrik na kuiyal,
Mahma na lal uh pa kut lohng inge.
Su ku in etu lupan fulat ac ku lun God uh?”
