Ke lutlut Bible lom orekmakihnyen puk se inge, oasr ma pucspucs kom lotwelah kacl Jeova. Ac ke srihpen ma kom lotwelah inge, kom ahkkahlwemye luhngse lom nuh sel ac sahp kom wuhlelah pac moul lom nuh sel ac eis bacptais. Kom fin soenna oruh, sahp kom nuhnkuh in oruh ma inge ke pacl na fototo fahsruh. Tuhsruhktuh tukun kom bacptaislac, kom enenuh in kwacfeacng in ahkfototoye kom nuh sin Jeova. Ahok, kom kuh in oruh ma inge ke lusen moul lom. Fuhkah?

1. Efuh kom in tahfwelah in ahkkweye ohiyen kawuck lom nuh sin Jeova?

Kuht enenuh in ahkkweye ohiyen kawuck lasr nuh sin Jeova ke kuhiyacsr kewa. Efuh? Tuh kuht ac fah tiac “forlah liki God moul.” (Hebrew 3:12) Meac kuh in kahsre kuht in tahfwelah in oaru in kuhlwacnsap nuh sin Jeova? Kuht in ahkkahfofoye kuht nuhke orekma in fahkwack pweng wo ac suk inkacnek tuh kuht in moniyuck in kuhlwacnsap nuh sin God lasr liki na meet ah. (Riti Philippi 3:16.) Orekma in kuhlwacnsap nuh sin Jeova pa ma wo emeet ma kuht in oruh ke moul lasr uh!​—Psalm 84:10.

2. Meac pac sahyac kom enenuh in tahfwelah na oruh?

Finne ac sahflah lutlut lom ke puk se inge, moul lom oacna sie mwet Christian ac fah tuhtahflah na. Bible uh fahk lah kuht enenuh in “nokomacng mwet sasuc.” (Ephesus 4:23, 24) Ke kom tahfwelah na lutlutkihn Kahs luhn God ac wi ke toeni luhn congregation, kom ac fah lotwelah ma sasuc kacl Jeova ac ke ohiyac wowo lal. Kwacfeacng in etahi pacl nuhkewa ohiyac wowo lal. Ac tahfwelah na in oruh ma eklac ke moul lom in ahkenganye Jeova.

3. Jeova el ac kahsre kom fuhkah in kapkapwack?

Bible uh fahk: “God, . . . El ac fah ahkwoyekowoslac, ac ahkkweye kowos tuh kowos in tu na kuh.” (1 Peter 5:10) Kuht nuhkewa kuh in srifweyuck in oruh ma tiac wo. Tuhsruhktuh, Jeova el acse ma kuht enenuh in lain mwe srifwe. (Psalm 139:23, 24) El wuhlelah lah el ac acse nuh sesr “kuh ac engan in ahkos ma luhngse lal.”​—Riti Philippi 2:13.

 AHKYOHKYE LUTLUT LOM

4. Sramsram pacl nuhkewa nuh sin Kawuck wo emeet lom

Puhruhe ac lutlut Bible kahsre kom in eklac mwet kawuck luhn Jeova. Orekma inge kuh in kahsre kom fuhkah in ahkfototoye kom nuh sel liki na meet ah?

Riti Psalm 62:8, ac tohkohyang sramsramkihn kihsen siyuck se inge:

• In ahkkweye fototo lom nuh sin Jeova, kom ac ahkwoye fuhkah puhruhe lom ac ma kom fahk nuh sel?

Riti Psalm 119:97, ac tohkohyang sramsramkihn kihsen siyuck se inge:

• In ahkkweye fototo lom nuh sin Jeova, ma wo fuhkah kom enenuh in oruh ke kom riti Bible?

Meac kom kuh in oruh tuh kom in eis na pwacye ma wo ke lutlut sifacna lom ke Bible? In kahsre kom kac, liye VIDEO se, ac tohkohyang sramsramkihn kihsen siyuck inge.

• Kahs in kahsruh fuhkah ke video sac kom luhngse in orekmakihn?

• Sifac fuhkah kom luhngse in lutlutkihn?

 MA KUHT LOTWELAH

Tahfwelah na in ahkkweye fototo lom nuh sin Jeova ac oakiyac finsrak na wowo ke kuhlwacnsap lom nuh sel. Kom fin oruh ma inge, kom kuh in engankihn moul nwe tok ma pahtpaht!

Kalweni

• Efuh kom luhlahlfongi muh Jeova elac kahsre kom in oaru in kuhlwacnsap nuh sel?

• Kom ac ahkkweye fuhkah fototo lom nuh sin Jeova?

• Finsrak wo ke kuhlwacnsap lom nuh sin Jeova kuh in kahsre kom fuhkah in fototo nuh sel liki na meet ah?