Nuhnkuh ke mwe luhmahlah se inge: Ke pacl se Julia el ngwetacng nuhke selnguhn sac, ma el liye ah pa el arlac yohkwelihk. El fahk nuh sel sifacna: “Nga enenuh in sislah kuhtuh paun luhk uh.” Finne pahpah ac ninac kiyacl uh kuh kawuck lal uh fahk nuh sel muh el arlac “srikolo.”

Tiac paht tohkoh, Julia el nuhnkuh muh el enenuh na pwacye in srilac finne “paun limekohsr na.” Ma el enenuh in oruh uh pa in ahksrihkyelah na ma el kang uh ke lusen na lwen ekahsr . . .

Kom fin puhla pac oacna Julia, meac kom ac oruh?

Tiac ma kuluk se kom fin nuhnkuh ke lomom kuh atom. Ke ma pwacye uh, Bible uh kaksakihn atacn kuhtuh sin mukul ac muhtwacn oacna Sarah, Rachel, Abigail, Joseph, ac David. Bible uh fahk lah oasr muhtwacn se pahngpahng Abishag el “arlacna oaskuh.”—Sie Tokosra 1:4.

Tuhsruhktuh, puhs sin mwet fuhsr arlacna nuhnkuh yohk ke atacltahl. Ma ingacn ac kuh in kol nuhke ma upac yohk. Nuhnkuh:

• Ke sie lutlut ma orek, oasr percent 58 ke tuhlihk muhtwacn suc fahk muh eltahl arlacna fact, tuhsruhktuh ke pwacyeiyac uh, oasr na ke percent 17.

• Ke sie pac lutlut ma orek, oasr ke percent 45 ke muhtwacn suc ma srikolo, a eltahl nuhnkuh muh eltahl arlacna toasr.

• Ke srihpen eltahl luhngse na pwacye in srilac, pwacnacng kuhtuh mwet fuhsr inge sun mas se inge pahngpahng anorexia, sie kain in mas ma tuhkuh ke srihpen sruhngwaclah mongo, pwacnacng arlac sensen nuhke moul laltahl uh.

 Kom fin puhla muh oasr yurum mas se inge anorexia kuh kuhtwena ohiyac ma oruh in upac nuh sum in mongo, kom enenuh in suk kahsruh. Fahk nuh sin pahpah kuh ninac kiyom an, kuh sie sin mwet suc kom luhlahlfongi an. Bible uh fahk: “Sie mwet kawuck el luhngse pacl e nuhkewa; ac sie mwet lili el isuslac tuh lan mwet kahsruh in pacl in ongaiyac.”—Soakas 17:17, BMK.

Inse pwacye luhn sie mwet pa ahkkahlwemye lah el kahto kuh tiac. Nuhnkuh ke wen se nahtuhl Tohkohsrah David suc pahngpahng Absalom. Bible uh fahk:

“Wacngihn sie mwet pwengpweng ke oaskuh lal. . . . Wacngihnna kuhtuh ma kuluk ke mahnol.”—Luo Samuel 14:25.

Tuhsruhktuh, mukul fuhsr se inge el arlacna inse fuhlwact, rahpkuh, ac kuhtasrihk! Pwacnacng, Bible uh tiac ahkkahlwemye ohiyac wo lal Absalom, a ma inge ahkkahlwemye lah el oacna sie mwet suc wacngihn mwekihn la, tiac oaru, ac mwet na ahkmas se suc insiacl nwacnwaclah ke sruhnga.

Oasr srihpac wowo ma oruh Bible uh use nuh sesr kahs in kahsruh se inge:

“Kowos moulkihn sie moul sasuc.”—Colossae 3:10.

“Kowos in tiac orekmakihn mwe yucn ma liyeyuck lihk tuh in ahkkahtoye kowos . . . , a kahto lowos uh in tuhkuh liki nuhnak pwacye luhn insiowos.”—Sie Peter 3:3, 4.

Finne wacngihn ma kuluk kac kom fin luhngse in kahto, ma se ma yohk srihpac emeet an pa ohiyac lom an liki na atom. Tok kuhtuh, mwet sahyac uh ac kaksakihn kom tiac ke mahno fokoko kuh atac kahto lom an, a ke ohiyac wowo lom an! Phylicia el fahk: “Fihsracsr in kaksakihn sie mwet ke kahto lal, tuhsruhktuh inse pwacye lom ac ohiyac wowo lom an pa mwet uh ac esam kom kac uh.”

Yac kom kwacna suhpwacr ke atacn ngwetngwet lom an?

Yac nuh oasr pacl kom nuhnkuh in ahkwoye atom ke inkacnek luhn cosmetic surgery kuh in oraclah oakwuck ke diet tuh in ahkwoyelah atom?

Meac kom ac luhngse in ekuhllah ke atom kom fin ac kuh? (Sulaclah top lom an.)

• MOTOM

• INFWEM

• AUNSIFOM

• MONUM

• INYEM

• TUHNIN MONUM

Kom fin topuk muh ahok nuhke kihsen siyuck luo meet an, ac kom sulaclah tolu kuh puhs liki ye kihsen siyuck ahk tolu, nuhnkuh ke ma se inge: Sahp, tiac pa inge liye kuh nuhnak luhn mwet sahyac nuh sum uh in oacna ke kom nuhnkuh uh. Arlac fihsracsr in nuhnkuh yohk ac elyah ke atom muh oasr na pwacye ma tiac wo kac.—Sie Samuel 16:7.