KIHSEN SIYUCK 3
Nga ac Sramsram Fuhkah nuh sin Pahpah ac Ninac Kiyuck uh?
MEAC KOM KUH IN ORUH?
Nuhnkuh ke mwe luhmahlah se inge: Ke tahfuhn lwen tok ke Wednesday, Geoff suc matwacl oasr ke yac 17 el tari ke orekma lal ah ac el ahkolah in eis pacl in monglac lal. El ohniyac TV ac, na el muhta ke siah se ma el luhngse in muhta kac ke pacl nuhkewa.
Ke pacl se ingacn, pahpah tuhmwacl ah tuhkuh ac el tiac na engan ke ma el liye ah.
“Geoffrey! Efuh kuh kom sislah pacl lom in liyeyuck TV ke kom enenuh in kahsruh tuhlihk mukul srihsrihk se wiyom ingacn ke homework lal an? Kom tiac oruh ma kuht fahk nuh sum uh!”
Geoff el mahmah fahk, “Kuht muhti ke lohngyac,” tuhsruhktuh kuh in lohngyuck.
Pahpah tuhmwacl ah kihluckyang nuh yohrohl. “Meac se kom fahk ah?”
“Wacngihn,” Geoff el fahk ac ke pacl se pacna ingacn, el sroasrolack.
Ingena, pahpah tuhmwacl ah arlacna kasrkuhsrak. “Nikmet oruh puhsrem ohingacn nuh sihk!” el fahk ke puhsra upac.
Fin kom pa Geoff, kom ac oruh fuhkah in fahsr liki ma sikyak inge?
TUI AC NUHNKUH MEET!
Ke kom sramsram nuh sin pahpah ac ninac kiyom an, ac oacna ke kom kahsruhsrkihn soko sitosah. Fin oasr ma kosraclah inkacnek lom an, kom kuh in suk ac kahsruhsr ke soko pacna inkacnek sahyac.
SIE MWE PUHPUHLYUCK:
Sie tuhlihk muhtwacn fuhsr pahngpahng Leah el fahk, “Arlac upac nuh sihk in sramsram nuh sin pahpah tuhmuhk uh. Kuhtuh pacl uh nga ac sramsram nuh sel ke lusen pacl se, na el ac fahk, ‘Sislah kuluk, yac kom sramsram nuh sihk?’”
OASR INKACNEK TOLU MA LEAH EL KUH IN ORUH.
-
Wowoyak ac muhlat nuh sin pahpah tuhmwacl an.
Leah el wowoyak ac fahk, “Lohng! Ma se inge yohk srihpac!”
-
Tui tilac sramsram nuh sin pahpah tuhmwacl an.
Leah el tui in fahk nuh sin pahpah tuhmwacl an ke ma upac lal uh.
-
Soano pacl fal, ac sifwilpac sramsram.
Leah el sifwilpac sramsram nuh sin pahpah tuhmwacl ah tohkoh, kuh el ac suhmuhslah sie lwacta ah nuh sel in sruhmuhn ke ma upac lal uh.
Piyac kac inkacnek se ma kom nuhnkuh muh ac wo Leah elan orekmakihn uh?
NUHNKUH AHKWOYAC: Puhs ma pahpah tuhmwacl ah nuhnkuh kac, pwacnacng el tiac lohacng nuh sel. Fin pa Leah el Sulaclah ma se meet an, pahpah tuhmwacl an ac tiac kahlwem ke wowoyak ac muhlat lal ingacn. Sahp, ohiyac se inge ac tiac kuh in kahsruh pahpah tuhmwacl an in lohacng nuhke ma el ac fahk an. Oacyacpac, el tiac ahkkahlwemye suhnak nuh sin pahpah tuhmwacl an. (Ephesus 6:2). Ke ma pwacye uh, wacngihn ma wo ac tuhkuh kac.
In oacna ke kom ac suk inkacnek sahyac, kom ac kuh in konwacack inkacnek in sramsram nuh sin pahpah ac ninac kiyom an
Sulaclah se ahkluo an sahp ac fihsracsr nuh sel in oruh, tuhsruhktuh ac tiac pac wo in oruh. Efuh? Mweyen, in ahkfahsryelah in wo mwe elyah lal ingacn, Leah el enenuh in sramsram nuh sin pahpah tuhmwacl an, ac pahpah tuhmwacl an fin luhngse in kahsrel, el enenuh in etuh lah meac na pwacye sikyak ke moul lal Leah an. Wacngihn pac ma wo ac tuhkuh kac.
Sulaclah se ahktolu an pa Leah el tiac na lwelah kuhtwena ma upac in tulokihnyac kwacfeacng lal in sramsram nuh sin pahpah tuhmwacl an. A, el srihke in sifwilpac sramsram nuh sin pahpah tuhmwacl an ke ma upac lal ingacn ke kuhtuh pacl tok. Ac el fin sulaclah in sihm lwacta nuh sin pahpah tuhmwacl an, puhlakihn lal an ac wolac ke pacl se ingacn.
Ke el suhmuhslah lwacta se inge, ma se ingacn ac oacyacpac kahsrel in ahkkahlwemye na pwacye ke ma nuhkewa ma el luhngse in fahk. Ke pacl se el riti lwacta sac, pahpah tuhmwacl an ac kuh in etuh ke ma upac lal ingacn ac kahlwem kac. Sulaclah se ahktolu an wo nuh seltahl kewa. Lah eltahl ac angwetacni sramsram kuh ke puhsren lwacta, sulaclah se inge ukwe kahs in kahsruh in Bible ma fahk muh “lwelah kuht in fahsr tukun ma oraclah mislac.”—Rome 14:19.
Meac pac kuhtuh sulaclah ma Leah el kuh in oruh?
Liye lah kom ac kuh in nuhnkwacack ke sie. Na tohkoh, nuhnkuh lah meac ac kuh in sikyak ke sulaclah se lom ingacn.
NUHNKWACLAH IN WO MEET LIKI KAHSKAHS
Esam lah ma kom fahk uh ac ma pahpah ac ninac kiyom an nuhnkuh kac uh tiac oacna sie pacl nuhkewa.
SIE MWE PUHPUHLYUCK:
Pahpah ac ninac kiyom an siyuck sum lah efuh oacna kom in tiac na pwacr. Kom ac fahk: “Nga tiac na ke sramsramkihn.”
Tuhsruhktuh, pahpah ac ninac kiyom an ac kuh in nuhnkuh ohinge: “Nga tiac na luhlahlfongi komtacl. Nga ac tiac ke sramsramkihn nuh sumtacl kac, a kawuck luhk uh pa nga ac sramsramkihn ma upac luhk uh nuh se uh.”
Srihke petsacelah ke nuhnak lom an muh oasr ma na upac se sikyak nuh sum ac pahpah ac ninac kiyom an luhngse in kahsre kom. Tuhsruhktuh, kom fahk: “Nikmet elyah, nga kuh in sifacna karihngihn.”
-
Meac pahpah ac ninac kiyom an ac kuh in nuhnkuh?
-
Top wo fuhkah se ma kom ac kuh in fahk?
