KIHSEN SIYUCK 1
Suc Nga uh?
MEAC KOM KUH IN ORUH?
Nuhnkuh ke mwe luhmahlah se inge: Karen el tuhfahna utyak nuhke party se ac tiac sun minit singucul tohkoh na, el lohng sie puhsra tohkohl me.
“Efuh kuh kom tu na insacn?”
Karen el tahpuhllac ac liyaclwack Jessica el tu sruok suhfah in nihmnihm lukoac. Jessica el kohlwacng suhfah in nihmnihm soko nuh ye muhtahl Karen ac fahk: “Eis, fal kom in engankihn, tiac tuhlihk srihsrihk se pa kom.”
Karen el tiac ke eis, tuhsruhktuh el ac Jessica kawuck. Ac, Karen el tiac luhngse kawuck se lal inge in nuhnkuh muh el boring. Sahyac, Jessica el sie sin tuhlihk muhtwacn wo. Ac el fin nihmnihm, na tiac na ma kuluk se in oruh. Karen el fahk nuh sel sifacna: ‘Mwe nihm se na pa inge. Ma inge tiac oacna ke kom eis ono kuluk uh.’
Kom fin oasr ke ohiyac se lal Karen inge, meac kom ac oruh?
TUI AC NUHNKUH MEET!
In oruh sulaclah wo ke kain in ohiyac se inge, kom enenuh in etuh lah kain in mwet fuhkah se kom an. In etuh lah kain in mwet fuhkah se kom an, kalmackihn nuhke ohiyom ac ma kom luhlahlfongi kac an. Ke srihpen kom etuh keim sifacna, pwacnacng kom pa ac oruh sulaclah lom sifacna ac tiac lwelah mwet sahyac in fahk ma kom in oruh.—Sie Corinth 9:26, 27.
Kom ac oruh fuhkah tuh in oasr yurum ohiyac se inge? Topukyen kihsen siyuck ahkosr tohkohyang inge ac kuh in ahkoekomlac tuh in wo nuh sum.
1 MEAC KUHTUH OHIYAC WO LUHK UH?
In etuh ma kom kuh in oruh ac ohiyac wowo lom an ac fah ahkkweye luhlahlfongi lom keim sifacna.
MWE SRIHKASRAK IN BIBLE: Mwet sap Paul el suhmuhslah: “Sahp nga mwet suhpah in kahskahs se, tuhsruhktuh yohk etuh luhk.” (Luo Corinth 11:6) Ke srihpen Paul el etuh na pwacye ma Suhmuhslah, pwacnacng el kuh in tu na kuh finne mwet sahyac uh laenuhl. El tiac na lwelah kahs tiac wo laltahl inge in ahkmuhnahsye luhlahlfongi lal uh.—Luo Corinth 10:10; 11:5.
TUNI MOUL LOM SIFACNA: Suhmuhslah ten sie talent lom an kuh sie ma ma kom kuh in oruh.
Tukun ma inge, ahkuhtweyac ke sie ohiyac wo lom an. (Ke sie mwe puhpuhlyuck, yac kom nuhnkuh ke mwet sahyac uh? luhngse in sang? fal in luhlahlfongiyuck? sa nuhke pacl?)
2 MEAC KUHTUH MWE MUHNAHS LUHK UH?
In oacna soko sein ma ac kuh in wotlac acn ma muhnahs kac an, ohiyac lom an ac kuh in eklac kuluk kom fin lwelah mwe muhnahs lom an in kihfaslah moul lom an.
MWE SRIHKASRAK IN BIBLE: Paul el etuh mwe muhnahs lal uh. El suhmuhslah: “Insiuck engankihn ma sap luhn God. Tuhsruhktuh nga liye siena kain ma sap pa orekma in monuk, sie ma sap suc lain ma sap suc nuhnak luhk uh ahkkweye. El oruh nga mwet kapihr nuhke ma sap luhn ma kuluk.”—Rome 7:22, 23.
TUNI MOUL LOM SIFACNA: Mwe muhnahs fuhkah ma kom enenuh in lotwelah in karihngihn?
3 MEAC MWE FINSRAK LUHK UH?
Yac kom ac sroacng nuhke taxi soko ac fahk nuh sin mwet se ma us ingacn in kahsruhsr rauni acn se ne ke na lihsr koano an? Orekma na lahlfon se pa ingacn, ac kom sislah mani yohk kac!
Meac kom lotwelah kac? Finsrak lom an ac kuh in kol moul lom, ac karihngihn kom in tiac sislah pacl yohk ke ma wacngihn srihpac. Pwacnacng in oacna ke kahs in puhpuhlyuck, oasr tari oakwuck lom in sun acn se ma kom ac som nuh we ingacn.
MWE SRIHKASRAK IN BIBLE: Paul el suhmuhslah: “Nga kahsruhsr suwohsna in sun sahflahiyac.” (Sie Corinth 9:26) Paul el oakiyac nien sun lal ac moul fal nuh kac, ac el tiac na lwelah kuhtwena ma in sikyak nuh sel.—Philippi 3:12-14.
TUNI MOUL LOM SIFACNA: Suhmuhslah mwe finsrak tolu ma kom luhngse in sun ke yac fahsruh uh.
4 MEAC NGA LUHLAHLFONGI KAC?
Kom fin sulaclah in oruh na ohiyac wo lom ac ke ma kom luhlahlfongi kac an, kom ac oacna soko sahk ma fokoko okah kac ma tu na kuh ke pacl ma oasr pahkah upac
Fin wacngihn luhlahlfongi, ac upac nuh sum in oraclah sulaclah lom an. In oacna sie koet, kom ac ekuhllah ohiyac lom an tuh kom in oacna tuhlihk suc oasr ke matwom. Ma se ingacn sie akucl nuh kac lah kom tiac etuh na pwacye lah kain mwet fuhkah se kom an.
Ke ohiyac se sahyac an, orekma lom an fin fal nuhke ma kom luhlahlfongi an, kom sruokyacna ohiyac wo lom an finne meac mwet sahyac uh oruh.
MWE SRIHKASRAK IN BIBLE: Sahp, mwet pahluh Daniel el srackna fuhsr ke el “sulaclah” muh el ac ahkos masap luhn God, el finne tiac muhta yurin sucu lal ah. (Daniel 1:8) Ke el oruh ohinge, el pwacye nuh sel sifacna. Daniel el moul fal nuhke ma el luhlahlfongi kac uh.
TUNI MOUL LOM SIFACNA: Meac kom luhlahlfongi kac? Ke sie mwe puhpuhlyuck: Yac kom luhlahlfongi ke God? Fin ohingacn, efuh? Meac kuhtuh mwe ahkpwacyeye ma oruh tuh kom in luhlahlfongi muh oasr God?
Yac kom luhlahlfongi lah oakwuck luhn God ke ma wo ac ma kuluk uh ma ac wo nuh sum? Fin ohingacn, efuh?
Ingena, piyac kac ma kom luhngse in oacna uh, yac sra se ma puhtatlac nuh infohk uh ac eng uh okoht okma, kuh sahk soko ma tu na kuh finne oasr pahkah upac? Ahkkweye kom in etuh lah kain in mwet fuhkah se kom an ac kom ac oacna sahk soko ma tu na kuh ah. Ac ma inge ac fah kahsre kom in tohpohklah kihsen siyuck se inge, Suc nga uh?
