Jeova God el oraclah facluh nuh sin mwet nuhkewa. Pa inge acn in muhta lasr. Pwacnacng, siacnyacn se meet, Adam ac Eve eltahl tiac oreklac in muhta ac nwacklah in kuhsrao. Oasr tari lipufacn pucspucs God el oraclah in muhta in kuhsrao. (Job 38:4, 7) God el eis mukul se meet ac fihlilyac ke sie paradise wolacna pahngpahng imac Eden. (Genesis 2:15-17) Jeova el sang nuh sel ac nuh sin tuhlihk nuhkewa nahtuhl finsrak wo in moul ma pahtpaht fin facluh.—Riti Psalm 37:29; 115:16.

Ke muhtwacwack ah, imac Eden muhkwena pa paradise. Sapkihnyuck nuh sin siacnyacn se meet inge in orek tuhlihk ac nwacklah facluh nohfohn. Eltahl ac leumi ac karihngihn facluh nohfohn, ac fah oraclah ma inge nuh ke sie paradise. (Genesis 1:28) Wacngihn pacl se facluh ac fah kuhnanuclac. Pa inge acn in muhta luhn mwet uh nwe tok ma pahtpaht.—Riti Psalm 104:5.

Adam ac Eve eltahl seahkos God, ke ma inge Jeova el luhsuhltahllah liki imac se inge. Paradise wacngihnlac, ac wacngihn kuh luhn mwet in sifwil pac oruh facluh in oacna sie paradise. Bible uh ahkkahlwemye la facluh ituckyang tari “nuh in poun mwet suhlallacl.”—Job 9:24.—Riti Genesis 3:23, 24.

Yac Jeova el fuhleack in ahkpwacyeye oakwuck lal nuh sin mwet uh ke muhtwacwack me? Moh, tiac ouinge. Arlacna yohk kuh lal. El kuh in ahkpwacyeye ma nuhkewa el luhngse. (Isaiah 45:18) El ac ahkpwacyeye oakwuck lal nuh sin mwet uh oacna ke ma el oakiyac in pacl meet ah.—Riti Psalm 37:11, 34.

Facluh ac fah sifwil pac eklac sie Paradise ye kolyuck lal Jesus. Ke mweun suc pahngpahng Armageddon, Jesus el fah kol lipufacn nuhkewa lal in kuhnauslah mwet nuhkewa suc lain God. Tukun ma inge el ac fah fihlilyac Setan ke sie acn oacna acn in  kaclpous ke lusen 1,000 yac. Mwet nuhkewa luhn God ac fah moliyucklac mweyen Jesus el fah koluhltahl ac karuhnguhnuhltahl. Eltahl ac fah engankihn moul ma pahtpaht ke sie Paradise fin facluh.—Riti Fwackyuk 20:1-3; 21:3, 4.

Ngac Jeova el fah ahksahfyelah ma kuluk nuhkewa fin facluh? Jesus el sang “akucl” suc ahkkahlwemye lah sahflah uh apkuhran me. Ke srihpen mwe ongoiye suc sikyak fin facluh ke pacl inge, mwet uh oasr ke mwe sensen yohk. Ma inge ahkkahlwemye lah kuht moul ke “lwen sahflah.”—Riti Matthew 24:3, 7-14, 21, 22.

Ke lusen 1,000 yac ke kolyuck luhn Jesus in kuhsrao, el ac fah ahkwacngihnyelah mwe kweok nuhkewa fin facluh. (Isaiah 9:6, 7; 11:9) Jesus el fah kol oacna sie Tohkohsrah. Sahyen ma inge el fah orekma pac oacna sie Mwet Tol Fuhlwact ac el fah elah ma kuluk luhn mwet nuhkewa suc luhngse God. Ke ma inge, God el ac orekmakuhnuhl Jesus in ahkwacngihnyelah mas, mahtohuh, ac misac.—Riti Isaiah 25:8; 33:24.

Mwet nuhkewa suc ahkos God ac fah muhta ke Paradise. (Sie John 2:17) Jesus el suhpwaclah mwet tuhma lutlut lal in suk mwet puhsisacl ac in lotweltahl lah fuhkah eltahl kuh in ahkinsewowoye God. Mihsenge, Jeova el ahkoo million pucspucs sin mwet eltahl in moul ke Paradise fin facluh ke pacl fahsruh. (Zephaniah 2:3) Ke Lohm in Toeni luhn Mwet Loh luhn Jeova, mwet uh lotelah lah fuhkah eltahl kuh in oacna siyacnyacn wo se ac in pahpah ac ninac wo se. Tuhlihk srihsrihk wi pahpah ac ninac kiyaclos tuhkweni alu nuh sin God, ac eltahl lotelah ohiyac wo suc pweng wo kuh in kahsruh moul in sucu laltahl.—Riti Micah 4:1-4.