God pwacye el oraclah ma nuhkewa. Wacngihn muhtwacwacyel ac fah wacngihn pac sahflahiyacl. (Psalm 90:2) El pa sropon pweng wo suc oasr ke Bible. (Sie Timothy 1:11) Ke srihpen God pa use moul lasr uh, pwacnacng kuht enenuh in alu nuh sel muhkwena.—Riti Fwackyuk 4:11.

Wacngihn sie mwet nuh liye God mweyen el sie Ngun, sie pacna kain in moul suc fuhlwact liki ma oreklac nuhkewa ma moul fin facluh. (John 1:18; 4:24) Ne ouinge, kuht kuh in liye ohiyac wowo luhn God ke ma nuhkewa suc el oraclah. Ke sie mwe puhpuhlyuck, luhngse ac lahlmwetmwet luhn God kuh in liyeyuck ke kain in fukun sahk ac ros nuhkewa ma el oraclah. Kuhsrao ac facluh ahkkahlwemye luhpan kuh lal.—Riti Rome 1:20.

Kuht kuh in etuh na pwacye ke ohiyac wowo luhn God ke pacl se kuht rit Bible. Ke sie mwe pupulyuk, ma inge luti kuht ke ma God el luhngse ac ma el sruhnga. Oacyacpac ke ohiyac suc el ahkkahlwemye nuh sin mwet uh, ac ma el ac tuh fah oruh ke kain in ohiyac ma mwet uh ahkkahlwemye.—Riti Psalm 103:7-10.

Jesus el fahk: “Pahpah, lwelah Ine muhtahl lom in ahkfuhlwactyeyuck.” (Luke 11:2) Finne oasr wal pucspucs luhn God, ine sefanna lal. Ke kais sie kahs, fahkyacn ine se inge tiac oacna sie. Ke kahs Kosrae, fahkyen ine se inge pa “Jeova.”—Riti Psalm 83:18, BMK.

Inen God itucklac liki Bible pucspucs ac aholyucklac nuh ke wal inge, Leum kuh God. Tuhsruhktuh ke pacl se Bible uh sihmihsyucklac, inen God sihmlac apkuhran nuh ke pacl 7,000.  Jesus el fahkwack inen God in etweyuck ke pacl se el luti mwet uh ke God.—Riti John 17:26.

Ke srihpen inkaiyen mwet uh sun mwe kweok, yac kalmacn ma inge pa Jeova God el tiac nuhnkuh kacsr? Kuhtuh mwet uh fahk muh kuht sun mwe kweok mweyen God el srihke kuht. Tuhsruhktuh tiac kahs pwacye pa inge.—Riti James 1:13.

God el lwelah kuht in oruh sulaclah lasr sifacna. Yac kuht tiac insewowo lah kuht sukohsohk in sifacna oruh sulaclah lasr in kuhlwacnsuhpuh God? (Joshua 24:15) Tuhsruhktuh mwet pucspucs elos sulaclah in oruh ma kuluk nuh sin mwet sahyac, pwacnacng arlacna yohkyohkwelihk mwe kweok. Jeova el arlacna ahsor ke kain in orekma sesuwohs inge.—Riti Genesis 6:5, 6.

Jeova el sie God suc nuhnkuh kacsr. El luhngse kuht in engankihn moul. Ke pacl na sa, el ac fah eisla mwe kweok nuhkewa, wekuhnacng mwet suc pwacnacng mwe kweok inge. Ke pacl inge, el lwelah mwe kweok in oan na, ac oasr srihpac wo lal nuh kac. Ke mwe lutlut ahk 8, kuht kuh in liye mwe ahkuhtweyac kac.—Riti Luo Peter 2:9; 3:7, 13.

Jeova el luhngse kuht in fototo nuh sel ke inkacnek luhn puhruhe. El nuhnkuh ke kais sie sesr. (Psalm 65:2; 145:18) El ahkolah in nuhnak muhnahs nuh sesr. El etuh lah kuht kacfweacng in ahkinsewowoyacl kuht finne tahfonglac kuhtuh pacl uh. Kuht kuh in fototo na pwacye nuh sin God, kuht finne mwet sesuwohs.—Riti Psalm 103:12-14; James 4:8.

Ke srihpen Jeova pa use moul lasr uh, pwacnacng kuht enenuh in luhngse el yohk liki kuhtwena mwet. (Mark 12:30) Kom kuh in ahkkahlwemye lah kom luhngse God ke kom eis etwacack kacl ac oruh ma luhngse lal uh. Kom fin oruh ouinge, kom ac kuh in fototo na pwacye nuh sel.—Riti Sie Timothy 2:4; Sie John 5:3.