Akt 3:1-26
3 We Pita ɛn Jɔn bin de go ɔp na di tɛmpul di tɛm fɔ pre, dat na bay dɛn tri oklɔk* santɛm,
2 pipul dɛn bin de kɛr wan man we nɔ ebul fɔ waka frɔm we dɛn bɔn am. Ɛnide, dɛn bin de put am nia di tɛmpul in domɔt we dɛn bin de kɔl Fayn, so dat i go beg di wan dɛn we de go insay di tɛmpul fɔ mɔni.
3 We i si Pita ɛn Jɔn de go insay di tɛmpul, i bigin fɔ beg dɛn mɔni.
4 Bɔt Pita ɛn Jɔn luk am na in yay ɛn tɛl am se: “Luk wi.”
5 So i put ɔl in atɛnshɔn pan dɛn, ɛn i bin de op se dɛn go gi am sɔntin.
6 Bɔt Pita tɛl am se: “A nɔ gɛt silva ɛn gold, bɔt wetin a gɛt na in a go gi yu. Insay Jizɔs Krays di Nazarin in nem, waka!”
7 Na de i ol in raytan ɛn es am ɔp. Wantɛm wantɛm, in fut ɛn ankul dɛn strɔng,
8 ɛn i jomp tinap ɛn bigin fɔ waka go wit dɛn insay di tɛmpul. I bin de waka, de jomp ɛn prez Gɔd.
9 Ɛn ɔl di pipul dɛn si am de waka ɛn prez Gɔd.
10 Ɛn dɛn kam mɛmba se dis na di man we bin de sidɔm fɔ beg fɔ mɔni na di get we dɛn de kɔl Fayn Get na di tɛmpul, ɛn dɛn bin rili sɔprayz ɛn de wɔnda wetin dɔn apin to am.
11 We di man bin stil ol Pita ɛn Jɔn, ɔl di pipul dɛn rɔn kam na di ples we dɛn bin de kɔl Sɔlɔmɔn in Viranda, ɛn dɛn bin rili sɔprayz.
12 We Pita si dat, i tɛl di pipul dɛn se: “Pipul dɛn na Izrɛl, wetin mek una de sɔprayz so, ɛn wetin mek una de luk wi lɛk se na bikɔs wi fetful to Gɔd ɔ na bay wi yon pawa wi dɔn mek dis man waka?
13 Ebraam, Ayzak, ɛn Jekɔp dɛn Gɔd, we na wi gret gret granpa dɛn Gɔd, dɔn ɔnɔ Jizɔs we na in Savant; di wan we una an ova ɛn dinay bifo Paylet, pan ɔl we i bin dɔn disayd fɔ fri am.
14 Fɔ tru, una dinay da man de we oli ɛn we de du wetin rayt, ɛn una se mek dɛn fri pɔsin we kil pipul dɛn,
15 bɔt una kil di Chif Lida fɔ layf. Bɔt Gɔd gi am layf bak ɛn na tin we wi si.
16 Ɛn bikɔs ɔf in nem ɛn di fet we wi gɛt pan in nem, na in mek dis man we una no ɛn de si dɔn strɔng. Na di fet we wi gɛt pan am na in dɔn mek dis man wɛl gud gud wan bifo una ɔl.
17 Mi brɔda dɛn, a no se una nɔ bin no wetin una de du, jɔs lɛk una rula dɛn.
18 Bɔt na dis we Gɔd yuz fɔ mek wetin i bin dɔn yuz ɔl di prɔfɛt dɛn fɔ tɔk bifo tɛm apin. I bin se in Krays go sɔfa.
19 “So una ripɛnt ɛn tɔn rawnd so dat una sin dɛn go wep kɔmɔt, ɛn Jiova* insɛf sɛf go de mek una fil fayn,
20 ɛn i go sɛn di Krays we i dɔn pik fɔ una, we na Jizɔs.
21 Jizɔs go de na ɛvin te ɔltin kam bak lɛk aw dɛn bin de jɔs lɛk aw Gɔd bin dɔn yuz in oli prɔfɛt dɛn we bin de trade fɔ tɔk.
22 Infakt, Mozis bin se: ‘Una Gɔd, we na Jiova,* go pik wan pan una brɔda dɛn fɔ bi prɔfɛt lɛk mi. Una fɔ lisin to ɛnitin we i tɛl una.
23 Fɔ tru, ɛnibɔdi* we nɔ lisin to da Prɔfɛt de, Gɔd go dɔnawe wit am kpatakpata.’
24 Ɛn ɔl di prɔfɛt dɛn frɔm Samiɛl ɛn di wan dɛn we kam afta am, dɛn ɔl dɔn tɔk plen wan bɔt dɛn tɛm ya.
25 Una na di prɔfɛt dɛn pikin dɛn ɛn unasɛf de pan di agrimɛnt we Gɔd bin mek wit una gret gret granpa dɛn. I bin tɛl Ebraam se: ‘Yu pikin go mek ɔl di famili dɛn na di wɔl gɛt blɛsin.’
26 Afta we Gɔd dɔn es in Savant ɔp, na to una fɔs i sɛn am fɔ blɛs una bay we i de ɛp una fɔ lɛf di wikɛd tin dɛn we una de du.”
Futnot
^ Dat na, di awa we mek nayn.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “ɛni sol.”
