Matyu 16:1-28
16 Ɛn di Faresi ɛn Sadyusi dɛn go mit am fɔ tɛst am. Dɛn tɛl am mek i sho dɛn sayn we de sho se na Gɔd sɛn am.
2 I tɛl dɛn se: “We ivintɛm kam, una kin se, ‘Di wɛda go fayn, bikɔs di skay rɛd,’
3 ɛn na mɔnin, una kin se, ‘Di wɛda go bad tide ɛn ren go kam, bikɔs di skay rɛd ɛn i dak.’ Una ebul sho wetin go apin we una wach di skay, bɔt una nɔ ebul ɔndastand wetin di tin dɛn we de apin naw min.
4 Jɛnɛreshɔn we wikɛd ɛn we nɔ fetful to Gɔd de luk fɔ sayn, bɔt dɛn nɔ go si no sayn pas Jona in sayn.” Afta dat, i kɔmɔt de ɛn lɛf dɛn biɛn.
5 Di disaypul dɛn krɔs go na di ɔdasay, bɔt dɛn fɔgɛt fɔ go wit bred.
6 Jizɔs tɛl dɛn se: “Una opin una yay ɛn tek tɛm wit di Faresi ɛn Sadyusi dɛn yist.”
7 So dɛn bigin fɔ tɔk to dɛnsɛf se: “Wi nɔ kam wit ɛni bred.”
8 We Jizɔs no dis, i tɔk se: “Wetin mek una de tɔk to unasɛf se una nɔ gɛt bred? Una nɔ gɛt bɛtɛ fet.
9 Una nɔ si di pɔynt yet? Una nɔ mɛmba we a fid 5,000 pipul dɛn wit fayv bred ɛn ɔmɔs baskɛt una bin ful-ɔp wit di balans we lɛf?
10 Ɔ una nɔ mɛmba we a fid 4,000 pipul dɛn wit sɛvin bred ɛn ɔmɔs big baskɛt una ful-ɔp wit di balans we lɛf?
11 Wetin mek una nɔ ɔndastand se nɔto bred a tɔk to una bɔt? A bin de tɛl una fɔ tek tɛm wit di Faresi ɛn Sadyusi dɛn yist.”
12 Na da tɛm de dɛn ɔndastand se na di tin dɛn we di Faresi ɛn Sadyusi dɛn de tich, i de tɛl dɛn fɔ tek tɛm wit, nɔto di yist we dɛn de tek mek bred.
13 We Jizɔs kam na di eria we dɛn kɔl Sizeria Filipay, i aks in disaypul dɛn se: “Udat pipul dɛn se mɔtalman Pikin bi?”
14 Dɛn se: “Sɔm pipul dɛn se na Jɔn we Bin De Baptayz Pipul Dɛn, ɔda wan dɛn se Ilayja, ɛn ɔda wan dɛn se Jɛrimaya ɔ wan pan di prɔfɛt dɛn.”
15 I aks dɛn se: “We una, udat una tink se a bi?”
16 Saymɔn Pita ansa am se: “Yu na di Krays, di Gɔd we de alayv in Pikin.”
17 Nain Jizɔs tɛl am se: “Gladi Saymɔn, Jona in pikin, bikɔs nɔto mɔtalman* mek yu no, bɔt na mi Papa we de na ɛvin mek yu no.
18 Ɛn a de tɛl yu bak se: Yu na Pita, ɛn na pan dis rɔk a go bil mi kɔngrigeshɔn, ɛn di Grev* nɔ go ebul am.
19 A go gi yu di ki dɛn fɔ di Kiŋdɔm we de na ɛvin, ɛnitin we yu tay na dis wɔl, Gɔd go dɔn ɔlrɛdi tay am na ɛvin; ɛn ɛnitin we yu lus na dis wɔl, Gɔd go dɔn ɔlrɛdi lus am na ɛvin.”
20 Dɔn i tɛl in disaypul dɛn siriɔs wan mek dɛn nɔ tɛl ɛnibɔdi se in na di Krays.
21 Frɔm da tɛm de, Jizɔs bigin ɛksplen to in disaypul dɛn se i fɔ go na Jerusɛlɛm ɛn di lida dɛn, di edman dɛn fɔ di prist dɛn, ɛn di Lɔ ticha dɛn go mek i sɔfa bad bad wan, ɛn dɛn go kil am, bɔt i go gɛt layf bak di tɔd de.
22 Na de Pita kɛr am go na kɔna ɛn bigin fɔ tɔk pan am se: “Masta, sɔri fɔ yusɛf; dis nɔ go apin to yu.”
23 Bɔt i tɔn in bak ɛn tɛl Pita se: “Lɛf mi,* Setan! Yu de blɔk mi we, bikɔs yu nɔ de tink lɛk aw Gɔd de tink, yu de tink lɛk mɔtalman.”
24 Dɔn Jizɔs tɛl in disaypul dɛn se: “If ɛnibɔdi want fɔ fala mi, i nɔ fɔ du wetin in want, i fɔ es in tik we i go sɔfa pan,* ɛn kɔntinyu fɔ fala mi.
25 Ɛnibɔdi we want fɔ sev in layf* go lɔs am, bɔt ɛnibɔdi we lɔs in layf* fɔ mi sek go gɛt am bak.
26 Fɔ tru, us bɛnifit pɔsin go gɛt if i gɛt di wan ol wɔl bɔt i lɔs in layf?* Ɔ wetin mɔtalman go gi fɔ bay in layf?*
27 Mɔtalman Pikin gɛt fɔ kam wit in Papa in glori ɛn wit in enjɛl dɛn. Da tɛm de, i go pe ɔlman akɔdin to aw i de biev.
28 Fɔ tru, a de tɛl una se sɔm pan di wan dɛn we tinap ya nɔ go day atɔl pas dɛn si mɔtalman Pikin de kam wit in Kiŋdɔm.”
Futnot Dɛn
^ Insay Grik, “flɛsh ɛn blɔd.”
^ Ɔ “Ediz.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Insay Grik, “De biɛn mi.”
^ Rid Baybul Wɔd dɛn Minin.
^ Ɔ “sol.”
^ Ɔ “sol.”
^ Ɔ “sol.”
^ Ɔ “sol.”
