Matyu 9:1-38
9 So i go insay di bot ɛn krɔs go na di ɔdasay, ɛn i go na in yon siti.
2 Nain dɛn kam wit wan man na strɛcha* we paralayz. We Jizɔs si di kayn fet we dɛn gɛt, i tɛl di man we paralayz se: “Mi pikin, tek kɔrej! A dɔn fɔgiv yu sin dɛn.”
3 Sɔm Lɔ ticha dɛn tɔk na dɛn at se: “Dis man dɔn tɔk bad agens Gɔd.”
4 Jizɔs no wetin dɛn de tink, so i aks dɛn se: “Wetin mek una de tink bɔt wikɛd tin dɛn na una at?
5 Fɔ ɛgzampul, uswan izi, fɔ se, ‘A dɔn fɔgiv yu sin,’ ɔ fɔ se, ‘Grap ɛn waka’?
6 Bɔt fɔ mek una no se mɔtalman Pikin gɛt rayt na dis wɔl fɔ fɔgiv sin—” i tɛl di man we paralayz se: “Grap, tek yu strɛcha, ɛn go na yu os.”
7 Ɛn i grap ɛn go na in os.
8 We di pipul dɛn si dis, dɛn fred, ɛn dɛn prez Gɔd, we gi mɔtalman dis kayn pawa.
9 We Jizɔs de kɔmɔt de, i si wan man we nem Matyu sidɔm na di taks ɔfis, ɛn i tɛl am se: “Kam fala mi.” Na de i grap ɛn fala am.
10 Leta, we Jizɔs de it* na Matyu in os, bɔku sina dɛn ɛn bɔku pipul dɛn we de gɛda taks kam ɛn bigin fɔ it* wit in ɛn in disaypul dɛn.
11 Bɔt we di Faresi dɛn si dis, dɛn aks in disaypul dɛn se: “Wetin mek una ticha de it wit sina dɛn ɛn pipul dɛn we de gɛda taks?”
12 We i yɛri dɛn, i se: “Pipul dɛn we gɛt wɛlbɔdi nɔ nid dɔktɔ, bɔt di wan dɛn we sik nid dɔktɔ.
13 So una go ɛn lan wetin dis min: ‘A nɔ want sakrifays, na sɔri-at a want.’ A nɔ kam fɔ kɔl pipul dɛn we de du wetin rayt, a kam fɔ kɔl sina dɛn.”
14 Dɔn Jɔn in disaypul dɛn kam aks am se: “Wetin mek wi ɛn di Faresi dɛn kin fast bɔt yu disaypul dɛn nɔ de fast?”
15 Na de Jizɔs tɛl dɛn se: “Di ɔkɔ in padi dɛn nɔ gɛt ɛni rizin fɔ mek dɛn at pwɛl wans di ɔkɔ de wit dɛn, nɔto so? Bɔt tɛm go kam we di ɔkɔ nɔ go de wit dɛn igen,* ɛn na da tɛm de dɛn go fast.
16 Nɔbɔdi nɔ de tek af pat pan nyu klos ɛn so am pan ol klos,* bikɔs di nyu klos go kɔmɔt pan di ol klos ɛn di say we bin chɛr go chɛr pas aw i bin de.
17 Ɛn pipul dɛn nɔ de put nyu wayn insay wayn bag* dɛn we ol. If dɛn du dat, di wayn bag dɛn go bɔs, di wayn go trowe, ɛn di wayn bag dɛn go pwɛl. Bɔt pipul dɛn de put nyu wayn insay nyu wayn bag ɛn di wayn nɔ go trowe ɛn di bag nɔ go pwɛl.”
18 As i de tɛl dɛn dɛn tin ya, na de wan rula kam sho am rɛspɛkt* ɛn tɛl am se: “Sɔntɛm mi galpikin go dɔn day bay naw, bɔt kam le yu an pan am, ɛn i go gɛt layf bak.”
19 So Jizɔs grap, ɛn in ɛn in disaypul dɛn fala am.
20 Nain wan uman we dɔn sɔfa fɔ 12 ia bikɔs i de blid, kam biɛn Jizɔs ɛn tɔch di ɛj pat pan in klos we i wɛr pantap,
21 bikɔs i bin de tɛl insɛf se: “If a jɔs tɔch in klos we i wɛr pantap, a go wɛl.”
22 Jizɔs tɔn rawnd, ɛn we i si am, i se: “Mi pikin, tek kɔrej! Yu fet dɔn mek yu wɛl.” Ɛn wantɛm wantɛm di uman wɛl.
23 We Jizɔs kam insay di rula in os ɛn si di wan dɛn we de ple flut ɛn bɔku pipul dɛn we de kray lawd lawd wan,
24 i tɛl dɛn se: “Una go na do, bikɔs di pikin nɔ day, na slip i de slip.” Na de dɛn bigin laf am da fityay we.
25 As di pipul dɛn go na do, i go insay ɛn ol di pikin in an, ɛn di pikin grap.
26 Dis tɔk skata na ɔl da eria de.
27 As Jizɔs de kɔmɔt de, tu blaynman dɛn fala am, de ala se: “Devid in Pikin, sɔri fɔ wi.”
28 We Jizɔs go insay di os, di blaynman dɛn kam to am, ɛn i aks dɛn se: “Una gɛt fet se a ebul du dis?” Dɛn ansa am se: “Yɛs, Masta.”
29 Dɔn i tɔch dɛn yay ɛn se: “Bikɔs una gɛt fet, una yay dɛn go opin.”
30 Ɛn dɛn bigin fɔ si. Pantap dat, Jizɔs wɔn dɛn siriɔs wan se: “Una nɔ mek ɛnibɔdi no bɔt dis.”
31 Bɔt we dɛn go na do, dɛn mek pipul dɛn no bɔt am na ɔl da eria de.
32 We dɛn bin de go, nain pipul dɛn briŋ wan man we na mumu to am we bin gɛt dimɔn;
33 we Jizɔs pul di dimɔn, di mumu tɔk. Di pipul dɛn bin sɔprayz ɛn se: “Wande dɛn kayn tin ya nɔ apin na Izrɛl.”
34 Bɔt di Faresi dɛn tɔk se: “Na di rula fɔ di dimɔn dɛn de mek i pul dimɔn dɛn.”
35 Ɛn Jizɔs bin de go na ɔl di siti ɛn vilej dɛn, de tich na dɛn sinagɔg* dɛn ɛn prich di gud nyuz bɔt di Kiŋdɔm ɛn mɛn ɔlkayn sik.
36 We i si di krawd, i sɔri fɔ dɛn bikɔs pipul dɛn bin de trit dɛn bad ɛn dɛn nɔ bin bisin bɔt dɛn* lɛk ship dɛn we nɔ gɛt shɛpad.
37 Dɔn i tɛl in disaypul dɛn se: “Fɔ tru, di tin dɛn fɔ avɛst bɔku, bɔt di wokman dɛn smɔl.
38 So, una beg di Masta we gɛt di tin dɛn fɔ avɛst fɔ sɛn wokman dɛn fɔ kam avɛst.”
Futnot Dɛn
^ Dis na wan smɔl bed we dɛn kin yuz fɔ kɛr sik pɔsin.
^ Ɔ “Jizɔs ling nia di tebul.”
^ Ɔ “ling nia di tebul.”
^ Insay Grik, “dɛn go pul am na dɛn an.”
^ Insay Grik, “di klos we dɛn kin wɛr pantap.”
^ Bag we dɛn mek wit animal kanda.
^ Ɔ “butu bifo am.”
^ Rid Baybul Wɔd dɛn Minin.
^ Insay Grik, “dɛn bin de pul dɛn kanda pan dɛn ɛn lɛf dɛn to dɛnsɛf.”
