Afta sɔm tɛm we Jizɔs bin apia to in apɔsul dɛn, Pita bin disayd fɔ go fishin na di Si na Galili. Tɔmɔs, Jems, Jɔn, ɛn sɔm ɔda disaypul dɛn bin go wit am. Dɛn fishin ol nɛt, bɔt dɛn nɔ ebul kech natin.

Ali mɔnin di nɛks de, dɛn si wan man tinap na di bich. Di man aks dɛn se: ‘Una kech ɛni fish?’ Dɛn tɛl am: “Nɔ-o!” Di man tɛl dɛn se: “Una ib di nɛt na di raytan say na di bot.” We dɛn du dat, dɛn fishin nɛt ful-ɔp wit bɔku bɔku fish, ɛn dɛn nɔ ebul fɔ es am. Wantɛm wantɛm, Jɔn kam fɔ no se di man na Jizɔs, ɛn Jɔn tɔk se: “Na di Masta!” Wantɛm wantɛm, Pita jomp insay di wata ɛn swim go na di bich. Di ɔda disaypul dɛn fala am wit di bot.

We dɛn rich na di bich, dɛn si bred ɛn fish de kuk na faya. Jizɔs tɛl dɛn fɔ kam wit sɔm pan di fish we dɛn kech fɔ ad am to di it. Dɔn Jizɔs tɛl dɛn se: ‘Una kam it.’

 Afta dɛn dɔn fɔ it, Jizɔs aks Pita se: ‘Yu lɛk mi pas dis fishin wok?’ Pita tɔk se: ‘Yɛs, Masta, yu no se a lɛk yu.’ Jizɔs tɛl am se: ‘Fid mi smɔl ship dɛn’ Jizɔs aks am bak se: ‘Pita, yu lɛk mi?’ Pita tɔk se: ‘Masta, yu no se a lɛk yu.’ Jizɔs tɛl am: “Mɛn mi smɔl ship dɛn.” Jizɔs aks am di tɔd tɛm. Pita in at rili pwɛl. I tɔk se: ‘Masta, yu sabi ɔltin. Yu no se a lɛk yu.’ Jizɔs tɛl am se: “Fid mi smɔl ship dɛn.” Dɔn i tɛl Pita bak se: “Kɔntinyu fɔ fala mi.”