WETIN yu kin mɛmba we yu yɛri di wɔd “sol” ɛn “spirit”? Bɔku pipul dɛn biliv se sol ɛn spirit na sɔntin we de insay mɔtalman we wi nɔ de si ɛn we nɔ de day. Dɛn tink se we pɔsin day, da tin de kin kɔmɔt insay di pɔsin ɛn go de ɔdasay. Bikɔs na dat bɔku pipul dɛn biliv, dɛn kin sɔprayz fɔ no se nɔto dat di Baybul de tich. So wetin di Baybul se sol ɛn spirit min?

Lɛ wi tɔk fɔs bɔt di sol. Di men langwej dɛn we dɛn bin yuz fɔ rayt di Baybul na Ibru ɛn Grik. Di Baybul yuz di Ibru wɔd nɛʹfɛsh ɛn di Grik wɔd si·kiʹ we i de tɔk bɔt sol. Dɛn tu wɔd ya de pas 800 tɛm na di Baybul. Insay di New World Translation, dɛn translet dɛn wɔd ya as “sol” insay di vas dɛn ɔ na di futnot. We yu luk di we aw di Baybul yuz di wɔd “sol” ɔ “sol dɛn,” yu go si se i de tɔk bɔt (1) pipul dɛn, (2) animal dɛn, ɛn (3) di layf we mɔtalman ɛn animal gɛt. Lɛ wi tɔk bɔt sɔm skripchɔ dɛn usay dɛn yuz di wɔd “sol.”  Insay dɛn skripchɔ dɛn de, yu go si se “sol” min di tri tin dɛn we wi tɔk bɔt ɔp.

Pipul dɛn. “Insay Noa in tɛm . . . dɛn bin de bil di ak, we bin sev smɔl pipul dɛn, dat na et sol dɛn nɔmɔ.” (Pita In Fɔs Lɛta 3:​20) * Insay dis skripchɔ, “sol dɛn” min pipul dɛn. Di pipul dɛn na bin Noa, in wɛf, dɛn tri bɔy pikin dɛn, ɛn dɛn pikin dɛn wɛf dɛn. Insay Ɛksodɔs 16:​16, Jiova bin tɛl di Izrɛlayt dɛn aw dɛn fɔ gɛda di mana. I tɛl dɛn se: “Una fɔ mɛzhɔ . . . fɔ ɔl di pipul dɛn we de na una os.” So di pipul dɛn fɔ kɔnt ɔmɔs pipul dɛn de na dɛn famili ɛn tek di mana we go du fɔ dɛn. If yu want fɔ si ɔdasay dɛn na di Baybul usay “sol” ɔ “sol dɛn” min pipul dɛn, na fɔ rid di futnot dɛn fɔ Jɛnɛsis 46:​18; Jɔshwa 11:​11; Di Apɔsul Dɛn Wok [Akt] 27:​37; ɛn Lɛta Fɔ Rom 13:​1.

Animal dɛn. We di Baybul de tɔk bɔt di tɛm we Gɔd bin de mek di wɔl, i se: “Na in Gɔd tɔk se: ‘Lɛ di wata ful-ɔp wit tin dɛn we gɛt layf, ɛn lɛ tin dɛn we de flay, flay ɔp di skay.’ Dɔn Gɔd tɔk bak se: ‘Lɛ ɔlkayn animal dɛn kam, na di wɔl. Animal dɛn lɛkɛ di wan fɔ mɛn, ɛn animal dɛn di wan we de drɛg na grɔn ɛn wayl animal dɛn. Dɛn ɔl fɔ gɛt dɛn kɔmpin.’ Ɛn ɔltin bi na so.” (Jɛnɛsis 1:​20, 24) Insay dis skripchɔ, dɛn kɔl di fish dɛn, di animal dɛn we pipul dɛn kin mɛn, ɛn di wayl animal dɛn as tin dɛn we gɛt layf “sol.” If yu want fɔ si ɔdasay dɛn we dɛn kɔl bɔd ɛn ɔda animal dɛn as “sol,” na fɔ rid di futnot fɔ Jɛnɛsis 9:​10; Lɛvitikɔs 11:​46; ɛn Nɔmbaz 31:​28.

Di layf we pɔsin gɛt. Sɔntɛnde, “sol” kin min di layf we pɔsin gɛt. Jiova bin tɛl Mozis se: “Ɔl di pipul dɛn ɔl we bin want fɔ kil yu, dɔn day.” (Ɛksodɔs 4:​19) Wetin Mozis in ɛnimi dɛn bin want fɔ du? Dɛn bin de afta Mozis in layf. Wan ɔda ɛgzampul bin apin bifo dɛn bɔn Mozis. Na di tɛm we Rechɛl bin de bɔn Bɛnjamin. Di Baybul se Rechɛl “in  layf bin de dɔn (bikɔs na day i bin de day).” (Jɛnɛsis 35:​16-19) Da tɛm de, Rechɛl bin lɔs in layf. Tink bɔt wetin Jizɔs bin min we i se: “Mi na di gud shɛpad; di gud shɛpad de gi in layf fɔ seka in ship dɛn.” (Jɔn 10:​11) Jizɔs bin gi in sol ɔ in layf fɔ sev mɔtalman. Dɛn skripchɔ ya ɔ dɛn futnot we wi dɔn tɔk bɔt, dɔn sho wi klia wan se “sol” kin min pɔsin in layf. If yu want fɔ si ɔdasay dɛn na di Baybul we “sol” min di layf we pɔsin gɛt, na fɔ rid di futnote we de fɔ Fɔs Kiŋ 17:​17-23; Sam 6:​3; 62:​1, 5; Matyu 10:​39; Jɔn 15:​13; ɛn Di Apɔsul Dɛn Wok [Akt] 20:​10.

We yu kɔntinyu fɔ stɔdi di Baybul, yu go si se nɔsay nɔ de na di wan ol Baybul we de tɔk se di sol “nɔ de day,” ɔ na tin we “go de sote go.” Bɔt di Baybul tɛl wi klia wan se di sol de day. (Izikɛl 18:​4, 20)

Naw, lɛ wi tɔk bɔt aw di Baybul yuz di wɔd “spirit.” Sɔm pipul dɛn tink se “spirit” na ɔda we fɔ kɔl “sol.” Bɔt nɔto so i bi. Di Baybul sho wi klia wan se “spirit” ɛn “sol” na tu difrɛn tin. Aw dɛn difrɛn?

Di wan dɛn we rayt di Baybul yuz di Ibru wɔd ruʹak ɔ di Grik wɔd pɛ·nɛvʹma we dɛn de tɔk bɔt “spirit.” Di Baybul sho wi wetin dɛn wɔd ya min. Fɔ ɛgzampul, Sam 104:​29 tɔk se: “If yu [Jiova] kɔba yu fes pan dɛn, dɛn go tɔmɛnt. If yu pul dɛn spirit [ruʹak] kɔmɔt, dɛn go day ɛn go bak na dɔti.” Ɛn Jems 2:​26 (Krio Fɔs Oli Baybul) tɔk se: “Pɔsin kin day wɛn in spirit [pɛ·nɛvʹma] nɔ de insay am igen.” So, dɛn vas ya sho se di “spirit” na di tin we de gi di bɔdi layf. We spirit nɔ de insay pɔsin in bɔdi, i de day. Na dat mek di Baybul nɔ jɔs se ruʹak na “spirit,” bɔt i se bak na “di tin we de gi layf.” Fɔ ɛgzampul, we Gɔd bin de tɛl Noa bɔt di ebi ren, i se: “A de kam mek ebi ren kam na di wɔl fɔ kil ɔltin we gɛt layf [ruʹak].” (Jɛnɛsis 6:​17; 7:​15, 22) So di “spirit” na di tin we de mek ɔl mɔtalman ɛn animal gɛt layf.

Di sol ɛn di spirit nɔto di sem. Di bɔdi fɔ gɛt spirit jɔs lɛk aw redio fɔ gɛt kɔrɛnt ɔ batri fɔ mek i wok. Fɔ ɔndastand dis  mɔ, tink bɔt wan smɔl redio. We yu put batri insay ɛn put am ɔn, di pawa we de insay di batri de mek di redio bigin ple. If di redio nɔ gɛt batri, i nɔ go wok. Na di sem tin go apin to redio we de yuz kɔrɛnt. If yu pul di plɔg pan di sɔkɛt, di redio nɔ go wok. Semweso, na di spirit we de insay mɔtalman de mek i gɛt layf. Jɔs lɛk aw di pawa we de insay batri ɛn kɔrɛnt nɔ de fil ɔ tink, na so bak di spirit we de insay mɔtalman nɔ de fil ɔ tink. I nɔ no natin. Di Baybul se if wi bɔdi nɔ gɛt spirit ɔ di tin we de gi layf, wi go “day ɛn go bak na dɔti.”

Ɛkliziastis 12:​7 tɔk se we pɔsin day, “di dɔti [we dɛn tek mek in bɔdi] de go bak na grɔn jɔs lɛk aw i bin de ɛn di spirit de go bak to di tru Gɔd we gi am.” We di spirit ɔ di tin we de gi layf, kɔmɔt insay di bɔdi, di bɔdi de day ɛn go bak na grɔn usay i kɔmɔt. Semweso, di spirit de go bak to Gɔd usay i kɔmɔt. (Job 34:​14, 15; Sam 36:​9, Krio Fɔs Oli Baybul) Dis nɔ min se di spirit de go to Gɔd na ɛvin. Bɔt i min se we pɔsin dɔn day, na Jiova Gɔd go disayd if i go gɛt layf bak tumara bambay. Wi go se, in layf de na Gɔd in an. Na Gɔd nɔmɔ go ebul gi di spirit so dat di pɔsin go gɛt layf bak.

Wi gladi fɔ no se na dat Gɔd go du fɔ ɔl di wan dɛn we dɔn day we i de mɛmba! (Jɔn 5:​28, 29) Da tɛm de, i go mek nyu bɔdi fɔ dɛn ɛn put spirit insay di bɔdi fɔ mek dɛn gɛt layf bak. Ɔlman go gladi pasmak da tɛm de!

If yu want fɔ no mɔ bɔt aw di Baybul yuz “sol” ɛn “spirit,” na fɔ rid wan buk we dɛn kɔl What Happens to Us When We Die? ɛn wan ɔda buk we dɛn kɔl Reasoning From the Scriptures frɔm pej 375 to pej 384. Na Jiova Witnɛs dɛn mek dɛn buk ya.

[Futnot]