SƐKSHƆN 3
Aw fɔ Sɔlv Prɔblɛm
“Una lɛk una kɔmpin wit ɔl una at, bikɔs dɛn pipul we lɛk dɛnsɛf kin rɛdi ɔltɛm fɔ padin dɛn kɔmpin wɛn dɛn kɔmpin du dɛn bad.”—Pita In Fɔs Lɛta 4:8
We una bigin una mared layf togɛda, una go gɛt difrɛn prɔblɛm dɛn. Dɛn prɔblɛm ya go apin bikɔs una tu gɛt difrɛn we aw una de tink, fil, ɛn aw una de du tin dɛn. Dat na bikɔs una nɔ mɛn di sem we. Sɔntɛnde, di prɔblɛm go kɔmɔt ɔdasay ɛn pan tin dɛn we una nɔ go tink sɛf se go mek una gɛt prɔblɛm.
Di fɔs tin we ɛnibɔdi go want fɔ du, na fɔ avɔyd di prɔblɛm, bɔt di Baybul advays wi se wi fɔ lan fɔ sɔlv wi prɔblɛm dɛn. (Matyu 5:23, 24) Di bɛst tin we go ɛp yu sɔlv yu prɔblɛm dɛn na we yu fala di advays we de na di Baybul.
1 UNA TƆK BƆT DI PRƆBLƐM
DI BAYBUL SE: “Di rayt tɛm de . . . fɔ tɔk.” (Ɛkliziastis 3:1, 7) Una mek shɔ se una spɛn tɛm fɔ tɔk bɔt di prɔblɛm. We una de tɔk, mek lɛ yu man ɔ yu wɛf no aw yu rili de fil ɛn wetin yu tink bɔt di prɔblɛm. Ɔltɛm i fayn fɔ “tɔk tru” to yu man ɔ yu wɛf. (Lɛta Fɔ Ɛfisɔs 4:25) Ilɛksɛf yu at rili wam, na fɔ tray tranga wan mek una nɔ fɛt. We yu tek tɛm ansa yu man ɔ yu wɛf, dat go mek tin we na smɔl tɔk nɔ tɔn to big plaba.—Prɔvabs 15:4; 26:20.
Ilɛksɛf yu nɔ gri wit wetin yu man ɔ yu wɛf de tɔk, kɔntinyu fɔ tɔk saful so dat i go gladi fɔ yɛri yu. Nɔ ɛva fɔgɛt fɔ sho se yu lɛk ɛn rɛspɛkt yu man ɔ yu wɛf. (Lɛta Fɔ Kɔlɔse 4:6) Una tray fɔ sɔlv di prɔblɛm kwik kwik wan ɛn una nɔ sɛt mɔt pan unasɛf.—Lɛta Fɔ Ɛfisɔs 4:26.
DU DIS:
-
Fɛn di rayt tɛm fɔ tɔk bɔt di prɔblɛm
-
We di ɔda pɔsin de tɔk, nɔ kɔt wɔd na in mɔt. Yu go tɔk we i dɔn
2 LISIN ƐN ƆNDASTAND
DI BAYBUL SE: “Una fɔ lɛk una kɔmpin gud, lɛkɛ aw Kristiɛn brɔda dɛn fɔ lɛk dɛnsɛf; una fɔ want fɔ rɛspɛkt una kɔmpin.” (Lɛta Fɔ Rom 12:10) Di we aw yu de lisin rili impɔtant. Tray fɔ ɔndastand di we aw di ɔda pɔsin de fil; bɔt yu fɔ du dat wit “sɔri at . . . ɛn nɔ fɔ de mek prawd.” (Pita In Fɔs Lɛta 3:8; Jems 1:19) Nɔ jɔs mek lɛk se yu de lisin. Sɔntɛnde, i go fayn mek yu lɛf wetin yu de du ɛn pe atɛnshɔn gud wan to wetin yu man ɔ yu wɛf want fɔ tɔk, ɔ aks am if una go ebul tɔk leta. If yu tink bɔt yu man ɔ yu wɛf as yu padi ɛn nɔ trit am lɛk yu ɛnimi, dat go mek yu “nɔ kwik fɔ vɛks.”—Ɛkliziastis 7:9.
DU DIS:
-
Kɔntinyu fɔ lisin, ilɛksɛf yu nɔ lɛk wetin di pɔsin de tɔk
-
Nɔ jɔs lisin to di wɔd dɛn we i de tɔk, bɔt tray fɔ ɔndastand wetin i rili min. Tray fɔ wach aw i de mek in bɔdi ɛn lisin to aw i de mek in vɔys
3 DU WETIN UNA DƆN DISAYD
DI BAYBUL SE: “Wok fɔ lɛ yu go gɛt yu an to mɔt, bɔku tɔk tɔk kin mek yu po.” (Prɔvabs 14:23) Una nɔ jɔs gri pan wetin fɔ du, una fɔ mek shɔ se una du wetin una dɔn disayd. Dis nɔ izi fɔ du, bɔt una go si se i rili impɔtant. (Prɔvabs 10:4) If una du am togɛda, una go “gɛt bɛtɛ bɛnifit.”—Ɛkliziastis 4:9.
DU DIS:
-
Una disayd wetin una go du fɔ sɔlv una prɔblɛm
-
As tɛm de go, una fɔ tray fɔ si if una de du wetin una bin dɔn disayd
