Tink bɔt dis: We Julia luk insɛf na mirɔ, i jɔs de si se i bɔmp. I kin tɛl insɛf se, “A nid fɔ mek mi bɔdi kam dɔŋ,” pan ɔl we in mama ɛn papa ɛn in padi dɛn de tɛl am se in na “stret kɔt.”

Dɛn biɛn tɛm ya, Julia dɔn tink fɔ du sɔntin we nɔ rili fayn, jɔs fɔ lɛ in bɔdi kam dɔŋ smɔl. I nɔ want fɔ it ɛnitin fɔ tu-tri dez . . .

If yu de fil di sem we aw Julia de fil, wetin yu go du?

Natin nɔ bad fɔ mek yu tink bɔt aw yu luk. Infakt, di Baybul tɔk bɔt aw sɔm man ɛn uman dɛn bin fayn, lɛk Sera, Rechɛl, Abigɛl, Josɛf, ɛn Devid. Di Baybul se wan uman we nem Abishag, bin rili “fayn.”—Fɔs Kiŋ 1:​4.

Bɔt bɔku yɔŋ pipul dɛn kin tink tumɔs bɔt aw dɛn luk. Dis kin kam wit siriɔs prɔblɛm dɛn. Tink bɔt dis:

• Wan tɛm, we dɛn tɔk to 100 titi dɛn, 58 pan dɛn bin tɔk se dɛn gɛt bɔdi tumɔs, we i bi se na 17 pan dɛn nɔmɔ bin gɛt bɔdi tumɔs.

• Wan ɔda tɛm, we dɛn tɔk to 100 uman dɛn, 45 pan dɛn we nɔ bin gɛt bɛtɛ bɔdi bin tink se dɛn gɛt bɔdi tumɔs!

• Fɔ mek sɔm yɔŋ pipul dɛn put dɛn bɔdi dɔŋ, dɛn nɔ kin gri fɔ it te dɛn gɛt wan sik we dɛn kɔl anorexia. Dis sik de mek dɛn nɔ fil fɔ it atɔl ɛn dis kin ivin mek dɛn day.

 If yu si sɔm sayn dɛn we de sho se yu gɛt anorexia ɔ ɛni ɔda prɔblɛm wit it biznɛs, na fɔ mek lɛ dɛn ɛp yu. Fɔs, tɔk wit yu mama ɛn papa ɔ ɔda big pɔsin we yu biliv. Di Baybul se: “Padi dɛn de sho lɔv ɔltɛm.”—Prɔvabs 17:​17.

Fɔ tru, na di abit dɛn we yu gɛt na in go mek pipul dɛn lɛk yu ɔ nɔ lɛk yu. Lɛ wi tɔk bɔt Kiŋ Devid in pikin Absalɔm. Di Baybul se:

“Absalɔm bin fayn pas ɔlman na Izrɛl lɛk tin fɔ it. I nɔ bin gɛt wan mak nain bɔdi.”—Sɛkɛn Samiɛl 14:​25.

Bɔt dis yɔŋ man bin prawd bad, i bin lɛk pawa, ɛn i bin kɔmɔt biɛn in papa! So di Baybul nɔ tɔk fayn bɔt Absalɔm; i mek wi no se Absalɔm na man we nɔ bin gɛt wan shem fɔ kɔmɔt biɛn pɔsin we biliv am, ɛn i bin gɛt bad at we mek i kil.

Na dat mek di Baybul advays wi se:

“Una fɔ liv di nyu layf we Gɔd dɔn gi una lɛkɛ aw i want.”—Lɛta Fɔ Ɛfisɔs 4:​24.

“Nɔto dɛn tin we pɔsin de si una fɔ de tek mek unasɛf fayn, . . .  bifo dat, ɔl una yon fayn fɔ de insay.”—Pita In Fɔs Lɛta 3:​3, 4.

I nɔ bad atɔl fɔ luk gud, bɔt di abit dɛn we yu gɛt impɔtant fa fawe pas di we aw yu luk. As tɛm de go, di fayn abit dɛn we yu gɛt go mek pipul dɛn lɛk yu mɔ pas di fayn we aw yu luk ɔ di fayn shep we yu gɛt! Wan titi we nem Filishia tɔk se: “Pipul dɛn kin notis pɔsin we fayn kwik kwik wan, bɔt udat yu bi ɛn di gud abit dɛn we yu gɛt na in pipul dɛn go mɛmba mɔ.”

Bɔku tɛm, yu kin fil bad bɔt di we aw yu luk?

Yu dɔn ɛva tink fɔ lɛf fɔ it bɔku fɔ lɔng tɛm jɔs fɔ lɛ yu bɔdi kam dɔŋ ɔ du ɔda tin we nɔ fayn, jɔs fɔ chenj di we aw yu luk?

If i pɔsibul, wetin yu go want fɔ chenj na yu bɔdi? (Mak ɔl di wan dɛn we yu pik.)

• AYT

• WET

• IA

• YU SHEP

• FES

• YU KƆLƆ

If yu ansa na yɛs to di fɔs tu kwɛstyɔn dɛn ɛn yu mak tri ɔ mɔ tin dɛn ɔnda di tɔd kwɛstyɔn, tink bɔt dis: I go mɔs bi se di bad we aw yu de si yusɛf nɔto so ɔda pipul dɛn de si yu. I izi fɔ lɛ yu du sɔntin we nɔ rili fayn ɛn wɔri tumɔs bɔt di we aw yu luk. —Fɔs Samiɛl 16:​7.