Dɛn nɔ de pe di ɛlda dɛn na wi ɔganayzeshɔn. Di ɛlda dɛn de fɔ “kia fɔ Gɔd In pipul dɛn” lɛk aw dɛn bin de du trade we di apɔsul dɛn bin de. (Di Apɔsul Dɛn Wok [Akt] 20:28) Dɛn ɛlda ya na brɔda dɛn we lɛk Jiova ɛn na dɛn de oba di kɔngrigeshɔn. Di Baybul se ɛlda dɛn ‘nɔ fɔ du lɛk se na fos dɛn de fos dɛn, dɛn fɔ kia fɔ wi wit opin at; ɛn dɛn nɔ fɔ wok fɔ mɔni, bɔt bikɔs dɛn gladi fɔ wok.’ (Pita In Fɔs Lɛta 5:1-3) Us wok di ɛlda dɛn de du na di kɔngrigeshɔn?

Dɛn de kia fɔ wi. Di ɛlda dɛn de sho ɔlman na di kɔngrigeshɔn wetin fɔ du, ɛn dɛn de ɛp wi fɔ kam nia Jiova. Di ɛlda dɛn nɔ de tek dɛnsɛf impɔtant pas di ɔda brɔda ɛn sista dɛn na di kɔngrigeshɔn bikɔs dɛn no se na Gɔd gi dɛn dis impɔtant wok fɔ du. Bɔt dɛn de ɛp ɔlman na di kɔngrigeshɔn fɔ gɛt gladi at. (Sɛkɛn Lɛta Fɔ Kɔrint 1:24) Jɔs lɛk aw shɛpad de kia fɔ ɔl in ship dɛn, na so di ɛlda dɛn de kia fɔ ɔlman na di kɔngrigeshɔn.—Prɔvabs 27:23.

Dɛn de tich wi aw fɔ du wetin Gɔd want. Ɛvri wik, di ɛlda dɛn kin tich wi na di mitin dɛn so dat wi go kɔntinyu fɔ biliv Gɔd. (Di Apɔsul Dɛn Wok [Akt] 15:32) Na di ɛlda dɛn kin de bifo pan di prichin wok. Dɛn kin prich wit wi na fil savis ɛn sho wi di difrɛn difrɛn we dɛn aw fɔ prich.

Dɛn kin ɛnkɔrej wi. Fɔ ɛp wi fɔ go nia Jiova mɔ, di ɛlda dɛn kin go na wi os dɛn fɔ tɔk to wi ɔ dɛn kin tɔk to wi na Kiŋdɔm Ɔl. Dɛn kin yuz di Baybul fɔ ɛp wi.—Jems 5:14, 15.

Apat frɔm di wok we di ɛlda dɛn gɛt na di kɔngrigeshɔn, bɔku ɛlda dɛn gɛt say we dɛn de wok ɛn dɛn gɛt fɔ kia fɔ dɛn famili. So, wi fɔ rɛspɛkt dɛn brɔda ya fɔ di tranga wok we dɛn de du.—Fɔs Lɛta Fɔ Tɛsalonayka 5:12, 13.

• Wetin ɛlda dɛn de du na di kɔngrigeshɔn?

• Aw di ɛlda dɛn de sho se dɛn lɛk wi?