Insay di Baybul, dɛn tɔk bɔku tɛm bɔt Banabas ɛn di apɔsul Pɔl. Dɛn bin de go to di brɔda dɛn na di difrɛn difrɛn kɔngrigeshɔn dɛn. So, na dat mek dɛn kɔl dɛn travlin ovasia. Wetin mek dɛn bin de du dat? Dɛn bin de du dat bikɔs dɛn bin want fɔ no aw di brɔda dɛn de du. Pɔl bin tɛl Banabas se: “Lɛ wi go fɛn dɛn pipul we wi bin dɔn tɛl di Masta in mɛsej, lɛ wi go luk aw dɛn de du.” Pɔl bin rɛdi fɔ go na dɛn fa fa ples dɛn, fɔ go ɛp di brɔda dɛn. (Di Apɔsul Dɛn Wok [Akt] 15:36) Na di sem tin di travlin ovasia dɛn de du tide.

Dɛn kin kam fɔ ɛnkɔrej wi. Wan brɔda we wi kɔl sakit ovasia kin go na lɛk 20 kɔngrigeshɔn dɛn so. I kin de na wan kɔngrigeshɔn fɔ wan wik, ɛn na tu tɛm i kin du dis insay di ia. Wi kin lan bɔku tin dɛn frɔm dɛn brɔda ya ɛn wi kin lan bak frɔm dɛn wɛf dɛn, if dɛn mared. Dɛn kin tray fɔ no ɔlman na di kɔngrigeshɔn, ɛn dɛn kin gladi fɔ go prich wit wi. Dɛn kin ivin go wit wi to di pipul dɛn we wi de stɔdi di Baybul. Dɛn ovasia ya kin go wit di ɛlda dɛn to sɔm brɔda ɛn sista dɛn fɔ go ɛnkɔrej dɛn. Dɛn kin gi fayn tɔk dɛn na di mitin ɛn na dɛn big program dɛn fɔ ɛp wi.—Di Apɔsul Dɛn Wok [Akt] 15:35.

Dɛn lɛk ɔlman na di kɔngrigeshɔn. Di sakit ovasia dɛn kin rɛdi fɔ ɛp ɔlman na di kɔngrigeshɔn fɔ du wetin Jiova want. Dɛn kin tɔk to di ɛlda ɛn ministerial savant dɛn fɔ no di tin dɛn we de apin na di kɔngrigeshɔn ɛn fɔ sho dɛn aw dɛn go du dɛn wok fayn. Dɛn kin tɔk bak to di wan dɛn we na payɔnia dɛn fɔ ɛnkɔrej dɛn. Dɛn kin ivin tray fɔ no di wan dɛn we jɔs bigin fɔ kam na di mitin ɛn fɔ no if di pɔsin de du di tin dɛn we i de lan. Dɛn brɔda ya kin rɛdi fɔ ‘wok wit wi fɔ ɛp wi.’ (Sɛkɛn Lɛta Fɔ Kɔrint 8:23) Lɛ wi tray fɔ falamakata di we aw dɛn biliv Gɔd ɛn aw dɛn rɛdi fɔ du wetin Gɔd want.—Di Ibru Pipul Dɛn 13:7.

• Wetin mek sakit ovasia dɛn kin go na di difrɛn difrɛn kɔngrigeshɔn dɛn?

• Aw yu go bɛnifit we dɛn kam na di kɔngrigeshɔn?