Yu dɔn ɛva de nia sɔmbɔdi we in pɔsin we i lɛk day ɛn yu nɔ ebul fɔ ɛp am? Sɔntɛnde, wi nɔ kin no wetin fɔ se ɔ du, so wi nɔ kin ebul fɔ se ɔ du natin. Bɔt sɔm tin dɛn de we wi kin du fɔ ɛp di pɔsin.

Bɔku tɛm, ɔl wetin yu nid fɔ du na fɔ go na di bɛrin os ɛn tɛl “ɔsh fɔ bɛrin.” Insay bɔku kɔntri dɛn, we yu ɔg di pɔsin ɔ kwis in an saful wan, na wan fayn we fɔ sho se yu bisin bɔt am. If di pɔsin want fɔ tɔk, i go fayn fɔ lisin ɛn sho se yu rili sɔri fɔ am. Di bɛst tin we yu go du, na fɔ du sɔntin fɔ di famili we dɛn pɔsin day, sɔntɛm yu kin du sɔm wok dɛn we di wan we in pɔsin day nɔ ebul fɔ du, lɛk fɔ kuk, fɔ kia fɔ di pikin dɛn, ɔ ɛp fɔ arenj fɔ di bɛrin if dɛn want lɛ yu du dat. Dɛn tin ya we yu go du go rili ɛp pas ɛni wɔd we yu go tɔk fɔ kɔrej di pɔsin.

As tɛm de go, yu kin tɔk bɔt di pɔsin we bin dɔn day, sɔntɛm yu kin tɔk bɔt sɔm gud kwaliti dɛn we di pɔsin bin gɛt ɔ sɔm tin dɛn we una bin du togɛda we mek una gladi. Dɛn kayn tɔk ya kin ivin mek di wan we in pɔsin day smayl. Fɔ ɛgzampul, we wan uman we nem Pam, in man bin day, i bin tɔk se: “Pipul dɛn kin tɛl mi gud tin dɛn we mi man bin du to dɛn we a nɔ ɛva no bɔt, ɛn dat kin mek a fil fayn.” Pam in man nem Ian, ɛn i dɔn pas siks ia naw we i dɔn day.

We masta sabi bukman dɛn bin du wan stɔdi, dɛn kam fɔ no se we sɔmbɔdi in pɔsin day, bɔku pipul dɛn kin kam fɔ ɛp am, bɔt afta sɔm tɛm, dɛn kin fɔgɛt bɔt am ɛn ɔlman kin go pan in yon biznɛs. Dis rili sɔri. So, i go fayn fɔ lɛ yu mek am abit fɔ kɔntinyu fɔ tɔk wit yu padi we in pɔsin bin dɔn day. * Bɔku pipul dɛn we dɛn pɔsin dɔn day kin gladi we sɔmbɔdi go fɛn dɛn, dɛn tɛm dɛn de, bikɔs i kin ɛp dɛn fɔ bia di pen we dɔn de na dɛn at fɔ lɔng tɛm.

Wan ɔda ɛgzampul na bɔt wan yɔŋ Jepaniz uman we nem Kaɔri. Kaɔri in at bin pwɛl bad bad wan we in mama bin day ɛn afta wan ia tri mɔnt, in big sista sɛf day. Tɛl Gɔd tɛnki in padi dɛn bin de ɛp am. Wan pan in padi dɛn nem Ritsuko. Ritsuko bin big fɔ Kaɔri fa fawe bɔt i bin tray fɔ bi in tayt padi. Kaɔri tɔk se: “Fɔ tru, a nɔ bin gladi bɔt dat. A nɔ bin want ɛnibɔdi fɔ tek mi mama in ples, ɛn a nɔ bin tink se ɛnibɔdi go du dat. Bɔt di kayn we aw Mama Ritsuko bin de trit mi, bin mek a kam nia am mɔ ɛn mɔ. Ɛni wik, wi bin de go prich togɛda ɛn go Kristian mitin togɛda. I bin de invayt mi fɔ drink ti wit am, briŋ it fɔ mi, ɛn i bin de rayt lɛta to mi ɛn sɛn kad dɛn to mi bɔku tɛm. Di fayn we aw Mama Ritsuko bin de trit mi bin rili ɛp mi.”

Twɛlv ia dɔn pas frɔm we Kaɔri in mama bin day, ɛn tide in ɛn in man de yuz ɔl dɛn tɛm fɔ sav Jiova. Kaɔri tɔk se: “Mama Ritsuko de kɔntinyu fɔ sho se i bisin bɔt mi. We a kin go bak na di tɔŋ we a kɔmɔt, a kin go fɛn am ɔltɛm ɛn a kin ɛnjɔy di tɛm we mi ɛn in kin spɛn togɛda.”

Wan ɔda ɛgzampul bɔt sɔmbɔdi we dɛn bin de ɛp ɛn we bin bɛnifit, na wan uman we nem Pɔli. Pɔli na Jiova Witnɛs we de na Sayprɔs. Pɔli bin gɛt gud man we nem Sɔzos. In man bin sɛt fayn ɛgzampul as ɛlda bay we i bin de invayt dɛn pikin dɛn we nɔ gɛt mama ɛn papa ɛn dɛn uman dɛn we dɛn man dɛn dɔn day, na dɛn os fɔ lɛ dɛn spɛn tɛm ɛn it togɛda. (Jems 1:​27) I sɔri fɔ no se in man Sɔzos bin day we i ol 53 ia ɛn na bren kansa bin kil am. Pɔli tɔk se: “Mi man we bin fetful to mi bin day afta we wi dɔn mared fɔ 33 ia.”

Afta di bɛrin, Pɔli bin muf go na Kanada wit in las bɔbɔ we nem Daniɛl we ol 15 ia. Na de,  dɛn bigin go Kristian mitin wit dɛn kɔmpin Jiova Witnɛs dɛn. Pɔli bin se: “Di padi dɛn na di nyu kɔngrigeshɔn, nɔ bin no natin bɔt wetin bin dɔn apin to wi ɛn di prɔblɛm dɛn we wi gɛt. Bɔt dat nɔ bin stɔp dɛn fɔ kam tɔk fayn wan to wi ɛn du difrɛn tin dɛn fɔ ɛp wi. Dɛn bin ɛp wi di tɛm we mi bɔy pikin bin rili nid in papa ɛn dat bin rili fayn! Di wan dɛn we de bifo na di kɔngrigeshɔn bin rili sho se dɛn bisin bɔt Daniɛl. Wan pan dɛn kin mek shɔ se i kɔl Daniɛl fɔ jɔyn am we in ɛn in padi dɛn de spɛn tɛm togɛda ɔ we dɛn de go ple bɔl.” Tide, Pɔli ɛn in bɔy pikin de du wɛl.

Fɔ tru, bɔku we dɛn de we wi kin ɛp ɛn kɔrej di wan dɛn we dɛn pɔsin dɔn day. Di Baybul sɛf de ɛp fɔ kɔrej wi bikɔs i tɛl wi bɔt di op we de tumara bambay fɔ di wan dɛn we dɔn day.