Filisa: A mɛn na wan simpul famili na Spen. Mi famili na bin Katolik ɛn wi bin rili lɛk Gɔd biznɛs. Fɔseka dat, 13 pan mi fambul dɛn na bin fada dɛn ɔ dɛn bin de wok fɔ di chɔch. Mi mama in kɔzin na bin fada ɛn na bin ticha na wan Katolik skul. Afta i day, Pop Jɔn Pɔl di Sɛkɔn bin ɔnɔ am bay we i tɔk se mi mama in kɔzin na sent. Mi papa na bin blaksmit, ɛn mi mama bin de wok na fam. Na wi et dɛn bin bɔn, ɛn na mi na bin di big wan.

We a bin ol 12 ia, dɛn bin bigin fɔ fɛt wɔ na Spen. We di wɔ dɔn, dɛn bin put mi papa na prizin bikɔs di gɔvmɛnt nɔ bin lɛk wetin i bin de tink bɔt dɛn. I nɔ bin izi fɔ mek mi mama fɛn tin fɔ it fɔ wi ɔl. So i bin kɛr mi tri smɔl sista dɛn, we nem Aresɛli, Lɔri, ɛn Ramoni, fɔ go de wit mɔda dɛn na kɔnvɛnt na wan siti we nem Bilboa. Mi sista dɛn go gɛt bɔku tin fɔ it we dɛn de de.

Aresɛli: Da tɛm de a bin ol 14 ia, Lɔri bin ol 12 ia, ɛn Ramoni bin ol 10 ia. Wi bin rili mis wi famili. Di wok we wi bin de du na di kɔnvɛnt na fɔ klin. Afta tu ia, di mɔda dɛn bin mek wi go na wan big kɔnvɛnt we de na Zaragoza we de kia fɔ ol pipul dɛn. Wi bin de wok tranga wan fɔ klin di kichin, ɛn dis bin de mek wi rili taya.

Filisa: We mi sista dɛn bin go na di kɔnvɛnt na Zaragoza, mi mama ɛn mi ɔnkul we na bin fada na di tɔŋ, bin disayd fɔ sɛn misɛf de.  Dɛn bin want mek a avɔyd wan bɔbɔ we bin lɛk mi. A bin rili want fɔ de na kɔnvɛnt bikɔs a lɛk Gɔd. A bin de go chɔch ɛnide, ɛn a bin ivin want fɔ bi Katolik mishɔnari lɛk mi kɔzin we de na Afrika.

Bɔt we a de na di kɔnvɛnt, a bin kam fɔ si se a nɔ go ebul fɔ du bɔku tin dɛn we a bin want fɔ du. Di mɔda dɛn nɔ bin ɛnkɔrej mi fɔ go na ɔda kɔntri fɔ sav Gɔd, lɛk aw a bin op se i go bi. So afta wan ia, a bin go bak na os ɛn kia fɔ mi ɔnkul we na fada. Na mi bin de du in os wok dɛn fɔ am ɛn wi bin de pre di Rozri prea togɛda ɛni ivintɛm. A bin lɛk fɔ de arenj di flawa dɛn na di chɔch ɛn drɛs Meri in imej dɛn ɛn di “sent dɛn.”

Aresɛli: We a bin de na Zaragoza, a bin tek di fɔs vaw we fɔ mek a bi mɔda. Dɔn di mɔda dɛn disayd fɔ sɛn mi ɛn mi sista dɛn na difrɛn say dɛn. So dɛn sɛn mi na wan kɔnvɛnt we de na Madrid ɛn dɛn sɛn Lɔri na wan kɔnvɛnt na Valɛnshia. Ramoni bin lɛf na Zaragoza. Na Madrid, a tek mi sɛkɔn vaw we fɔ mek a bi mɔda. Bɔku pipul dɛn bin kam de na di kɔnvɛnt, pipul dɛn lɛk studɛnt dɛn ɛn ol pipul dɛn. So bɔku wok dɛn bin de fɔ du. A bin de wok na di ɔspitul we de na di kɔnvɛnt.

A bin de wet fɔ di tɛm we a go bi mɔda. A bin tink se wi go spɛn mɔ tɛm fɔ rid di Baybul ɛn lan bɔt am. Bɔt mi at bin pwɛl. Nɔbɔdi nɔ bin de yuz di Baybul ɔ ivin tɔk bɔt Gɔd ɔ Jizɔs. A bin lan Latin, a stɔdi bɔt Katolik “sent dɛn,” ɛn a bin de wɔship Meri. Bɔt bɔku tɛm, na tranga tranga wok dɛn wi bin de du.

A bin bigin fɔ wɔri. A bin tink se a bin fɔ dɔn de fɛn mɔni fɔ ɛp mi famili bifo a de wok na kɔnvɛnt fɔ mek ɔda pipul dɛn jɛntri. So a bin tɔk to di wan we de oba wi ɔl na di kɔnvɛnt we dɛn kɔl mɔda supiriɔ ɛn a bin tɛl am se a want fɔ go. Bɔt i lɔk mi na rum. I bin tink se we i du mi dat, a nɔ go go.

Di mɔda dɛn pul mi na di rum, bɔt we dɛn bin si se a stil want fɔ kɔmɔt na di kɔnvɛnt, dɛn lɔk mi bak na di rum. Afta dɛn dɔn du am tri tɛm, dɛn se dɛn go mek a go if a rayt dɛn wɔd dɛn ya we se: “A de go bikɔs a want fɔ sav Setan bifo a sav Gɔd.” A bin shɔk. A bin rili want fɔ go, bɔt a nɔ go rayt dɛn wɔd dɛn de. So a se a want fɔ tɔk to wan pan di fada dɛn, ɛn tɛl am wetin dɔn apin. Di bishɔp bin tɛl di fada se dɛn fɔ sɛn mi bak na di kɔnvɛnt we de na Zaragoza. Afta sɔm mɔnt we a bin de de, dɛn bin alaw mi fɔ go. Jɔs afta dat, Lɔri ɛn Ramoni bin kɔmɔt na di kɔnvɛnt.

Filisa: Afta sɔm tɛm leta, a bin mared ɛn a bin go de na wan tɔŋ we de na Spen we dɛn kɔl Kantabria. A bin stil de go chɔch fast fast. A bin de na chɔch wan Sɔnde, di fada vɛks ɛn ala lawd wan se: “Una luk dis buk!” I sho wi di buk we gɛt di taytul The Truth That Leads to Eternal Life. I se: “If ɛnibɔdi gi una dis buk, una fɔ gi mi am ɔ una trowe am!”

A nɔ bin gɛt da buk de, bɔt a bin want am. Dɔn afta sɔm dez, tu uman dɛn bin kam na mi os. Na bin Jiova Witnɛs dɛn, ɛn dɛn bin gi mi da buk de. A bin rid am da sem nɛt de. We di uman dɛn bin kam bak, dɛn aks mi if a want fɔ stɔdi di Baybul, ɛn a bin ansa dɛn se yɛs, a want fɔ stɔdi.

A bin want fɔ du wetin Gɔd want ɔltɛm. Dɔn a lan di tru tin dɛn bɔt Jiova, ɛn a bin bigin fɔ lɛk am mɔ ɛn mɔ. A bin want fɔ tɛl ɔlman bɔt am. A bin baptayz insay 1973. Ɛnitɛm we a gɛt chans, a kin tray fɔ tɔk to mi famili bɔt di trut. Bɔt mi famili, ɛn mɔ mi sista we na Aresɛli, bin pin se na rɔng tin a biliv.

Aresɛli: Bikɔs dɛn bin rili trit mi bad we a bin de na kɔnvɛnt, a bin vɛks ɛn a nɔ bin gladi wit mi rilijɔn. Bɔt a bin kɔntinyu fɔ de go na chɔch Sɔnde, ɛn a bin de pre di Rozri prea ɛni de. A bin stil want fɔ ɔndastand di Baybul, ɛn a bin aks Gɔd fɔ ɛp mi. Dɔn Filisa bin tɛl mi wetin i dɔn lan. Di we aw i bin gladi fɔ wetin i biliv bin mek a tink se i dɔn kres. A nɔ bin gri wit wetin i bin de tɔk.

Leta, a go bak na Madrid fɔ wok ɛn a bin mared. Afta sɔm tɛm, a bin kam fɔ notis se pipul dɛn we de go na chɔch fast fast nɔ de liv bay di tin dɛn we Jizɔs bin tich. So a bin lɛf fɔ go na chɔch. A nɔ bin ɛva biliv pan “sent dɛn” ɔ ɛlfaya, ɛn a nɔ bin tink se fada go fɔgiv pɔsin in sin dɛn. A ivin trowe ɔl di imej dɛn we rilijɔn dɛn kin yuz na chɔch. A nɔ bin no if na di rayt tin a bin de du. Mi at bin pwɛl, bɔt a bin kɔntinyu fɔ pre to Gɔd. A bin de pre se: “A want fɔ no yu. Ɛp mi!” A mɛmba se Jiova Witnɛs dɛn bin de nak na mi domɔt bɔku tɛm, bɔt a nɔ ɛva opin fɔ dɛn. A nɔ biliv ɛni rilijɔn.

 Mi sista Lɔri bin de na Frans, ɛn Ramoni bin de na Spen. Arawnd 1980, dɛn bin bigin fɔ stɔdi di Baybul wit Jiova Witnɛs dɛn. A bin shɔ se, lɛk Filisa, dɛn nɔ bin no se na lay lay tin dɛn, dɛn bin de lan. Leta, a mit wan pan mi neba dɛn we nem Anjɛlin, ɛn wi ɔl tu bi tayt padi. Insɛf na bin Jiova Witnɛs. Anjɛlin ɛn in man bin de aks mi bɔku tɛm if a want mek dɛn stɔdi di Baybul wit mi. Dɛn bin kam fɔ no se pan ɔl we a se a nɔ bisin bɔt rilijɔn, a bin rili want fɔ stɔdi di Baybul. Dɔn a tɛl dɛn se: “Oke, a gri. Bɔt a go gri fɔ mek una stɔdi di Baybul wit mi if a yuz mi yon Baybul!” A bin gɛt wan Baybul we nem Nácar-Colunga.

Filisa: We a bin baptayz insay 1973, na lɛk 70 Witnɛs dɛn bin de na di kapital siti we nem Santanda insay Kentabria. Wi bin de travul go fa fa ples dɛn fɔ prich to ɔl di pipul dɛn na bɔku bɔku vilej dɛn we de na di tɔŋ. So wi bin de travul bay bɔs, ɛn leta wi bin de yuz motoka fɔ go na di vilej dɛn.

As tɛm de go, a bin stɔdi di Baybul wit bɔku pipul dɛn ɛn 11 pan dɛn bin baptayz. Bɔku pan di pipul dɛn we a bin stɔdi di Baybul wit na bin Katolik. A bin nid fɔ peshɛnt wit dɛn. Jɔs lɛk mi, dɛn bin rili nid tɛm fɔ no se wetin dɛn biliv rɔng. A bin no se na di Baybul nɔmɔ ɛn Jiova in oli spirit go ɛp pɔsin fɔ chenj di we aw i de tink ɛn fɔ ɔndastand di trut. (Di Ibru Pipul Dɛn 4:​12) Mi man, we nem Biɛnvɛnido, we na bin polisman, bin baptayz insay 1979, ɛn mi mama bin bigin fɔ stɔdi di Baybul jɔs bifo di tɛm we i day.

Aresɛli: We a bin bigin fɔ stɔdi di Baybul wit Jiova Witnɛs dɛn a bin fil se a nɔ fɔ biliv dɛn. Bɔt as tɛm de go, a nɔ bin fil da we de igen. Di Witnɛs dɛn nɔ de tich pipul dɛn di Baybul nɔmɔ bɔt dɛn de liv bay wetin dɛn de tich. A bigin fɔ gɛt strɔng fet pan Jiova ɛn di Baybul, ɛn dat bin mek a gladi mɔ. Sɔm pan mi neba dɛn notis di we aw mi layf de chenj ɛn dɛn tɛl mi se: “Aresɛli, kɔntinyu fɔ lan wetin yu de lan so!”

A mɛmba we a bin de pre se: “Tɛnki Jiova, fɔ we yu nɔ taya pan mi ɛn fɔ we yu dɔn gi mi bɔku bɔku chans fɔ fɛn wetin a bin de luk fɔ; dat na di tru tin bɔt di Baybul.” A tɛl mi sista we na Filisa se mek i fɔgiv mi fɔ di bad we we a bin tɔk to am. Frɔm da tɛm de, bifo wi agyu, wi bin de ɛnjɔy we wi de tɔk bɔt di Baybul. We a bin ol 61 ia, a bin baptayz insay 1989.

Filisa: Na 91 ia a ol naw. Mi man bin dɔn day, ɛn naw a nɔ ebul fɔ du bɔku tin dɛn lɛk aw a bin dɔn yus fɔ du. Bɔt a stil de rid di Baybul ɛnide, a kin go di mitin dɛn ɛn a kin go prich ɛnitɛm we a ebul.

Aresɛli: A lɛk fɔ tɔk bɔt Jiova to ɔl di fada ɛn di mɔda dɛn we a kin mit, sɔntɛm na bikɔs mi na bin mɔda. A dɔn ɛnjɔy fɔ tɔk wit sɔm pan dɛn, ɛn bɔku pan dɛn dɔn tek buk ɛn magazin dɛn. A mɛmba wan patikyula fada. Afta a bin tɔk to am fɔ sɔm tɛm, i bin gri wit wetin a bin de se. Dɔn i bin tɛl mi se: “Bɔt usay a go go we a dɔn ol so? Wetin mi chɔch mɛmba dɛn ɛn mi fambul dɛn go se?” A aks am se: “Ɛn wetin Gɔd go se?” I bin kam fɔ no se na di rayt tin a bin tɔk, ɛn a bin si se in at bin pwɛl. Bɔt i bin tan lɛk se i nɔ bin gɛt maynd fɔ chenj.

A nɔ go ɛva fɔgɛt di tɛm we mi man tɛl mi se i want fɔ go na mitin wit mi. Di fɔstɛm we mi man bin kam na mitin, i bin dɔn pas 80 ia, ɛn frɔm da tɛm de i nɔ bin wande mis mitin. I bin stɔdi di Baybul ɛn i bin bigin fɔ prich. A stil de mɛmba di gud tɛm dɛn we wi bin spɛn togɛda we mi ɛn in bin de prich. I bin day tu mɔnt bifo di de we i fɔ baptayz.

Filisa: We a bigin fɔ sav Jiova, mi tri smɔl sista dɛn bin de agens mi. Bɔt leta, dɛnsɛf bin tek di trut. Dat na wan pan di bɛst tin dɛn we dɔn ɛva apin to mi. Afta dat, wi bin de ɛnjɔy we wi de spɛn tɛm togɛda ɛn tɔk bɔt wi Gɔd, Jiova ɛn in Wɔd! Ɛn wi ɔl bin de wɔship Jiova. *