INSAY Jɛnɛsis chapta 22, di Baybul se Gɔd bin tɛl Ebraam fɔ lɛf in os ɛn travul go fa fa say fɔ go mek sakrifays. Di Baybul se: ‘Ebraam gi Ayzak di wud fɔ tot. Dɔn Ebraam insɛf ol di nɛf ɛn ɔltin we i fɔ tek mek di faya, as dɛn tu de go.’—Jɛnɛsis 22:6.

Di Baybul nɔ tɔk bɔt aw pipul dɛn we bin de trade bin de mek faya. So fɔ se Ebraam ɛn Ayzak bin layt faya ɛn waka wit am as dɛn de go? Wan man we de tɔk bɔt di Baybul bin se i nɔ pɔsibul fɔ mek yu layt faya ɛn “di faya kɔntinyu fɔ kech we yu de travul go fa fa say.” Bifo dat, i go mɔs bi se Ebraam ɛn in bɔypikin go dɔn tek ɔl wetin dɛn go nid fɔ mek faya.

Bɔt ɔda pipul dɛn se i nɔ bin izi fɔ mek pipul dɛn mek faya dɛn tɛm dɛn de. So ɛni tɛm we pipul dɛn gɛt chans, dɛn kin mek faya bay we dɛn de tek chakol frɔm faya we de kech, sɔntɛm i go bi se dɛn go tek am na dɛn neba in fayasay. Bɔku masta sabi bukman dɛn biliv se Ebraam bin tek chakol na fayasay we bin de kɛch bifo i travul. I go dɔn put dɛn insay wan pɔt we sɔntɛm bin ɛng pan chen, ɛn di pɔt go dɔn de wit am we i bin de travul. (Ayzaya 30:14) Dɔn i go dɔn yuz di kol dɛn we gɛt faya ɛn af af dray stik dɛn ɛnitɛm we i want fɔ mek faya.