1-2. (a) Wetin Gɔd bin tɛl Jizɔs in tri apɔsul dɛn fɔ du? Wetin dɛn bin du? (b) Wetin wi go tɔk bɔt insay dis atikul?

 AFTA di Pasova insay di ia 32 afta Krays, apɔsul Pita, Jems, ɛn Jɔn bin si wan wɔndaful vishɔn. Na ɔp wan ay mawntin, i go bi se na Mawnt Amɔn, na de Jizɔs bin chenj bifo dɛn. “In fes bin de shayn lɛk di san, ɛn di klos we i wɛr pantap bin brayt lɛk layt.” (Mat. 17:​1-4) We di vishɔn de dɔn, di apɔsul dɛn bin yɛri Gɔd tɔk se: “Na mi Pikin dis, di wan we a rili lɛk, ɛn a gladi fɔ am. Una lisin to am.” (Mat. 17:​5) Di tri apɔsul dɛn bin pruv se dɛn de lisin to Jizɔs bay di we aw dɛn bin de liv dɛn layf afta da vishɔn de. Wi want fɔ falamakata dɛn ɛgzampul.

² Insay di atikul bifo dis wan, wi bin lan se fɔ lisin to Jizɔs in vɔys min se wi fɔ lɛf fɔ du sɔm tin dɛn. Insay dis atikul, wi go tɔk bɔt tu tin dɛn we Jizɔs se wi fɔ du.

3. Akɔdin to Matyu 7:​13, 14, wetin wi fɔ du?

³ Rid Matyu 7:​13, 14. Notis se Jizɔs bin tɔk bɔt tu difrɛn get dɛn we de lid to tu difrɛn rod dɛn. Wan na rod we “wayd” ɛn di ɔda wan na rod we “nɔ big.” Jizɔs nɔ tɔk bɔt tɔd rod. Wi fɔ pik fɔ wisɛf us rod wi go want fɔ yuz. Dis na di tin we impɔtant pas ɔl we wi fɔ disayd,  bikɔs na wan rod nɔmɔ go mek wi gɛt layf we go de sote go.

4. Wetin yu go se bɔt di rod we “wayd”?

⁴ Wi nid fɔ mɛmba di difrɛns dɛn we de bitwin di tu rod dɛn. Bɔku pipul dɛn de waka na di rod we “wayd” bikɔs i izi fɔ waka. I sɔri fɔ no se bɔku pan dɛn dɔn disayd fɔ kɔntinyu fɔ waka na da rod de ɛn du di sem tin we ɔlman de du. Dɛn nɔ de si se Setan de tray fɔ mek bɔku pipul dɛn waka na dis rod, ɛn dis in rod go mek dɛn ɛnd-ɔp fɔ day.—1 Kɔr. 6:​9, 10; 1 Jɔn 5:​19.

5. Aw sɔm pipul dɛn dɔn tray tranga wan fɔ fɛn di rod we “nɔ big” ɛn bigin fɔ waka de?

⁵ Bɔt di ɔda rod we Jizɔs bin tɔk bɔt na rod we “nɔ big,” ɛn Jizɔs bin se di pipul dɛn we go fɛn da rod de nɔ bɔku. Wetin mek? I fayn fɔ no se insay di nɛks vas, Jizɔs bin wɔn in disaypul dɛn agens lay lay prɔfɛt dɛn. (Mat. 7:​15) Sɔm pipul dɛn se bɔku rilijɔn dɛn de, ɛn bɔku pan dɛn se dɛn de tich di trut. Bikɔs di rilijɔn dɛn so bɔku, dis dɔn mek bɔku pipul dɛn at pwɛl ɛn dɛn kɔnfyus, ɛn dɛn nɔ de ivin tray fɔ luk fɔ di rod we go mek dɛn gɛt layf. Bɔt pɔsin go ebul fɔ fɛn da rod de. Jizɔs bin se: “If una de du wetin a tɛl una fɔ du, una na mi tru tru disaypul dɛn, ɛn una go no di trut, ɛn di trut go fri una.” (Jɔn 8:​31, 32) I rili fayn we yu nɔ fala di bɔku pipul dɛn, bifo dat, yu tray fɔ luk fɔ di trut. Yu bigin fɔ stɔdi Gɔd in Wɔd gud gud wan fɔ lan wetin i want wi fɔ du, ɛn yu lisin to Jizɔs in tichin dɛn. Yu lan se Jiova de ɛkspɛkt wi fɔ tɔn wi bak pan lay lay rilijɔn ɛn fɔ lɛf fɔ sɛlibret ɔlide dɛn we kɔmɔt frɔm lay lay rilijɔn. Dɔn, yu bin lan bak se i nɔ go izi fɔ du wetin Jiova want ɛn fɔ mek chenj dɛn na yu layf fɔ mek Jiova gladi. (Mat. 10:​34-36) Sɔntɛm i nɔ bin izi fɔ yu fɔ mek dɛn chenj dɛn de na yu layf. Bɔt yu bin kɔntinyu fɔ tray tranga wan fɔ chenj bikɔs yu lɛk yu Papa we de na ɛvin ɛn want fɔ mek i gladi. I rili gladi fɔ dɛn chenj dɛn de we yu mek.—Prɔv. 27:​11.

6. Akɔdin to Sam 119:​9, 10, 45, 133, wetin go ɛp wi fɔ kɔntinyu fɔ waka na di rod we nɔ big?

⁶ We wi dɔn bigin fɔ waka na di rod we nɔ big, wetin go ɛp wi fɔ kɔntinyu fɔ waka de? Lɛ wi tɔk bɔt dis ɛgzampul. Insay sɔm kɔntri dɛn, dɛn kin mek relin na smɔl rod we de ɔp mawntin, fɔ gayd di drayva ɛn in motoka. Dis relin de protɛkt pipul dɛn fɔ mek dɛn nɔ go nia di ɛj ɔ fɔ mek dɛn nɔ go tɔnɔbɔ. Nɔbɔdi nɔ go tɔk se da kayn relin de go mek di rod tayt fɔ dɛn. Jiova in lɔ dɛn we de na di Baybul tan lɛk da relin de. In lɔ dɛn de ɛp wi fɔ kɔntinyu fɔ waka na di rod we nɔ big.—Rid Sam 119:​9, 10, 45, 133.

7. Aw yɔŋ wan dɛn fɔ si di rod we nɔ big?

⁷ Yɔŋ wan dɛn, sɔntɛnde una kin fil se Jiova in lɔ dɛn tu at fɔ obe? Na so Setan want una fɔ tink. I want una fɔ pe atɛnshɔn fɔ du tin dɛn we di wan dɛn we de waka na di rod we wayd de du, bikɔs i tan lɛk se dɛn rili de ɛnjɔy. I go yuz wetin una kɔmpin dɛn na skul de du, ɔ wetin yu de si na di Intanɛt fɔ mek yu fil se yu nɔ de ɛnjɔy  layf. Setan want yu fɔ tink se Jiova in lɔ dɛn nɔ go mek yu rili ɛnjɔy yu layf. * Bɔt mɛmba dis: Setan nɔ want di wan dɛn we de waka na di rod we wayd fɔ si wetin go apin to dɛn tumara bambay. Bɔt Jiova dɔn sho una klia wan di blɛsin dɛn we i go gi di wan dɛn we de kɔntinyu fɔ waka na di rod we de gi layf.—Sam 37:​29; Ayz. 35:​5, 6; 65:​21-23.

8. Wetin yɔŋ wan dɛn go lan frɔm Olaf in ɛgzampul?

⁸ Lɛ wi tɔk bɔt wetin yu go lan frɔm wan yɔŋ brɔda we nem Olaf in ɛkspiriɛns. * In klasmet dɛn bin de prɛzhɔ am fɔ du mami ɛn dadi biznɛs di we aw Gɔd nɔ want. We i ɛksplen se Jiova Witnɛs dɛn de fala wetin di  Baybul se bɔt mami ɛn dadi biznɛs, sɔm titi dɛn na in klas kɔntinyu fɔ prɛzhɔ am mɔ ɛn mɔ fɔ mek i go du mami ɛn dadi biznɛs wit dɛn. Bɔt Olaf bin tinap tranga wan fɔ du wetin rayt. Ɛn nɔto dis nɔmɔ dɛn bin de prɛzhɔ Olaf fɔ. Olaf se: “Mi ticha dɛn bin de tray fɔ mek a biliv se a fɔ go yunivasiti, bikɔs na dat go mek pipul dɛn rɛspɛkt mi. Dɛn bin tɛl mi se if a nɔ du dat, a nɔ go gɛt gud wok ɔ gɛt gladi-at.” Wetin bin ɛp Olaf fɔ tinap tranga wan? I tɔk se: “A tray fɔ gɛt tayt padi biznɛs wit di brɔda ɛn sista dɛn na mi kɔngrigeshɔn. Dɛn bin tan lɛk famili to mi. Dɔn bak, a stat fɔ stɔdi di Baybul gud gud wan. Di mɔ we a bin de stɔdi, na di mɔ a kam fɔ biliv se dis na di trut. So dat bin mek a mekɔp mi maynd fɔ sav Jiova.”

9. If pɔsin want fɔ kɔntinyu fɔ de na di rod we nɔ big, wetin i fɔ du?

⁹ Setan go want fɔ mek yu kɔmɔt na di rod we go mek yu gɛt layf. I want fɔ mek yu jɔyn di bɔku pipul dɛn we de na di rod we wayd we “go mek pɔsin ɛnd-ɔp fɔ day.” (Mat. 7:​13) Bɔt wi go kɔntinyu fɔ de na di rod we nɔ big if wi kɔntinyu fɔ lisin to Jizɔs ɛn si se da rod de de protɛkt wi. Naw, lɛ wi tɔk bɔt ɔda tin we Jizɔs bin se wi fɔ du.

10. Akɔdin to Matyu 5:​23, 24, wetin Jizɔs bin se wi fɔ du?

¹⁰ Rid Matyu 5:​23, 24. Na dɛn vas dɛn ya, Jizɔs bin tɔk bɔt wan program we bin rili impɔtant to di Ju dɛn we bin de lisin to am. Imajin se pɔsin de na di tɛmpul, ɛn i dɔn rɛdi fɔ gi in animal to di prist as sakrifays. If di pɔsin mɛmba da tɛm de se in brɔda nɔ gladi wit am, i fɔ lɛf di animal ɛn “go.” Wetin mek? Bikɔs bifo i gi in gift to Jiova, i nid fɔ du sɔntin we impɔtant pas wetin i kam fɔ du so. Jizɔs bin tɔk klia wan se: “Go mek pis fɔs wit yu brɔda.”

11. Wetin Jekɔb bin du fɔ mek pis wit Isɔ?

¹¹ Wi kin lan fayn lɛsin dɛn bɔt aw fɔ mek pis frɔm wetin bin apin to Jekɔb. Afta Jekɔb bin dɔn lɛf in om-tɔŋ fɔ lɛk 20 ia, Gɔd bin yuz wan enjɛl fɔ tɛl am fɔ go bak. (Jɛn. 31:​11, 13, 38) Bɔt prɔblɛm bin de. In big brɔda, Isɔ, bin want fɔ kil am. (Jɛn. 27:​41) Jekɔb bin de rili “fred” ɛn i bin wɔri se in brɔda stil vɛks pan am. (Jɛn. 32:​7) Wetin Jekɔb bin du fɔ mek pis wit in brɔda? Fɔs, i bin pre to Jiova wit ɔl in at bɔt di prɔblɛm. Dɔn, i sɛn bɔku gift to Isɔ. (Jɛn. 32:​9-15) Faynali, we i si Isɔ, na in fɔs go fɔ sho ɔnɔ to am. I butu bifo Isɔ; i nɔ jɔs butu bifo am wan ɔ tu tɛm, bɔt sɛvin tɛm! Jekɔb bin ɔmbul, i sho rɛspɛkt to Isɔ, ɛn i mek pis wit am.—Jɛn. 33:​3, 4.

12. Wetin wi lan frɔm Jekɔb in ɛgzampul?

¹² Wi lan fayn lɛsin frɔm aw Jekɔb bin pripia fɔ go mit in brɔda ɛn wetin i bin du we i mit am. Jekɔb bin put insɛf dɔŋ ɛn aks Jiova fɔ ɛp am. Dɔn i bin sho se i min wetin i pre fɔ bay we i bin du in bɛst fɔ mek pis wit in brɔda. We dɛn ɔl tu mit, Jekɔb nɔ bin agyu wit Isɔ bɔt udat rayt ɛn udat rɔŋ. Di tin we Jekɔb bin want na fɔ mek pis wit in brɔda. Aw wi go falamakata Jekɔb in ɛgzampul?

13-14. Wetin wi fɔ du if wi dɔn ɔfɛn wi kɔmpin Kristian?

¹³ If wi want fɔ waka na di rod we go mek wi gɛt layf, wi fɔ kɔntinyu fɔ mek pis wit wi brɔda ɛn sista dɛn. (Rom. 12:​18) Wetin wi fɔ du if wi kam fɔ no se wi dɔn ɔfɛn wi kɔmpin Kristian? Lɛk Jekɔb, wi fɔ pre to Jiova wit ɔl wi at. Wi kin aks am fɔ ɛp wi fɔ mek pis wit wi brɔda ɔ sista.

¹⁴ Dɔn bak, wi fɔ tek tɛm chɛk wisɛf. Wi kin aks wisɛf kwɛstyɔn dɛn lɛk: ‘A rɛdi fɔ gri se na mi rɔŋ, put misɛf dɔŋ ɛn tɛl di pɔsin sɔri, ɛn mek pis? Aw Jiova ɛn Jizɔs go fil if mi fɔs go fɔ mek pis wit mi brɔda ɔ sista?’ Wi ansa to dɛn kwɛstyɔn dɛn ya go muv wi fɔ lisin to Jizɔs ɛn put wisɛf dɔŋ fɔ go mit wi kɔmpin Kristian fɔ mek pis wit am. If wi du dis, dat min se wi de falamakata Jekɔb in ɛgzampul.

15. We wi aplay di prinsipul we de na Ɛfishians 4:​2, 3, aw dat go ɛp wi fɔ mek pis wit wi brɔda ɔ sista?

¹⁵ Tink bɔt wetin bin fɔ dɔn apin if Jekɔb bin agyu wit Isɔ bɔt udat rayt ɛn udat rɔŋ. Tin nɔ bin fɔ dɔn kɔmɔt fayn. We wi go to wi brɔda ɔ sista fɔ mek pis wit am, wi fɔ put wisɛf dɔŋ. (Rid Ɛfishians 4:​2, 3.) Prɔvabs 18:​19 se: “I at fɔ mek pis wit yu brɔda, pas fɔ kapchɔ siti we gɛt wɔl rawnd am.” We wi se sɔri to wi brɔda ɔ sista, i go ɛp am fɔ gri fɔ mek pis wit wi.

16. Wetin bak wi fɔ tink bɔt? Wetin mek?

¹⁶ Wi nid fɔ tek tɛm tink bak bɔt wetin wi go se to wi brɔda ɔ sista, ɛn aw wi go se am. We wi rɛdi, wi fɔ tɔk to di pɔsin we wi gɛt prɔblɛm wit, ɛn wi fɔ tray fɔ ɛp am fɔ gɛt tayt padi biznɛs wit wi bak. Sɔntɛm i go se tin dɛn fɔs we go mek wi fil bad. I go izi fɔ mek wi vɛks ɔ tray fɔ difɛnd wisɛf, bɔt yu tink se dat go mek wi ebul fɔ mek pis wit wi brɔda ɔ sista? Nɔ. Mɛmba se fɔ tray fɔ mek pis bak wit yu brɔda ɔ sista, impɔtant pas fɔ agyu bɔt udat rayt ɛn udat rɔŋ.—1 Kɔr. 6:​7.

17. Wetin yu lan frɔm Gilbat in ɛgzampul?

¹⁷ Wan brɔda we nem Gilbat bin de tray tranga wan fɔ mek pis. I se: “A bin de gɛt bɔku prɔblɛm dɛn wit mi  galpikin. Fɔ lɛk tu ia, a bin de tray tranga wan fɔ tɔk wit am pisful wan so dat wi go gɛt pis bak.” Wetin bak Gilbat bin du? I se: “Bifo a kin go tɔk wit mi pikin, a kin pre ɛn mɛmba misɛf se a nɔ fɔ vɛks if i tɔk sɔntin we nɔ fayn. A bin nid fɔ rɛdi fɔ fɔgiv. A lan se a nɔ fɔ tray fɔ pruv se na mi rayt, ɛn di men tin we a fɔ tray fɔ du na fɔ mek pis.” Wetin bin apin afta ɔl dis? Gilbat se: “Rayt naw, a gɛt kolat bikɔs a gɛt pis wit ɔlman na mi famili.”

18-19. Wetin wi fɔ mekɔp wi maynd fɔ du if wi dɔn ɔfɛn pɔsin? Wetin mek?

¹⁸ So wetin yu fɔ mekɔp yu maynd fɔ du we yu kam fɔ no se yu dɔn ɔfɛn yu kɔmpin Kristian? Fala wetin Jizɔs tɛl wi bɔt fɔ mek pis. Tɔk to Jiova bɔt di prɔblɛm, ɛn abop pan in oli spirit fɔ ɛp yu fɔ bi pɔsin we de mek pis. If yu du dat, yu go gladi, ɛn yu go sho se yu de lisin to Jizɔs.—Mat. 5:​9.

¹⁹ Wi gladi we Jiova de yuz Jizɔs Krays, we na di wan we “de oba di kɔngrigeshɔn,” fɔ tɛl wi wetin fɔ du. (Ɛfi. 5:​23) Lɛ wi mekɔp wi maynd fɔ “lisin to am,” lɛk aw apɔsul Pita, Jems, ɛn Jɔn bin du. (Mat. 17:​5) Wi dɔn lan bɔt aw wi go du dat bay we wi de mek pis wit wi kɔmpin Kristian dɛn we wi dɔn ɔfɛn. We wi du dat, ɛn we wi kɔntinyu fɔ de na di rod we nɔ big we go mek wi gɛt layf, wi go gɛt bɔku blɛsin dɛn naw, ɛn tumara bambay wi go gɛt gladi-at sote go.