1. Wetin na wan rizin we go dɔn mek Jizɔs bin kɔmpia di wan dɛn we de fala am to ship dɛn?

 JIZƆS bin kɔmpia in padi biznɛs wit in disaypul dɛn to di tayt padi biznɛs we de bitwin shɛpad ɛn in ship dɛn. (Jɔn 10:​14) Dat na fayn ɛgzampul. Di ship dɛn no dɛn shɛpad, ɛn dɛn de lisin to in vɔys. Wan man we bin de travul bin si we dis apin. I bin se: “Wi bin want fɔ snap sɔm ship dɛn, ɛn so wi tray fɔ mek dɛn kam nia wi. Bɔt dɛn nɔ bin fala wi bikɔs dɛn nɔ no wi vɔys dɛn. Dɔn wan smɔl shɛpad bɔbɔ kam; ɛn as i kɔl dɛn so, dɛn fala am.”

2-3. (a) Aw Jizɔs in disaypul dɛn de sho se dɛn de lisin to in vɔys? (b) Wetin wi go tɔk bɔt insay dis atikul ɛn di nɛks wan?

² Da man de we de travul in ɛkspiriɛns mek wi mɛmba wetin Jizɔs bin tɔk bɔt in ship dɛn ɔ in disaypul dɛn. I bin se: “Dɛn go lisin to mi vɔys.” (Jɔn 10:​16) Bɔt Jizɔs de na ɛvin. So aw wi go lisin to am? Wan men we aw wi go sho se wi de lisin to wi Masta in vɔys na we wi du di tin dɛn we i tich wi.—Mat. 7:​24, 25.

³ Insay dis atikul ɛn di nɛks wan, wi go tɔk bɔt sɔm pan Jizɔs in tichin dɛn. As wi go lan, Jizɔs bin tich wi se wi fɔ lɛf fɔ du sɔm patikyula tin dɛn ɛn wi fɔ du ɔda tin dɛn. Bɔt fɔs, wi go tɔk bɔt tu tin dɛn we di gud shɛpad tɛl wi fɔ lɛf fɔ du.

4. Akɔdin to Lyuk 12:​29, wetin kin mek wi “wɔri pasmak”?

⁴ Rid Lyuk 12:​29. Jizɔs bin ɛnkɔrej in disaypul dɛn fɔ “lɛf fɔ wɔri pasmak” bɔt di tin dɛn we dɛn nid fɔ liv. Wi no se Jizɔs in advays mek sɛns ɛn i rayt ɔltɛm. Wi want fɔ aplay am, bɔt sɔntɛnde i nɔ kin izi fɔ du so. Wetin mek?

5. Wetin mek sɔm pipul dɛn kin wɔri bɔt di tin dɛn we dɛn nid fɔ liv?

  ⁵ Sɔm pipul dɛn kin wɔri bɔt aw dɛn go gɛt tin fɔ it, klos fɔ wɛr, ɛn say fɔ de. Sɔntɛm dɛn de na kɔntri usay bɔku pipul dɛn po ɛn i nɔ izi fɔ fɛn wok. I go bi se i nɔ izi fɔ mek dɛn gɛt mɔni we dɛn go ebul yuz fɔ kia fɔ dɛn famili. Ɔ sɔntɛm di pɔsin we de wok ɛn fɛn mɔni fɔ di famili dɔn day, ɛn so di famili nɔ gɛt mɔni fɔ di tin dɛn we dɛn nid. Sɔntɛm bɔku pipul dɛn dɔn lɔs dɛn wok dɛn bikɔs ɔf di COVID 19 pandɛmik. (Ɛkli. 9:​11) If ɛni wan pan dɛn tin dɛn ya ɔ ɛni ɔda tin dɔn apin to wi, aw wi go fala Jizɔs in advays fɔ lɛf fɔ wɔri?

6. Tɔk bɔt wetin bin apin to di apɔsul Pita wantɛm.

⁶ Wantɛm, apɔsul Pita ɛn di ɔda apɔsul dɛn bin de na wan bot na di Si na Galili we big briz bin de blo, na in dɛn si Jizɔs bin de waka pantap di wata. Pita bin se: “Masta, if na yu, tɛl mi fɔ waka pantap di wata kam mit yu.” We Jizɔs bin tɛl am fɔ “kam,” Pita bin kɔmɔt na di bot ɛn “waka pantap di wata fɔ go mit Jizɔs.” Notis wetin bin apin nɛks. “We i pe atɛnshɔn to di big briz, i fred. Ɛn we i bigin fɔ go dɔŋ di wata, i ala lawd wan se: “Masta, sev mi!’” Jizɔs bin stret in an ɛn sev am. I impɔtant fɔ mɛmba se Pita bin fɔ ebul fɔ waka pantap di wata wans i kɔntinyu fɔ wach Jizɔs. Bɔt we Pita bigin fɔ pe atɛnshɔn to di big briz, i bin fred ɛn bigin fɔ dawt, ɛn i bigin fɔ go dɔŋ di wata.—Mat. 14:​24-31.

7. Wetin wi kin lan frɔm Pita in ɛgzampul?

 ⁷ Wi kin lan frɔm Pita in ɛgzampul. We Pita bin kɔmɔt na di bot ɛn bigin fɔ waka pantap di wata, i nɔ bin de ɛkspɛkt se sɔntin go tek in atɛnshɔn ɛn i go bigin fɔ go dɔŋ di wata. I bin want fɔ kɔntinyu fɔ waka pantap di wata te i rich to in Masta. Bɔt i nɔ bin ebul fɔ kɔntinyu fɔ pe atɛnshɔn to da tin de we i bin want fɔ du. Tide, wi nid fɔ gɛt fet fɔ bia prɔblɛm dɛn jɔs lɛk aw Pita bin nid fet fɔ waka pantap di wata. If wi nɔ kɔntinyu fɔ abop pan Jiova ɛn in prɔmis dɛn, wi fet go wik ɛn i go tan lɛk se wi de sink spirichwali. So ivin if wi gɛt prɔblɛm dɛn we nɔ rili izi, wi fɔ kɔntinyu fɔ pe atɛnshɔn pan Jiova ɛn di pawa we i gɛt fɔ ɛp wi. Aw wi go du dat?

8. Wetin go ɛp wi fɔ mek wi nɔ wɔri pasmak bɔt di tin dɛn we wi nid?

⁸ Bifo wi de wɔri bɔt wi prɔblɛm dɛn, wi nid fɔ abop pan Jiova. Mɛmba se Jiova, wi Papa we lɛk wi, dɔn prɔmis se i go kia fɔ di tin dɛn we wi nid if wi put am fɔs na wi layf. (Mat. 6:​32, 33) I dɔn de kip dis prɔmis ɔltɛm. (Dit. 8:​4, 15, 16; Sam 37:​25) If Jiova de gi di bɔd dɛn ɛn di flawa dɛn wetin dɛn nid, wi shɔ se wi nɔ nid fɔ wɔri bɔt wetin wi fɔ it ɔ wetin wi go wɛr! (Mat. 6:​26-30; Fil. 4:​6, 7) Lɛk aw lɔv de muv mama ɔ papa we lɛk in pikin fɔ gi am di tin dɛn we i nid, na so lɔv de muv wi Papa we de na ɛvin fɔ gi in pipul dɛn di tin dɛn we dɛn nid. Fɔ tru, wi shɔ se Jiova go kia fɔ wi!

9. Wetin yu lan frɔm wan brɔda ɛn in wɛf dɛn ɛkspiriɛns?

⁹ Lɛ wi tɔk bɔt wan ɛkspiriɛns bɔt aw Jiova de kia fɔ di tin dɛn we wi nid. Wan brɔda ɛn in wɛf we de ful-taym savis bin drayv dɛn ol motoka fɔ lɛk wan awa fɔ go tek sɔm sista dɛn we bin de na wan rɛfyuji kamp fɔ mek dɛn go atɛnd di mitin. Di brɔda bin tɔk se: “Afta di mitin, wi bin invayt di sista dɛn fɔ kam it na wi os, bɔt wi mɛmba se wi nɔ gɛt natin fɔ gi dɛn.” Wetin bin apin? Di brɔda bin kɔntinyu fɔ tɔk se: “We wi go na os, wi si tu big plastik ful-ɔp wit it bifo wi domɔt. Wi nɔ bin no udat lɛf dɛn de. Jiova bin kia fɔ wi.” Afta sɔm tɛm, di brɔda ɛn in wɛf dɛn motoka bin brok dɔŋ. Dɛn bin nid di motoka fɔ go prich, bɔt dɛn nɔ bin gɛt mɔni fɔ mek am. Dɛn go wit dɛn motoka na garaj fɔ si ɔmɔs dɛn go nid fɔ pe fɔ mek am. Dɔn wan man kam ɛn aks se: “Na udat in motoka dis?” Di brɔda se na in motoka ɛn i nid fɔ mek am. Di man tɔk se: “I nɔ mata. Mi wɛf want dis kayn motoka ɛn na dis sem kɔlɔ i want. Ɔmɔs yu go want fɔ mek a pe fɔ am?” Di brɔda sɛl di motoka to di man, ɛn di mɔni we di man pe am bin du fɔ bay ɔda motoka. I se: “Wi bin rili gladi da de de. Wi no se dis tin we apin nɔto bay chans, na Jiova bin ɛp wi.”

10. Aw Sam 37:​5 ɛnkɔrej wi nɔ fɔ wɔri bɔt di tin dɛn we wi nid fɔ liv?

¹⁰ We wi lisin to di gud shɛpad ɛn lɛf fɔ de wɔri pasmak bɔt di tin dɛn we wi nid fɔ liv, wi shɔ se Jiova go gi wi di tin dɛn we wi nid. (Rid Sam 37:​5; 1 Pit. 5:​7) Tink bɔt di prɔblɛm dɛn we wi tɔk bɔt na  paregraf 5. Te to dis tɛm, i go bi se Jiova dɔn yuz wi bɔsman ɔ pɔsin we de oba in famili fɔ ɛp wi fɔ kia fɔ di tin dɛn we wi nid ɛvride. If wi lɔs wi wok  ɔ if di pɔsin we de oba in famili nɔ ebul igen fɔ du so, Jiova go yuz ɔda we fɔ kia fɔ wi. Wi shɔ se i go du dat. Lɛ wi tɔk bɔt ɔda tin bak we di gud shɛpad ɛnkɔrej wi fɔ lɛf fɔ du.

11. Akɔdin to Matyu 7:​1, 2, wetin Jizɔs tɛl wi fɔ lɛf fɔ du? Wetin mek dat nɔ kin izi?

¹¹ Rid Matyu 7:​1, 2. Jizɔs bin no se mɔtalman nɔ pafɛkt ɛn bɔku tɛm dɛn kin pe atɛnshɔn pan di mistek we ɔda pipul dɛn de mek. Na dat mek i bin se: “Una lɛf fɔ jɔj.” Wi kin tray tranga wan nɔ fɔ jɔj wi kɔmpin Kristian dɛn. Bɔt, wi ɔl nɔ pafɛkt. If wi notis se sɔntɛnde wi kin want fɔ pe atɛnshɔn to ɔda pipul dɛn mistek, wetin wi fɔ du? Wi fɔ lisin to Jizɔs, ɛn tray tranga wan fɔ lɛf fɔ jɔj.

12-13. Aw Jiova in ɛgzampul go ɛp wi fɔ lɛf fɔ jɔj ɔda pipul dɛn?

¹² Wi go bɛnifit we wi tink gud wan bɔt Jiova in ɛgzampul. I de pe atɛnshɔn pan di gud kwaliti we pipul dɛn gɛt. Wi no dis bay di we aw i bin trit Kiŋ Devid, we bin mek siriɔs mistek dɛn. Fɔ ɛgzampul, i bin du mami ɛn dadi biznɛs di we aw Gɔd nɔ want wit Bathshiba, ɛn i bin ivin mek dɛn kil in man. (2 Sam. 11:​2-4, 14, 15, 24) Bikɔs ɔf wetin Devid bin du, in ɛn in famili bin sɔfa, ivin in ɔda wɛf dɛn. (2 Sam. 12:​10, 11) Wan ɔda tɛm, Devid nɔ bin sho se i rili abop pan Jiova bay we i bin kɔnt di Izrɛlayt sojaman dɛn, we na tin we Jiova bin tɛl am nɔ fɔ du. I go bi se Devid bin du dis bikɔs i bin prawd bɔt di bɔku bɔku sojaman dɛn we i bin dɔn gɛt, ɛn bikɔs i bin abop pan dɛn fɔ protɛkt am. Wetin na bin di rizɔlt? Na lɛk 70,000 Izrɛlayt dɛn bin day frɔm sik we de prɛd!—2 Sam. 24:​1-4, 10-15, NWT.

¹³ If yu bin de na Izrɛl da tɛm de, aw yu bin fɔ si Devid? Yu bin fɔ jɔj am se i nɔ fit fɔ mek Jiova fɔgiv am? Jiova nɔ bin tink so. I bin pe atɛnshɔn pan aw Devid bin fetful te to da tɛm de, ɛn di ripɛnt we i bin ripɛnt wit ɔl in at. So Jiova bin fɔgiv Devid fɔ dɛn siriɔs sin dɛn ya. Jiova bin no se Devid rili lɛk am ɛn i want fɔ du wetin rayt. Wi rili gladi we Jiova de pe atɛnshɔn pan di gud kwaliti dɛn we wi gɛt ɛn di gud tin dɛn we wi de du.—1 Kiŋ 9:​4; 1 Kro. 29:​10, 17.

14. Wetin dɔn ɛp Kristian dɛn fɔ lɛf fɔ jɔj ɔda pipul dɛn?

¹⁴ Bikɔs Jiova nɔ de ɛkspɛkt wi fɔ pafɛkt, wisɛf nɔ fɔ ɛkspɛkt ɔda pipul dɛn fɔ pafɛkt, ɛn wi fɔ luk fɔ di gud kwaliti we ɔda pipul dɛn gɛt. Bɔku tɛm, i izi fɔ si di mistek we ɔda pipul dɛn de mek ɛn tɔk bad bɔt dɛn. Bɔt pɔsin we de falamakata Jiova de du tin fayn wit ɔda pipul dɛn, ivin if i no se dɛn de mek mistek. Dayamɔn we rɔf nɔ kin fayn, bɔt pɔsin we gɛt sɛns no se di dayamɔn go rili fayn ɛn valyu afta dɛn dɔn kɔt ɛn klin am. Lɛk Jiova ɛn Jizɔs, wi nɔ fɔ pe atɛnshɔn pan di mistek dɛn we ɔda pipul dɛn de mek, bifo dat wi fɔ pe atɛnshɔn pan dɛn gud kwaliti dɛn.

15. We wi tink bɔt wetin de apin to ɔda pipul dɛn, aw dat de ɛp wi nɔ fɔ tɔk bad bɔt dɛn?

¹⁵ Apat frɔm we wi de pe atɛnshɔn pan ɔda pipul dɛn gud kwaliti dɛn,  wetin bak go ɛp wi nɔ fɔ tɔk bad bɔt dɛn? Tray fɔ imajin wetin de apin na dɛn layf. Tink bɔt dis ɛgzampul. Wan de we Jizɔs bin de na di tɛmpul, i bin si wan po uman we in man dɔn day de put tu kɔyn dɛn we nɔ gɛt bɛtɛ valyu na di mɔni bɔks. I nɔ bin aks se: “Wetin mek i nɔ put mɔ?” Jizɔs nɔ bin pe atɛnshɔn to ɔmɔs di uman we in man bin dɔn day bin gi, bɔt i bin tink bɔt wetin mek di uman gi ɛn wetin bin de apin to am. Ɛn i bin prez am fɔ we i du ɔl wetin i bin ebul.—Lyuk 21:​1-4.

16. Wetin yu lan frɔm Vɛronika in ɛkspiriɛns?

¹⁶ Wan sista we nem Vɛronika in ɛkspiriɛns de sho wi wetin mek i impɔtant fɔ tink bɔt wetin de apin to ɔda pipul dɛn. Na di kɔngrigeshɔn we i bin de, wan sista bin de de we na in nɔmɔ de mɛn in bɔypikin. Vɛronika bin tɔk se: “To mi, i bin tan lɛk se dɛn nɔ de atɛnd di mitin dɛn ɛn go fil savis ɔltɛm. So dis bin mek a nɔ bin de tink di rayt we bɔt dɛn. Bɔt wande, a bin go fil savis wit di mama. I bin ɛksplen to mi se in bɔypikin gɛt ed prɔblɛm. I bin de du in bɛst fɔ gɛt di tin dɛn we dɛn nid fɔ liv ɛn fɔ kɔntinyu fɔ gɛt tayt padi biznɛs wit Jiova. Bikɔs ɔf di prɔblɛm we in pikin gɛt, sɔntɛnde i bin de atɛnd mitin na ɔda kɔngrigeshɔn. Vɛronika  bin dɔn fɔ tɔk se: “A nɔ bin no se na so tin nɔ izi fɔ am. Naw, a dɔn rili lɛk ɛn rɛspɛkt dis sista fɔ ɔl wetin i de du fɔ sav Jiova.”

17. Wetin Jems 2:​8 tɛl wi fɔ du, ɛn aw wi go du dat?

¹⁷ Wetin wi fɔ du if wi kam fɔ no se wi dɔn bigin jɔj wi kɔmpin Kristian dɛn? Wi fɔ mɛmba se wi fɔ lɛk wi brɔda dɛn. (Rid Jems 2:​8.) Dɔn bak, wi fɔ rili pre to Jiova ɛn beg am mek i ɛp wi fɔ stɔp fɔ jɔj. Wi go du wetin wi dɔn pre bɔt bay we wi fɔs go tɔk to di pɔsin we wi dɔn tɔk bad bɔt. Sɔntɛm dat go ɛp wi fɔ no am. Wi kin aks am fɔ wok wit wi na fil savis ɔ fɔ jɔyn wi fɔ it. As wi de kam fɔ no wi brɔda mɔ ɛn mɔ, wi go tray fɔ fala di ɛgzampul we Jiova ɛn Jizɔs sɛt bay we wi de luk fɔ di gud kwaliti dɛn we i gɛt. Na bay da we de wi de sho se wi de lisin to wetin di gud shɛpad tɛl wi we i se lɛf fɔ jɔj.

18. Aw wi go sho se wi de lisin to di gud shɛpad in vɔys?

¹⁸ Jɔs lɛk aw ship kin lisin to in shɛpad in vɔys, na so Jizɔs in disaypul dɛn de lisin to in vɔys. If wi tray tranga wan fɔ lɛf fɔ wɔri bɔt di tin dɛn we wi nid ɛn lɛf fɔ jɔj ɔda pipul dɛn, Jiova ɛn Jizɔs go blɛs wi fɔ wetin wi de du. Ilɛk wi de pat pan di “ship dɛn we nɔ bɔku” ɔ di “ɔda ship dɛn,” lɛ wi kɔntinyu fɔ lisin ɛn obe wi gud shɛpad in vɔys. (Lyuk 12:​32; Jɔn 10:​11, 14, 16) Insay di nɛks atikul, wi go tɔk bɔt tu tin dɛn we Jizɔs bin tɛl in disaypul dɛn fɔ du.