Yu Bin No?
Aw di blɔk dɛn we dɛn fɛn na Babilɔn we bin de trade trade ɛn di we aw dɛn bin de mek dɛn blɔk dɛn de sho se wetin di Baybul tɔk na tru?
DI WAN dɛn we de stɔdi bɔt aw pipul dɛn bin de du tin trade trade bin fɛn bɔku blɔk dɛn we dɛn bin yuz fɔ bil di siti we bin de na Babilɔn we bin de trade trade. Rɔbɔt Kɔldavay we na pɔsin we de stɔdi bɔt aw pipul dɛn bin de du tin trade trade bin tɔk se dɛn bin de mek dɛn blɔk dɛn de na ovin dɛn we “nɔ bin de na di siti bikɔs di kle we bin de usay di ovin dɛn bin de bin rili fayn ɛn i bin de na say usay bɔku bush de we dɛn bin de yuz fɔ mek faya.”
Di wan dɛn we de stɔdi bɔt aw pipul dɛn bin de du tin trade trade dɔn si pruf dɛn we sho se pipul dɛn we bin de wok na gɔvmɛnt insay Babilɔn bin de yuz dɛn ovin dɛn ya fɔ du sɔntin we rili bad. Pɔl-Alan Bolyu we na profɛsɔ we de stɔdi bɔt di istri ɛn langwej bɔt di pipul dɛn we bin de na Asiria we bin de trade trade na di Yunivasiti na Toronto tɔk se: “Babilonian raytin dɛn sho se di kiŋ bin de mek dɛn trowe di wan dɛn we nɔ bin de obe am ɛn we nɔ bin de rɛspɛkt di oli tin dɛn na di ovin ɛn bɔn dɛn.” Fɔ ɛgzampul, wan raytin we dɛn fɛn frɔm di tɛm we Kiŋ Nɛbyukadnɛza bin de, tɔk se: “Una dɔnawe wit dɛn, bɔn dɛn, ros dɛn . . . insay di ovin, . . . mek dɛn smok go up. Kil dɛn bay we una trowe dɛn insay di faya.”
Dis de mɛmba di wan dɛn we de rid di Baybul bɔt di tin dɛn we dɛn bin rayt na Daniɛl chapta 3. Insay da chapta de, wi rid se Kiŋ Nɛbyukadnɛza mek wan big imej wit gold we bin de na Dura, we nɔ bin de insay di siti na Babilɔn. We tri Ibru yɔŋman dɛn we nem Shedrak, Mishak, ɛn Abɛdnigo nɔ bin gri fɔ butu bifo da imej de, Nɛbyukadnɛza bin vɛks bad bad wan ɛn i bin se mek dɛn mek di ovin wam “sɛvin tɛm pas aw dɛn kin wam am” ɛn mek dɛn “trowe” di tri Ibru man dɛn “insay di big big ovin we faya de kech bad bad wan.” Wan pawaful enjɛl bin sev dɛn ɛn mek dɛn nɔ day.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Wan blɔk we gɛt Nɛbyukadnɛza in nem pan am
Di blɔk dɛn we dɛn bin fɛn na Babilɔn bin sho bak se wetin di Baybul tɔk na tru. Bɔku pan dɛn blɔk dɛn de bin gɛt raytin dɛn we bin de prez di kiŋ. Wan pan di raytin dɛn bin se: “Nɛbyukadnɛza, Kiŋ na Babilɔn . . . Di pales we mi we na Gret Kiŋ bil . . . Mek mi pikin dɛn rul sote go.” Dis raytin ya fiba di wan we de na Daniɛl 4:30, usay Nɛbyukadnɛza bost se: “Nɔto di pawaful Babilɔn dis we a bil wit mi pawa; ples we fit fɔ kiŋ fɔ tap, lɛ pipul dɛn kɔle ɛn rɛspɛkt mi?”
