MERI go dɔŋ wit in ni na grɔn, di pen we i bin de fil na in at bin so ebi dat, i nɔ ebul fɔ tɔk. Di tin nɔmɔ we i bin de yɛri da tɛm de, na di las kray we in pikin bin kray lawd lawd wan bifo i day, afta i dɔn sɔfa fɔ lɔng tɛm. Na bin san santɛm bɔt di ples bin dɔn dak lɛk se na nɛt. Ɛn di grɔn bigin fɔ trimbul bad bad wan. (Matyu 27:45, 51) We dɛn tin ya apin, Meri kam fɔ no se Jiova insɛf sɛf de sho ɔlman na di wɔl se i fil am bad, pas ɛnibɔdi, we Jizɔs Krays day.

Meri bin kɔntinyu fɔ kray fɔ in pikin na di ples we dɛn kɔl Gɔlgɔta ɔ ples we tan lɛk mɔtalman ed, te di san bigin kɔmɔt bak. (Jɔn 19:17, 25) I go bi se Meri bin de mɛmba bɔku tin. Sɔntɛm, wan pan di tin dɛn we i bin de mɛmba na sɔntin we bin dɔn apin 33 ia bifo dis tɛm. We in ɛn Josɛf bin kɛr dɛn pikin go na di tɛmpul we bin de na Jerusɛlɛm, Gɔd bin tɛl wan ol pa we nem Simiɔn, fɔ tɔk sɔntin we gɛt fɔ apin. Dis pa bin tɔk wɔndaful tin dɛn bɔt Jizɔs, bɔt i bin tɔk se wan de, Meri go fil pen na in at lɛk we dɛn chuk pɔsin wit lɔng sɔd. (Lyuk 2:25-35) Na we Jizɔs day na in Meri bin rili ɔndastand wetin dis pa bin tɔk.

Pipul dɛn dɔn kam fɔ si se di tin we at ɛn sɔri pas ɔl, na we pɔsin in yon pikin we i bɔn, day. Day na bad bad tin, ɛn i kin mit wi ɔl. (Lɛta Fɔ Rom 5:12; Fɔs Lɛta Fɔ Kɔrint 15:26) Yu tink se pɔsin go ebul bia di pwɛl at we day kin briŋ? Fɔ no di ansa, lɛ wi tɔk bɔt Meri in ɛgzampul. Wi go bigin frɔm di tɛm we Jizɔs bigin in prichin wok te to di tɛm we i day ɛn jɔs afta dat. Wi go lan bɔku tin bɔt aw di fet we Meri bin gɛt ɛp am fɔ bia di pen ɛn pwɛl at we day kin briŋ.

Lɛ wi tɔk bɔt wetin bin apin tri ɛn af ia bifo dis tɛm: Meri bin no se tin gɛt fɔ chenj. Ivin insay Nazarɛt, we na smɔl tɔŋ, pipul dɛn bin de tɔk bɔt Jɔn we bin de baptayz pipul dɛn ɛn we bin de tɛl pipul dɛn fɔ lɛf fɔ du bad ɛn tɔn to Gɔd. Meri bin no se in big bɔy pikin dɔn si dis nyus as sayn we de sho am se i fɔ bigin in prichin wok. (Matyu 3:1, 13) We Jizɔs gɛt fɔ lɛf di famili fɔ go du in prichin wok, dat go mek layf nɔ izi fɔ Meri ɛn in famili. Wetin mek wi se so?

Sɔntɛm Meri in man we na Josɛf, bin dɔn day. If na so i bi, Meri bin no wetin i min fɔ lɛ sɔmbɔdi lɛf di famili. * Naw, pipul dɛn nɔ bin jɔs de kɔl Jizɔs di ‘kapɛnta in pikin,’ bɔt dɛn bin de kɔl am bak di kapɛnta. I go mɔs bi se Jizɔs bin dɔn tek in papa in biznɛs ɛn na in naw bin de kia fɔ di famili, ɛn dis famili bin gɛt lɛk siks pikin dɛn so we Meri bin dɔn bɔn afta i bɔn Jizɔs. (Matyu 13:55, 56; Mak 6:3, NW) Sɔntɛm na Jems Jizɔs kɔl biɛn. Bɔt ivin if Jizɔs bin dɔn de tren am fɔ lɛ i kɔntinyu di biznɛs, i nɔ go stil izi fɔ di famili we Jizɔs we na di big wan, de kam lɛf dɛn. Meri bin gɛt plɛnti tin fɔ du na di famili. So yu tink se i bin de fred we Jizɔs gɛt fɔ kam go? Wɛl, wi nɔ rili no, pas wi gɛs. Bɔt wan impɔtant kwɛstyɔn de we wi fɔ fɛn ansa to. Di kwɛstyɔn na: Wetin Meri go du we Jizɔs we bin de na Nazarɛt kam fɔ bi Jizɔs Krays, we na di Mɛsaya  we Gɔd bin dɔn tɔk bɔt trade trade? Wan pat na di Baybul tɛl wi sɔntin bɔt dis.—Jɔn 2:1-12.

Wande, Jizɔs go to Jɔn fɔ lɛ i baptayz am, ɛn i kam fɔ bi di pɔsin we Gɔd dɔn put in spirit pan, ɔ di Mɛsaya. (Lyuk 3:21, 22) Afta dat, i bigin fɔ pik in disaypul dɛn. Pan ɔl we Jizɔs bin gɛt shɔt tɛm fɔ du in wok, i bin stil de fɛn tɛm fɔ ɛnjɔy wit in famili ɛn padi dɛn. Jizɔs wit in mama, in disaypul dɛn, ɛn in brɔda dɛn, go pan wan mared we bin de na Kena. Dis tɔŋ bin de ɔp wan il we de lɛk et mayl so frɔm Nazarɛt. We dɛn bin de pan di mared pati, Meri kam fɔ no se prɔblɛm de. Sɔntɛm i bin de si se di ɔkɔ ɛn yawo dɛn fambul dɛn bin de wach dɛnsɛf lɛk se sɔntin dɔn apin, ɛn dɛn bin de tɔk sikrit to dɛnsɛf fast fast. Di wayn bin dɔn dɔn! Insay Jizɔs in tɛm, we wayn dɔn pan mared, di famili kin shem bad bad wan ɛn dat kin mek di mared pati nɔ kɔmɔt fayn atɔl. Meri bin sɔri fɔ di famili, so i tɛl Jizɔs wetin de apin.

Meri tɛl Jizɔs se: “Di wayn dɔn dɔn.” Wetin i bin want mek in pikin du? Wi nɔ no, bɔt Meri bin no se in pikin na pawaful man we go ebul du wɔndaful tin dɛn. Sɔntɛm Meri bin op se Jizɔs go bigin fɔ du wɔndaful tin dɛn naw. I bin jɔs tan lɛk se i de tɛl am se, “Mi pikin, duya du sɔntin fɔ ɛp dɛn!” Di we aw Jizɔs bin ansa in mama go dɔn sɔprayz am. Jizɔs bin se: “Nɔ tɛl mi dɛn tin ya naw.” Dis wɔd we Jizɔs bin tɔk nɔ sho se i fityay in mama, pan ɔl we ɔda pipul dɛn de fil se na fityay i fityay am. Bɔt Jizɔs bin tɔk dis wɔd fɔ ɛp in mama fɔ no se nɔto in fɔ tɛl am aw fɔ du in wok; na in Papa, Jiova nɔmɔ fɔ tɛl aw fɔ du in wok.

Meri bin tek wetin in pikin tɛl am bikɔs in na bin uman we ɔmbul ɛn kwik fɔ ɔndastand. I tɛl di wan dɛn we de sav na di mared pati se, ‘Una du ɛnitin we i tɛl una fɔ du.’ Meri kam si se nɔto in fɔ de tɛl in pikin wetin fɔ du igen; bifo dat, na in pikin naw fɔ de tɛl in ɛn ɔda pipul dɛn wetin fɔ du. Bɔt pan ɔl dat, Jizɔs du sɔntin fɔ sho se i gɛt sɔri-at lɛk in mama, fɔ di ɔkɔ ɛn yawo. I bin du in fɔs mirekul pan da mared pati de bay we i tɔn wata to fayn wayn. We Jizɔs du dis, “in lanin bɔy dɛn biliv pan am.” Meri insɛf biliv Jizɔs. Meri nɔ bin de si Jizɔs as in pikin nɔmɔ, i bin de si am bak as in Masta ɛn as di pɔsin we gɛt fɔ sev am.

Mama ɛn papa dɛn kin lan bɔku tin frɔm di kayn fet we Meri bin gɛt. Na tru se, nɔbɔdi nɔ ɛva mɛn pikin we tan lɛk Jizɔs. Bɔt we ɛni pikin dɔn big, ilɛk uskayn pɔsin i bi, i nɔ kin izi fɔ lɛ in mama ɛn papa chenj di we aw dɛn bin dɔn yus fɔ trit am we i bin smɔl. Sɔm mama ɛn papa dɛn kin kɔntinyu fɔ trit dɛn pikin dɛn lɛk smɔl pikin, pan ɔl we dɛn nɔ fɔ de du dat. (Fɔs Lɛta Fɔ Kɔrint 13:11) Aw mama ɛn papa dɛn go ɛp dɛn pikin dɛn we dɔn big? Wan we we dɛn go ɛp dɛn, na we dɛn tɛl dɛn se dɛn no se dɛn go kɔntinyu fɔ du wetin di Baybul se ɛn Jiova go blɛs dɛn fɔ dat. Mama ɛn papa dɛn we put dɛnsɛf dɔŋ fɔ tɛl dɛn pikin dɛn, dɛn fayn fayn tin ya go rili ɛp dɛn pikin dɛn. Jizɔs bin rili gladi fɔ di we aw Meri bin sɔpɔt am te to di tɛm we i day.

Di Baybul nɔ tɛl wi bɔku tin bɔt Meri insay di tri ɛn af ia we Jizɔs bin de du in prichin wok. Bɔt lɛ wi mɛmba se, sɔntɛm Meri in man bin dɔn day, ɛn i go bi se i bin stil gɛt smɔl pikin dɛn wit am na os. So i go bi se na dat bin de mek Meri nɔ bin ebul fɔ fala Jizɔs we i bin de prich. (Fɔs Lɛta To Timoti 5:8) Bɔt stil, Meri bin kɔntinyu fɔ tink gud wan bɔt di tin dɛn we i bin dɔn lan bɔt di Mɛsaya ɛn go di mitin dɛn we dɛn bin de gɛt na di Ju mitin  os jɔs lɛk aw di famili bin dɔn yus fɔ du.—Lyuk 2:19, 51; 4:16.

So yu nɔ tink se Meri bin de na di Ju mitin os na Nazarɛt we Jizɔs bin go tɔk de? I go mɔs dɔn gladi fɔ yɛri we in pikin de tɔk se di tin dɛn we dɛn bin dɔn rayt bɔt di Mɛsaya, de apin to am naw! Bɔt Meri in at go dɔn pwɛl we di pipul dɛn na Nazarɛt nɔ bin biliv in pikin. Dɛn bin ivin tray fɔ kil am!—Lyuk 4:17-30.

Di ɔda tin we bin de pwɛl in at, na we in ɔda bɔy pikin dɛn nɔ bin biliv pan Jizɔs. Jɔn 7:5 tɔk se Jizɔs in 4 brɔda “dɛn . . . nɔ bin biliv pan am.” We i kam to Jizɔs in sista dɛn, we sɔntɛm na bin dɛn tu, di Baybul nɔ tɔk bɛtɛ bɔt dɛn. * Ilɛksɛf dɛn bin biliv am ɔ nɔ biliv am, Meri bin kam fɔ no se i nɔ izi fɔ de na os usay ɔlman gɛt difrɛn we aw dɛn de wɔship Gɔd. Meri bin gɛt fɔ tray tranga wan fɔ kɔntinyu fɔ biliv pan Jizɔs ɛn tray bak fɔ mek in famili du di sem tin. Bɔt i bin de tek tɛm we i de du am; i nɔ bin de fos dɛn.

Wan tɛm, Jizɔs in fambul dɛn bin disayd fɔ go “pul am kɔmɔt” usay i bin de. I go bi se Jizɔs in brɔda dɛnsɛf bin jɔyn dɛn fɔ go du dat. Dɛn bin de tɔk se: “I de mek lɛkɛ se in ed nɔ de.” (Mak 3:21, 31) Meri in nɔ bin de tink da we de, bɔt i bin stil go wit in pikin dɛn; sɔntɛm i bin de op se dɛn go go lan sɔntin we go ɛp dɛn fɔ gɛt fet pan Jizɔs. Yu tink se dis go we dɛn bin go, bin mek dɛn biliv Jizɔs? Pan ɔl we Jizɔs bin de du pawaful mirekul dɛn ɛn tich wɔndaful tin dɛn bɔt Gɔd, Meri in ɔda bɔy pikin dɛn nɔ bin stil biliv am. Yu nɔ tink se Meri go de wɔnda wetin rili go mek in ɔda bɔy pikin dɛn biliv Jizɔs?

Yu de na os usay nɔto ɔlman de sav Jiova? Di kayn fet we Meri bin gɛt, go tich yu bɔku tin. I nɔ bin taya fɔ ɛp in fambul dɛn we nɔ bin biliv Jizɔs. Bɔt Meri bin de mek lɛ dɛn si se in fet we i bin gɛt pan Jizɔs bin de mek i gladi ɛn gɛt kol at. Apat frɔm dat, i bin kɔntinyu fɔ sɔpɔt in pikin. Yu tink se i bin de fil am we Jizɔs nɔ bin de wit am? Yu tink se sɔntɛnde Meri bin de wish se Jizɔs stil de na os wit di famili? Ilɛksɛf Meri bin de tink dɛn kayn we ya, i bin stil ebul fɔ kɔntrol insɛf. I bin de si am se na big big ɔnɔ i gɛt fɔ sɔpɔt ɛn ɛnkɔrej Jizɔs. Yusɛf go ebul ɛp yu pikin dɛn fɔ mek dɛn put Gɔd fɔs na dɛn layf.

Yu tink se Jiova bin blɛs Meri fɔ di fet we i bin gɛt pan Jizɔs? Jiova nɔ de ɛva taya fɔ blɛs pɔsin we gɛt fet, so i bin blɛs Meri. (Di Ibru Pipul Dɛn 11:6) Jɔs tink bɔt aw Meri bin de fil we i bin de yɛri we in pikin de tich ɔ we ɔda pipul dɛn we bin dɔn lisin to Jizɔs, kam tɛl am bɔt di tin dɛn we in pikin de tich.

We Jizɔs bin de yuz ɛgzampul dɛn fɔ tich, yu tink se Meri bin de yɛri sɔm tin dɛn we bin de mek i mɛmba we Jizɔs bin smɔl na Nazarɛt? We Jizɔs bin de tɔk bɔt wan uman we bin de swip in os fɔ fɛn in mɔni we dɔn lɔs, ɛn uman dɛn we de gren flawa fɔ mek bred, ɔ pɔsin we de layt lamp ɛn put am usay ɔlman go si am, yu tink se Meri bin de mɛmba di tɛm we Jizɔs bin smɔl we i bin de nia am we i bin de du dɛn wok ya? (Lyuk 11:33; 15:8, 9; 17:35) We Jizɔs bin de tɔk se di tin dɛn we i de tich pipul dɛn nɔ at fɔ lan ɛn di tin dɛn we i de tɛl dɛn fɔ du nɔ at fɔ du, yu tink se Meri bin de tink bɔt di tɛm we Josɛf bin de tich Jizɔs aw fɔ tek tɛm mek da stik we dɛn kin put na animal dɛn nɛk fɔ mek dɛn wok togɛda, so dat i nɔ go mɔna  di animal? (Matyu 11:30) Fɔ tru, Meri bin de rili gladi ɛnitɛm we i tink bɔt di ɔnɔ we Jiova gi am fɔ ɛp fɔ mɛn ɛn tren di pikin we go kam bi di Mɛsaya. Meri go mɔs dɔn fil wan kayn spɛshal we we i de lisin to Jizɔs, di bɛst mɔtalman ticha, we bin de yuz kɔmɔn kɔmɔn tin dɛn fɔ tich impɔtant lɛsin dɛn!

Bɔt pan ɔl dat, Meri bin stil ɔmbul. In pikin nɔ bin ɛva alaw pipul dɛn fɔ prez am tumɔs, ɔ ivin alaw dɛn fɔ wɔship in mama. We Jizɔs bin de prich, wan uman na di krawd bin tɔk se Jizɔs in mama rili gɛt blɛsin we i bɔn am. Jizɔs bin ansa se: “Yɛs, dat na tru, bɔt mɔ blɛsin de fɔ di pipul dɛn we yɛri Gɔd in wɔd ɛn du wetin Gɔd tɛl dɛn.” (Lyuk 11:27, 28) Ɛn we sɔm pipul dɛn na wan krawd tɛl Jizɔs se in mama ɛn in brɔda dɛn de aks fɔ am, i tɛl dɛn se in mama ɛn in brɔda dɛn na di wan dɛn we de du wetin Gɔd want. Meri nɔ bin vɛks bikɔs Jizɔs tɔk dat; i bin ɔndastand wetin Jizɔs min. Jizɔs bin de sho se di kayn tin we de bitwin pipul dɛn we de du wetin Gɔd want, impɔtant pas di tin we de bitwin fambul dɛn.—Mak 3:32-35.

No wɔd nɔ de we go ɛp wi fɔ no di kayn pen we Meri bin fil we i si in pikin de sɔfa na di stik we dɛn ɛng am te i day. Di apɔsul Jɔn we bin de usay Jizɔs day, bin rayt se: Meri bin tinap nia di stik we dɛn ɛng Jizɔs fɔ day. Meri bin so lɛk in pikin dat, natin nɔ bin stɔp am fɔ tinap nia am te i day. Jizɔs bin de si in mama, ɛn pan ɔl we i bin de fil siriɔs pen we i de blo, ɛn i bin at fɔ lɛ i tɔk, i bin stil tɔk. I bin lɛf in mama to di apɔsul we i bin lɛk, we na Jɔn. Bikɔs Jizɔs in brɔda dɛn nɔ bin stil biliv pan am yet, i nɔ bin lɛf in mama na dɛn nɔn an, bifo dat, i lɛf am to sɔmbɔdi we bin rili biliv pan am. We Jizɔs du dis, i sho se i rili impɔtant fɔ mek pɔsin we biliv Gɔd kia fɔ in famili, mɔ we i kam pan Gɔd biznɛs.—Jɔn 19:25-27.

We Jizɔs day, Meri bin fil di pen we dɛn bin dɔn tɔk lɔn lɔn tɛm se i go fil, we go tan lɛk di pen we pɔsin de fil we dɛn chuk am wit sɔd. If wi nɔ ebul fɔ no di kayn pen ɛn pwɛl at we Meri bin de fil we in pikin day, semweso wi nɔ go ebul fɔ no di we aw i bin gladi tri dez leta! Meri bin kam fɔ no se Jizɔs dɔn gɛt layf bak. Dis na bin di mirekul we pas ɛni ɔda mirekul. Ɛn wetin kam mek i gladi mɔ, na we Jizɔs apia to in stɛp brɔda, Jems. Jizɔs bin apia to Jems di tɛm we in wangren de. (Fɔs Lɛta Fɔ Kɔrint 15:7) Dis apia we Jizɔs bin apia to Jems bin rili ɛp in ɛn in ɔda brɔda dɛn. Leta, dɛn kam fɔ biliv se Jizɔs na di Krays. I nɔ tu te, dɛn bin de go wit dɛn mama na Kristian mitin dɛn fɔ “pre.” (Di Apɔsul Dɛn Wok [Akt] 1:14) Tu pan Jizɔs in brɔda dɛn we na Jems ɛn Jud, bin rayt buk dɛn na di Baybul.

Di las tɛm we di Baybul tɔk bɔt Meri na we in ɛn in pikin dɛn bin de na mitin, de pre. Meri in stori rili ɛnd fayn, ɛn na gud ɛgzampul we wi fɔ falamakata! Bikɔs Meri bin gɛt fet, i bin ebul fɔ bia di pen ɛn pwɛl at we day kin briŋ, ɛn leta, i bin gɛt wɔndaful blɛsin. If wi falamakata di kayn fet we Meri bin gɛt, wisɛf go ebul fɔ bia ɛnikayn tin we dis wikɛd wɔl go briŋ pan wi, ɛn wi go gɛt bɔku blɛsin we wi nɔ go ivin ebul fɔ tink bɔt naw.