Imajin wan papa de tɔk to in bɔypikin we ol sɛvin ia. I se: “I dɔn tek lɔng lɔng tɛm we Gɔd bin mek di wɔl ɛn ɔltin we de de, ɛn i mek di san, di mun, ɛn di sta dɛn.” Di bɔbɔ tink bɔt dis fɔ shɔt tɛm dɔn i aks in papa se, “Udat mek Gɔd?”

Di papa ansa se, “Nɔbɔdi nɔ mek Gɔd. I bin dɔn de frɔm tɛm.” Fɔ naw di pikin satisfay wit da simpul ansa de. Bɔt as i de big, i kɔntinyu fɔ tink bɔt di kwɛstyɔn. I nɔ izi fɔ am fɔ ɔndastand aw pɔsin go de i nɔ gɛt biginin. Ivin di wan ol wɔl gɛt biginin. I bigin wɔnda; ‘Usay Gɔd kɔmɔt?’

Wetin di Baybul se bɔt dat? Di Baybul ansa di sem we lɛk aw di papa bin ansa di pikin na wi ɛgzampul. Mozis bin rayt se: “PAPA GƆD [“Jiova,” NWT] frɔm tɛm, na yu dɔn de kɔba wi. Bifo yu mek di mawnten dɛn ɛn infakt sɛf bifo yu mek di wɔl, yu bin dɔn bi di PAPA GƆD we wi de wɔship, ɛn yu go stil bi wi PAPA GƆD sote go.” (Sam 90:​1, 2) Semweso, di prɔfɛt Ayzaya bin tɔk se: “Yu nɔ no yet? Yu nɔ dɔn yɛri? PAPA GƆD [“Jiova,” NWT] na di Gɔd we de sote go! Nain mek di wan ol wɔl.” (Ayzaya 40:​28) Jud insɛf bin rayt na in lɛta se Gɔd bin dɔn de “frɔm trade trade.”​—Jud 25.

Dɛn skripchɔ dɛn de sho se Gɔd na “di Kiŋ we bin dɔn de ɛn we go de sote go,” jɔs lɛk aw apɔsul Pɔl kɔl am. (1 Timoti 1:​17) Dis min se Gɔd bin dɔn de frɔm trade trade, ɛn i go kɔntinyu fɔ de sote go. (Rɛvɛleshɔn 1:​8) So bikɔs i bin dɔn de frɔm trade trade, i de naw ɛn i go kɔntinyu fɔ de sote go, dat na wan men tin we mek in na di Ɔlmayti.

Wetin mek dis aydia nɔ izi fɔ ɔndastand? Bikɔs wi nɔ gɛt lɔng layf, na dat mek di we aw wi de si tɛm difrɛn frɔm aw Jiova de si am. Gɔd bin dɔn de frɔm trade trade ɛn i go kɔntinyu fɔ de sote go, so to am wan tawzin ia jɔs tan lɛk wan de. (2 Pita 3:​8) Fɔ ɛgzampul: Yu tink se grasɔpa we de liv fɔ jɔs 50 dez, go ebul fɔ ɔndastand aw lɔng mɔtalman de liv fɔ, we na fɔ lɛk 70 ɔ 80 ia? Nɔ! Bɔt di Baybul ɛksplen se, wi tan lɛk grasɔpa we dɛn kɔmpia wi to di Wan we mek ɔltin. Ivin di we aw wi de tink nɔ de kɔmpia to di we aw Gɔd de tink. (Ayzaya 40:​22; 55:​8, 9) So wi nɔ sɔprayz fɔ no se sɔntin dɛn de bɔt Jiova we mɔtalman nɔ go rili ebul ɔndastand.

Pan ɔl we i nɔ izi fɔ ɔndastand se Gɔd bin dɔn de frɔm trade trade ɛn i go kɔntinyu fɔ de sote go, wi go stil si se dat mek sɛns. If pɔsin bin de we mek Gɔd, da pɔsin de na in bin fɔ bi di Wan we mek ɔltin. Bɔt di Baybul ɛksplen se, na Jiova “mek ɔltin.” (Rɛvɛleshɔn 4:​11) Dɔn bak, wi no se tɛm bin de we di wan ol wɔl nɔ bin de. (Jɛnɛsis 1:​1, 2) Usay di wan ol wɔl kɔmɔt? Di Wan we mek am na in fɔs fɔ dɔn de. Dɔn bak i bin dɔn de bifo i mek in wangren Pikin we insɛf sɛf mek ɛn di enjɛl dɛn. (Job 38:​4, 7; Koloshians 1:​15) Dis sho klia wan se, na in wan bin de fɔs. I nɔ pɔsibul fɔ mek i bi se na mek dɛn mek am, bikɔs natin nɔ bin dɔn de we go dɔn mek am.

Wi de wan na di wɔl, ɛn ɔltin we de na di wan ol wɔl sho se Gɔd de we bin dɔn de frɔm trade trade ɛn we go kɔntinyu fɔ de sote go. Di Wan we mek di wan ol wɔl we wi de, di Wan we gi lɔ dɛn we de kɔntrol am, go mɔs dɔn de frɔm trade trade. Na in nɔmɔ go dɔn gi layf to ɔltin we gɛt layf.​—Job 33:⁠4.