ဘၣ်ဃးဒီး ပကလဲၤခီဖျိ တၢ်သူၣ်အုးသးအုးဒ်လဲၣ်အဂ့ၢ်န့ၣ် တၢ်ဟ့ၣ်ကူၣ်တဖၣ်အိၣ်ဝဲအါမးလီၤ. ဘၣ်ဆၣ် တၢ်ဟ့ၣ်ကူၣ်တနီၤန့ၣ် တကဲဘျုးလၢနဂီၢ်ဘၣ်. အဒိ ပှၤတနီၤနီၤ ကဟ့ၣ်ကူၣ်နၤလၢ ဖဲပှၤလၢနအဲၣ်ဘၣ်အီၤတဂၤသံအခါ နတကြၢးဟီၣ်ဘၣ် ဒီးနတဘၣ်ပာ်ဖျါထီၣ် နတၢ်သူၣ်အုးသးအုးဘၣ်. မ့မ့ၢ် ပှၤအဂၤတနီၤနီၤန့ၣ် ကဟ့ၣ်ကူၣ်နၤလၢ နကဘၣ်ပာ်ဖျါထီၣ် နတၢ်တူၢ်ဘၣ်ခဲလၢာ်လီၤ. ဘၣ်ဆၣ် လံာ်စီဆှံပာ်ဖျါထီၣ် တၢ်ဟ့ၣ်ကူၣ်အဂ့ၤကတၢၢ်လၢ ပှၤဃုသ့ၣ်ညါတၢ်တဖၣ် တူၢ်လိာ်ဝဲစ့ၢ်ကီးလီၤ.

ပှၤတနီၤနီၤစံးဝဲလၢ ပှၤပိာ်ခွါန့ၣ်တဘၣ်ဟီၣ်ဘၣ်. ဘၣ်ဆၣ် ပမ့ၢ်ဟီၣ်လၢပှၤမဲာ်ညါန့ၣ် မ့ၢ်တၢ်လၢအလီၤမဲာ်ဆှးနီၢ်ကီၢ်ဧါ. ကသံၣ်သရၣ်တဖၣ် ပာ်ဖျါထီၣ်ဝဲလၢ တၢ်ဟီၣ်တၢ်ယၢၤန့ၣ် မ့ၢ်ဒၣ်ကျဲတဘိလၢ ပပာ်ဖျါထီၣ် တၢ်သူၣ်အုးသးအုးန့ၣ်လီၤ. ဒီးနမ့ၢ်မၤဒ်န့ၣ်န့ၣ် နတၢ်သူၣ်အုးသးအုး ကစှၤလီၤဝဲကယီကယီလီၤ. ဘၣ်ဆၣ် နမ့ၢ်ပၢၤဃာ် နတၢ်သူၣ်အုးသးအုးန့ၣ် မၤဘၣ်ဒိနၤသ့ဝဲလီၤ. တကးဒံးဘၣ် လံာ်စီဆှံစ့ၢ်ကီး ပာ်ဖျါထီၣ်ဝဲလၢ ဖဲပသးအုးအဆၢကတီၢ် ပမ့ၢ်ဟီၣ်န့ၣ် တမ့ၢ်တၢ်လၢအကမၣ် ဒီးတမ့ၢ်တၢ်လၢအလီၤမဲာ်ဆှးဘၣ်. ဆိကမိၣ်ကွၢ် ယ့ၣ်ၡူးအဒိအတဲာ်တက့ၢ်. ယ့ၣ်ၡူးအိၣ်ဒီး တၢ်စိတၢ်ကမီၤလၢ ကမၤသမူထီၣ်က့ၤ ပှၤလၢအသံတဖၣ်သနာ်က့ ဖဲအတံၤသကိး စီၤလါစရူးသံအခါန့ၣ် အဝဲဟီၣ်ဝဲလီၤ.—ယိၤဟၣ် ၁၁:၃၃-၃၅.

တၢ်သူၣ်ဒိၣ်သးဖျိးန့ၣ် မ့ၢ်စ့ၢ်ကီးတၢ်ပာ်ဖျါထီၣ် တၢ်သူၣ်အုးသးအုး လီၤဆီဒၣ်တၢ်ဖဲ ပှၤလၢပအဲၣ်ဘၣ်အီၤသံဝဲလၢ တၢ်တမုၢ်လၢ်အပူၤအခါန့ၣ်လီၤ. ပှၤလၢသူၣ်အုးသးအုးတဖၣ် ဘၣ်သ့ၣ်သ့ၣ် အသးဒိၣ်ထီၣ်တၢ်သ့ဝဲ ဖဲပှၤလၢအယူးယီၣ်ပာ်ကဲဝဲတဂၤဂၤ မ့ၢ်တဲကမၣ်အီၤ မ့တမ့ၢ် တဲဆါဘၣ်အီၤအခါန့ၣ်လီၤ. မးခ် အိၣ်လၢကလံၤထံး အၤဖြံၤကၤန့ၣ် စံးဝဲလၢ “ဖဲယသးအိၣ် ၁၄ နံၣ်အခါယပါသံဝဲလီၤ. တချုးပှၤခူၣ်လီၤယပါန့ၣ် အဲၣ်ကလံၣ်ကၣ် အသရၣ်တဂၤ စံးဝဲလၢ ကစၢ်ယွၤလိၣ်ဘၣ် ပှၤလၢအဂ့ၤ ဒီးကိးအီၤလီၤ. * တၢ်ကတိၤအံၤမၤသးထီၣ်ယၤ မ့ၢ်လၢပလိၣ်ဘၣ်ပပါအဃိန့ၣ်လီၤ. ခဲအံၤယပါသံအိၣ် ၆၃ နံၣ်လံဘၣ်ဆၣ် ယသးဘၣ်ဒိဒံးလီၤ.”

မ့ၢ်ပကြၢးပာ်ဒ့ၣ်ပာ်ကမၣ် လီၤက့ၤပသးဧါ. တၢ်အံၤကဲထီၣ်အသးသ့ လီၤဆီဒၣ်တၢ် ဖဲပှၤလၢပအဲၣ်ဘၣ်အီၤတဂၤသံ သတူၢ်ကလာ်အခါန့ၣ်လီၤ. ပှၤလၢအသူၣ်အုးသးအုးတဂၤ ကပာ်ဒ့ၣ်ပာ်ကမၣ်လီၤအနီၢ်ကစၢ်အသးလၢ ‘ယမ့ၢ်မၤဒ်အံၤဒ်နုၤန့ၣ် တမ့ၢ်လၢအဝဲကသံဘၣ်.’ မ့တမ့ၢ် ဖဲတချုးအဝဲသံအဆၢကတီၢ်န့ၣ် နတဲအါလိာ်သးတၢ်ဒီးအီၤအဃိန့ၣ်လီၤ. လၢတၢ်အံၤအဃိ နကတူၢ်ဘၣ်လၢ နအိၣ်ဒီးတၢ်ကမၣ်လီၤ.

နမ့ၢ်တူၢ်ဘၣ်ဒ်န့ၣ်န့ၣ် အရ့ဒိၣ်လၢနကတဲဖျါထီၣ် နတၢ်သူၣ်အုးသးအုးန့ၣ်လီၤ. တဲဘၣ်နတၢ်တူၢ်ဘၣ်လၢ နတံၤသကိးလၢ နနာ်အီၣ်အီၤသ့တဂၤ ဒ်သိးကဒိကနၣ်န့ၢ် နတၢ်သူၣ်အုးသးအုး ဒီးကမၤစၢၤနၤအဂီၢ်န့ၣ်တက့ၢ်. လံာ်စီဆှံ ဟ့ၣ်သဆၣ်ထီၣ်ပှၤလၢ– “ပှၤအတံၤအသကိးအဲၣ်တၢ်ကိး အဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.”—ကတိၤဒိ ၁၇:၁၇.

ပှၤလၢအသူၣ်အုးသးအုးတဂၤ အတံၤသကိးလၢအဂ့ၤကတၢၢ်န့ၣ် မ့ၢ်ဒၣ်တၢ်ဘၣ်တ့ကစၢ် ယဟိဝၤယွၤလီၤ. လၢတၢ်န့ၣ်အဃိ ပာ်ဖျါထီၣ်နတၢ်သူၣ်အုးသးအုး လၢနတၢ်ထုကဖၣ်အပူၤတက့ၢ်. မ့ၢ်လၢကစၢ်ယွၤ “သးအိၣ်” နၤအဃိန့ၣ်လီၤ. (၁ ပ့းတရူး ၅:၇) အါန့ၢ်အန့ၣ် ကစၢ်အၢၣ်လီၤပှၤလၢ ကမၤမုာ်ထီၣ်က့ၤပသးခီဖျိ “ယွၤအတၢ်ဃူတၢ်ဖိး လၢအဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” န့ၣ်လီၤ. (ဖံလံးပံၤ ၄:၆, ၇) ပျဲကစၢ်ယွၤကမၤစၢၤနၤ ခီဖျိအကလုၢ်ကထါလၢ အမၤမုာ်ထီၣ်နသးသ့န့ၣ်တက့ၢ်. ကွဲးနီၣ်ဃာ်လံာ်စီဆှံအဆၢတဖၣ်လၢ အမၤမုာ်ထီၣ်က့ၤနသးန့ၣ်တက့ၢ်. (ကွၢ်တၢ်ဂ့ၢ်လၢ  အိၣ်ဖဲတၢ်လွံၢ်နၢၣ်အပူၤန့ၣ်တက့ၢ်.) လံာ်စီဆှံအဆၢတဖၣ်အံၤအကျါတနီၤန့ၣ် နကအဲၣ်ဒိးတိၢ်ရူးပာ်အီၤလီၤ. နမ့ၢ်ဆိကမိၣ်ထံ လံာ်စီဆှံအဆၢတဖၣ်အံၤန့ၣ် ကကဲထီၣ်တၢ်မၤစၢၤ လီၤဆီဒၣ်တၢ် ဖဲနအိၣ်ထဲတဂၤ ဒီးနမံတန့ၢ်ဘၣ်အဆၢကတီၢ်န့ၣ်လီၤ. —ယၡါယၤ ၅၇:၁၅.

ကၠဲးခ်လၢအသးအိၣ် ၄၀ န့ၣ်အမါသံတယံာ်ဒံးဘၣ်လၢ ခဲစၢၣ်အဃိန့ၣ်လီၤ. ကၠဲးခ်စံးဝဲလၢ တဘျီတခီၣ် အဝဲသးသယုၢ်ဘၣ်အမါဒိၣ်မးန့ၣ်လီၤ. ဘၣ်ဆၣ် အဝဲဒိးန့ၢ်ဘၣ် တၢ်မၤစၢၤလၢတၢ်ထုကဖၣ်အဃိန့ၣ်လီၤ. အဝဲတဲဝဲလၢ “ဖဲယဃ့ဘါထုကဖၣ်တၢ်ဆူ ယဟိဝၤယွၤအိၣ်အခါန့ၣ် ယတတူၢ်ဘၣ်လၢ ယအိၣ်ထဲတဂၤလၢၤဘၣ်. တဘျီတခီၣ် ယပၢၢ်ထီၣ်လၢ မုၢ်နၤဒီးယက့ၤမံကဒါက့ၤ တန့ၢ်လၢၤဘၣ်. ဘၣ်ဆၣ် ယဖးက့ၤလံာ်စီဆှံဒီးဆိကမိၣ်ထံ ကစၢ်ယွၤအတၢ်အၢၣ်လီၤတဖၣ်ဝံၤဒီး ယဃ့ဘါထုကဖၣ်တၢ်လီၤ. အဃိ ယသးမုာ်ထီၣ်က့ၤဒီး ယမံကဒါက့ၤန့ၢ်ဝဲလီၤ.”

ဘၣ်နဲစၣ် အမိၢ်သံသဒၣ်အီၤလၢ တၢ်ဆူးတၢ်ဆါအဃိန့ၣ်လီၤ. အဝဲစ့ၢ်ကီးထံၣ်ဘၣ်ဝဲလၢ တၢ်ထုကဖၣ်အိၣ်ဒီး အစိအကမီၤန့ၣ်လီၤ. ဘၣ်နဲစၣ် စံးဝဲလၢ “ဖဲယသးအုးဒိၣ်ဒိၣ်ကလဲာ်အခါ ယကိးထီၣ် ယဟိဝၤယွၤအမံၤ ဒီးယဟီၣ်ဝဲလီၤ. ယဟိဝၤယွၤ ဒိကနၣ်ယတၢ်ထုကဖၣ် ဒီးဟ့ၣ်ယၤတၢ်ဂံၢ်တၢ်ဘါလၢ အလိၣ်ဒီးယၤလီၤ.”

ပှၤဟ့ၣ်ကူၣ်ဟ့ၣ်ဖးတၢ်တဖၣ် စံးဝဲလၢ ပှၤလၢအသူၣ်အုးသးအုးတဖၣ်န့ၣ် မ့ၢ်မၤစၢၤပှၤဂၤ မ့တမ့ၢ် မၤဝဲမုာ်သးမၤကလီတၢ်မၤလၢ ပှၤအတဝၢအဂီၢ်န့ၣ် အဘျုးကအိၣ်လၢ အဝဲသ့ၣ်အဂီၢ်လီၤ. မ့ၢ်မၤဝဲဒ်န့ၣ်န့ၣ် အဝဲသ့ၣ်ကဒိးန့ၢ်ဘၣ် တၢ်သူၣ်ခုသးခု ဒီးအသးကမုာ်ထီၣ်က့ၤသ့ဝဲလီၤ. (မၤတၢ် ၂၀:၃၅) ခရံာ်ဖိအါဂၤလၢ အိၣ်ဒီးတၢ်သူၣ်အုသးအုးန့ၣ် ခီဖျိလၢအမၤဝဲဒ်အံၤအဃိ ဒိးန့ၢ်ဘၣ်တၢ်သူၣ်မံသးမုာ်လီၤ.—၂ ကရံၣ်သူး ၁:၃, ၄.