လံာ်စီဆှံ ဟ့ၣ်ကူၣ်ပှၤလၢ– “သုတဘၣ်ယိၣ်လၢ သုသးသမူအဂီၢ်တဂ့ၤ.” —မးသဲ ၆:၂၅.

အခီပညီ ဒ်လဲၣ် ဖဲယ့ၣ်ၡူးစံၣ်တဲၤတဲလီၤတၢ်လၢ တၢ်လူၢ်ခိၣ်အခါ အဝဲတဲတၢ်ကတိၤသ့ၣ်တဖၣ်အံၤလီၤ. လံာ်ခီယ့ၤတဘ့ၣ် ပာ်ဖျါထီၣ်ဝဲလၢ ကြံးအတၢ်ကတိၤ လၢအမ့ၢ် “တၢ်သူၣ်ကိၢ်သးဂီၤ” အံၤအဲၣ်ဒိးစံးဝဲလၢ “ပှၤတဂၤဂၤပာ်ဖျါထီၣ် အတၢ်တူၢ်ဘၣ် ဖဲအဘၣ်ကွၢ်ဆၢၣ်မဲာ် ဒီးတၢ်နးတၢ်ဖှီၣ်, တၢ်သၣ်ဝံၤလီၤဒိ, ဒီးတၢ်ကီတၢ်ခဲတဖၣ်လၢ အတၢ်အိၣ်မူတနံၤဘၣ်တနံၤအဂီၢ်န့ၣ်လီၤ.” ညီနုၢ်ပသူၣ်ကိၢ်သးဂီၤတၢ်လၢ ခါဆူညါအဂီၢ်န့ၣ်လီၤ. တၢ်သူၣ်ကိၢ်သးဂီၤဘၣ်ဃးဒီး ပနီၢ်ခိအတၢ်လိၣ်ဘၣ်တဖၣ်မ့ၢ်ဂ့ၤ, မ့တမ့ၢ် ပှၤလၢပအဲၣ်အီၤတဖၣ်အဂီၢ်န့ၣ် တကမၣ်ဝဲဘၣ်. (ဖံလံးပံၤ ၂:၂၀) ဘၣ်ဆၣ်ဖဲယ့ၣ်ၡူးစံးဝဲလၢ “ဘၣ်ယိၣ်တၢ်တဂ့ၤ” အခါအဝဲဟ့ၣ်ကူၣ်ဝဲ အပျဲၢ်အဘီၣ်တဖၣ်လၢ ကဟးဆှဲးတၢ်သူၣ်ကိၢ်သးဂီၤလၢ အတလၢကွံာ်အခၢးတဖၣ်န့ၣ်လီၤ. လၢတၢ်န့ၣ်အဃိ ပတဘၣ်ပျဲတၢ်ဘၣ်ယိၣ်ဘၣ်ဘှီလၢ ခဲမုၢ်ဆ့ၣ်အဂီၢ်န့ၣ် မၤဘၣ်ဒိဘၣ်ထံး ပတၢ်သူၣ်ဖှံသးညီ လၢတနံၤအံၤအဂီၢ်ဘၣ်.—မးသဲ ၆:၃၁, ၃၄.

မ့ၢ်အကဲဘျုး လၢပစိၤခဲအံၤဧါ. ပအိၣ်ဒီးတၢ်ကူၣ်သ့ ခီဖျိလၢပဒိကနၣ် ယ့ၣ်ၡူးအတၢ်ဟ့ၣ်ကူၣ်အဃိန့ၣ်လီၤ. ဘၣ်မနုၤအဃိလဲၣ်. အဒိ, လံာ်တနီၤနီၤ ပာ်ဖျါထီၣ်ဝဲ ဖဲပှၤတဂၤဂၤ သူၣ်ကိၢ်သးဂီၤတၢ်ဒိၣ်ဒိၣ်မုၢ်မုၢ်အခါ ဒီးအသးကိၢ်တၢ်ထီဘိန့ၣ် တၢ်အံၤဒုးကဲထီၣ်ဝဲ “ကဖုတၢ်ဆါ, သးတၢ်ဆါ, ဒီးတၢ်သးဘံးသ့ဝဲဒၣ်န့ၣ်လီၤ.”

ယ့ၣ်ၡူးဟ့ၣ်ကူၣ်ပှၤလၢပကဟးဆှဲး တၢ်သူၣ်ကိၢ်သးဂီၤလၢ အတလၢကွံာ်အခၢးတဖၣ်လီၤ. မ့ၢ်လၢတၢ်အံၤ အဘျုးတအိၣ်ဘၣ်အဃိန့ၣ်လီၤ. ယ့ၣ်ၡူးသံကွၢ်ဝဲလၢ “မ့ၢ်မတၤလၢသုကျါလၢ အဘၣ်ယိၣ်တၢ်အဃိဒီး, ထုးထီထီၣ်အယုာ်တပျၢ်ဧိၤသ့တဂၤလဲၣ်.” (မးသဲ ၆:၂၇) ခီဖျိလၢ ပသူၣ်ကိၢ်သးဂီၤတၢ်အဃိ ပထုးထီထီၣ်ပတၢ်အိၣ်မူတစဲးဖိဒၣ်လဲာ် တန့ၢ်ဘၣ်. တကးဒံးဘၣ် တၢ်ဂ့ၢ်လၢပသူၣ်ကိၢ်သးဂီၤဝဲတဖၣ်န့ၣ် ညီနုၢ်တမၤအသးဒ်သိးဒီး ပဆိကမိၣ်အီၤအသိးဘၣ်. ပှၤကူၣ်ဘၣ်ကူၣ်သ့တဂၤစံးဝဲလၢ– “နသူၣ်ကိၢ်သးဂီၤတၢ်ဒိၣ်ဒိၣ်မုၢ်မုၢ် လၢခါဆူညါအဂီၢ်န့ၣ် အဘျုးအဖှိၣ်တအိၣ်လၢနဂီၢ်ဘၣ်. ဒီးတၢ်လၢကမၤအသးခါဆူညါန့ၣ် ကဂ့ၤဒိၣ်န့ၢ်ဒံး တၢ်လၢနဆိကမိၣ်ပာ်တဖၣ်န့ၣ်လီၤ.”

ပဟးဆှဲးတၢ်သူၣ်ကိၢ်သးဂီၤကသ့ဒ်လဲၣ်. ကျဲအဆိကတၢၢ်တဘိန့ၣ် အိၣ်ဒီးတၢ်နာ်န့ၢ်ကစၢ်ယွၤတက့ၢ်. ကစၢ်ယွၤမ့ၢ်လုၢ်အီၣ်လုၢ်အီထိၣ်ဖိလံၣ်ဖိတဖၣ် ဒီးမၤဃံမၤလၤဖီဖိတဖၣ်န့ၣ် မ့ၢ်ကစၢ်ယွၤတမၤလၢပှဲၤ ပှၤဟီၣ်ခိၣ်ဖိ လၢအဘူၣ်ထီၣ်ဘါထီၣ်အီၤ အတၢ်လိၣ်ဘၣ်တဖၣ်န့ၣ်ဘၣ်ဧါ. (မးသဲ ၆:၂၅, ၂၆, ၂၈-၃၀) ကျဲခံဘိတဘိန့ၣ်, ဘၣ်ယိၣ်တၢ်ထဲတနံၤအဂီၢ် တနံၤအဂီၢ်တက့ၢ်. ယ့ၣ်ၡူးစံးဝဲလၢ “မၤသးဒ်န့ၣ်ဒီးဘၣ်ယိၣ်တၢ်လၢ ခဲဂီၤအဂီၢ်တဂ့ၤ. အဂ့ၢ်ဒ်အံၤ, ခဲဂီၤန့ၣ်ကဘၣ်ယိၣ်တၢ် လၢအဂီၢ်ဒၣ်ဝဲလီၤ.” မ့ၢ်နတူၢ်လိာ်လၢ “မုၢ်တနံၤအတၢ်အၢတၢ်နးန့ၣ် အါလံလၢအဂီၢ်လံ” န့ၣ်ဧါ.—မးသဲ ၆:၃၄.

ခီဖျိလၢပဒိကနၣ်ယ့ၣ်ၡူး အတၢ်ဟ့ၣ်ကူၣ်အဃိ ကကဲထီၣ်တၢ်ဒီသဒၢလၢ ပနီၢ်ခိတၢ်အိၣ်ဆူၣ်အိၣ်ချ့အဂီၢ်လီၤ. တကးဒံးဘၣ် ပကဒိးန့ၢ်ဘၣ်တၢ်သူၣ်မံသးမုာ်ဒီး “ယွၤအတၢ်ဃူတၢ်ဖိး” ကအိၣ်ဒီးပှၤလီၤ.—ဖံလံးပံၤ ၄:၆, ၇.