ခီဖျိ​လၢ ကစၢ်​ယွၤ​ဒုး​ဒီး​ထီဒါ ပှၤ​အဲၤကူပတူး​ဖိ​အဃိ ပ​သ့ၣ်ညါ​ဘၣ်​လၢ ကစၢ်​ယွၤ​န့ၣ် တူၢ်လိာ်ဝဲ​တၢ်ဒုးသုး​အိၣ်ဝဲ​တနီၤ​လီၤ. တဘျီတခီၣ်​န့ၣ် အဝဲ​ဟ့ၣ်​အခွဲး​လၢ အ​ပှၤ​ဂီၢ်မုၢ်​ပှၤ​အံၣ်စရ့လး​ဖိ​တဖၣ် က​လဲၤ​ဒုးတၢ်​န့ၣ်​လီၤ. အဒိ, ကစၢ်​ယွၤ​မၢဝဲ ပှၤ​အံၣ်စရ့လး​ဖိ လဲၤ​ဒုး​ပှၤ​ကနၤဧၣ်​ဖိ ခီဖျိ​လၢ​အဝဲသ့ၣ်​အၢ​သီ​ဒိၣ်ဒိၣ်ကလဲာ်​အဃိ​န့ၣ်​လီၤ. (၅ မိၤၡ့ ၉:၅; ၂၀:၁၇, ၁၈) ဒီး​ကစၢ်​ယွၤ​မၢ ပှၤ​အံၣ်စရ့လး​ဖိ အ​စီၤပၤ​ဒၤဝံး လဲၤ​ဒုးဝဲ​ပှၤ​ဖလ့ၡသး​ဖိ​လၢ အ​ဆီၣ်တံၢ်​မၤနၢၤ​ပှၤဂၤ​တဖၣ်​န့ၣ်​လီၤ. ကစၢ်​ယွၤ​ဟ့ၣ်ကူၣ်​ဟ့ၣ်ဖး စီၤ​ဒၤဝံး ဒ်သိး​အဝဲ က​မၤနၢၤ​တၢ်​အဂီၢ်​လီၤ.​—၂ ၡမူၤအ့လး ၅:၁၇-၂၅.

လံာ်စီဆှံ ပာ်ဖျါ​ထီၣ်​န့ၢ်​ပှၤလၢ ဖဲ​ပှၤ​အံၣ်စရ့လး​ဖိ​တဖၣ် ထံၣ်ဘၣ်​တၢ်​မၤအၢ​မၤသီ​ဒီး တၢ်​ဆီၣ်တံၢ်​မၤနၢၤ​အခါ ကစၢ်​ယွၤ​ဟ့ၣ်​အခွဲး​လၢ အဝဲသ့ၣ်​က​ဒုးတၢ်​လီၤ. ကစၢ်​ယွၤ​ဟ့ၣ်​ဝဲ​အခွဲး ဒ်သိး​အ​က​ဒီသဒၢ​ဝဲ အ​ပှၤ​ဂီၢ်မုၢ်​ဒီး တၢ်ဘူၣ်​တၢ်ဘါ​စီဆှံ​အဂီၢ်​န့ၣ်​လီၤ. ဘၣ်ဆၣ်​သနာ်က့ ဘၣ်ဃး​ဒီး​တၢ်ဒုး​တၢ်ယၤ လၢ​ကစၢ်​ယွၤ​တူၢ်လိာ်ဝဲ​န့ၣ် ပ​ကကွၢ်​သကိး တၢ်ဂ့ၢ်​သၢ​ခါလီၤ.

1. ၁. မတၤ​တဖၣ်​ကြၢး​ပၣ်ဃုာ်​လၢ တၢ်ဒုး​အ​ပူၤ​လဲၣ်န့ၣ် ထဲ​ကစၢ်​ယွၤ​တဂၤဧိၤ ဆၢတဲာ်​ဝဲ​သ့​လီၤ. ဘၣ်​တဘျီ​န့ၣ် ကစၢ်​ယွၤ​တဲဘၣ် ပှၤ​အံၣ်စရ့လး​ဖိ​တဖၣ်​လၢ– “သု​တ​ဒုး​သုး” လၢ​တၢ်ဒုး​အံၤ​အ​ပူၤ​တဂ့ၤ. ဘၣ်​မနုၤ​အဃိ​လဲၣ်. မ့ၢ်​လၢ​ကစၢ်​ယွၤ​က​ဒုးတၢ်​လၢ အဝဲသ့ၣ်​အဂီၢ်​န့ၣ်​လီၤ. (၂ ကွဲးနီၣ်​တၢ် ၂၀:၁၇; ၃၂:၇, ၈) ကစၢ်​ယွၤ​မၤဝဲ​ဒ်အံၤ တဘျုး​ဘျီ​ညါ. တဘျီတခီၣ်​န့ၣ် ကစၢ်​ယွၤ​ဟ့ၣ်လီၤ​တၢ်​ကလုၢ်​လၢ ပှၤ​အံၣ်စရ့လး​ဖိ​တဖၣ် က​လဲၤ​ဒုးတၢ် ဒ်သိး​အဝဲသ့ၣ်​က​မၤနၢၤ ဒီး​ဒီသဒၢ​ဝဲ​အ​တၢ်အိၣ်​တၢ်ဆိး​အလီၢ်​လၢ ကီၢ်တၢ်စံးပာ်​အ​ပူၤ​န့ၣ်​လီၤ.​—၅ မိၤၡ့ ၇:၁, ၂;ယိၤၡူ ၁၀:၄၀.

2. ၂. ယွၤ​အခ့အပှၤ​တဖၣ်​က​ဘၣ်​ဒုးတၢ် အဆၢ​ကတီၢ်​ဖဲလဲၣ်​န့ၣ် ထဲ​ကစၢ်​ယွၤ​တဂၤဧိၤ ဆၢတဲာ်​ဝဲ​သ့​လီၤ. ယွၤ​အခ့အပှၤ​သ့ၣ်​တဖၣ် ဘၣ်​အိၣ်ခိး​ကွၢ်လၢ်​ဝဲ တၢ်​ဆၢကတီၢ်​လၢ ကစၢ်​ယွၤ​သ့ၣ်နံၤဖးသီ​ဝဲ ဒ်သိး​အ​က​လဲၤ​ဒုးဝဲ အဒုၣ်အဒါ​သ့ၣ်​တဖၣ် လၢ​အ​ဆီၣ်တံၢ်​မၤနၢၤ​ဒီး မၤအၢ​မၤသီ​အဝဲသ့ၣ်​န့ၣ်​လီၤ. တၢ်​ဆၢကတီၢ်​မ့ၢ်​တဘၣ်​ဒံး​ဘၣ်​န့ၣ် အဝဲသ့ၣ်​တအိၣ်​ဒီး​တၢ်ခွဲး​တၢ်ယာ်​လၢ အ​က​လဲၤ​ဒုးတၢ်​ဘၣ်. တချုး​လၢ ကစၢ်​ယွၤ​ဟ့ၣ်​အခွဲး​ဒံး​ဘၣ်​ဒီး အဝဲသ့ၣ် မ့ၢ်​လဲၤ​ဒုး​ဆိ​တၢ်​န့ၣ် တ​ဒိးန့ၢ်​ဘၣ်​ကစၢ်​ယွၤ​အ​တၢ်​ဆိၣ်ဂ့ၤ​ဘၣ်. လံာ်စီဆှံ​ပာ်ဖျါ​ထီၣ်ဝဲ​လၢ ပှၤ​အံၣ်စရ့လး​ဖိ​တဖၣ်​န့ၣ် ဖဲ​အဝဲသ့ၣ်​တ​ဒိကနၣ်​ကစၢ်​ယွၤ​အ​ကလုၢ်​ဒီး လဲၤ​ဒုးတၢ်​လၢ အ​နီၢ်ကစၢ်​အဆၢ​ကတီၢ် အဝဲသ့ၣ် ထံၣ်ဘၣ်​ဝဲ​တၢ်ကီ​တၢ်ခဲ​ဒိၣ်ဒိၣ်​မုၢ်မုၢ်​န့ၣ်​လီၤ. *

3. ၃. ပှၤ​ဂ့ၤ​မ့ၢ်ဂ့ၤ ပှၤအၢ​မ့ၢ်ဂ့ၤ​န့ၣ် ကစၢ်​ယွၤ​တဘၣ်​အသး​လၢ အဝဲသ့ၣ်​က​တုၤလၢ​တၢ်သံ နီ​တဂၤ​ဘၣ်. ယဟိဝၤ​ယွၤ​မ့ၢ် သးသမူ​အဂံၢ်​ခီၣ်ထံး ဒီး​အဝဲ​တ့လီၤ​ပှၤ​ဟီၣ်ခိၣ်​ဖိ​လီၤ. (စံးထီၣ်​ပတြၢၤ ၃၆:၉) လၢတၢ်န့ၣ်​အဃိ ကစၢ်​ယွၤ တ​အဲၣ်ဒိး​လၢ ပှၤ​ဟီၣ်ခိၣ်​ဖိ​တဖၣ် က​ဘၣ်​သံဝဲ​ဘၣ်. ဘၣ်ဆၣ် ပှၤလၢ​အ​ဆီၣ်တံၢ်​မၤနၢၤ​တၢ် ဒီး​မၤသံ​ပှၤဂၤ​အိၣ်ဝဲ​တနီၤ​အဃိ မ့ၢ်​တၢ်​လၢ​အ​လီၤသးအုး​ဒိၣ်မး​လီၤ. (စံးထီၣ်​ပတြၢၤ ၃၇:၁၂, ၁၄) လၢညါ​န့ၣ် ကစၢ်​ယွၤ​မၤလိာ်​ဝဲ အခ့အပှၤ​တဖၣ်​လၢ အ​က​လဲၤ​ဒုးတၢ် ဒ်သိး​က​စံၣ်ညီၣ်​ဝဲ ပှၤအၢ​ပှၤသီ​အဂီၢ်​န့ၣ်​လီၤ. ဘၣ်ဆၣ်​သနာ်က့ ဖဲ​ကစၢ်​ယွၤ မၤလိာ်​ဝဲ​ပှၤ​အံၣ်စရ့လး​ဖိ​လၢ က​လဲၤ​ဒုးတၢ်​အဆၢ​ကတီၢ်​န့ၣ် အဝဲ​ပာ်ဖျါ​ထီၣ် တၢ် “သးကညီၤ​တၢ်” ဒီး​တၢ် “သးထီၣ်​ကီ” လၢ​ပှၤလၢ​အ​ဆီၣ်တံၢ်​မၤနၢၤ ပှၤ​အံၣ်စရ့လး​ဖိ​တဖၣ်​အ​ဖီခိၣ်​န့ၣ်​လီၤ. (စံးထီၣ်​ပတြၢၤ ၈၆:၁၅) အဒိ တချုး​ပှၤ​အံၣ်စရ့လး​ဖိ​တဖၣ် လဲၤ​ဒုး​ဝ့ၢ်​တဖျၢၣ်​ဖျၢၣ်​အခါ​န့ၣ် ကစၢ်​ယွၤ​ထုးထီၣ်​တၢ်​ကလုၢ်​လၢ အဝဲသ့ၣ်​က​ဘၣ် “ကိးထီၣ်​တၢ်ဃူ​တၢ်ဖိး” ဒ်သိး​အ​က​ဟ့ၣ်​ပှၤဝ့ၢ်ဖိ​တဖၣ် တၢ်ခွဲး​တၢ်ယာ်​လၢ အ​က​ဆီတလဲ​အ​တၢ်​ပာ်သူၣ်​ပာ်သး ဒီး​ဟးဆှဲး​တၢ်ဒုး​တၢ်ယၤ​န့ၣ်​လီၤ. (၅ မိၤၡ့ ၂၀:၁၀-၁၃) လၢတၢ်န့ၣ်​အဃိ ကစၢ်​ယွၤ​ပာ်ဖျါ​ထီၣ်ဝဲ​လၢ “ပှၤ​တတီ​ဘၣ်​သံ​န့ၣ် တမ့ၢ်​ဘၣ်​အဘၣ်​ယ​သး​ဘၣ်, မ့ၢ်​အဘၣ်​ယ​သး​လၢ အ​က​ဃၣ်ကွံာ်​အသး​လၢ အကျဲ​ဒီး​မူ​ဝဲ​လီၤ.”​—ယဃ့းစက့လး ၃၃:၁၁, ၁၄-၁၆. *

လၢပျၢၤ​န့ၣ် ပ​ထံၣ်ဘၣ်​လၢ ယွၤ​သူဝဲ​တၢ်ဒုး​တၢ်ယၤ​ဒ်သိး က​မၤ​လီၤမၢ်​ကွံာ်​တၢ်​ဆီၣ်တံၢ်​မၤနၢၤ​အ​ကလုာ်​ကလုာ် ဒီး​တၢ်အၢ​တၢ်သီ​တဖၣ်​န့ၣ်​လီၤ. ဘၣ်ဆၣ် ထဲ​ကစၢ်​ယွၤ​တဂၤဧိၤ​န့ၣ် အိၣ်ဒီး​တၢ်ခွဲး​တၢ်ယာ်​လၢ က​ဆၢတဲာ်​ဝဲ​လၢ မတၤ​တဖၣ်​က​ဒုးတၢ်​လဲၣ် ဒီး​က​ဒုးတၢ်​လၢ တၢ်​ဆၢကတီၢ်​ဖဲလဲၣ် န့ၣ်​လီၤ. မ့ၢ်​ကစၢ်​ယွၤ​ဒုးတၢ်​ဒီး မၤသံမၤဝီတၢ်​လၢ တၢ်ဆှုၣ်​မဲာ်​ကဲၤမဲာ်​အ​ပူၤ​ဧါ. တမ့ၢ်​ဘၣ်. ကစၢ်​ယွၤ​သးဟ့ဝဲ တၢ်မၤ​ဆူၣ်​မၤစိး​န့ၣ်​လီၤ. (စံးထီၣ်​ပတြၢၤ ၁၁:၅) ဖဲ​ယ့ၣ်ၡူး​ခရံာ်​ဟဲ​လီၤ​လၢ ဟီၣ်ခိၣ်​ချၢ​အခါ မ့ၢ်​ကစၢ်​ယွၤ​အ​တၢ်ထံၣ်​ဘၣ်ဃး​ဒီး တၢ်ဒုး​တၢ်ယၤ​န့ၣ် ဆီတလဲ​အသး​စ့ၢ်ကီး​ဧါ.