မးသဲ ၂:၁-၂၃
၂ ဖဲစီၤပၤဟ့ၤရိာ်* ပၢတၢ်အခါ+ ယ့ၣ်ၡူးအိၣ်ဖျဲၣ်ထီၣ်လၢ ဘ့ၤသလ့ဃ့ၣ်လၢ+ ယူဒၤအဟီၣ်ကဝီၤ အပူၤလီၤ. ပှၤမၤကူးတဖၣ်* လၢအအိၣ်လၢ မုၢ်ထီၣ်တခီန့ၣ် ဟဲဝဲလၢ ဝ့ၢ်ယရူၤၡလ့ၣ်
၂ ဒီးတဲဝဲလၢ “ယူဒၤအစီၤပၤလၢ အဟဲအိၣ်ဖျဲၣ်ထီၣ်တဂၤန့ၣ် အိၣ်ဖဲလဲၣ်.+ ဖဲပအိၣ်လၢ မုၢ်ထီၣ်အခါ ပထံၣ်ဘၣ် အဆၣ်တဖျၢၣ် ဒီးပဟဲဒ်သိး ပကယူးယီၣ်အီၤလီၤ.”*
၃ ဖဲစီၤပၤဟ့ၤရိာ် ဒီးပှၤယရူၤၡလ့ၣ်ဖိခဲလၢာ် နၢ်ဟူဝဲဒ်န့ၣ်အခါ အဝဲသ့ၣ် သူၣ်ကိၢ်သးဂီၤတၢ်လီၤ.
၄ အဃိ စီၤဟ့ၤရိာ်ကိးဖှိၣ်ဝဲ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ဒီးသံကွၢ် အဝဲသ့ၣ်လၢ မ့ၢ်ခရံာ်* ကဟဲအိၣ်ဖျဲၣ်ထီၣ်ဝဲလၢ တၢ်လီၢ်ဖဲလဲၣ်.
၅ ဒီးအဝဲသ့ၣ် တဲဘၣ်အီၤလၢ “ဘ့ၤသလ့ဃ့ၣ်+ လၢအအိၣ်လၢ ယူဒၤအဟီၣ်ကဝီၤ အပူၤလီၤ. ဝံတဂၤ ကွဲးဆိပာ်စၢၤဝဲလၢ
၆ ‘ဘ့ၤသလ့ဃ့ၣ် လၢအအိၣ်လၢ ယူဒၤအဟီၣ်ကဝီၤဧၢ, ပှၤပၢတၢ်တဂၤ ကဟဲအိၣ်ထီၣ်ဝဲလၢနပူၤ ဒီးအဝဲ ကပၢဝဲယပှၤဂီၢ်မုၢ် ပှၤအံၣ်စရ့လးဖိလီၤ. အဃိ ယူဒၤအဟီၣ်ကဝီၤ အပဒိၣ်ပပှၢ်တဖၣ် တဘၣ်ပာ်နၤလၢ ဝ့ၢ်လၢ အဆံးကတၢၢ်တဖျၢၣ်ဘၣ်.’”+
၇ ဝံၤဒီးစီၤဟ့ၤရိာ် ကိးခူသူၣ်ဝဲ ပှၤမၤကူးတဖၣ် ဒီးသံကွၢ်အဝဲသ့ၣ် လီၤတံၢ်လီၤဆဲးလၢ ဆၣ်န့ၣ် အိၣ်ဖျါထီၣ်ဝဲလၢ အခါဖဲလဲၣ်.
၈ ဒီးဖဲအဝဲမၢ ပှၤမၤကူးတဖၣ် လဲၤလၢ ဝ့ၢ်ဘ့ၤသလ့ဃ့ၣ်အခါ အတဲဘၣ်အဝဲသ့ၣ်လၢ “လဲၤဃုဖိသၣ်အံၤ လီၤတံၢ်လီၤဆဲး ဒီးဖဲသုထံၣ်အီၤအခါ ဟဲက့ၤတဲဘၣ်ယၤ ဒ်သိးယကလဲၤ ယူးယီၣ်အီၤစ့ၢ်ကီးနီၤ.”
၉ ဖဲအဝဲသ့ၣ်နၢ်ဟူ စီၤပၤအတၢ်ကတိၤဝံၤအလီၢ်ခံ အဝဲသ့ၣ် လဲၤတၢ်လီၤ. ဒီးဆၣ်တဖျၢၣ်လၢ အဝဲသ့ၣ်ထံၣ်တ့ၢ်ဝဲဖဲ အဝဲသ့ၣ်အိၣ်လၢ မုၢ်ထီၣ်အခါန့ၣ်+ လဲၤတၢ်လၢ အဝဲသ့ၣ်အမဲာ်ညါ တုၤလၢ ဖိသၣ်အိၣ်တၢ်အလီၢ် ဒီးအိၣ်ပတုာ်ဝဲ ဖဲန့ၣ်လီၤ.
၁၀ ဖဲအဝဲသ့ၣ်ထံၣ်ဘၣ် ဆၣ်တဖျၢၣ်န့ၣ်အခါ အဝဲသ့ၣ် သးခုဝဲဒိၣ်မး.
၁၁ ဒီးအဝဲသ့ၣ် လဲၤနုာ်လၢဟံၣ်ပူၤ ဒီးထံၣ်ဝဲဖိသၣ်အိၣ်ဒီး အမိၢ်နီၢ်မၤရံလီၤ. အဝဲသ့ၣ် ထိၣ်လီၤပှီၤအသး ဒီးယူးယီၣ်ဖိသၣ် ဒီးအိးထီၣ်ဝဲ တၢ်ဟ့ၣ် ဒီးဟ့ၣ်လီၤအီၤလၢ ထူ, လီၢ်ဘၣ်* ဒီးမူရၣ်လီၤ.
၁၂ ဘၣ်ဆၣ် လၢတၢ်မံမီၢ်အပူၤ+ ကစၢ်ယွၤ ဟ့ၣ်ပလီၢ်အဝဲသ့ၣ်လၢ တဘၣ်က့ၤကဒါလၢ စီၤဟ့ၤရိာ် အအိၣ်တဂ့ၤ. အဃိ အဝဲသ့ၣ် က့ၤကဒါက့ၤဆူ အထံအကီၢ်လၢ ကျဲအဂၤတဘိလီၤ.
၁၃ ဖဲပှၤမၤကူးတဖၣ် က့ၤဝံၤအလီၢ်ခံ ယဟိဝၤယွၤ* အမူခိၣ်ကလူး လီၣ်ဖျါထီၣ်အသးလၢ စီၤယိၤသး အတၢ်မံမီၢ်အပူၤ+ ဒီးတဲအီၤလၢ “စီၤဟ့ၤရိာ် ကဃုမၤသံ ဖိသၣ်အံၤအဃိ ကိးထီၣ် ဖိသၣ် ဒီးနီၢ်မၤရံ ဒီးလဲၤဃ့ၢ်လၢ ကီၢ်အဲၤကူပတူး ဒီးအိၣ်ဖဲန့ၣ် တုၤလၢ ယမၢနဟးထီၣ်န့ၣ်တက့ၢ်.”
၁၄ စီၤယိၤသး ပၢၢ်ထီၣ်ဒီး လၢမုၢ်နၤခီန့ၣ် ကိးထီၣ် ဖိသၣ်ဒီးနီၢ်မၤရံ ဒီးလဲၤဝဲလၢ ကီၢ်အဲၤကူပတူးလီၤ.
၁၅ ဒီးအိၣ်ဝဲဖဲန့ၣ် တုၤလၢ စီၤဟ့ၤရိာ် သံဝဲတစုလီၤ. အဃိ တၢ်လၢယဟိဝၤယွၤ တဲဘၣ်အဝံန့ၣ် ဟဲလၢထီၣ်ပှဲၤထီၣ်ဝဲလီၤ. အဝဲတဲဝဲလၢ “ယကိးထီၣ်က့ၤ ယဖိခွါလၢ ကီၢ်အဲၤကူပတူးအပူၤလီၤ.”+
၁၆ ဖဲစီၤဟ့ၤရိာ် သ့ၣ်ညါဝဲလၢ ပှၤမၤကူးတဖၣ် လီန့ၢ်အီၤအခါ အဝဲသးဒိၣ်ထီၣ်တၢ် ဒိၣ်မးလီၤ. အဃိ အဝဲဟ့ၣ်လီၤ တၢ်ကလုၢ်လၢ ပှၤကဘၣ်မၤသံကယဲၢ် ဖိသၣ်ပိာ်ခွါ ခံနံၣ်ဆူအဖီလာ် လၢအအိၣ်လၢ ဘ့ၤသလ့ဃ့ၣ် ဒီးတၢ်လီၢ်လၢ အခိၣ်အဃၢၤတဖၣ်လီၤ. ခီဖျိလၢ ပှၤမၤကူးတဖၣ်အဃိ+ အဝဲနၢ်ပၢၢ်ထီၣ်လၢ ဖိသၣ်တဂၤန့ၣ် အသးနံၣ် ကအိၣ်ထဲထဲန့ၣ်လီၤ.
၁၇ ဒီးတၢ်မၤအသးတဖၣ်န့ၣ် မၤလၢပှဲၤထီၣ်ဝဲ ဝံယံးရမံယၤ အတၢ်ကတိၤလၢအမ့ၢ်
၁၈ “တၢ်ဟီၣ်တၢ်ယၢၤ ဒီးတၢ်ကအုကစွါ အကလုၢ်သီၣ်ထီၣ်လၢ ဝ့ၢ်ရၤမါအပူၤလီၤ. နီၢ်ရၤဃ့လး+ ဟီၣ်ဝဲလၢ အဖိတဖၣ်အဃိလီၤ. ဒီးမ့ၢ်လၢ အဖိတအိၣ်လၢၤဘၣ်အဃိ အတတူၢ်လိာ်ဝဲလၢ ပှၤကမၤမုာ်ထီၣ်အသးဘၣ်.”+
၁၉ ဖဲစီၤဟ့ၤရိာ် သံဝံၤအလီၢ်ခံ ယဟိဝၤယွၤ အမူခိၣ်ကလူး လီၣ်ဖျါထီၣ်အသးလၢ စီၤယိၤသး အတၢ်မံမီၢ်အပူၤ+ ဖဲအဝဲအိၣ်လၢ ကီၢ်အဲၤကူပတူးအပူၤ အခါလီၤ.
၂၀ ဒီးအတဲဝဲလၢ “ပှၤလၢအဃုမၤသံ ဖိသၣ်အသးသမူန့ၣ် သံလံအဃိ ကိးထီၣ် ဖိသၣ်ဒီးနမါ ဒီးက့ၤကဒါက့ၤလၢ အံၣ်စရ့လးအကီၢ်ဟီ.”
၂၁ အဃိ စီၤယိၤသး ကိးထီၣ်ဖိသၣ်ဒီး နီၢ်မၤရံ ဝံၤက့ၤဝဲလၢ အံၣ်စရ့လးအကီၢ်လီၤ.
၂၂ ဘၣ်ဆၣ် အဝဲနၢ်ဟူလၢ စီၤအၢ်ဃ့လး ပၢတၢ်လၢ အပၢ်စီၤဟ့ၤရိာ်အလီၢ်လၢ ယူဒၤအဟီၣ်ကဝီၤ အပူၤအဃိ အဝဲက့ၤအိၣ်ဝဲဖဲန့ၣ် တဘူၣ်လၢၤဘၣ်. တကးဒံးဘၣ် ကစၢ်ယွၤ ဟ့ၣ်ပလီၢ်အီၤလၢ တၢ်မံမီၢ်အပူၤအဃိ+ အဝဲလဲၤအိၣ်လၢ ကၤလံၤလါ အဟီၣ်ကဝီၤအပူၤလီၤ.+
၂၃ အဝဲလဲၤအိၣ်လၢ ဝ့ၢ်နစၤရ့းအပူၤ+ ဒ်သိး ကမၤလၢထီၣ်ပှဲၤထီၣ် ဝံအတၢ်စံးပာ် လၢအမ့ၢ် “အဝဲ* ကဘၣ်တၢ်ကိးအီၤလၢ ပှၤနစၤရ့းဖိလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ပှၤလၢအဒွးဆၣ် ဒ်သိးကတဲဖျါထီၣ် တၢ်မၤအသးလၢ ခါဆူညါအဂ့ၢ်.”
^ မ့ၢ်စ့ၢ်ကီး “သကူးလီၤသး.”
^ မ့ၢ်စ့ၢ်ကီး “မ့းၡံအၤ, ပှၤလၢဘၣ်တၢ်ဒိးဖှူအီၤ.”
^ ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်ဝဲ ခရံာ်.
