မးသဲ ၂၃:၁-၃၉
၂၃ ဝံၤဒီး ယ့ၣ်ၡူးတဲဘၣ် ပှၤဂီၢ်မုၢ် ဒီးအပျဲၢ်အဘီၣ်တဖၣ်လၢ
၂ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်န့ၣ် ဆ့ၣ်နီၤလၢ စီၤမိၤၡ့ အလီၢ်ဆ့ၣ်နီၤ အလိၤလီၤ.
၃ တၢ်လၢအဝဲသ့ၣ် တဲသုခဲလၢာ်န့ၣ် တိၢ်န့ၢ် ဒီးမၤထွဲအီၤတက့ၢ်. ဘၣ်ဆၣ် တဘၣ်မၤဒ် အဝဲသ့ၣ်မၤဝဲ အသိးတဂ့ၤ. အိၣ်ဒၣ်အဝဲသ့ၣ် တဲဝဲလီၤ. ဘၣ်ဆၣ် အဝဲသ့ၣ် တမၤဒ်အတဲဝဲ အသိးဘၣ်.+
၄ အဝဲသ့ၣ် ဘိၣ်ထီၣ်ဝဲ တၢ်ဝံတၢ်ယိး လၢအဃၢ ဒီးတီၣ်ထီၣ်ဝဲလၢ ပှၤဂၤအဖံဘၣ်ခိၣ်လီၤ.+ မ့မ့ၢ် အဝဲသ့ၣ် အနီၢ်ကစၢ်န့ၣ် ကထိးဘၣ်ဝဲလၢ အစုနၢတဘိဒၣ်လဲာ် အသးတအိၣ်ဘၣ်.+
၅ တၢ်အဒၢလၢ ပှၤထၢနုာ်ဃာ်ဝဲ လံာ်စီဆှံ အဆၢတဖၣ် လၢအပူၤန့ၣ် အဝဲသ့ၣ် စၢထီၣ်ဝဲ လၢအမဲာ်တူၢ်ခိၣ် ဒီးအစုအလိၤ ဒ်သိးကဒိးန့ၢ်ဘၣ်ဝဲ တၢ်ဒီသဒၢ အဂီၢ်လီၤ.+ အဝဲသ့ၣ် မၤဒိၣ်ထီၣ်ဝဲ တၢ်အဒၢတဖၣ်အံၤ ဒီးမၤထီထီၣ်စ့ၢ်ကီး အဆ့ကၤခီၣ်ထံးအနွံလီၤ.+ တၢ်လၢအဝဲသ့ၣ် မၤဝဲခဲလၢာ်န့ၣ် မၤဝဲဒ်သိး ပှၤကထံၣ်ဝဲ အဂီၢ်လီၤ.+
၆ ဒီးအဝဲသ့ၣ် အဲၣ်ဒိးဆ့ၣ်နီၤလၢ လီၢ်ဆ့ၣ်နီၤ အဂ့ၤကတၢၢ် ဖဲဟါတၢ်အီၣ်အခါ ဒီးအဲၣ်ဒိးဆ့ၣ်နီၤလၢ တၢ်မဲာ်ညါကတၢၢ် လၢဘူၣ်ဘျီၣ်ပူၤလီၤ.+
၇ အဝဲသ့ၣ် အဲၣ်ဒိးဝဲလၢ ပှၤကဆၢဂ့ၤဆၢဝါ အဝဲသ့ၣ်လၢ တၢ်ဆါတၢ်ပှ့ၤအလီၢ် ဒီးကိးအဝဲသ့ၣ်လၢ သရၣ်လီၤ.*
၈ ဘၣ်ဆၣ် မ့မ့ၢ်သုန့ၣ် တဘၣ်ပျဲ ပှၤကိးသုလၢ သရၣ်တဂ့ၤ. သုသရၣ်အိၣ်ထဲတဂၤလီၤ.+ သုဝဲသ့ၣ်ခဲလၢာ်န့ၣ် သုမ့ၢ်ဒီပုၢ်ဝဲၢ်လီၤ.
၉ တကးဒံးဘၣ် လၢဟီၣ်ခိၣ်ချၢအံၤ တဘၣ်ကိးပှၤဂၤလၢ ပၢ်နီတဂၤတဂ့ၤ. သုပၢ်အိၣ်ထဲတဂၤ+ လၢအအိၣ်လၢ မူခိၣ်န့ၣ်လီၤ.
၁၀ တဘၣ်ပျဲ ပှၤကိးသုလၢ တၢ်အခိၣ်တဂ့ၤ. သုခိၣ်အိၣ်ထဲတဂၤ လၢအမ့ၢ် ခရံာ်လီၤ.
၁၁ ပှၤလၢ အဒိၣ်ကတၢၢ်လၢ သုကျါတဂၤန့ၣ် ကဘၣ်ကဲထီၣ် သုခ့သုပှၤလီၤ.+
၁၂ ပှၤလၢ အပာ်ထီၣ်ထီအသးန့ၣ် တၢ်ကဆီၣ်လီၤအီၤလီၤ.+ ဒီးပှၤလၢ အဆီၣ်လီၤအသးန့ၣ် ကဘၣ်တၢ်ပာ်ထီၣ်ထီအီၤလီၤ.+
၁၃ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ, သုကးပံးဃာ် မူခိၣ်ဘီမုၢ်ဒ်သိး ပှၤလဲၤနုာ်လီၤ သုတန့ၢ်တဂ့ၤ အဂီၢ်လီၤ. သုနီၢ်ကစၢ်ဒၣ်ဝဲ သုတလဲၤနုာ်လီၤဘၣ် ဒီးပှၤလၢအအဲၣ်ဒိး လဲၤနုာ်ဝဲတဖၣ်န့ၣ် သုတဟ့ၣ်အခွဲးလၢ အဝဲသ့ၣ် ကလဲၤနုာ်လီၤဝဲ စ့ၢ်ကီးဘၣ်,+ အဃိ သုကဘၣ်ကီဘၣ်ခဲလီၤ.
၁၄ *—
၁၅ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ,+ သုကဘၣ်ကီဘၣ်ခဲလီၤ. သုလဲၤတၢ်လၢ ပီၣ်လဲၣ်ပူၤ ဒီးလၢခိခိၣ် ဒ်သိးပှၤတဂၤ ကဟဲနုာ်လီၤလၢ ယူဒၤ အတၢ်ဘူၣ်တၢ်ဘါ အပူၤလီၤ. ဒီးဖဲအဝဲ ဟဲနုာ်လီၤအခါ သုဒုးကဲထီၣ်အီၤလၢ ပှၤလၢ အကြၢးလဲၤလၢ ကဟဲနၢ်* အါန့ၢ်ဒံးသု ခံစးလီၤ.
၁၆ “ပှၤမဲာ်တထံၣ်တၢ်လၢ အဒုးနဲၣ် ပှၤဂၤကျဲသ့ၣ်ဧၢ,+ သုကဘၣ်ကီဘၣ်ခဲလီၤ. သုတဲလၢ ‘ပှၤတဂၤဂၤ မ့ၢ်မၤတၢ်အၢၣ်လီၤလၢ တၢ်လုၢ်ဟံၣ် အမဲာ်ညါန့ၣ် အတလိၣ် မၤလၢပှဲၤအတၢ်အၢၣ်လီၤဘၣ်. ဘၣ်ဆၣ် ပှၤမ့ၢ်မၤ တၢ်အၢၣ်လီၤလၢ တၢ်လုၢ်ဟံၣ်အထူ အမဲာ်ညါန့ၣ် အဝဲကဘၣ် မၤလၢပှဲၤအီၤလီၤ.’+
၁၇ ပှၤလၢအသးတဆးဘၣ် ဒီးပှၤမဲာ် တထံၣ်တၢ်သ့ၣ်ဧၢ, တၢ်လၢအရ့ဒိၣ်န့ၣ် မ့ၢ်ထူဧါ မ့တမ့ၢ် တၢ်လုၢ်ဟံၣ်လၢ အမၤစီဆှံထူန့ၣ်ဧါ.
၁၈ သုတဲစ့ၢ်ကီးလၢ ‘ပှၤတဂၤဂၤ မ့ၢ်မၤတၢ်အၢၣ်လီၤလၢ တၢ်လုၢ်လီၢ်အမဲာ်ညါန့ၣ် အတလိၣ်မၤလၢပှဲၤ အတၢ်အၢၣ်လီၤဘၣ်. ဘၣ်ဆၣ် ပှၤတဂၤဂၤ မ့ၢ်မၤတၢ်အၢၣ်လီၤ ဖဲတၢ်လုၢ်အိၣ်လၢ တၢ်လုၢ်လီၢ်အဖီခိၣ် အမဲာ်ညါအခါ အဝဲကဘၣ် မၤလၢပှဲၤအီၤလီၤ.’
၁၉ ပှၤမဲာ်တထံၣ်တၢ်သ့ၣ်ဧၢ, တၢ်လၢအရ့ဒိၣ်န့ၣ် မ့ၢ်တၢ်လုၢ်ဧါ မ့တမ့ၢ် တၢ်လုၢ်လီၢ်လၢ အမၤစီဆှံ တၢ်လုၢ်ဧါ.
၂၀ အဃိ ပှၤလၢ အအၢၣ်လီၤတၢ်လၢ တၢ်လုၢ်လီၢ်အမဲာ်ညါန့ၣ် မ့ၢ်အအၢၣ်လီၤတၢ်လၢ တၢ်လုၢ်လီၢ်အမဲာ်ညါ တကးဒံးဘၣ် အအၢၣ်လီၤတၢ်လၢ ကယဲၢ်တၢ်လၢ အအိၣ်လၢ တၢ်လုၢ်လီၢ်အဖီခိၣ် အမဲာ်ညါ စ့ၢ်ကီးလီၤ.
၂၁ ဒီးပှၤလၢ အအၢၣ်လီၤတၢ်လၢ တၢ်လုၢ်ဟံၣ်အမဲာ်ညါန့ၣ် မ့ၢ်အအၢၣ်လီၤတၢ်လၢ တၢ်လုၢ်ဟံၣ်အမဲာ်ညါ တကးဒံးဘၣ် မ့ၢ်အအၢၣ်လီၤတၢ်လၢ ကစၢ်ယွၤ လၢအအိၣ်လၢ တၢ်လုၢ်ဟံၣ်ပူၤတဂၤန့ၣ် အမဲာ်ညါစ့ၢ်ကီးလီၤ.+
၂၂ ဒီးပှၤလၢ အအၢၣ်လီၤတၢ်လၢ မူခိၣ်အမဲာ်ညါန့ၣ် မ့ၢ်အအၢၣ်လီၤတၢ်လၢ ကစၢ်ယွၤ အလီၢ်ပစိာ်အမဲာ်ညါ ဒီးကစၢ်ယွၤလၢ အဆ့ၣ်နီၤလၢ လီၢ်ပစိာ်အလိၤတဂၤန့ၣ် အမဲာ်ညါစ့ၢ်ကီးလီၤ.
၂၃ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ, သုကဘၣ်ကီဘၣ်ခဲလီၤ. သုဟ့ၣ် တၢ်ဆံဆဲၣ်ပူတပူလၢ ဟီၣ်ဝီၤသွ့, စးမူ ဒီးစံယၤတဖၣ်လီၤ.+ ဘၣ်ဆၣ် တၢ်ဂ့ၢ်အရ့ဒိၣ်န့ၢ်အန့ၣ်လၢ စီၤမိၤၡ့ အတၢ်သိၣ်တၢ်သီ ပာ်ဖျါထီၣ်ဝဲဘၣ်ဃးဒီး တၢ်စံၣ်ညီၣ်တီ,+ တၢ်သးကညီၤ+ ဒီးတၢ်သးတီန့ၣ် သုကွၢ်ကပာ်အီၤလီၤ. နီၢ်ကီၢ်န့ၣ် သုကဘၣ်ဟ့ၣ်လီၤ တၢ်ဆံဆဲၣ်ပူတပူ ဘၣ်ဆၣ် သုတဘၣ်ကွၢ်ကပာ် တၢ်လၢအရ့ဒိၣ်န့ၢ်အန့ၣ်လၢ စီၤမိၤၡ့ အတၢ်သိၣ်တၢ်သီ ပာ်ဖျါထီၣ်ဝဲဘၣ်.+
၂၄ ပှၤမဲာ်တထံၣ်တၢ်လၢ အဒုးနဲၣ်ပှၤဂၤကျဲသ့ၣ်ဧၢ,+ သုပှဲၢ်ကွံာ်ပစိၤ+ ဘၣ်ဆၣ် သုယူၢ်လီၤ ကီၤလၤအူးဒီတဒုညါလီၤ.+
၂၅ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ, သုကဘၣ်ကီဘၣ်ခဲလီၤ. သုလီၤဂာ်ဒ်သိးဒီး ထံခွး ဒီးလီခီလၢ အဘၣ်တၢ်မၤကဆှီအီၤ ထဲအချၢလီၤ.+ သုသးပူၤန့ၣ် ပှဲၤဝဲဒီး တၢ်သးကွံ*+ ဒီးသုတၢ်ပၢၤသး တအိၣ်ဘၣ်.+
၂၆ ပှၤဖၤရံၤၡဲလၢ အမဲာ်တထံၣ်တၢ်သ့ၣ်ဧၢ, မၤကဆှီထီၣ်ဆိ ထံခွးအပူၤ ဒီးလီခီအပူၤတက့ၢ်. သုမ့ၢ်မၤဒ်န့ၣ်န့ၣ် အချၢစ့ၢ်ကီး ကကဆှီထီၣ်ဝဲလီၤ.
၂၇ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ,+ သုကဘၣ်ကီဘၣ်ခဲလီၤ. သုလီၤဂာ်ဒ်သိးဒီး တၢ်သွၣ်ခိၣ်လၢ ပှၤဖှူဝါထီၣ်အီၤလီၤ.+ မ့မ့ၢ်လၢအချၢန့ၣ် ဖျါဃံလၤ ဘၣ်ဆၣ် လၢအပူၤန့ၣ် ပှဲၤဒီး ပှၤသံအဃံအကွဲ ဒီးတၢ်လၢ အတကဆှီဘၣ် ကိးမံၤဒဲးလီၤ.
၂၈ ဒ်န့ၣ်အသိး လၢပှၤမဲာ်ညါန့ၣ် သုဖျါဒ်သိးဒီး ပှၤတီပှၤလိၤလီၤ. ဘၣ်ဆၣ် လၢသုသးပူၤန့ၣ်ပှဲၤဒီး တၢ်ပာ်မၤသး ဒီးတၢ်တတီတလိၤဘၣ်လီၤ.+
၂၉ “ပှၤကွဲးလံာ်ဖိ ဒီးပှၤဖၤရံၤၡဲတဖၣ်လၢ အပာ်မၤအသးသ့ၣ်ဧၢ,+ သုကဘၣ်ကီဘၣ်ခဲလီၤ. သုတ့ထီၣ် တၢ်သွၣ်ခိၣ်လၢ ဝံတဖၣ်အဂီၢ် ဒီးသုမၤဃံမၤလၤထီၣ် ပှၤတီပှၤလိၤ အတၢ်သွၣ်ခိၣ်တဖၣ်လီၤ.+
၃၀ ဒီးသုတဲလၢ ‘ပမ့ၢ်အိၣ်မူဘၣ်လၢ ပမိၢ်ပၢ်ဖံဖု လၢပျၢၤတဖၣ် အစိၤန့ၣ် တမ့ၢ်လၢ ပကပၣ်ဃုာ်ဒီး အဝဲသ့ၣ် ဖဲအဝဲသ့ၣ် လူလီၤဝံတဖၣ် အသွံၣ်အခါန့ၣ်ဘၣ်.’
၃၁ အဃိ ပှၤလၢအမၤသံဝံတဖၣ်န့ၣ် သုအၢၣ်လီၤလၢ သုမ့ၢ် အဝဲသ့ၣ်အဖိအလံၤလီၤ.+
၃၂ အဃိ တၢ်မၤလၢ သုမိၢ်ပၢ်ဖံဖု လၢပျၢၤတဖၣ် မၤတ့ၢ်အီၤန့ၣ် မၤဝံၤက့ၤအီၤသၢၤ.
၃၃ “ဂုၢ်အၢအဖိအလံၤသ့ၣ်ဧၢ,+ သုဃ့ၢ်ပူၤဖျဲး တၢ်စံၣ်ညီၣ်လၢ ကဟဲနၢ်*+ ကသ့ဒ်လဲၣ်.
၃၄ လၢတၢ်ဂ့ၢ်အံၤအဃိ ယကဆှၢလီၤ ဝံတဖၣ်,+ ပှၤကူၣ်တၢ်သ့တဖၣ် ဒီးပှၤသိၣ်လိတၢ်တဖၣ်+ လၢသုအိၣ်လီၤ. သုကမၤသံ အဝဲသ့ၣ်တနီၤလၢ+ သ့ၣ်တၢၣ်လိၤ ဒီးတနီၤန့ၣ် သုကတီၢ်အီၤလၢ+ ဘူၣ်ဘျီၣ်အပူၤ ဒီးသုကမၤအၢမၤနး+ အဝဲသ့ၣ်လၢ ဝ့ၢ်တဖျၢၣ်ဘၣ် တဖျၢၣ်အပူၤလီၤ.
၃၅ အဃိ ပှၤတီပှၤလိၤခဲလၢာ် အသွံၣ်လၢ အဘၣ်တၢ်လူလီၤအီၤလၢ ဟီၣ်ခိၣ်ချၢအံၤ ကလီၤတီလၢ သုခိၣ်လိၤ စးထီၣ်လၢ ပှၤတီပှၤလိၤ စီၤဟ့းဘ့းလး+ တုၤလီၤလၢ စီၤဘရၤဃံအဖိခွါ စီၤစကၤရယၤ လၢသုမၤသံအီၤလၢ တၢ်လုၢ်ဟံၣ် ဒီးတၢ်လုၢ်လီၢ် အဘၢၣ်စၢၤလီၤ.+
၃၆ ယကတဲဘၣ်သုတီတီလၢ ခီဖျိတၢ်သ့ၣ်တဖၣ်န့ၣ်ခဲလၢာ်အဃိ တၢ်စံၣ်ညီၣ် ကဟဲဘၣ် ပှၤတစိၤအံၤလီၤ.
၃၇ “ပှၤအိၣ်လၢ ဝ့ၢ်ယရူၤၡလ့ၣ်အပူၤသ့ၣ်ဧၢ, ပှၤအိၣ်လၢ ဝ့ၢ်ယရူၤၡလ့ၣ်အပူၤသ့ၣ်ဧၢ, သုမၤသံဝံတဖၣ် ဒီးသုကွံာ်သံပှၤလၢ ကစၢ်ယွၤဆှၢလီၤအီၤ ဆူသုအိၣ်န့ၣ် လၢလၢၢ်လီၤ.+ ဒ်ဆီမိၢ်ပှၢ် ဟုဃာ်အဖိလၢ အဒံးဆ့အဖီလာ် အသိးန့ၣ် ယအဲၣ်ဒိးဒုးအိၣ်ဖှိၣ် သုဖိသုလံၤတဖၣ် အဘျီအါမးလီၤ. ဘၣ်ဆၣ် သုတတူၢ်လိာ်ဘၣ်.+
၃၈ အဃိ ကစၢ်ယွၤ ကပာ်တ့ၢ်ကွံာ် သုဟံၣ်* ဒီးအကအိၣ်က့ၤလၢ သုစုပူၤလီၤ.+
၃၉ ယကတဲဘၣ်သုလၢ တချုးလၢ သုတဲလၢ ‘ပှၤလၢအဟဲလၢ ယဟိဝၤယွၤ* အမံၤတဂၤန့ၣ် မ်အဘၣ်ဆိၣ်ဂ့ၤတက့ၢ်’+ ဒံးဘၣ်န့ၣ် လ့ၤတက့ၤ သုတထံၣ်ယၤလၢၤဘၣ်.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ရၤဘံဧၢ.”
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ဂုာ်န့ၢ်ဆူၣ်တၢ်.”
^ ကွၢ် တၢ်ကတိၤအခီပညီ.
^ မ့ၢ်ဝဲ တၢ်လုၢ်ဟံၣ်.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
