မၢ်ကူး ၁:၁-၄၅
-
ပှၤဘျၢတၢ်စီၤယိၤဟၣ် စံၣ်တဲၤတဲလီၤတၢ် (၁-၈)
-
ယ့ၣ်ၡူးဒိးဘျၢထံ (၉-၁၁)
-
မုၣ်ကီၤလံၢ်လ့ပစီ ယ့ၣ်ၡူး (၁၂, ၁၃)
-
ယ့ၣ်ၡူးစးထီၣ် စံၣ်တဲၤတဲလီၤတၢ်လၢ ကၤလံၤလါ (၁၄, ၁၅)
-
ယ့ၣ်ၡူးကိးဝဲ အပျဲၢ်အဘီၣ် အဆိကတၢၢ်တဖၣ် (၁၆-၂၀)
-
နီဟးထီၣ်ကွံာ် တၢ်ဝံတၢ်နါ (၂၁-၂၈)
-
ယ့ၣ်ၡူးမၤဘျါကွံာ် ပှၤအါဂၤလၢ ဝ့ၢ်ကပ့းရနီၣ်အပူၤ (၂၉-၃၄)
-
ဃ့ထုကဖၣ်တၢ်လၢ ပှၤတအိၣ် နီတဂၤဘၣ်အလီၢ် (၃၅-၃၉)
-
ပှၤဘၣ်တၢ်ဆါအၢတဂၤ ဘျါက့ၤဝဲ (၄၀-၄၅)
၁ တၢ်သးခုကစီၣ် ဘၣ်ဃးဒီး ကစၢ်ယွၤအဖိခွါ ယ့ၣ်ၡူးခရံာ်န့ၣ် စးထီၣ်အသးဒ်အံၤလီၤ.
၂ ဒ်ဝံယၡါယၤ ကွဲးဝဲအသိး “(ယကမၢလီၤ ယပှၤစိာ်တၢ်ကစီၣ်ဖိတဂၤ လၢနမဲာ်ညါ ဒ်သိးအဝဲ ကကတဲာ်ကတီၤဆိန့ၢ် ကျဲလၢနဂီၢ်လီၤ.)+
၃ လၢပှၢ်မုၢ်ကနၢန့ၣ် ပှၤတဂၤ အကလုၢ်သီၣ်ထီၣ်ဝဲလၢ ‘ကတဲာ်ကတီၤန့ၢ် ကျဲလၢယဟိဝၤယွၤ* အဂီၢ် ဒီးမၤလိၤထီၣ် ကျဲလၢအမဲာ်ညါတက့ၢ်.’”+
၄ ပှၤဘျၢတၢ် စီၤယိၤဟၣ်န့ၣ် အိၣ်လၢပှၢ်မုၢ်ကနၢ ဒီးစံၣ်တဲၤတဲလီၤဝဲ တၢ်ဒိးဘျၢထံအဂ့ၢ် လၢအမ့ၢ် တၢ်ပနီၣ်တခါလၢ ဘၣ်ဃးဒီး တၢ်ပီၢ်ယၢ်လီၤက့ၤသး လၢတၢ်ပျၢ်တၢ်ဒဲးဘး အဂီၢ်လီၤ.+
၅ ကယဲၢ်ပှၤအိၣ်လၢ ယူဒၤအဟီၣ်ကဝီၤ ဒီးပှၤအိၣ်လၢ ဝ့ၢ်ယရူၤၡလ့ၣ်အပူၤခဲလၢာ် လဲၤဝဲလၢအအိၣ် ဒီးစီၤယိၤဟၣ် ဒိးဘျၢအဝဲသ့ၣ်လၢ ထံကျိယၢ်ဒ့ၣ်အပူၤ ဒီးအဝဲသ့ၣ်အၢၣ်လီၤ အတၢ်ဒဲးဘးပျီပျီလီၤ.+
၆ စီၤယိၤဟၣ်န့ၣ် သိးဝဲတၢ်ကူတၢ်သိးလၢ ဘၣ်တၢ်မၤအီၤလၢ ကီၤလၤအူးအဆူၣ် ဒီးစၢထီၣ်အယီၢ်ဒ့ဒီး ယီၢ်တကိးလၢ ဘၣ်တၢ်တ့အီၤလၢ ဆၣ်ဖိကီၢ်ဖိအဘ့ၣ်လီၤ.+ အဝဲအီၣ်ဒွဲၣ် ဒီးကနဲမံၤအစီလီၤ.+
၇ အဝဲ စံၣ်တဲၤတဲလီၤဝဲလၢ “ပှၤကဟဲလၢ ယလီၢ်ခံတဂၤန့ၣ် ဒိၣ်န့ၢ်ယၤလီၤ. ထဲလၢ ယကသကူးလီၤသး ဒီးဃဲၣ်လီၤကွံာ် အခီၣ်ဖံးပျံၤဒၣ်လဲာ် ယတကြၢးဘၣ်.+
၈ ယဒိးဘျၢသုလၢထံ ဘၣ်ဆၣ် အဝဲကဒိးဘျၢသုလၢ သးစီဆှံလီၤ.”+
၉ လၢမုၢ်နံၤတဖၣ်န့ၣ်အတီၢ်ပူၤ ယ့ၣ်ၡူးအိၣ်ဟဲလၢ ဝ့ၢ်နစၤရ့း လၢကၤလံၤလါ အဟီၣ်ကဝီၤအပူၤ ဒီးဒိးဘျၢအသးလၢ စီၤယိၤဟၣ်အစုပူၤ လၢထံကျိယၢ်ဒ့ၣ်အပူၤလီၤ.+
၁၀ ဖဲယ့ၣ်ၡူးဟဲထီၣ်လၢ ထံကျါတဘျီဃီန့ၣ် အထံၣ်ဝဲ မူခိၣ်အိးထီၣ်အသး ဒီးသးစီဆှံ ဟဲလီၤလၢအလိၤ ဒ်ထိၣ်လွံၢ် ဟဲလီၤဝဲအသိးလီၤ.+
၁၁ ဒီးတၢ်ကလုၢ်သီၣ်ထီၣ်လၢ မူခိၣ်လၢ “နမ့ၢ် ယဖိခွါလၢယအဲၣ် ဒီးယဘၣ်သူၣ်ဘၣ်သးနၤလီၤ.”+
၁၂ ဒီးသးစီဆှံ ထိၣ်ဟူးထိၣ်ဂဲၤထီၣ်အီၤ တဘျီဃီ ဒ်သိးအကလဲၤလၢ ပှၢ်မုၢ်ကနၢလီၤ.
၁၃ အဝဲအိၣ်လၢ ပှၢ်မုၢ်ကနၢအသီ ၄၀ ဒီးမုၣ်ကီၤလံၢ်* လ့ပစီအီၤလီၤ.+ အဝဲအိၣ်လၢ ဆၣ်ဖိကီၢ်ဖိအမံၤတဖၣ်အကျါ ဘၣ်ဆၣ် မူခိၣ်ကလူးတဖၣ် မၤစၢၤအီၤလီၤ.+
၁၄ ဖဲပှၤဖီၣ် စီၤယိၤဟၣ် ဝံၤအလီၢ်ခံ ယ့ၣ်ၡူးလဲၤဝဲလၢ ကၤလံၤလါ+ ဒီးစံၣ်တဲၤတဲလီၤ တၢ်သးခုကစီၣ် ဘၣ်ဃးဒီး ကစၢ်ယွၤအဂ့ၢ်+
၁၅ ဒီးတဲဝဲလၢ “တၢ်ဆၢကတီၢ်လၢအဘၣ် တၢ်ပာ်ပနီၣ်အီၤန့ၣ် ဟဲတုၤလံ. ဒီးကစၢ်ယွၤ အဘီအမုၢ်ဘူးထီၣ်လံ. ပီၢ်ယၢ်လီၤက့ၤသုသး+ ဒီးစူၢ်က့ၤနာ်က့ၤ တၢ်သးခုကစီၣ်တက့ၢ်.”
၁၆ ဖဲယ့ၣ်ၡူးဟးလၢ ကၤလံၤလါ အပီၣ်လဲၣ်နံၤအခါ အထံၣ်ဝဲ စီၤၡံမိၣ်ဒီး စီၤၡံမိၣ်အဒီပုၢ်ဝဲၢ်ခွါ စီၤအၣ်ဒရ့းလီၤ.+ အဝဲသ့ၣ်မ့ၢ် ပှၤမၤညၣ်ဖိအဃိ+ အဝဲသ့ၣ်ကွံာ်လီၤစၤ* လၢပီၣ်လဲၣ်ပူၤလီၤ.+
၁၇ ဒီးယ့ၣ်ၡူး တဲအဝဲသ့ၣ်လၢ “ဟဲပိာ်ယခံတက့ၢ်. ဒီးယကမၢသုဃုပှၤကညီ ဒ်သုဃုန့ၢ်ညၣ်အသိးလီၤ.”+
၁၈ ဒီးအဝဲသ့ၣ်ပာ်တ့ၢ်ကွံာ် အစၤတဘျီဃီ ဒီးပိာ်ထီၣ်အခံလီၤ.+
၁၉ အဝဲ လဲၤကဒီးဆူညါတစဲး ဒီးထံၣ်ဝဲ စီၤစ့းဘ့းဒဲ အဖိခွါတဖၣ် လၢအမ့ၢ် စီၤယၤကိာ် ဒီးစီၤယိၤဟၣ်န့ၣ် အိၣ်လၢချံပူၤ ဒီးဆးထီၣ်ဝဲအစၤလီၤ.+
၂၀ တဘျီဃီန့ၣ် ယ့ၣ်ၡူးကိးန့ၢ်အဝဲသ့ၣ် ဒီးအဝဲသ့ၣ် ပာ်တ့ၢ်ကွံာ်အပၢ် စီၤစ့းဘ့းဒဲ ဒီးအပှၤမၤတၢ်ဖိတဖၣ် လၢချံပူၤ ဒီးပိာ်ထီၣ် ယ့ၣ်ၡူးအခံလီၤ.
၂၁ ဒီးအဝဲသ့ၣ် လဲၤဝဲလၢ ဝ့ၢ်ကပ့းရနီၣ်လီၤ.
ဖဲမုၢ်အိၣ်ဘှံးနံၤ တုၤအခါ ယ့ၣ်ၡူးလဲၤနုာ်လီၤလၢ ဘူၣ်ဘျီၣ်ပူၤ ဒီးသိၣ်လိတၢ်လီၤ.+
၂၂ ပှၤဖဲန့ၣ်တဖၣ် ကမၢကမၣ်ဝဲလၢ အတၢ်သိၣ်လိနဲၣ်လိ အဃိလီၤ. အဝဲသိၣ်လိတၢ်ဒ် ပှၤလၢအိၣ်ဒီး တၢ်စိတၢ်ကမီၤအသိး ဒီးတမ့ၢ်ဒ် ပှၤကွဲးလံာ်ဖိတဖၣ် အသိးဘၣ်.+
၂၃ ဖဲန့ၣ်အဆၢကတီၢ် လၢဘူၣ်ဘျီၣ်ပူၤန့ၣ် ပှၤလၢ တၢ်ဝံတၢ်နါ အိၣ်လၢအလိၤတဂၤ ကိးပသူထီၣ်ဝဲလၢ
၂၄ “ပှၤနစၤရ့းဖိ ယ့ၣ်ၡူးဧၢ,+ နမၤကီမၤခဲပှၤဘၣ်လဲၣ်. နဟဲလၢ နကမၤဟးဂီၤပှၤဧါ. နမ့ၢ်ကစၢ်ယွၤ အပှၤစီဆှံတဂၤန့ၣ်+ ယသ့ၣ်ညါ လီၤတံၢ်လီၤဆဲးလီၤ.”
၂၅ ဘၣ်ဆၣ် ယ့ၣ်ၡူးဟ့ၣ်လီၤအီၤတၢ်ကလုၢ် ဒီးတဲဝဲလၢ “အိၣ်ဘှ့ၣ် ဒီးဟးထီၣ်ကွံာ်လၢ အပူၤန့ၣ်.”
၂၆ ဒီးတၢ်ဝံတၢ်နါအံၤ တရုၤဆှဲးဆှုဝဲ ပှၤတဂၤန့ၣ် ဒီးကိးပသူထီၣ်လၢ အကလုၢ်ဖးဒိၣ် ဝံၤဒီး ဟးထီၣ်လၢအပူၤလီၤ.
၂၇ ပှၤဖဲန့ၣ်ခဲလၢာ် ကမၢကမၣ်ဝဲဒိၣ်မး ဒီးအဝဲသ့ၣ် တဲလိာ်အသးလၢ “တၢ်တခါအံၤ ဒ်လဲၣ်. မ့ၢ်ဝဲတၢ်သိၣ်လိလၢ အသီတခါဧါသၢၤ. အဝဲအိၣ်ဒီး တၢ်စိတၢ်ကမီၤလၢ ကနီဟးထီၣ် တၢ်ဝံတၢ်နါတဖၣ် ဒီးအဝဲသ့ၣ် ဒိကနၣ်အီၤလီၤ.”
၂၈ အဃိ ယ့ၣ်ၡူးအဂ့ၢ် ရၤလီၤအသးလၢ ကၤလံၤလါ အဟီၣ်ကဝီၤ ဒီတဘ့ၣ်ညါ ချ့မးလီၤ.
၂၉ ဝံၤဒီး အဝဲသ့ၣ်ဟးထီၣ်ကွံာ်လၢ ဘူၣ်ဘျီၣ်ပူၤ ဒီးလဲၤဝဲဒီး စီၤယၤကိာ် ဒီးစီၤယိၤဟၣ် လၢစီၤၡံမိၣ် ဒီးစီၤအၣ်ဒရ့း အဟံၣ်လီၤ.+
၃၀ ဒီးစီၤၡံမိၣ် အမံၤပှၢ်ပိာ်မုၣ်+ အလိၤကိၢ်အဃိ အမံနီၤဝဲလီၤ. တဘျီဃီန့ၣ် အဝဲသ့ၣ်တဲဘၣ် ယ့ၣ်ၡူးလၢအဂ့ၢ်လီၤ.
၃၁ ယ့ၣ်ၡူး လဲၤဖီၣ်ထီၣ်အစု ဒီးဝံၣ်ဆၢထၢၣ်အီၤ ဒီးအတၢ်ကိၢ် ခုၣ်လီၤက့ၤဝဲလီၤ. ဒီးအကတဲာ်ကတီၤဝဲ တၢ်အီၣ်တၢ်အီလၢ အဝဲသ့ၣ်အဂီၢ်လီၤ.
၃၂ ဖဲဟါလီၤခီ ဒီးမုၢ်လီၤနုာ် ဝံၤအလီၢ်ခံန့ၣ် ပှၤဟဲကိးဝဲကယဲၢ် ပှၤလၢအဆိးက့ ဒီးပှၤလၢ တၢ်ဝံတၢ်နါ အိၣ်လၢအလိၤတဖၣ်လီၤ.+
၃၃ ဒီးပှၤဒီတဝ့ၢ် ဟဲအိၣ်ဖှိၣ်ဝဲလၢ တြဲၤအခီၣ်ထံးလီၤ.
၃၄ အဃိ အဝဲမၤဘျါဝဲ ပှၤအါဂၤလၢအိၣ်ဒီး တၢ်ဆူးတၢ်ဆါ အကလုာ်ကလုာ်+ ဒီးနီဟးထီၣ်ဝဲ တၢ်ဝံတၢ်နါအါမးလီၤ. ဘၣ်ဆၣ် မ့ၢ်လၢ တၢ်ဝံတၢ်နါတဖၣ် သ့ၣ်ညါဝဲလၢ အမ့ၢ်ခရံာ်အဃိ အတဟ့ၣ်အခွဲးလၢ တၢ်ဝံတၢ်နါတဖၣ်အံၤ တဲတၢ်ဘၣ်.
၃၅ ဖဲဂီၤခီဂီၤဂီၤ တၢ်ခံးဒံးအဆၢကတီၢ်န့ၣ် ယ့ၣ်ၡူးပၢၢ်ထီၣ် ဒီးလဲၤဝဲလၢတၢ်ချၢ လၢပှၤတအိၣ် နီတဂၤဘၣ်အလီၢ် ဒီးဃ့ထုကဖၣ်တၢ်လီၤ.+
၃၆ ဒီးစီၤၡံမိၣ် ဒီးပှၤလၢ အအိၣ်ဒီးအီၤတဖၣ် ဟးလူၤဃု ယ့ၣ်ၡူးလီၤ.
၃၇ ဖဲအဝဲသ့ၣ် ထံၣ်အီၤအခါ အဝဲသ့ၣ်တဲအီၤလၢ “ပှၤခဲလၢာ်ဃုနၤလီၤ.”
၃၈ ဘၣ်ဆၣ် ယ့ၣ်ၡူး တဲအဝဲသ့ၣ်လၢ “ပကလဲၤလၢ ဝ့ၢ်အဂုၤအဂၤ လၢအဘူးတဖၣ် ဒ်သိး ယကစံၣ်တဲၤတဲလီၤ တၢ်ဖဲန့ၣ်လီၤ. ယဟဲဒ်သိး ယကမၤဒ်န့ၣ်အဂီၢ်လီၤ.”+
၃၉ ဒီးအဝဲလဲၤဝဲ ဒီးစံၣ်တဲၤတဲလီၤတၢ်လၢ ဘူၣ်ဘျီၣ်တဖၣ်အပူၤ လၢကၤလံၤလါ ဒီတဘ့ၣ်ညါ ဒီးနီဟးထီၣ် တၢ်ဝံတၢ်နါတဖၣ်လီၤ.+
၄၀ ဒီးပှၤဘၣ်တၢ်ဆါအၢ တဂၤ ဟဲလၢအအိၣ်, ချံးလီၤအခီၣ် ဒီးဃ့ကညးအီၤလၢ “ယသ့ၣ်ညါလၢ နသးမ့ၢ်အိၣ်မၤကဆှီထီၣ်က့ၤယၤန့ၣ် နမၤသ့လီၤ.”+
၄၁ ယ့ၣ်ၡူး သးကညီၤအီၤ, ယူာ်ဃီၤအစု, ထိးအီၤဒီးတဲဝဲလၢ “ယသးအိၣ်ဝဲသၢၤ. မ်နကဆှီထီၣ်က့ၤ တက့ၢ်.”+
၄၂ ဒီးအတၢ်ဆါအၢန့ၣ် လီၤမၢ်ကွံာ်ဝဲ တဘျီဃီ ဒီးအဝဲ ကဆှီထီၣ်က့ၤလီၤ.
၄၃ ဒီးယ့ၣ်ၡူးမၤလိာ်အီၤ လီၤတံၢ်လီၤဆဲး ဒီးပျဲက့ၤအီၤတဘျီဃီ
၄၄ ဒီးတဲအီၤလၢ “တဲဘၣ် ပှၤနီတဂၤတဂ့ၤနီၤ. ဘၣ်ဆၣ် လဲၤပာ်ဖျါထီၣ်နသးလၢ ပှၤလုၢ်တၢ်ဒိၣ်အအိၣ် ဒီးလုၢ်ထီၣ်တၢ်လုၢ်ဒ် စီၤမိၤၡ့ မၤလိာ်ဝဲအသိးနီၤ.+ နမ့ၢ်မၤဒ်န့ၣ်န့ၣ် ကကဲထီၣ် တၢ်အုၣ်အသးလၢ အဝဲသ့ၣ်အဂီၢ်လၢ+ နကဆှီထီၣ်က့ၤလံ.”
၄၅ ဘၣ်ဆၣ် ပှၤတဂၤအံၤ က့ၤရၤလီၤဝဲ တၢ်ဂ့ၢ်အံၤ သကုၤဆးဒး တုၤဒၣ်လဲာ် ယ့ၣ်ၡူးလဲၤနုာ်လီၤလၢ ဝ့ၢ်ပူၤဖျါဖျါ တသ့လၢၤဘၣ်. ဒီးယ့ၣ်ၡူးအိၣ်ဝဲလၢ ဝ့ၢ်ချၢ လၢပှၤတအိၣ်ဘၣ် အလီၢ်လီၤ. ဘၣ်ဆၣ် ပှၤလၢအအိၣ်လၢ တၢ်လီၢ်ဝးဝးန့ၣ် ဟဲလၢအအိၣ်လီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “စၤတၣ်.” မံၤအံၤ အခီပညီမ့ၢ်ဝဲ “ပှၤလၢအထီဒါတၢ်.”
^ မ့ၢ်စ့ၢ်ကီး “ပှာ်.”
