မၤတၢ် ၂၀:၁-၃၈
၂၀ ဖဲတၢ်တၢထီၣ်တၢလီၤ လီၤကယး ဝံၤအလီၢ်ခံ စီၤပီလူး ကိးဖှိၣ်ပှၤလၢ အစူၢ်က့ၤနာ်က့ၤတၢ်တဖၣ် ဒီးဟ့ၣ်ဂံၢ်ဟ့ၣ်ဘါအဝဲသ့ၣ် ဒီးတဲဘၣ်အဝဲသ့ၣ်လၢ အကလဲၤတၢ် ဝံၤဒီး အဝဲလဲၤလၢ ကီၢ်မၤက့းဒနံလီၤ.
၂ အဝဲလဲၤလၢ ဟီၣ်ကဝီၤဖဲန့ၣ်တဖၣ် ဒီးဟ့ၣ်ဂံၢ်ဟ့ၣ်ဘါ ပှၤလၢအအိၣ် ဖဲန့ၣ်တဖၣ်အါမး ဝံၤဒီးအဝဲလဲၤလၢ ကြံးကီၢ်လီၤ.
၃ အဝဲအိၣ်ဖဲန့ၣ် သၢလါလီၤ. ဖဲဘူးထီၣ်လၢ အဝဲကဒိးထီၣ်ကဘီ ဒီးလဲၤလၢ ကီၢ်စူၤရံအခါ ပှၤယူဒၤဖိတဖၣ် ကူၣ်ထီၣ်တၢ်လၢ ကမၤအၢအီၤအဃိ+ အဝဲပာ်လီၤအသးလၢ ကက့ၤကဒါက့ၤလၢ ကီၢ်မၤက့းဒနံအပူၤလီၤ.
၄ ဒီးပှၤဘ့းရံၤဖိ စီၤပူရူးအဖိခွါ စီၤစိပၤတြူး, ပှၤသ့းစၤလနံဖိ လၢအမ့ၢ် စီၤအရံစတၢ်ဃူး+ ဒီးစီၤစ့းကူၣ်ဒူး, ပှၤဒ့ၢ်ဘ့ၤဖိလၢအမ့ၢ် စီၤကါယူး, စီၤတံၤမသ့း+ ဒီးပှၤလၢ အအိၣ်ဟဲလၢ အၤစံအကီၢ်ရ့ၣ် လၢအမ့ၢ် စီၤတူဃံၤကူး+ ဒီးစီၤတြီဖံမူးန့ၣ်+ လဲၤသကိးတၢ်ဒီး စီၤပီလူးလီၤ.
၅ ပှၤတဖၣ်န့ၣ် လဲၤဆိဝဲ ဒီးအိၣ်ခိးပှၤလၢ တြိၤအါလီၤ.
၆ ဖဲဘူၣ်ကိၣ်လၢ အတပၣ်ဒီး ကိၣ်မံၣ်ဘၣ်+ ဝံၤအလီၢ်ခံ ပဒိးထီၣ် ကဘီဒီးဟးထီၣ်လၢ ဝ့ၢ်ဖံလံးပံၤလီၤ. ဒီးလၢယဲၢ်သီ အတီၢ်ပူၤန့ၣ် ပလဲၤတုၤလၢ အဝဲသ့ၣ်အအိၣ်လၢ တြိၤအါ ဒီးပအိၣ်ဖဲန့ၣ် နွံသီလီၤ.
၇ ဖဲမုၢ်ခီၣ်ထံးအနံၤန့ၣ် ပပာ်ဖှိၣ်ထီၣ်ပသးဒ်သိး ပကအီၣ်သကိးတၢ်အဂီၢ် ဒီးလၢခံတနံၤန့ၣ် စီၤပီလူး ကက့ၤဝဲအဃိ အဝဲစံၣ်တဲၤတဲလီၤ အဝဲသ့ၣ် ဒီးဟ့ၣ်ဝဲ တၢ်စံၣ်တဲၤတဲလီၤတၢ် ဖးယံာ် တုၤလၢ ဖးဖီမုၢ်လီၤ.
၈ ဖဲဒၢးတဖျၢၣ်လၢ ဟံၣ်ဖီခိၣ်တတီၤလၢ ပပာ်ဖှိၣ်ထီၣ်ပသး အလီၢ်န့ၣ် မ့ၣ်အူဒၢ အိၣ်ဝဲ အါဖျၢၣ်လီၤ.
၉ ဖဲစီၤပီလူး ဆဲးစံၣ်တဲၤတဲလီၤတၢ်အခါ ပှၤသးစၢ်တဂၤလၢ အမ့ၢ် စီၤအူတူၤဃူးန့ၣ် ဆ့ၣ်နီၤလၢ ပဲတြီဖိအကပၤ ဒီးမံခ့ဝဲ ဝံၤဒီးအမံဘၣ်အသးဖးယိာ်အဃိ အဝဲအိၣ်လၢ ဟံၣ်သၢကထြၢ တကထြၢဒီး လီၤတဲာ်လၢ ကိာ်လာ်ဒ့လီၤ. ဖဲပှၤလဲၤတုၤလၢ အအိၣ်အခါ အသံလံ.
၁၀ ဘၣ်ဆၣ် စီၤပီလူး စံၣ်လီၤလၢ ဟံၣ်ဖီလာ် ဒီးမံနီၤဝဲလၢ အဖီခိၣ် ဒီးဖိးဟုအီၤ+ ဒီးတဲဝဲ “ကိၢ်တဂ့ၤ, အမူထီၣ်က့ၤလံ.”+
၁၁ ဝံၤဒီး စီၤပီလူး က့ၤထီၣ်လၢ ဟံၣ်ဖီခိၣ် ဒီးအဝဲဘိးကၢ်ကိၣ်ဒီး အီၣ်တၢ်လီၤ. ဒီးအဝဲဆဲး တဲသကိးတၢ် ဖးယံာ်တုၤလၢ မုၢ်ဝါထီၣ်ဒီး အဝဲဟးထီၣ်ကွံာ်ဝဲလီၤ.
၁၂ ဒီးအဝဲသ့ၣ် က့ၤကိးဝဲ ပိာ်ခွါသးစၢ်လၢ အမူထီၣ်က့ၤတဂၤအံၤ ပှဲၤဒီး တၢ်သူၣ်မံသးမုာ်လီၤ.
၁၃ ဒီးစီၤပီလူး ပာ်လီၤအသးလၢ အကလဲၤလၢ အၣ်စူးလၢ အခီၣ်လီၤ. ဒီးဒ်အဝဲမၤလိာ် ပှၤအသိး ပဒိးထီၣ်ကဘီဒီး လဲၤဆိလၢအၣ်စူး ဒ်သိး ပကတီၣ်ထီၣ်အီၤလၢ ကဘီပူၤဖဲန့ၣ်လီၤ.
၁၄ အဃိ ဖဲအဝဲ ထံၣ်လိာ်သးဒီးပဝဲ လၢအၣ်စူးအခါ ပဒုးဒိးထီၣ်အီၤ ကဘီဒီး ပလဲၤလၢ ဝ့ၢ်မ့ၤတိၤလ့လီၤ.
၁၅ လၢခံတနံၤန့ၣ် ပလဲၤကဒီးတၢ်လၢကဘီ တုၤလၢကီးဃံအူးလီၤ. လၢခံတနံၤန့ၣ် ပတုၤလၢကီးစါမူး ဒီးလၢခံတနံၤန့ၣ် ပလဲၤတုၤကဒီးလၢ ဝ့ၢ်မံလ့ၤတူးလီၤ.
၁၆ ဒီးစီၤပီလူး ပာ်လီၤအသးလၢ အကလဲၤတလၢ ဝ့ၢ်အ့းဖ့းစူး+ ဒ်သိး အသုတသူ အတၢ်ဆၢကတီၢ်လၢ အၤစံကီၢ်ရ့ၣ်အပူၤ နီတစဲးတဂ့ၤ အဂီၢ်လီၤ. ဒီးဒ်သိး အဝဲလဲၤကတုၤလၢ ဝ့ၢ်ယရူၤၡလ့ၣ်+ ဖဲဘူၣ်ယဲၢ်ဆံအနံၤအဂီၢ် အဝဲလဲၤကရီတၢ်လီၤ.
၁၇ ဘၣ်ဆၣ် ဖဲအဝဲအိၣ်လၢ ဝ့ၢ်မံလ့ၤတူးအခါ အဝဲဆှၢလီၤဝဲ တၢ်ကစီၣ်လၢ ဝ့ၢ်အ့းဖ့းစူး ဒ်သိး ကကိးန့ၢ်ဝဲ တၢ်အိၣ်ဖှိၣ်သးပှၢ်တဖၣ် အဂီၢ်လီၤ.
၁၈ ဖဲအဝဲသ့ၣ် ဟဲလၢအအိၣ်အခါ အဝဲတဲဘၣ် အဝဲသ့ၣ်လၢ “စးထီၣ်ဖဲ မုၢ်နံၤလၢ ယခါလီၤယခီၣ်လၢ အၤစံကီၢ်ရ့ၣ် အပူၤလံၤလံၤ ယအိၣ်မူလၢ သုကျါဒ်လဲၣ် ဒ်လဲၣ်န့ၣ် သုသ့ၣ်ညါ ဂ့ၤဂ့ၤလီၤ.+
၁၉ ယမၤ ကစၢ်အတၢ်မၤ ဒ်ကုၢ်တဂၤအသိး လၢတၢ်ဆီၣ်လီၤသး ဒိၣ်ဒိၣ်မုၢ်မုၢ်အပူၤလီၤ.+ ဒီးပှၤယူဒၤဖိတဖၣ် ကူၣ်အၢယၤအဃိ ယလဲၤခီဖျိ တၢ်မၤကွၢ် အကလုာ်ကလုာ် လၢတၢ်မဲာ်ထံမဲာ်နိ အပူၤလီၤ.
၂၀ ဘၣ်ဆၣ် တၢ်လၢ အကဲဘျုး လၢသုဂီၢ်န့ၣ် ယတပာ်ခူသူၣ်အီၤ နီတမံၤဘၣ်, ယစံၣ်တဲၤတဲလီၤသု တၢ်ခဲလၢာ်လီၤ. ဒီးယသိၣ်လိသုလၢ ကမျၢၢ်အမဲာ်ညါ+ ဒီးလၢတဟံၣ်ဘၣ် တဟံၣ်လီၤ.+
၂၁ ယအုၣ်ယသး လီၤတံၢ်လီၤဆဲးလၢ ပှၤယူဒၤဖိဒီး ပှၤကြံးဖိတဖၣ် အမဲာ်ညါ ဒ်သိးအဝဲသ့ၣ် ကပီၢ်ယၢ်လီၤက့ၤအသး+ ဒီးဘူၣ်ထီၣ်ဘါထီၣ် ကစၢ်ယွၤ ဒီးစူၢ်က့ၤနာ်က့ၤ ပကစၢ် ယ့ၣ်ၡူးအဂီၢ်လီၤ.+
၂၂ ခဲအံၤန့ၣ် သးစီဆှံ ထိၣ်ဟူးထိၣ်ဂဲၤထီၣ် ယၤလၢ ယကလဲၤလၢ ဝ့ၢ်ယရူၤၡလ့ၣ်လီၤ. ဖဲန့ၣ် တၢ်ကမၤအသးဒီးယၤ ဒ်လဲၣ်န့ၣ် ယတသ့ၣ်ညါဘၣ်.
၂၃ ဘၣ်ဆၣ် လၢဝ့ၢ်တဖျၢၣ်ဘၣ် တဖျၢၣ်န့ၣ် သးစီဆှံတဲဘၣ်ယၤ တဘျီဝံၤ တဘျီလၢ ဃိာ်ဒီးတၢ်နးတၢ်ဖှီၣ် အိၣ်ခိးပာ်စၢၤယၤလီၤ.+
၂၄ ဘၣ်ဆၣ် ယသးသမူန့ၣ် ယတထံၣ်အီၤဒ် တၢ်လၢ အရ့ဒိၣ်လၢယဂီၢ် နီတစဲးဘၣ်. တၢ်လၢ အရ့ဒိၣ်န့ၣ်မ့ၢ်ဝဲ ယကမၤဝံၤက့ၤ ယမူဒါဒီး+ တၢ်စံၣ်တဲၤတဲလီၤ တၢ်မၤလၢ ကစၢ်ယ့ၣ်ၡူး ဟ့ၣ်လီၤယၤလၢ ယကအုၣ်ယသး လီၤတံၢ်လီၤဆဲးလၢ တၢ်သးခုကစီၣ် ဘၣ်ဃးဒီး ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အဂ့ၢ်လီၤ.
၂၅ “အဃိ ယသ့ၣ်ညါလၢ သုဝဲခဲလၢာ်လၢ ယစံၣ်တဲၤတဲလီၤတ့ၢ်သုလၢ ဘီမုၢ်အဂ့ၢ်န့ၣ် သုတထံၣ်ဘၣ်ယမဲာ် နီတဘျီလၢၤဘၣ်.
၂၆ ဒီးယကိးန့ၢ်သုဒ်သိး တနံၤညါအံၤ သုကအုၣ်သးလၢ ယကဆှီဒီး ပှၤခဲလၢာ်အသွံၣ်,+
၂၇ မ့ၢ်လၢ ယတဲဘၣ်သု တၢ်ခဲလၢာ် လၢအဘၣ်ဃးဒီး ကစၢ်ယွၤ အတၢ်ဘၣ်သး* ပျီပျီ အဃိလီၤ.+
၂၈ ပလီၢ်သုသး ဘၣ်ဃးဒီး သုနီၢ်ကစၢ်ဒီး သိခဲလၢာ်တက့ၢ်.+ သးစီဆှံ ပာ်ထီၣ်သုလၢ ပှၤကွၢ်ထွဲတၢ်တဖၣ်+ ဒ်သိး သုကကဲပှၤကွၢ်သိလၢ ကစၢ်ယွၤ အတၢ်အိၣ်ဖှိၣ်အဂီၢ်လီၤ.+ တၢ်အိၣ်ဖှိၣ်အံၤ ကစၢ်ယွၤပှ့ၤဝဲဒီး အနီၢ်ကစၢ်အဖိခွါ အသွံၣ်လီၤ.+
၂၉ ယသ့ၣ်ညါပာ်စၢၤလၢ ဖဲယလဲၤပူၤကွံာ် ဝံၤအလီၢ်ခံ ထွံၣ်မံၤ အဒူတဖၣ် ကဟဲနုာ်လီၤလၢ သုကျါ+ ဒီးတမ့ၢ်လၢ အဝဲသ့ၣ် ကရ့သိတဖၣ်လၢ တၢ်သးကညီၤ အပူၤဘၣ်.
၃၀ ဒီးပှၤလၢ သုကျါ ကတဲက့ၣ်တဲကူတၢ် ဒ်သိး ကကွဲန့ၢ်လွဲန့ၢ် ပှၤလၢ အစူၢ်က့ၤနာ်က့ၤတၢ်တဖၣ် လၢအဝဲသ့ၣ် အအိၣ်လီၤ.+
၃၁ “အဃိ အိၣ်ပလီၢ်သး ဒီးသ့ၣ်နီၣ်ထီၣ်လၢ ယသိၣ်လိသု တဂၤစုာ်စုာ် လၢမဲာ်ထံမဲာ်နိအပူၤ ထီဘိ, လၢမုၢ်ဆါဒီး လၢမုၢ်နၤ လၢသၢနံၣ်အတီၢ်ပူၤလီၤ.+
၃၂ မ်ကစၢ်ယွၤ ဒီးအကလုၢ်ကထါလၢ အပာ်ဖျါထီၣ်အတၢ်သးကညီၤ ဒိၣ်ဒိၣ်မုၢ်မုၢ်န့ၣ် ဒီသဒၢသုတက့ၢ်. ဒီးတၢ်ကလုၢ်ကထါအံၤ ကဒုးဆူၣ်ထီၣ် သုဂံၢ်သုဘါ ဒီးကအိးဟိထီၣ်ကျဲလၢ သုကဒိးန့ၢ်ဘၣ် တၢ်န့ၢ်သါလၢ ကစၢ်ယွၤဟ့ၣ်လီၤ ပှၤစီဆှံ ခဲလၢာ်လီၤ.+
၃၃ ပှၤဂၤအစ့ မ့ၢ်ဂ့ၤ, အထူ မ့ၢ်ဂ့ၤ, အတၢ်ကူတၢ်သိး မ့ၢ်ဂ့ၤ ယတလီကီဘၣ်.+
၃၄ သုသ့ၣ်ညါလၢ ယမၤတၢ်လၢယစုဒ်သိး ယကမၤလၢပှဲၤ ယနီၢ်ကစၢ် အတၢ်လိၣ်ဘၣ်+ ဒီးပှၤလၢ အအိၣ်ဒီးယၤတဖၣ် အတၢ်လိၣ်ဘၣ် အဂီၢ်လီၤ.
၃၅ အဃိ လၢတၢ်ကိးမံၤဒဲးအပူၤ ယပာ်ဖျါထီၣ်န့ၢ်သုလၢ သုကဘၣ်မၤတၢ်ဆူၣ်ဆူၣ်ဒ်န့ၣ်+ ဒ်သိးသုကမၤစၢၤ ပှၤလၢ အဂံၢ်စၢ်ဘါစၢ် တဖၣ်အဂီၢ်လီၤ. ဒီးသုကဘၣ်သ့ၣ်နီၣ်ထီၣ် ကစၢ်ယ့ၣ်ၡူး အတၢ်ကတိၤ လၢအတဲဝဲလၢ ‘ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး+ ဒိးန့ၢ်ဘၣ်တၢ်ဒံးလီၤ.’”
၃၆ ဖဲစီၤပီလူးတဲ တၢ်ဂ့ၢ်တဖၣ်အံၤ ဝံၤအလီၢ်ခံ အဝဲဒီး ပှၤခဲလၢာ် ချံးလီၤအခီၣ် ဒီးဃ့ထုကဖၣ်တၢ်လီၤ.
၃၇ အဝဲသ့ၣ် ကိးဂၤဒဲး ဟီၣ်ဝဲသပှၢ်တၢၢ် ဒီးဖိးဟုဝဲ စီၤပီလူး ဒီးနၢမူအီၤလၢ တၢ်အဲၣ်တၢ်ကွံ အပူၤလီၤ.
၃၈ ဒီးအဝဲသ့ၣ် အသးဘၣ်ဒိ လီၤဆီဒၣ်တၢ် ခီဖျိလၢ စီၤပီလူး တဲဘၣ် အဝဲသ့ၣ်လၢ အဝဲသ့ၣ် တထံၣ်ဘၣ်အမဲာ် နီတဘျီလၢၤဘၣ် အဃိလီၤ.+ ဒီးအဝဲသ့ၣ် လဲၤဆှၢအီၤတုၤလၢ ကဘီအခီၣ်ထံးလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်တိာ်ပာ်ခဲလၢာ်.”
