ယိၤဟၣ် ၆:၁-၇၁
၆ တၢ်န့ၣ်ဝံၤအလီၢ်ခံ ယ့ၣ်ၡူး လဲၤခီဂာ်ဝဲ ပီၣ်လဲၣ်ကၤလံၤလါ လၢအမ့ၢ် တံၤဘ့ၤရံလီၤ.+
၂ ဒီးပှၤဂီၢ်မုၢ်ဖးဒိၣ် ပိာ်ထီၣ်အခံ+ မ့ၢ်လၢ အဝဲသ့ၣ်ထံၣ်ဝဲ တၢ်လီၤလးတဖၣ် ဖဲယ့ၣ်ၡူးမၤဘျါက့ၤဝဲ ပှၤဆူးပှၤဆါ အခါန့ၣ်လီၤ.+
၃ အဃိ ယ့ၣ်ၡူးလဲၤထီၣ်လၢ ကစၢၢ်ခိၣ် ဒီးဆ့ၣ်နီၤဝဲဖဲန့ၣ်ဒီး အပျဲၢ်အဘီၣ်တဖၣ်လီၤ.
၄ ဖဲန့ၣ်အခါ ပှၤယူဒၤဖိ အဘူၣ်လၢအမ့ၢ် ဘူၣ်လဲၤကပာ်န့ၣ်+ ဘူးထီၣ်ကဘၣ်ဝဲလီၤ.
၅ ဖဲယ့ၣ်ၡူး ကျ့ၣ်ထီၣ်အမဲာ်အခါ အဝဲထံၣ်ဝဲပှၤဂီၢ်မုၢ်ဖးဒိၣ် ဟဲလၢအအိၣ်လီၤ. အဝဲတဲဘၣ် စီၤဖံလံးပူးလၢ “ပကလဲၤပှ့ၤ ကိၣ်လၢ ပှၤတဖၣ်အံၤ အဂီၢ်ဖဲလဲၣ်.”+
၆ ဘၣ်ဆၣ် ယ့ၣ်ၡူး တဲဝဲဒ်အံၤန့ၣ် မ့ၢ်ဒ်သိး ကမၤကွၢ်အီၤ မ့ၢ်လၢ တယံာ်လၢၤဘၣ် တၢ်လၢ အကမၤဝဲန့ၣ် အသ့ၣ်ညါပာ်စၢၤဝဲ အဃိလီၤ.
၇ စီၤဖံလံးပူး တဲဆၢက့ၤ ယ့ၣ်ၡူးလၢ “ပမ့ၢ် ပှ့ၤကိၣ်လၢ စ့ဒန့ၤရံၤ* ခံကယၤ သနာ်က့ အဝဲသ့ၣ် မ့ၢ်အီၣ်ဝဲ တဂၤတစဲးမး တယၢဒံးဘၣ်.”
၈ ဒီးအပျဲၢ်တဂၤ လၢအမ့ၢ် စီၤၡံမိၣ်ပ့းတရူး အဒီပုၢ်ဝဲၢ်ခွါ စီၤအၣ်ဒရ့းန့ၣ် တဲအီၤလၢ
၉ “ဖဲအံၤ ဖိသၣ်ပိာ်ခွါဖိတဂၤ အိၣ်ဒီး ကိၣ်ယဲၢ်လိၣ် ဒီးညၣ်ဆံးဆံးဖိခံဘ့ၣ်လီၤ. ဘၣ်ဆၣ် တၢ်သ့ၣ်တဖၣ်အံၤ ကယၢလၢ ပှၤသ့ၣ်တဖၣ်န့ၣ် အဂီၢ်ဒ်လဲၣ်.”+
၁၀ ယ့ၣ်ၡူး တဲဝဲလၢ “မၢပှၤဆ့ၣ်နီၤတက့ၢ်.” ဖဲတၢ်လီၢ်အဝဲန့ၣ် နီၣ်အိၣ်ဝဲအါမး ဒီးပိာ်ခွါတဖၣ် ဆ့ၣ်နီၤဝဲဖဲန့ၣ် ဒီးအနီၣ်ဂံၢ် ကအိၣ်ဝဲ ၅,၀၀၀ လီၤ.+
၁၁ ယ့ၣ်ၡူး ဟံးန့ၢ်ကိၣ် ဒီးစံးဘျုးစံးဖှိၣ်ယွၤ ဝံၤအလီၢ်ခံ နီၤလီၤဝဲ ပှၤလၢအဆ့ၣ်နီၤ ဖဲန့ၣ်တဖၣ်လီၤ. ဒီးအဝဲမၤ ညၣ်ဆံးဆံးဖိတဖၣ် ဒ်န့ၣ်စ့ၢ်ကီး ဒီးအဝဲသ့ၣ် အီၣ်ဘၣ်ဝဲဘျဲဘျဲလီၤ.
၁၂ ဘၣ်ဆၣ် ဖဲအဝဲသ့ၣ်အီၣ်တၢ် ဘျဲဘျဲဝံၤအလီၢ်ခံ ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “ဒ်သိး တၢ်သုတလၢာ်ဂီၤ နီတမံၤတဂ့ၤအဂီၢ် ထၢဖှိၣ်ထီၣ်က့ၤ တၢ်အီၣ်အဘျဲၣ်အစဲၢ်တက့ၢ်.”
၁၃ အဃိ ကိၣ်ယဲၢ်လိၣ်လၢ ပှၤအီၣ်ဝဲန့ၣ် အဝဲသ့ၣ် ထၢဖှိၣ်ထီၣ်က့ၤဝဲ အဘျဲၣ်အစဲၢ် ပှဲၤကု ၁၂ ဒုလီၤ.
၁၄ ဖဲပှၤထံၣ်ယ့ၣ်ၡူး မၤတၢ်ပနီၣ်လီၤလးအံၤအခါ အဝဲသ့ၣ် တဲဝဲလၢ “အဝဲ မ့ၢ်ဝံတဂၤလၢ ပအိၣ်ခိးကွၢ်လၢ်အီၤလီၤ.”*+
၁၅ မ့ၢ်လၢ ယ့ၣ်ၡူးသ့ၣ်ညါဝဲလၢ အဝဲသ့ၣ် ကဟဲဖီၣ်အီၤဒ်သိး ကဒုးကဲထီၣ်အီၤလၢ စီၤပၤအဃိ အဝဲလဲၤထီၣ်+ ကဒီးလၢ ကစၢၢ်ခိၣ် ထဲတဂၤလီၤ.+
၁၆ ဖဲမုၢ်ဟါလီၤအခါ အပျဲၢ်အဘီၣ်တဖၣ် လဲၤလီၤလၢ ပီၣ်လဲၣ်နံၤ+
၁၇ ဒီးဒ်သိး ကလဲၤလၢ ဝ့ၢ်ကပ့းရနီၣ်အဂီၢ် အဝဲသ့ၣ် ဒိးထီၣ်ချံတဘ့ၣ် ဒီးခီဂာ်ဝဲ ပီၣ်လဲၣ်လီၤ. ဖဲန့ၣ်အခါ တၢ်ခံးလီၤလံ ဘၣ်ဆၣ် ယ့ၣ်ၡူးတလဲၤလၢ အဝဲသ့ၣ် အအိၣ်ဒံးဘၣ်.+
၁၈ ဒီးမ့ၢ်လၢ ကလံၤအူတၢ် ဆူၣ်ဒိၣ်မးအဃိ ပီၣ်လဲၣ် ဟူးဝးဝဲလီၤ.+
၁၉ ဘၣ်ဆၣ် ဖဲအဝဲသ့ၣ် ဝၢ်ချံန့ၢ်ဝဲ သၢမံးလာ်, လွံၢ်မံးလာ်အခါ* အဝဲသ့ၣ် ထံၣ်ယ့ၣ်ၡူးဟးလၢ ပီၣ်လဲၣ်အထံဖံးခိၣ် ဒီးဟဲဘူးထီၣ်ဒီးချံအဃိ အဝဲသ့ၣ် ပျံၤတၢ်လီၤ.
၂၀ ဘၣ်ဆၣ် ယ့ၣ်ၡူး တဲအဝဲသ့ၣ်လၢ “မ့ၢ်ဒၣ်ယၤလီၤ, ပျံၤတၢ်တဂ့ၤ.”+
၂၁ အဝဲသ့ၣ် ကိးနုာ်အီၤလၢချံပူၤ ဒီးတယံာ်ဘၣ်န့ၣ် ချံလဲၤတုၤဝဲလၢ ကၢၢ်ကပၤ ဖဲတၢ်လီၢ်လၢ အဝဲသ့ၣ် ကလဲၤဝဲလီၤ.+
၂၂ လၢခံတနံၤန့ၣ် ပှၤဂီၢ်မုၢ်လၢ အအိၣ်တ့ၢ်လၢ ပီၣ်လဲၣ်ဝၢ်ဘးခီန့ၣ် ထံၣ်ဝဲထဲချံ ဆံးဆံးဖိတဘ့ၣ် ဒီးဖဲန့ၣ် တထံၣ်ဝဲချံအဂၤ နီတဘ့ၣ်ဘၣ်. အဝဲသ့ၣ် သ့ၣ်ညါစ့ၢ်ကီးဝဲလၢ ယ့ၣ်ၡူး တလဲၤဒိးထီၣ်ချံဒီး အပျဲၢ်အဘီၣ်တဖၣ်ဘၣ်, လဲၤဝဲထဲ အပျဲၢ်အဘီၣ်တဖၣ်လီၤ.
၂၃ ဘၣ်ဆၣ် ချံတဖၣ်လၢ တံၤဘ့ၤရံန့ၣ် ဟဲတုၤဝဲဘူးဒီး တၢ်လီၢ်ဖဲ ကစၢ်စံးဘျုးစံးဖှိၣ် ယွၤဝံၤဒီး ဒုးအီၣ် အဝဲသ့ၣ်ကိၣ်လီၤ.
၂၄ အဃိ ဖဲပှၤဂီၢ်မုၢ်တဖၣ် ထံၣ်ဝဲလၢ ယ့ၣ်ၡူးဒီး အပျဲၢ်အဘီၣ်တဖၣ် တအိၣ်ဖဲန့ၣ်လၢၤဘၣ်အခါ အဝဲသ့ၣ် ဒိးထီၣ်ဝဲ ချံတဖၣ်အံၤ ဒီးလဲၤဝဲလၢ ဝ့ၢ်ကပ့းရနီၣ် ဒ်သိးကဃု ယ့ၣ်ၡူးအဂီၢ်လီၤ.
၂၅ ဖဲအဝဲသ့ၣ် ထံၣ်ယ့ၣ်ၡူးလၢ ပီၣ်လဲၣ် အဝၢ်ဘးခီအခါ အဝဲသ့ၣ် သံကွၢ်အီၤလၢ “သရၣ်ဧၢ,+ နဟဲတုၤဖဲအံၤ ဆံးယံာ်လဲၣ်.”
၂၆ ယ့ၣ်ၡူး တဲဆၢအဝဲသ့ၣ်လၢ “ယကတဲသုတီတီလၢ သုဃုယၤန့ၣ် တမ့ၢ်လၢသုထံၣ် တၢ်ပနီၣ်လီၤလးတဖၣ် အဃိဘၣ်, မ့ၢ်လၢ သုအီၣ်ဘၣ်ကိၣ် ဘျဲဘျဲအဃိလီၤ.+
၂၇ တဘၣ်မၤတၢ်လၢ တၢ်အီၣ်လၢ အဟးဂီၤသ့တဖၣ် အဂီၢ်တဂ့ၤ. မ့မ့ၢ် မၤတၢ်လၢ တၢ်အီၣ်လၢ အတဟးဂီၤဘၣ်ဒီး လၢအကဟ့ၣ်လီၤ တၢ်မူအထူအယိာ်လၢ+ ပှၤကညီဖိခွါ ကဟ့ၣ်လီၤသုအဂီၢ်တက့ၢ်. အဝဲမ့ၢ် ပှၤတဂၤလၢ ပၢ်ကစၢ်ယွၤ အနီၢ်ကစၢ်ဒၣ်ဝဲ ပာ်ဖျါထီၣ်ဝဲ* လၢအဘၣ်သူၣ်ဘၣ်သးအီၤလီၤ.”+
၂၈ အဃိ အဝဲသ့ၣ် သံကွၢ်အီၤလၢ “ဒ်သိးပကမၤ ကစၢ်ယွၤ အတၢ်မၤအဂီၢ် ပကဘၣ်မၤ တၢ်မနုၤလဲၣ်.”
၂၉ ယ့ၣ်ၡူးစံးဆၢက့ၤ အဝဲသ့ၣ်လၢ “တၢ်မၤကစၢ်ယွၤ အတၢ်မၤန့ၣ် မ့ၢ်ဝဲ သုဘၣ်စူၢ်က့ၤနာ်က့ၤ ပှၤတဂၤလၢ အဆှၢလီၤဝဲန့ၣ်လီၤ.”+
၃၀ အဝဲသ့ၣ် တဲယ့ၣ်ၡူးလၢ “ဒ်သိးပကထံၣ် တၢ်ပနီၣ်လီၤလး ဒီးနာ်နၤအဂီၢ် နကမၤ တၢ်ပနီၣ်လီၤလး မနုၤလဲၣ်.+ ဒီးနကမၤ တၢ်မနုၤလဲၣ်.
၃၁ အဒိ ပမိၢ်ပၢ်ဖံဖု လၢပျၢၤတဖၣ် အီၣ်ကိၣ်မၤနၤ လၢပှၢ်မုၢ်ကနၢလၢ+ အဟဲလၢ ကစၢ်ယွၤအအိၣ်လီၤ. ဒ်တၢ်ကွဲးအသး အိၣ်ဝဲအသိး ‘အဝဲဒုးအီၣ် အဝဲသ့ၣ်ကိၣ် လၢအဟဲလီၤလၢ မူခိၣ်လီၤ.’”+
၃၂ ယ့ၣ်ၡူး တဲအဝဲသ့ၣ်လၢ “ယကတဲဘၣ်သု တီတီလၢ ယပၢ်ဟ့ၣ်လီၤသု ကိၣ်နီၢ်ကီၢ် လၢမူခိၣ်လီၤ. စီၤမိၤၡ့န့ၣ် တဟ့ၣ်လီၤသု ကိၣ်လၢမူခိၣ်ဘၣ်.
၃၃ ကစၢ်ယွၤ အကိၣ်န့ၣ်မ့ၢ်ဝဲ ပှၤတဂၤလၢ အဟဲလီၤလၢမူခိၣ် ဒီးဟ့ၣ်လီၤ တၢ်မူလၢ ပှၤဟီၣ်ခိၣ်ဖိလီၤ.”
၃၄ အဃိ အဝဲသ့ၣ် တဲအီၤလၢ “ကစၢ်ဧၢ, ဟ့ၣ်ပှၤကိၣ်အံၤ ထီဘိမီၤ.”
၃၅ ယ့ၣ်ၡူး တဲအဝဲသ့ၣ်လၢ “ယမ့ၢ်တၢ်မူ အကိၣ်လီၤ. ပှၤလၢအဟဲလၢ ယအိၣ်န့ၣ် တလီၤဘဲ နီတစဲးလၢၤဘၣ်. ဒီးပှၤလၢ အစူၢ်က့ၤနာ်က့ၤယၤန့ၣ် တအဲၣ်ဒိးအီထံ နီတစဲးလၢၤဘၣ်.+
၃၆ ဘၣ်ဆၣ် ဒ်ယတဲသုအသိး သုထံၣ်ဘၣ်ယၤ သနာ်က့ သုတနာ်တၢ်ဘၣ်.+
၃၇ ပှၤကိးဂၤဒဲးလၢ ပၢ်ဟ့ၣ်လီၤယၤန့ၣ် ကဟဲလၢ ယအိၣ်လီၤ. ဒီးပှၤလၢ အဟဲလၢယအိၣ်န့ၣ် ယတနီဟးထီၣ်ကွံာ်အီၤ နီတဘျီဘၣ်.+
၃၈ ယဟဲလီၤလၢမူခိၣ်+ ဒ်သိး ယကမၤ ဖဲဒၣ်ယသး တမ့ၢ်ဘၣ်. မ့ၢ်ဒ်သိး ယကမၤပှၤလၢ အဆှၢလီၤယၤတဂၤ အတၢ်ဘၣ်သး အဂီၢ်လီၤ.+
၃၉ ပှၤလၢ အဆှၢလီၤယၤတဂၤန့ၣ် တအဲၣ်ဒိးဝဲလၢ ပှၤလၢ အဟ့ၣ်လီၤယၤတဖၣ်န့ၣ် ကဟါမၢ်လၢယအိၣ် နီတဂၤဘၣ်. လၢတၢ်န့ၣ်အလီၢ် အဝဲအဲၣ်ဒိးဝဲလၢ ယကမၤသမူထီၣ်က့ၤ အဝဲသ့ၣ်လၢ+ မုၢ်နံၤအကတၢၢ်တနံၤ အတီၢ်ပူၤလီၤ.
၄၀ ယပၢ် အဲၣ်ဒိးဝဲလၢ ပှၤကိးဂၤဒဲးလၢ အတူၢ်လိာ်ဖိခွါ ဒီးစူၢ်က့ၤနာ်က့ၤအီၤန့ၣ် ကန့ၢ်ဘၣ် တၢ်မူအထူအယိာ်လီၤ.+ ဒီးယကမၤ သမူထီၣ်က့ၤအဝဲသ့ၣ်လၢ+ မုၢ်နံၤအကတၢၢ်တနံၤ အတီၢ်ပူၤလီၤ.”
၄၁ ခီဖျိလၢ ယ့ၣ်ၡူးတဲလၢ “ယမ့ၢ်ကိၣ်လၢ အဟဲလီၤလၢမူခိၣ်”+ အဃိ ပှၤယူဒၤဖိတဖၣ် ကဒူးကဒ့ၣ်အီၤလီၤ.
၄၂ အဝဲသ့ၣ်တဲဝဲလၢ “အဝဲမ့ၢ် စီၤယိၤသးအဖိခွါ ယ့ၣ်ၡူး တမ့ၢ်ဧီၤ. ဒီးပသ့ၣ်ညါ အမိၢ်အပၢ် တမ့ၢ်ဧီၤ.+ ဘၣ်မနုၤအဃိ ခဲအံၤ အတဲဝဲလၢ အဟဲလီၤလၢ မူခိၣ်လဲၣ်.”
၄၃ ယ့ၣ်ၡူး တဲဆၢက့ၤ အဝဲသ့ၣ်လၢ “တဘၣ် ကဒူးကဒ့ၣ်တၢ် လၢၤတဂ့ၤ.
၄၄ ပၢ်လၢ အဆှၢလီၤယၤတဂၤ မ့ၢ်တမူၤဃီၤပှၤဘၣ်န့ၣ် ပှၤဟဲလၢ ယအိၣ်တသ့ နီတဂၤဘၣ်.+ ဒီးပှၤလၢ အဟဲလၢ ယအိၣ်န့ၣ် ယကမၤ သမူထီၣ်က့ၤအီၤလၢ မုၢ်နံၤအကတၢၢ်တနံၤ အတီၢ်ပူၤလီၤ.+
၄၅ ဝံတဖၣ် အတၢ်ကွဲးအိၣ်ဝဲလၢ ‘အဝဲသ့ၣ်ခဲလၢာ် ကမ့ၢ်ပှၤလၢ ယဟိဝၤယွၤ* သိၣ်လိအီၤလီၤ.’+ ပှၤကိးဂၤဒဲးလၢ အဒိကနၣ်ပၢ် ဒီးမၤလိတၢ်လၢ အအိၣ်န့ၣ် ကဟဲဝဲလၢ ယအိၣ်လီၤ.
၄၆ ပှၤတထံၣ်ဘၣ်ပၢ် နီတဂၤဘၣ်.+ ပှၤလၢ အထံၣ်ဘၣ်ပၢ်န့ၣ် မ့ၢ်ထဲဒၣ်ပှၤလၢ အဟဲလၢ ယွၤအအိၣ်လီၤ.+
၄၇ ယကတဲသု တီတီလၢ ပှၤလၢ အစူၢ်က့ၤနာ်က့ၤတၢ်န့ၣ် ကန့ၢ်ဘၣ် တၢ်မူအထူအယိာ်လီၤ.+
၄၈ “ယမ့ၢ်တၢ်မူအကိၣ်လီၤ.+
၄၉ သုမိၢ်ပၢ်ဖံဖု လၢပျၢၤတဖၣ် အီၣ်ဘၣ်ကိၣ်မၤနၤ လၢပှၢ်မုၢ်ကနၢ ဘၣ်ဆၣ် အဝဲသ့ၣ်သံဝဲလီၤ.+
၅၀ မ့မ့ၢ် ပှၤလၢ အအီၣ်ကိၣ်လၢ အဟဲလီၤလၢမူခိၣ်န့ၣ် တသံဘၣ်ဝဲဘၣ်.
၅၁ ယမ့ၢ်ကိၣ်မူလၢ အဟဲလီၤလၢ မူခိၣ်လီၤ. ပှၤမ့ၢ်အီၣ်ကိၣ်အံၤန့ၣ် အကအိၣ်မူဘၣ် လီၤထူလီၤယိာ်လီၤ. ဒီးကိၣ်လၢ ယကဟ့ၣ်လီၤန့ၣ်မ့ၢ်ဝဲ ယညၣ်ဒ်သိး ပှၤဟီၣ်ခိၣ်ဖိ* ကမူဝဲ အဂီၢ်လီၤ.”+
၅၂ ဒီးပှၤယူဒၤဖိတဖၣ် စးထီၣ်တဲအါလိာ်သး တဂၤဒီးတဂၤလၢ “ပှၤတဂၤအံၤ ဒုးအီၣ်ပှၤလၢ အညၣ်ကသ့ဒ်လဲၣ်.”
၅၃ အဃိ ယ့ၣ်ၡူးတဲဘၣ် အဝဲသ့ၣ်လၢ “ယကတဲဘၣ်သု တီတီလၢ သုမ့ၢ်တအီၣ် ပှၤကညီဖိခွါ အညၣ်ဘၣ် ဒီးမ့ၢ်တအီ အသွံၣ်ဘၣ်န့ၣ် တၢ်မူတအိၣ်လၢ သုပူၤဘၣ်.+
၅၄ ပှၤလၢအအီၣ် ယညၣ် ဒီးအီယသွံၣ်န့ၣ် ကန့ၢ်ဘၣ် တၢ်မူအထူအယိာ် ဒီးယကမၤ သမူထီၣ်က့ၤအီၤလၢ+ မုၢ်နံၤအကတၢၢ်တနံၤ အတီၢ်ပူၤ,
၅၅ မ့ၢ်လၢ ယညၣ်န့ၣ် မ့ၢ်ဝဲ တၢ်အီၣ်နီၢ်ကီၢ် ဒီးယသွံၣ်န့ၣ် မ့ၢ်ဝဲ တၢ်အီနီၢ်ကီၢ် အဃိလီၤ.
၅၆ ပှၤလၢအအီၣ်ယညၣ် ဒီးအီယသွံၣ်န့ၣ် မ့ၢ်အအိၣ်ဒီးယၤ ဒီးယအိၣ်ဒီးအီၤလီၤ.+
၅၇ ဒ်ပၢ်လၢ အမူဝဲတဂၤ ဆှၢလီၤယၤဒီး ယအိၣ်မူဘၣ်လၢ ပၢ်အဃိအသိးန့ၣ် ပှၤလၢ အအီၣ်ယၤန့ၣ် ကအိၣ်မူဘၣ်စ့ၢ်ကီး လၢယဃိလီၤ.+
၅၈ အဝဲအံၤမ့ၢ်ကိၣ်လၢ အဟဲလီၤလၢ မူခိၣ်လီၤ. အတလီၤဂာ်ဒီး ကိၣ်လၢ သုမိၢ်ပၢ်ဖံဖု လၢပျၢၤတဖၣ် အီၣ်ဝဲဘၣ်. အဝဲသ့ၣ်အီၣ်ကိၣ်တခါန့ၣ် ဘၣ်ဆၣ် သံဝဲလီၤ. မ့မ့ၢ် ပှၤလၢ အအီၣ်ကိၣ်အံၤန့ၣ် ကအိၣ်မူဘၣ် လီၤထူလီၤယိာ်လီၤ.”+
၅၉ ယ့ၣ်ၡူး တဲတၢ်ဂ့ၢ်တဖၣ်န့ၣ် ဖဲအသိၣ်လိတၢ်လၢ ဘူၣ်ဘျီၣ်ပူၤလၢ ဝ့ၢ်ကပ့းရနီၣ် အခါလီၤ.
၆၀ ဖဲအပျဲၢ်အဘီၣ် နၢ်ဟူဝဲဒ်န့ၣ်အခါ အဝဲသ့ၣ်အါဂၤ တဲဝဲလၢ “အတၢ်ကတိၤအံၤ ပကတူၢ်လိာ်အီၤ ကီဒိၣ်မး အဃိ မတဂၤကနၣ် ကကဲလဲၣ်.”
၆၁ ဘၣ်ဆၣ် ယ့ၣ်ၡူး သ့ၣ်ညါဝဲလၢ အပျဲၢ်အဘီၣ်တဖၣ် ကဒူးကဒ့ၣ်တၢ် ဘၣ်ဃးဒီး တၢ်ဂ့ၢ်အံၤလီၤ. အဃိ ယ့ၣ်ၡူး တဲအဝဲသ့ၣ်လၢ “တၢ်ဂ့ၢ်တခါအံၤ ကဲထီၣ် တၢ်လီၤဃံၢ်လၢ သုဂီၢ်ဧါ.
၆၂ မ့မ့ၢ်ဒ်န့ၣ်န့ၣ် သုမ့ၢ်ထံၣ်ဘၣ် ပှၤကညီဖိခွါ က့ၤထီၣ်ဆူ တၢ်လီၢ်လၢ အအိၣ်ဝဲလၢညါန့ၣ် သုသးကမၤအသးဒ်လဲၣ်.+
၆၃ တၢ်လၢသးစီဆှံန့ၣ် ဟ့ၣ်ဝဲတၢ်မူလီၤ.+ မ့မ့ၢ် တၢ်ဖံးတၢ်ညၣ်န့ၣ် အဘျုးတအိၣ် နီတမံၤဘၣ်. တၢ်လၢယတဲဘၣ်သုန့ၣ် ဟဲခီဖျိလၢ သးစီဆှံ ဒီးအဟ့ၣ်လီၤဝဲ တၢ်မူလီၤ.+
၆၄ ဘၣ်ဆၣ် သုဝဲသ့ၣ်တနီၤန့ၣ် တနာ်ဝဲဘၣ်.” လၢအခီၣ်ထံးလံၤလံၤန့ၣ် ယ့ၣ်ၡူးသ့ၣ်ညါဝဲ ပှၤလၢ အတနာ်တၢ်ဘၣ်တဖၣ် ဒီးပှၤလၢအက ဟ့ၣ်လီၤကွံာ်အီၤတဂၤန့ၣ်လီၤ.+
၆၅ ယ့ၣ်ၡူး ဆဲးတဲဝဲလၢ “အဃိ ယတဲသုလၢ ပၢ်မ့ၢ်တဟ့ၣ်အခွဲးဘၣ်န့ၣ် ပှၤဟဲလၢ ယအိၣ်တသ့ နီတဂၤဘၣ်.”+
၆၆ ခီဖျိလၢ တၢ်ဂ့ၢ်အံၤအဃိ အပျဲၢ်အဘီၣ်အါဂၤ က့ၤဝဲဆူတၢ်လၢ အပာ်တ့ၢ်ကွံာ်ဝဲ တဖၣ်အအိၣ်+ ဒီးတဆဲးပိာ် အခံလၢၤဘၣ်.
၆၇ အဃိ ယ့ၣ်ၡူးတဲဘၣ် ပှၤတဆံခံဂၤလၢ “သုဝဲစ့ၢ်ကီး သုအဲၣ်ဒိးက့ၤဧါ.”
၆၈ ဒီးစီၤၡံမိၣ်ပ့းတရူး တဲဆၢအီၤလၢ “ကစၢ်ဧၢ, ပကလဲၤလၢ မတဂၤ အအိၣ်လဲၣ်.+ တၢ်ကတိၤလၢ အဘၣ်ဃးဒီး တၢ်မူအထူအယိာ်န့ၣ် အိၣ်ဒီးနၤလီၤ.+
၆၉ ပသ့ၣ်ညါ ဒီးပနာ်လၢ နမ့ၢ်ကစၢ်ယွၤ အပှၤစီဆှံတဂၤလီၤ.”+
၇၀ ယ့ၣ်ၡူးတဲဆၢ အဝဲသ့ၣ်လၢ “ယဃုထၢသုတဆံခံဂၤ တမ့ၢ်ဧီၤ.+ ဘၣ်ဆၣ် ပှၤလၢသုကျါတဂၤန့ၣ် မ့ၢ်ဝဲပှၤလၢ အတဲဟးဂီၤပှၤဂ့ၢ်လီၤ.”*+
၇၁ နီၢ်ကီၢ်န့ၣ် ယ့ၣ်ၡူးတဲဝဲဘၣ်ဃး စီၤၡံမိၣ်အံၣ်စကၤရံၤအိာ် အဖိခွါ စီၤယူဒၤလီၤ. အဝဲပၣ်ဃုာ်လၢ တၢ်မၢဖိတဆံခံဂၤအကျါ သနာ်က့ အကဟ့ၣ်လီၤကွံာ် ယ့ၣ်ၡူးလီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အခီပညီလိၤလိၤ “လၢအကဘၣ်ဟဲလီၤလၢ ဟီၣ်ခိၣ်ချၢ.”
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “စဲပနီၣ်အီၤ.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “ဟီၣ်ခိၣ်.”
^ မ့ၢ်စ့ၢ်ကီး “မုၣ်ကီၤလံၢ်တဂၤ.”
