ယိၤဟၣ် ၇:၁-၅၂
၇ တၢ်န့ၣ်ဝံၤအလီၢ်ခံ ယ့ၣ်ၡူး ဆဲးလဲၤတၢ်လၢ ကၤလံၤလါအပူၤလီၤ. မ့ၢ်လၢ ပှၤယူဒၤဖိတဖၣ် ဃုမၤသံအီၤအဃိ အဝဲ တအဲၣ်ဒိးလဲၤလၢ ယူဒၤအဟီၣ်ကဝီၤအပူၤဘၣ်.+
၂ ဘၣ်ဆၣ် ပှၤယူဒၤဖိ အဘူၣ်ဒဲန့ၣ်+ ဘူးကဘၣ်လံ.
၃ အဃိ အဒီပုၢ်ဝဲၢ်ခွါတဖၣ်+ တဲအီၤလၢ “ဟးထီၣ်ဖဲအံၤ ဒီးလဲၤလၢ ယူဒၤအဟီၣ်ကဝီၤအပူၤဒ်သိး နပျဲၢ်နဘီၣ်တဖၣ် ကထံၣ်ဘၣ်စ့ၢ်ကီး တၢ်မၤလၢ နမၤအီၤသၢၤ.
၄ ပှၤလၢ အအဲၣ်ဒိးလၢ ကမျၢၢ် ကသ့ၣ်ညါအီၤန့ၣ် တမၤတၢ်လၢ တၢ်ခူသူၣ်အပူၤ နီတဂၤဘၣ်. နမ့ၢ်မၤ တၢ်သ့ၣ်တဖၣ်အံၤန့ၣ် ပာ်ဖျါထီၣ်နသးလၢ ပှၤခဲလၢာ်* အမဲာ်ညါသၢၤ.”
၅ နီၢ်ကီၢ်န့ၣ် အဒီပုၢ်ဝဲၢ်ခွါတဖၣ်န့ၣ် တစူၢ်က့ၤနာ်က့ၤအီၤဒံးဘၣ်.+
၆ အဃိ ယ့ၣ်ၡူး တဲအဝဲသ့ၣ်လၢ “ယတၢ်ဆၢကတီၢ် တဘၣ်ဒံးဘၣ်,+ မ့မ့ၢ်သုန့ၣ် သုလဲၤ န့ၢ်ကိးဆၢကတီၢ်ဒဲးလီၤ.
၇ လၢဟီၣ်ခိၣ် ကသးဟ့သုအဂီၢ်န့ၣ် တၢ်ဂ့ၢ်တအိၣ် နီတမံၤဘၣ်. ဘၣ်ဆၣ် မ့ၢ်လၢ ယအုၣ်ယသးလၢ ဟီၣ်ခိၣ် အတၢ်မၤတဖၣ်န့ၣ် အၢဝဲသီဝဲအဃိ ဟီၣ်ခိၣ်သးဟ့ယၤလီၤ.+
၈ လဲၤသုဝဲလၢ ဘူၣ်ပူၤဟီ. မ့ၢ်လၢ ယတၢ်ဆၢကတီၢ် တဘၣ်တဝၢ် ဒံးဘၣ်အဃိ ယတလဲၤထီၣ်လၢ ဘူၣ်အံၤဒံးဘၣ်.”+
၉ ဖဲယ့ၣ်ၡူး တဲအဝဲသ့ၣ်ဒ်န့ၣ် ဝံၤအလီၢ်ခံ အဝဲအိၣ်တ့ၢ်ဖဲ ကၤလံၤလါလီၤ.
၁၀ ဘၣ်ဆၣ် ဖဲအဒီပုၢ်ဝဲၢ်ခွါတဖၣ် လဲၤထီၣ်လၢဘူၣ်အခါ အဝဲစ့ၢ်ကီး လဲၤထီၣ်ဝဲလၢ တၢ်ခူသူၣ်အပူၤလီၤ.
၁၁ အဃိ ပှၤယူဒၤဖိတဖၣ် လူၤဃုအီၤလၢဘူၣ်ပူၤ ဒီးတဲဝဲလၢ “ပှၤတဂၤန့ၣ် အိၣ်ဖဲလဲၣ်.”
၁၂ ဒီးလၢ ပှၤဂီၢ်မုၢ်အကျါန့ၣ် ပှၤတဲခူသူၣ်အီၣ် ယ့ၣ်ၡူးအဂ့ၢ် အါမးလီၤ. ပှၤတနီၤ တဲဝဲလၢ “အဝဲမ့ၢ် ပှၤအဂ့ၤတဂၤလီၤ.” မ့မ့ၢ် ပှၤအဂၤတနီၤန့ၣ် တဲဝဲလၢ “အတမ့ၢ် ပှၤဂ့ၤဘၣ်, အဆှၢကမၣ် ပှၤဂီၢ်မုၢ်လီၤ.”+
၁၃ ဘၣ်ဆၣ် မ့ၢ်လၢ ပှၤပျံၤ ပှၤယူဒၤဖိတဖၣ်* အဃိ ပှၤတဲအဂ့ၢ်ပျီပျီ တဘူၣ်နီတဂၤဘၣ်.+
၁၄ ဖဲဘူၣ်ဘၣ်ဝဲ လီၤတဝာ်အခါ ယ့ၣ်ၡူးလဲၤထီၣ်လၢ တၢ်လုၢ်ဟံၣ်ပူၤ ဒီးစးထီၣ် သိၣ်လိတၢ်လီၤ.
၁၅ ပှၤယူဒၤဖိတဖၣ် ကမၢကမၣ် ဒီးတဲဝဲလၢ “ပှၤတဂၤအံၤ အတလဲၤ မၤလိဘၣ်တၢ်လၢ ကၠိ* တဖၣ်ဘၣ်.+ ဘၣ်ဆၣ် အဝဲအိၣ်ဒီး တၢ်သ့ၣ်ညါနၢ်ပၢၢ် ဘၣ်ဃးဒီး တၢ်ကွဲးအသးတဖၣ်အဂ့ၢ်*+ ထဲထဲအံၤညါဒ်လဲၣ်.”
၁၆ ယ့ၣ်ၡူးတဲဆၢက့ၤ အဝဲသ့ၣ်လၢ “တၢ်လၢ ယသိၣ်လိတဖၣ်န့ၣ် တမ့ၢ် ယတၢ်သိၣ်လိဘၣ်. မ့ၢ်ဝဲပှၤလၢ အဆှၢလီၤယၤတဂၤ အတၢ်သိၣ်လိလီၤ.+
၁၇ တၢ်သိၣ်လိအံၤ မ့ၢ်အဟဲလၢ ယွၤအအိၣ်ဧါ+ မ့တမ့ၢ် ယတဲလၢ ယနီၢ်ကစၢ် အတၢ်ဆိကမိၣ်ဧါန့ၣ် ပှၤလၢအသးအိၣ် မၤယွၤ အတၢ်ဘၣ်သးန့ၣ် ကသ့ၣ်ညါဝဲလီၤ.
၁၈ ပှၤလၢ အတဲတၢ်ဒ် အနီၢ်ကစၢ် အတၢ်ဆိကမိၣ်အသိးန့ၣ် မ့ၢ်အဃုဒၣ်အနီၢ်ကစၢ် အလၤကပီၤလီၤ. မ့မ့ၢ်ပှၤလၢ အမၤလၤကပီၤ ပှၤလၢအဆှၢလီၤအီၤတဂၤန့ၣ်+ မ့ၢ်ပှၤလၢ အကလုၢ်တီ ဒီးတၢ်တတီတလိၤ တအိၣ်လၢ အပူၤဘၣ်.
၁၉ စီၤမိၤၡ့ ဟ့ၣ်လီၤသု တၢ်သိၣ်တၢ်သီ+ တမ့ၢ်ဧီၤ. ဘၣ်ဆၣ် သုတဒိကနၣ် စီၤမိၤၡ့ အတၢ်သိၣ်တၢ်သီ နီတဂၤဘၣ်. ဘၣ်မနုၤအဃိ သုဃုမၤသံယၤလဲၣ်.”+
၂၀ ပှၤဂီၢ်မုၢ်တဖၣ် တဲဆၢဝဲလၢ “မတဂၤ ဃုမၤသံနၤလဲၣ်. တၢ်ဝံတၢ်နါ အိၣ်လၢနလိၤလီၤသၢၤ.”
၂၁ ယ့ၣ်ၡူးတဲဆၢက့ၤ အဝဲသ့ၣ်လၢ “ယမၤတၢ်လီၤလးထဲတခါဒံးလီၤ သုကိးဂၤဒဲး ကမၢကမၣ်လံ.
၂၂ လၢတၢ်ဂ့ၢ်အံၤအဃိ စီၤမိၤၡ့ ဟ့ၣ်လီၤသု တၢ်သိၣ်တၢ်သီလၢ ဘၣ်ဃးဒီး တၢ်ကူးတရံးလီၤ.+ နီၢ်ကီၢ်န့ၣ် တၢ်သိၣ်တၢ်သီအံၤ အတဟဲလၢ စီၤမိၤၡ့ အအိၣ်ဘၣ်, အဟဲလၢ သုမိၢ်ပၢ်ဖံဖု လၢပျၢၤတဖၣ်အအိၣ်လီၤ.+ ဒီးသုကူးတရံး ပှၤလၢ မုၢ်အိၣ်ဘှံးနံၤလီၤ.
၂၃ ဒ်သိးပှၤသု တမၤကမၣ် စီၤမိၤၡ့ အတၢ်သိၣ်တၢ်သီ တဂ့ၤအဂီၢ် ပှၤတဂၤ မ့ၢ်ဒိးတၢ်ကူးတရံးလၢ မုၢ်အိၣ်ဘှံးနံၤဒီး ဘၣ်မနုၤအဃိ သုသးဒိၣ်ထီၣ်ယၤ ဒိၣ်မး ခီဖျိလၢ ယမၤဘျါက့ၤ ပှၤတဂၤလၢ မုၢ်အိၣ်ဘှံးနံၤ အဃိလဲၣ်.+
၂၄ တဘၣ်စံၣ်ညီၣ်တၢ် ဒ်တၢ်အိၣ်ဖျါ လၢခိအသိး လၢၤတဂ့ၤ, စံၣ်ညီၣ်တၢ် တီတီလိၤလိၤတက့ၢ်.”+
၂၅ ပှၤလၢ အအိၣ်ဝဲဆိးဝဲလၢ ဝ့ၢ်ယရူၤၡလ့ၣ်အပူၤတနီၤ တဲဝဲလၢ “အဝဲမ့ၢ် ပှၤလၢ အဝဲသ့ၣ် ဃုမၤသံအီၤ တမ့ၢ်ဧီၤ.+
၂၆ ကွၢ်မီၤ, အဝဲတဲတၢ်လၢ ကမျၢၢ်အမဲာ်ညါဒီး အဝဲသ့ၣ် တတဲအီၤ နီတမံၤဘၣ်. မ့ၢ်ပခိၣ်နၢ်တဖၣ် ဆိကမိၣ်လၢ အဝဲမ့ၢ်ခရံာ် အနီၢ်ကီၢ်ဟီဧါ.
၂၇ ပှၤတဂၤအံၤ ဟဲဖဲလဲၣ်န့ၣ် ပသ့ၣ်ညါလီၤ.+ ဘၣ်ဆၣ် ဖဲခရံာ်ဟဲအခါ အအိၣ်ဟဲလၢ တၢ်လီၢ်ဖဲလဲၣ်န့ၣ် ပှၤတဘၣ်သ့ၣ်ညါ နီတဂၤဘၣ်.”
၂၈ ဖဲယ့ၣ်ၡူး သိၣ်လိတၢ်လၢ တၢ်လုၢ်ဟံၣ်ပူၤအခါ အဝဲတဲဝဲလၢ အကလုၢ်ဒိၣ်ဒိၣ်လၢ “သုသ့ၣ်ညါယၤ ဒီးယဟဲလၢ တၢ်လီၢ်ဖဲလဲၣ်န့ၣ် သုသ့ၣ်ညါလီၤ. ဒီးယတဟဲလၢ ယနီၢ်ကစၢ်အသးဘၣ်.+ ဘၣ်ဆၣ် ပှၤလၢ အဆှၢလီၤယၤန့ၣ် မ့ၢ်ပှၤလၢ အအိၣ်နီၢ်ကီၢ် ဒီးသုတသ့ၣ်ညါအီၤဘၣ်.+
၂၉ ယသ့ၣ်ညါအီၤ+ မ့ၢ်လၢ ယမ့ၢ် အပှၤခၢၣ်စး ဒီးအဝဲ ဆှၢလီၤယၤလီၤ.”
၃၀ အဃိ အဝဲသ့ၣ် ဃုကျဲလၢကဖီၣ်အီၤ+ ဘၣ်ဆၣ် အဝဲသ့ၣ်ဖီၣ်အီၤ တန့ၢ်နီတဂၤဘၣ်, မ့ၢ်လၢ အတၢ်ဆၢကတီၢ် တဘၣ်ဒံးဘၣ် အဃိလီၤ.+
၃၁ ပှၤဂီၢ်မုၢ်အါဂၤ စူၢ်က့ၤနာ်က့ၤအီၤ+ ဒီးအဝဲသ့ၣ် တဲဝဲလၢ “ဖဲခရံာ်ဟဲအခါ အကမၤတၢ်လီၤလးဒီဒူၣ်, ဒီးပှၤတဂၤအံၤ မၤဝဲဒ်န့ၣ် နီၢ်ကီၢ်လီၤ တမ့ၢ်ဧီၤ.”
၃၂ ပှၤဂီၢ်မုၢ်တဖၣ် တဲခူသူၣ် ယ့ၣ်ၡူးအဂ့ၢ် ဒ်အံၤအဃိ ပှၤဖၤရံၤၡဲတဖၣ် နၢ်ဟူဝဲလီၤ. ဒီးပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် ဆှၢလီၤဝဲ ပှၤခိးတၢ်ဖိတဖၣ် ဒ်သိး ကဖီၣ်အီၤအဂီၢ်လီၤ.
၃၃ ဒီးယ့ၣ်ၡူး တဲဝဲလၢ “တချုးလၢ ယက့ၤထီၣ်လၢ ပှၤလၢ အဆှၢလီၤယၤတဂၤ အအိၣ်ဒံးဘၣ်န့ၣ် ယကအိၣ်ဒံးဒီးသု တတီၤဖိလီၤ.+
၃၄ ခဲကၢာ် သုကဃုယၤ ဘၣ်ဆၣ် သုတထံၣ်ယၤဘၣ် ဒီးလၢယအိၣ်အလီၢ်န့ၣ် သုဟဲတသ့ဘၣ်.”+
၃၅ အဃိ ပှၤယူဒၤဖိတဖၣ် တဲလိာ်အသး ကဒဲကဒဲလၢ “ဒ်သိး ပသုတထံၣ်အီၤ တဂ့ၤအဂီၢ် အဝဲကလဲၤဖဲလဲၣ်. မ့ၢ်အဝဲ ကလဲၤလၢ ပှၤယူဒၤဖိလၢ အလီၤပြံလီၤပြါလၢ ပှၤကြံးဖိတဖၣ်အကျါ ဒ်သိး ကသိၣ်လိ ပှၤကြံးဖိအဂီၢ်ဧါ.
၃၆ အဝဲတဲလၢ ‘ခဲကၢာ် သုကဃုယၤ ဘၣ်ဆၣ် သုတထံၣ်ယၤဘၣ် ဒီးလၢယအိၣ်အလီၢ်န့ၣ် သုဟဲတသ့ဘၣ်’ န့ၣ် အဝဲအဲၣ်ဒိးတဲဝဲ အခီပညီဒ်လဲၣ်.”
၃၇ ဖဲဘူၣ်အမုၢ်နံၤလၢ အရ့ဒိၣ်ကတၢၢ်+ လၢအမ့ၢ် အလီၢ်ခံကတၢၢ် တနံၤန့ၣ် ယ့ၣ်ၡူးဂဲၤဆၢထၢၣ် ဒီးတဲဝဲလၢ အကလုၢ်ဒိၣ်ဒိၣ်လၢ “ပှၤလၢအအဲၣ်ဒိးအီထံ တဂၤဂၤန့ၣ် မ်အဟဲလၢယအိၣ် ဒီးအီတၢ်တက့ၢ်.+
၃၈ ဒ်တၢ်ကွဲးအသး တဲဝဲအသိး ပှၤလၢ အစူၢ်က့ၤနာ်က့ၤယၤန့ၣ် ‘ထံမူကျိတဖၣ် ကယွၤလီၤဝဲလၢ အသူၣ်ကံၢ်သးလဲ အပူၤလီၤ.’”+
၃၉ ဘၣ်ဆၣ် တၢ်လၢယ့ၣ်ၡူးတဲဝဲန့ၣ် အဘၣ်ဃးဒီး သးစီဆှံအဂ့ၢ်လီၤ. ဒီးတယံာ်လၢၤဘၣ် ပှၤလၢ အစူၢ်က့ၤနာ်က့ၤယ့ၣ်ၡူးန့ၣ် ကဒိးန့ၢ်ဘၣ်ဝဲ သးစီဆှံလီၤ. ဘၣ်ဆၣ် မ့ၢ်လၢ ယ့ၣ်ၡူးတဒိးန့ၢ်ဘၣ် တၢ်လၤတၢ်ကပီၤဒံးဘၣ်+ အဃိ တၢ်တဟ့ၣ်လီၤ သးစီဆှံဒံးဘၣ်.+
၄၀ ဒီးပှၤတနီၤလၢ ပှၤဂီၢ်မုၢ်အကျါ လၢအနၢ်ဟူဘၣ် တၢ်ကတိၤတဖၣ်အံၤန့ၣ် တဲဝဲလၢ “အဝဲမ့ၢ်ဝံလၢအဘၣ် တၢ်တဲဆိပာ်အီၤတဂၤ နီၢ်ကီၢ်လီၤ.”+
၄၁ ပှၤအဂၤတနီၤ တဲဝဲလၢ “အဝဲမ့ၢ် ခရံာ်လီၤ.”+ မ့မ့ၢ် အဂၤတနီၤ တဲဝဲလၢ “မ့ၢ်ခရံာ် ကဟဲအိၣ်ထီၣ်လၢ ကၤလံၤလါအပူၤဧါ.+
၄၂ တၢ်ကွဲးအသး အိၣ်ဝဲလၢ ခရံာ်န့ၣ် ကဟဲလီၤစၢၤလၢ စီၤဒၤဝံး အချံအသၣ်+ ဒီးကဟဲအိၣ်ထီၣ်လၢ ဘ့ၤသလ့ဃ့ၣ်အပူၤ+ လၢအမ့ၢ် စီၤဒၤဝံးအသဝီ တမ့ၢ်ဧီၤ.”+
၄၃ အဃိ တၢ်သးတလီၤပလိာ် အိၣ်ထီၣ်ဝဲလၢ ပှၤဂီၢ်မုၢ်အကျါလၢ ယ့ၣ်ၡူးအဃိလီၤ.
၄၄ အဝဲသ့ၣ်တနီၤ အဲၣ်ဒိးဖီၣ်ယ့ၣ်ၡူး ဘၣ်ဆၣ် အဝဲသ့ၣ်ဖီၣ်အီၤ တန့ၢ်နီတဂၤဘၣ်.
၄၅ ဒီးပှၤခိးတၢ်ဖိတဖၣ် က့ၤကဒါလၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် အအိၣ်လီၤ. အဝဲသ့ၣ်တဲ ပှၤခိးတၢ်ဖိတဖၣ်လၢ “ဘၣ်မနုၤအဃိ သုတဟဲက့ၤဖီၣ်အီၤ ဘၣ်လဲၣ်.”
၄၆ ပှၤခိးတၢ်ဖိတဖၣ် တဲဝဲလၢ “ပှၤလၢအတဲတၢ်ဒ်အံၤ တအိၣ်နီတဂၤဒံးဘၣ်.”+
၄၇ ပှၤဖၤရံၤၡဲတဖၣ် တဲဆၢဝဲလၢ “သုစ့ၢ်ကီး သုဘၣ်တၢ်လံၣ်န့ၢ်လီန့ၢ်သု လံဟီဧါ.
၄၈ ပှၤခိၣ်ပှၤနၢ် ဒီးပှၤဖၤရံၤၡဲတဖၣ် တစူၢ်က့ၤနာ်က့ၤအီၤ နီတဂၤဘၣ် တမ့ၢ်ဧီၤ.+
၄၉ မ့မ့ၢ် ပှၤဂီၢ်မုၢ်လၢ အဒိကနၣ်ယ့ၣ်ၡူးန့ၣ် တသ့ၣ်ညါ စီၤမိၤၡ့ အတၢ်သိၣ်တၢ်သီဘၣ် ဒီးမ့ၢ်ပှၤလၢ အဘၣ်တၢ်ဆိၣ်အၢလီၤ.”
၅၀ စီၤနံၤကဒ့မူးလၢ အလဲၤလၢ ယ့ၣ်ၡူးအအိၣ် လၢညါခါ ဒီးလၢအမ့ၢ် ပှၤဖၤရံၤၡဲတဂၤန့ၣ် တဲဘၣ်အဝဲသ့ၣ်လၢ
၅၁ “ဒ်ပတၢ်သိၣ်တၢ်သီ အိၣ်ဝဲအသိး ပမ့ၢ်တနၢ်ဟူဆိ ပှၤတဂၤတဲတၢ်လၢ အနီၢ်ကစၢ် ဒ်သိး ပကသ့ၣ်ညါ တၢ်လၢအမၤဝဲ တဖၣ်ဘၣ်န့ၣ် ပစံၣ်ညီၣ်အီၤ တသ့ဘၣ် တမ့ၢ်ဧီၤ.”+
၅၂ အဝဲသ့ၣ် တဲဆၢက့ၤအီၤလၢ “နၤစ့ၢ်ကီး မ့ၢ်နအိၣ်ဟဲလၢ ကၤလံၤလါဟီဧါ. ဃုသ့ၣ်ညါဒီး နကထံၣ်ဘၣ်လၢ ဝံတဘၣ်ဟဲအိၣ်ထီၣ်လၢ ကၤလံၤလါအပူၤ နီတဂၤဘၣ်.”*
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟီၣ်ခိၣ်.”
^ ဖျါလၢ အဲၣ်ဒိးတဲဝဲ ပှၤယူဒၤဖိအတၢ်ဘူၣ်တၢ်ဘါ အခိၣ်အနၢ်တဖၣ်.
^ မ့ၢ်ဝဲ ကၠိလၢ တၢ်ဘူၣ်တၢ်ဘါခိၣ်နၢ်တဖၣ် သိၣ်လိဝဲ.
^ မ့ၢ်စ့ၢ်ကီး “လံာ်စီဆှံဆၢတဖၣ်.”
^ အဆၢဖိ ၅၃ တုၤလီၤလၢ အဆၢဒိၣ် ၈ အဆၢဖိ ၁၁ န့ၣ် တအိၣ်လၢ တၢ်ကွဲးကူက့ၤလံာ်စီဆှံလၢပျၢၤ လၢပနာ်န့ၢ်အီၤသ့တဖၣ်အပူၤဘၣ်.
