လူၤကၣ် ၃:၁-၃၈
၃ ဖဲကဲစၢ်တံၤဘ့းရံ ပၢတၢ် ၁၅ နံၣ်တနံၣ်န့ၣ် စီၤပီၣ်တံၤပံၤလး မ့ၢ်ဝဲ ယူဒၤဟီၣ်ကဝီၤ အပဒိၣ်ဖးဒိၣ်လီၤ. ဖဲန့ၣ်အခါ စီၤဟ့ၤရိာ်ပၢဝဲ+ ကၤလံၤလါ ဒီးမ့မ့ၢ် အဒီပုၢ်ဝဲၢ်ခွါ စီၤဖံလံးပူးန့ၣ်ပၢဝဲ ကီၢ်ယတူၢ်ဒီးကီၢ်တြဃိၤန့တံၤ ဒီးစီၤလူၤစၤနံန့ၣ် ပၢဝဲအဘ့ၤလ့ၣ်လီၤ.
၂ ဒီးဘၣ်ဖဲ စီၤကၤယါဖၤ+ ကဲပှၤလုၢ်တၢ်ခိၣ် အဒိၣ်ကတၢၢ် ဒီးစီၤအၣ်နၣ် ပၣ်ဃုာ်လၢ ပှၤလုၢ်တၢ်ဒိၣ်အခိၣ်တဖၣ်အကျါလီၤ. ဖဲန့ၣ်အခါ ကစၢ်ယွၤဟ့ၣ်လီၤ တၢ်ကစီၣ်လၢ စီၤစဃၤရံ အဖိခွါ စီၤယိၤဟၣ်အအိၣ်လၢ+ ပှၢ်မုၢ်ကနၢလီၤ.+
၃ အဃိ စီၤယိၤဟၣ် လဲၤဝဲလၢ တၢ်လီၢ်လၢ အအိၣ်လၢ ထံကျိယၢ်ဒ့ၣ် အဃၢၤဝးဝး ဒီးစံၣ်တဲၤတဲလီၤဝဲ တၢ်ဒိးဘျၢထံအဂ့ၢ် လၢအမ့ၢ် တၢ်ပနီၣ်တခါလၢ ဘၣ်ဃးဒီး တၢ်ပီၢ်ယၢ်လီၤက့ၤသး လၢတၢ်ပျၢ်တၢ်ဒဲးဘး အဂီၢ်လီၤ.+
၄ ဒ်ဝံယၡါယၤ ကွဲးဝဲအသိး “လၢပှၢ်မုၢ်ကနၢန့ၣ် ပှၤတဂၤအကလုၢ် သီၣ်ထီၣ်ဝဲလၢ ‘ကတဲာ်ကတီၤန့ၢ်ကျဲလၢ ယဟိဝၤယွၤ* အဂီၢ် ဒီးမၤလိၤထီၣ်ကျဲ လၢအမဲာ်ညါတက့ၢ်.+
၅ တၢ်တြီၤခဲလၢာ် ကဘၣ်တၢ်မၤပှဲၤအီၤ, ကစၢၢ်ဒီး တၢ်လူၢ်ကိးဖျၢၣ်ဒဲး ကဘၣ်တၢ်မၤပၢၤအီၤ, ကျဲလၢအက့ၣ်တဖၣ်န့ၣ် ကဘၣ်တၢ်မၤလိၤထီၣ်အီၤ, ကျဲလၢအတပၢၤဘၣ်န့ၣ် ကဘၣ်တၢ်မၤပၢၤထီၣ်အီၤ
၆ ဒီးပှၤဟီၣ်ခိၣ်ဖိခဲလၢာ်* ကထံၣ်ဘၣ်ဝဲ ကစၢ်ယွၤ အတၢ်အုၣ်က့ၤခီၣ်က့ၤလီၤ.’”+
၇ ဒီးဖဲပှၤဂီၢ်မုၢ်တဖၣ် ဟဲဝဲဒ်သိး ကဒိးဘျၢထံလၢ စီၤယိၤဟၣ် အစုပူၤအခါ အဝဲတဲဘၣ် အဝဲသ့ၣ်လၢ “ဂုၢ်အၢအဖိအလံၤသ့ၣ်ဧၢ, မတဂၤဟ့ၣ်ပလီၢ်သု ဒ်သိး သုကဃ့ၢ်ပူၤဖျဲးထီၣ်ကွံာ် သုသးလၢ ကစၢ်ယွၤ အတၢ်သးဒိၣ်ထီၣ်လၢ အကဟဲန့ၣ်လဲၣ်.+
၈ အဆိကတၢၢ်န့ၣ် မၤတၢ်လၢ အပာ်ဖျါထီၣ်လၢ သုပီၢ်ယၢ်လီၤက့ၤသုသး* န့ၣ်တက့ၢ်. တဘၣ်တဲလီၤသုသးလၢ စီၤအၤဘြၤဟၣ် မ့ၢ်သုပၢ်တဂ့ၤ. ယကတဲဘၣ်သုလၢ ကစၢ်ယွၤ မၤကဲထီၣ်လၢၢ်တဖၣ်အံၤလၢ စီၤအၤဘြၤဟၣ် အဖိအလံၤတဖၣ် သ့ဝဲလီၤ.
၉ ဒီးကွါအိၣ်ပာ်လီၤအသးလၢ သ့ၣ်ခီၣ်ထံးလံ. အဃိ ကယဲၢ်သ့ၣ်လၢ အတသၣ်ထီၣ်အသၣ် လၢအဂ့ၤဘၣ်န့ၣ် ကဘၣ်တၢ်ကူာ်လီၤကွံာ်အီၤဒီး ထၢနုာ်အီၤလၢ မ့ၣ်အူအပူၤလီၤ.”+
၁၀ ဒီးပှၤဂီၢ်မုၢ်တဖၣ်န့ၣ် သံကွၢ်အီၤလၢ “မ့မ့ၢ်ဒ်န့ၣ်န့ၣ် ပကဘၣ်မၤဒ်လဲၣ်.”
၁၁ အဝဲတဲဆၢက့ၤ အဝဲသ့ၣ်လၢ “ပှၤလၢအဆ့ကၤ အိၣ်ခံဘ့ၣ်န့ၣ်* မ်အဟ့ၣ်နီၤလီၤ ပှၤလၢအဆ့ကၤ တအိၣ်ဘၣ် တဘ့ၣ်တက့ၢ်. ဒီးပှၤလၢ အတၢ်အီၣ်တၢ်အီအိၣ်န့ၣ် မ်အဟ့ၣ်နီၤလီၤပှၤလၢ အတၢ်အီၣ်တၢ်အီ တအိၣ်ဘၣ်တဖၣ် စ့ၢ်ကီးတက့ၢ်.”+
၁၂ ဒီးပှၤထၢ တၢ်ခိတၢ်သွဲတဖၣ်ဒၣ်လဲာ် ဟဲဒ်သိး ကဒိးဘျၢထံ+ ဒီးတဲအီၤလၢ “သရၣ်ဧၢ, ပကဘၣ်မၤဒ်လဲၣ်.”
၁၃ အဝဲတဲဘၣ် အဝဲသ့ၣ်လၢ “တဘၣ်ဃ့တၢ်ခိတၢ်သွဲ အါန့ၢ်ဒံး တၢ်ပာ်ပနီၣ်အီၤ အသိးတဂ့ၤ.”+
၁၄ တကးဒံးဘၣ် ပှၤသုးဖိတဖၣ် သံကွၢ်စ့ၢ်ကီးအီၤလၢ “ပကဘၣ်မၤဒ်လဲၣ်.” အဝဲတဲဘၣ် အဝဲသ့ၣ်လၢ “တဘၣ်ဟံးန့ၢ်ဆူၣ် ပှၤစ့ နီတဂၤတဂ့ၤ ဒီးတဘၣ် ပာ်ဒ့ၣ်ပာ်ကမၣ် ပှၤလၢအတၢ်ကမၣ် တအိၣ်ဘၣ်တဂ့ၤ.+ သးမံဒီးတၢ်လၢ သုဒိးန့ၢ်ဘၣ်အီၤ တဖၣ်တက့ၢ်.”
၁၅ ဒီးပှၤဂီၢ်မုၢ်တဖၣ် ခိးကွၢ်လၢ်ဝဲ ခရံာ်အဃိ အဝဲသ့ၣ် ဆိကမိၣ်ထီၣ်ဝဲလၢ ဘၣ်သ့ၣ်သ့ၣ် စီၤယိၤဟၣ်န့ၣ်ကမ့ၢ်ဝဲ ခရံာ်လီၤ.+
၁၆ အဃိ စီၤယိၤဟၣ် တဲဆၢ အဝဲသ့ၣ် ခဲလၢာ်လၢ “ယၤန့ၣ် ယဒိးဘျၢသုလၢထံ ဘၣ်ဆၣ် ပှၤတဂၤလၢ အဒိၣ်န့ၢ်ယၤန့ၣ် ကဟဲဝဲလီၤ. ထဲလၢ ယကဃဲၣ်လီၤကွံာ် အခီၣ်ဖံး ပျံၤဒၣ်လဲာ် ယတကြၢးဘၣ်.+ အဝဲ ကဒိးဘျၢသုလၢ သးစီဆှံ ဒီးလၢမ့ၣ်အူလီၤ.+
၁၇ အနီၣ်တရီာ်ဘုန့ၣ် အိၣ်လၢအစုပူၤ ဒ်သိး ကမၤကဆှီထီၣ်ကွံာ် အကြဲၢ်ပူၤပျီပျီ ဒီးကပာ်ဖှိၣ်အဘု* လၢဘုဖီပူၤလီၤ. မ့မ့ၢ်ဘုဘ့ၣ်န့ၣ် အဝဲကဒွဲၣ်အူကွံာ်ဝဲလၢ မ့ၣ်အူလၢ အလီၤပံာ်တသ့ဘၣ် အပူၤလီၤ.”
၁၈ စီၤယိၤဟၣ် ဟ့ၣ်ဂံၢ်ဟ့ၣ်ဘါ အဝဲသ့ၣ်အါမး ဒီးဆဲးစံၣ်တဲၤတဲလီၤစ့ၢ်ကီး ပှၤဂီၢ်မုၢ်လၢ တၢ်သးခုကစီၣ်တဖၣ်လီၤ.
၁၉ မ့မ့ၢ် ပဒိၣ်စီၤဟ့ၤရိာ်န့ၣ် စီၤယိၤဟၣ် သိၣ်ဃီၣ်အီၤ ခီဖျိလၢ အဝဲဟံးန့ၢ် အဒီပုၢ်ဝဲၢ်ခွါအမါ နီၢ်ဟ့ၤရိၤဒံ ဒီးကယဲၢ် တၢ်အၢတၢ်သီလၢ အမၤတ့ၢ်ဝဲတဖၣ် အဃိလီၤ.
၂၀ ဒီးစီၤဟ့ၤရိာ် မၤအါထီၣ် တၢ်ကမၣ် ခီဖျိအထၢနုာ်ဝဲ စီၤယိၤဟၣ်လၢဃိာ်ပူၤလီၤ.+
၂၁ ဖဲပှၤခဲလၢာ်ဟဲဒိးဘျၢထံအခါ ယ့ၣ်ၡူးစ့ၢ်ကီး ဟဲဒိးဘျၢအသးလီၤ.+ ဒီးဖဲအဝဲ ဃ့ထုကဖၣ်တၢ်အခါ မူခိၣ် အိးထီၣ်အသး+
၂၂ ဒီးသးစီဆှံ ဟဲလီၤလၢအလိၤ ဒ်ထိၣ်လွံၢ်အသိး ဒီးတၢ်ကလုၢ်သီၣ်ထီၣ် လၢမူခိၣ်လၢ “နမ့ၢ်ယဖိခွါလၢယအဲၣ် ဒီးယဘၣ်သူၣ်ဘၣ်သးနၤလီၤ.”+
၂၃ ဖဲယ့ၣ်ၡူးစးထီၣ်+ အတၢ်စံၣ်တဲၤတဲလီၤတၢ်မၤအခါ အသးအိၣ်အနံၣ် ၃၀ လီၤ.+ လၢပှၤဂၤ အတၢ်ထံၣ်န့ၣ် ယ့ၣ်ၡူးမ့ၢ် စီၤယိၤသးအဖိခွါဒီးစီၤယိၤသးမ့ၢ်+စီၤဟ့ၤလံအဖိခွါလီၤ.
၂၄ စီၤဟ့ၤလံမ့ၢ် စီၤမးသးအဖိခွါ,စီၤမးသးမ့ၢ် စီၤလ့ၤဝံအဖိခွါ,စီၤလ့ၤဝံမ့ၢ် စီၤမ့းလဃံအဖိခွါ,စီၤမ့းလဃံမ့ၢ် စီၤယၣ်နါအဖိခွါ,စီၤယၣ်နါမ့ၢ် စီၤယိၤသးအဖိခွါ,
၂၅ စီၤယိၤသးမ့ၢ် စီၤမးတၤသံအဖိခွါ,စီၤမးတၤသံမ့ၢ် စီၤဧၤမိၣ်အဖိခွါ,စီၤဧၤမိၣ်မ့ၢ် စီၤနၤဃူၣ်အဖိခွါ,စီၤနၤဃူၣ်မ့ၢ် စီၤအ့းစလံအဖိခွါ,စီၤအ့းစလံမ့ၢ် စီၤနၤကဲအဖိခွါ,
၂၆ စီၤနၤကဲမ့ၢ် စီၤမအါသးအဖိခွါ,စီၤမအါသးမ့ၢ် စီၤမးတၤသံအဖိခွါ,စီၤမးတၤသံမ့ၢ် စီၤစ့းမ့းအံအဖိခွါ,စီၤစ့းမ့းအံမ့ၢ် စီၤယိၤသဲးအဖိခွါ,စီၤယိၤသဲးမ့ၢ် စီၤယူဒၣ်အဖိခွါ,
၂၇ စီၤယူဒၣ်မ့ၢ် စီၤယိၤအၣ်နၣ်အဖိခွါ,စီၤယိၤအၣ်နၣ်မ့ၢ် စီၤရ့ၤစါအဖိခွါ,စီၤရ့ၤစါမ့ၢ် စီၤစရူဘၤဘ့လး အဖိခွါ,+စီၤစရူဘၤဘ့လးမ့ၢ် စီၤၡၤလတံၤအ့လးအဖိခွါ,+စီၤၡၤလတံၤအ့လးမ့ၢ် စီၤန့ၤရံ အဖိခွါ,
၂၈ စီၤန့ၤရံမ့ၢ် စီၤမ့းလဃံအဖိခွါ,စီၤမ့းလဃံမ့ၢ် စီၤအးဒံးအဖိခွါ,စီၤအးဒံးမ့ၢ် စီၤကိၣ်စၣ်အဖိခွါ,စီၤကိၣ်စၣ်မ့ၢ် စီၤအ့းလမိၤဒၣ် အဖိခွါ,စီၤအ့းလမိၤဒၣ်မ့ၢ် စီၤအ့ၢ်အဖိခွါ,
၂၉ စီၤအ့ၢ်မ့ၢ် စီၤယ့ၣ်ၡူးအဖိခွါ,စီၤယ့ၣ်ၡူးမ့ၢ် စီၤအလံၤဧ့စ့ၢ်အဖိခွါ,စီၤအလံၤဧ့စ့ၢ်မ့ၢ် စီၤယိၤရံၣ်အဖိခွါ,စီၤယိၤရံၣ်မ့ၢ် စီၤမးသးအဖိခွါ,စီၤမးသးမ့ၢ် စီၤလ့ၤဝံအဖိခွါ,
၃၀ စီၤလ့ၤဝံမ့ၢ် စီၤစူၤမ့းအိးအဖိခွါ,စီၤစူၤမ့းအိးမ့ၢ် စီၤယူဒၤအဖိခွါ,စီၤယူဒၤမ့ၢ် စီၤယိၤသးအဖိခွါ,စီၤယိၤသးမ့ၢ် စီၤယိၤနာ်အဖိခွါ,စီၤယိၤနာ်မ့ၢ် စီၤအ့ၤလယါကံၣ် အဖိခွါ,
၃၁ စီၤအ့ၤလယါကံၣ်မ့ၢ် စီၤမ့းလ့းအဖိခွါ,စီၤမ့းလ့းမ့ၢ် စီၤမအံနၣ်အဖိခွါ,စီၤမအံနၣ်မ့ၢ် စီၤမးတၤသါအဖိခွါ,စီၤမးတၤသါမ့ၢ် စီၤနၤသၣ်အဖိခွါ,+စီၤနၤသၣ်မ့ၢ် စီၤဒၤဝံးအဖိခွါ,+
၃၂ စီၤဒၤဝံးမ့ၢ် စီၤယံးၡဲအဖိခွါ,+စီၤယံးၡဲမ့ၢ် စီၤဧိၤဘ့းအဖိခွါ,+စီၤဧိၤဘ့းမ့ၢ် စီၤဘိၤဧးအဖိခွါ,+စီၤဘိၤဧးမ့ၢ် စီၤစၤလမိၣ်အဖိခွါ,+စီၤစၤလမိၣ်မ့ၢ် စီၤနးၡိၣ်အဖိခွါ,+
၃၃ စီၤနးၡိၣ်မ့ၢ် စီၤဧးမံၤနဒးအဖိခွါ,စီၤဧးမံၤနဒးမ့ၢ် စီၤရၣ်အဖိခွါ,စီၤရၣ်မ့ၢ် စီၤဃ့ၤစရိၣ်အဖိခွါ,စီၤဃ့ၤစရိၣ်မ့ၢ် စီၤဖ့ၤရ့းအဖိခွါ,+စီၤဖ့ၤရ့းမ့ၢ် စီၤယူဒၤအဖိခွါ,+
၃၄ စီၤယူဒၤမ့ၢ် စီၤယၤကိာ်အဖိခွါ,+စီၤယၤကိာ်မ့ၢ် စီၤအံၤစဲးအဖိခွါ,+စီၤအံၤစဲးမ့ၢ် စီၤအၤဘြၤဟၣ် အဖိခွါ,+စီၤအၤဘြၤဟၣ်မ့ၢ် စီၤတ့ရၤ အဖိခွါ,+စီၤတ့ရၤမ့ၢ် စီၤနၤဃိၢ်အဖိခွါ,+
၃၅ စီၤနၤဃိၢ်မ့ၢ် စီၤစၤရူာ်အဖိခွါ,+စီၤစၤရူာ်မ့ၢ် စီၤရူၤအဖိခွါ,+စီၤရူၤမ့ၢ် စီၤပ့ၤလ့းအဖိခွါ,+စီၤပ့ၤလ့းမ့ၢ် စီၤဧၤဘ့ၢ်အဖိခွါ,+စီၤဧၤဘ့ၢ်မ့ၢ် စီၤစ့ၤလါအဖိခွါ,+
၃၆ စီၤစ့ၤလါမ့ၢ် စီၤက့ၤနၣ်အဖိခွါ,စီၤက့ၤနၣ်မ့ၢ် စီၤအၢ်ဖးၡးအဖိခွါ,+စီၤအၢ်ဖးၡးမ့ၢ် စီၤၡ့ၣ်အဖိခွါ,+စီၤၡ့ၣ်မ့ၢ် စီၤနိအၤအဖိခွါ,+စီၤနိအၤမ့ၢ် စီၤလ့ၤမ့းအဖိခွါ,+
၃၇ စီၤလ့ၤမ့းမ့ၢ် စီၤမသူၤၡလၤအဖိခွါ,+စီၤမသူၤၡလၤမ့ၢ် စီၤဃနိာ်အဖိခွါ,စီၤဃနိာ်မ့ၢ် စီၤယၤရ့းအဖိခွါ,+စီၤယၤရ့းမ့ၢ် စီၤဟမၤလ့လး အဖိခွါ,+စီၤဟမၤလ့လးမ့ၢ် စီၤက့ၤနၣ် အဖိခွါ,+
၃၈ စီၤက့ၤနၣ်မ့ၢ် စီၤအနိၣ်အဖိခွါ,+စီၤအနိၣ်မ့ၢ် စီၤၡ့သးအဖိခွါ,+စီၤၡ့သးမ့ၢ် စီၤအၤဒၣ်အဖိခွါ+ဒီးစီၤအၤဒၣ်မ့ၢ် ကစၢ်ယွၤ အဖိခွါလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “ဖံးညၣ်.”
^ အခီပညီလိၤလိၤ “သၣ်ထီၣ်တၤသၣ်လၢအဘၣ်ဃးဒီး တၢ်ပီၢ်ယၢ်လီၤက့ၤသး.”
^ မ့ၢ်စ့ၢ်ကီး “အါန့ၢ်ဒံးတဘ့ၣ်.”
^ အခီပညီလိၤလိၤ “ဘုကၠူၣ်.”
