လူၤကၣ် ၆:၁-၄၉
-
ယ့ၣ်ၡူးမ့ၢ်ဝဲ “မုၢ်အိၣ်ဘှံးနံၤ အကစၢ်” (၁-၅)
-
ပိာ်ခွါတဂၤလၢ အစုတဂ့ၤဘၣ်န့ၣ် ဘျါက့ၤဝဲ (၆-၁၁)
-
တၢ်မၢဖိ ၁၂ ဂၤ (၁၂-၁၆)
-
ယ့ၣ်ၡူးသိၣ်လိတၢ် ဒီးမၤဘျါတၢ် (၁၇-၁၉)
-
တၢ်သးခု ဒီးတၢ်သးအုးအဂ့ၢ် (၂၀-၂၆)
-
အဲၣ်ဒုၣ်ဒါ (၂၇-၃၆)
-
တဘၣ်စံၣ်ညီၣ်တၢ်လၢၤတဂ့ၤ (၃၇-၄၂)
-
သ့ၣ်ညါအီၤလၢအသၣ် (၄၃-၄၅)
-
ဟံၣ်လၢဘၣ်တၢ်တ့အီၤကျၢၤကျၢၤ, ဟံၣ်လၢအတကျၢၤဘၣ် (၄၆-၄၉)
၆ ဖဲမုၢ်အိၣ်ဘှံးနံၤန့ၣ် ယ့ၣ်ၡူး လဲၤခီဂာ်ဝဲ စံာ်ပျီတဖၣ်လီၤ. ဒီးအပျဲၢ်အဘီၣ်တဖၣ်န့ၣ် ဒဲးဝဲဘုဒီး ဒံးဒူးဝဲလၢအစု+ ဝံၤဒီးအီၣ်ဝဲလီၤ.+
၂ အဃိ ပှၤဖၤရံၤၡဲတနီၤ တဲဝဲလၢ “ဘၣ်မနုၤအဃိ သုမၤတၢ်လၢ ပှၤတကြၢးမၤလၢ မုၢ်အိၣ်ဘှံးနံၤဘၣ်လဲၣ်.”+
၃ ဘၣ်ဆၣ် ယ့ၣ်ၡူးတဲဆၢက့ၤ အဝဲသ့ၣ်လၢ “ဖဲစီၤဒၤဝံး ဒီးပှၤလၢ အအိၣ်ဒီးအီၤတဖၣ် လီၤဘဲအခါ စီၤဒၤဝံးမၤ တၢ်မနုၤလဲၣ်န့ၣ် သုတဖးဘၣ် နီတဘျီဧီၤ.+
၄ အဝဲလဲၤနုာ်လီၤလၢ ကစၢ်ယွၤ အဟံၣ်ပူၤဒီး ဒိးန့ၢ်ဘၣ်ဝဲ ကိၣ်လၢ တၢ်လုၢ်ထီၣ်တၢ် အဂီၢ်လီၤ. အဝဲအီၣ်ဝဲ ဒီးဟ့ၣ်လီၤအီၣ်စ့ၢ်ကီး ပှၤလၢ အအိၣ်ဒီးအီၤတဖၣ်လီၤ. နီၢ်ကီၢ်န့ၣ် ပှၤတကြၢးအီၣ်ဝဲ နီတဂၤဘၣ်. ပှၤအီၣ်န့ၢ်ဒၣ်ထဲ ပှၤလုၢ်တၢ်ဒိၣ်တဖၣ်လီၤ.”+
၅ ဝံၤဒီး ယ့ၣ်ၡူးတဲဘၣ် အဝဲသ့ၣ်လၢ “ပှၤကညီဖိခွါအံၤ မ့ၢ်ဝဲ မုၢ်အိၣ်ဘှံးနံၤ အကစၢ်လီၤ.”+
၆ ဒီးလၢအဂၤတဘျီ ဘၣ်ဖဲ မုၢ်အိၣ်ဘှံးနံၤန့ၣ်+ ယ့ၣ်ၡူး လဲၤနုာ်လီၤလၢ ဘူၣ်ဘျီၣ်ပူၤ ဒီးသိၣ်လိတၢ်လီၤ. ဒီးပှၤလၢ အစုထွဲတဂ့ၤဘၣ်တဂၤ အိၣ်ဝဲဖဲန့ၣ်လီၤ.+
၇ မ့ၢ်ယ့ၣ်ၡူး ကမၤဘျါဝဲ ပှၤဂၤလၢ မုၢ်အိၣ်ဘှံးနံၤဧါ တမၤဘျါဝဲဧါန့ၣ် ပှၤကွဲးလံာ်ဖိ ဒီးပှၤဖၤရံၤၡဲတဖၣ် ကွၢ်ယ့ၣ်ၡူးထံထံ ဒ်သိးကပာ်ဒ့ၣ်ပာ်ကမၣ်အီၤ အဂီၢ်လီၤ.
၈ ဘၣ်ဆၣ် မ့ၢ်လၢ ယ့ၣ်ၡူးသ့ၣ်ညါ အဝဲသ့ၣ် အတၢ်ဆိကမိၣ်အဃိ+ အတဲဘၣ် ပှၤလၢအစုတဂ့ၤဘၣ် တဂၤလၢ “ဂဲၤဆၢထၢၣ် ဒီးလဲၤအိၣ်လၢ တၢ်ခၢၣ်သးတက့ၢ်.” အဝဲဂဲၤဆၢထၢၣ် ဒီးလဲၤအိၣ်ဝဲဖဲန့ၣ်လီၤ.
၉ ယ့ၣ်ၡူးတဲဘၣ် အဝဲသ့ၣ်လၢ “ယကသံကွၢ်သု, လၢမုၢ်အိၣ်ဘှံးနံၤန့ၣ် မ့ၢ်ပကြၢး မၤဂ့ၤတၢ်ဧါ မ့တမ့ၢ် မၤအၢတၢ်ဧါ. မ့ၢ်ပကြၢး မၤပူၤဖျဲးတၢ်သးသမူဧါ မ့တမ့ၢ် မၤသံတၢ်ဧါ.”+
၁၀ ယ့ၣ်ၡူးကွၢ်တရံး အဝဲသ့ၣ် ဒီးတဲဘၣ်ပှၤတဂၤန့ၣ်လၢ “မၤဘျၢထီၣ် နစုတက့ၢ်.” ပှၤတဂၤန့ၣ် မၤဝဲဒ်န့ၣ်ဒီး အစုဂ့ၤထီၣ်က့ၤဝဲလီၤ.
၁၁ ဘၣ်ဆၣ် ပှၤတဖၣ်န့ၣ် သးဒိၣ်ထီၣ်တၢ်ဒိၣ်မးဒီး တဲသကိးလိာ်သး တဂၤဒီးတဂၤ လၢကမၤ ယ့ၣ်ၡူးဒ်လဲၣ်လီၤ.
၁၂ ဘၣ်တနံၤန့ၣ် ယ့ၣ်ၡူးလဲၤထီၣ်လၢ ကစၢၢ်ခိၣ် ဒ်သိး ကဃ့ထုကဖၣ်တၢ် အဂီၢ်လီၤ.+ ဒီးအဃ့ထုကဖၣ်တၢ်လၢ ကစၢ်ယွၤအအိၣ် ဒီတနၤကျၢၤလီၤ.+
၁၃ ဖဲမုၢ်ဝါထီၣ်န့ၣ် အဝဲကိးဖှိၣ်ဝဲ အပျဲၢ်အဘီၣ်တဖၣ် ဒီးဃုထၢထီၣ်ဝဲပှၤ ၁၂ ဂၤလၢ အဝဲသ့ၣ်အကျါ ဒီးကိးအဝဲသ့ၣ်လၢ တၢ်မၢဖိတဖၣ်လီၤ.+
၁၄ အဝဲသ့ၣ် အမံၤမ့ၢ်ဝဲ စီၤၡံမိၣ်လၢ ယ့ၣ်ၡူးကိးက့ၤအီၤလၢ စီၤပ့းတရူး, အဒီပုၢ်ဝဲၢ်ခွါ စီၤအၣ်ဒရ့း, စီၤယၤကိာ်, စီၤယိၤဟၣ်, စီၤဖံလံးပူး,+ စီၤဘၢ်သလီးမဲ,
၁၅ စီၤမးသဲ, စီၤသိၤမါ,+ စီၤအၤလဖဲအဖိခွါ စီၤယၤကိာ်, စီၤၡံမိၣ် လၢပှၤကိးအီၤလၢ “ပှၤလၢအသးဆူၣ်တဂၤ,”
၁၆ စီၤယၤကိာ်အဖိခွါ စီၤယူဒၤ ဒီးစီၤယူဒၤ အံၣ်စကၤရံၤအိာ် လၢအကဲထီၣ်ပှၤလၢ အဆါလီၤကွံာ်ယ့ၣ်ၡူး တဂၤန့ၣ်လီၤ.
၁၇ ယ့ၣ်ၡူး ဟဲက့ၤလီၤဒီးအဝဲသ့ၣ် ဒီးဆၢထၢၣ်ဝဲလၢ တၢ်ပၢၤခိၣ်လီၤ. ဒီးအပျဲၢ်အဘီၣ် အိၣ်ဝဲဖဲန့ၣ် အါအါဂီၢ်ဂီၢ်, ဒီးပှၤဂီၢ်မုၢ်ဖးဒိၣ်လၢ အအိၣ်လၢ ယူဒၤအဟီၣ်ကဝီၤဝးဝး ဒီးယရူၤၡလ့ၣ် ဒီးစိၢ် ဒီးစံဒိၣ်အဟီၣ်ကဝီၤ လၢအဘူးဒီးပီၣ်လဲၣ်န့ၣ် ဟဲဝဲဒ်သိး ကဒိကနၣ်အီၤ ဒီးဒ်သိး အဝဲသ့ၣ်အတၢ်ဆါ ကဘျါအဂီၢ်လီၤ.
၁၈ ဒီးပှၤလၢ တၢ်ဝံတၢ်နါ မၤအၢမၤနးအီၤတဖၣ်ဒၣ်လဲာ် ဘျါက့ၤဝဲလီၤ.
၁၉ ဖဲပှၤထိးဘၣ် ယ့ၣ်ၡူးအခါ အစိအကမီၤဟးထီၣ်ဝဲ+ ဒီးပှၤခဲလၢာ် အတၢ်ဆါဘျါက့ၤဝဲလီၤ. အဃိ ပှၤကိးဂၤဒဲး အဲၣ်ဒိးဟဲထိးအီၤလီၤ.
၂၀ ဒီးယ့ၣ်ၡူးကွၢ်ထီၣ် အပျဲၢ်အဘီၣ်တဖၣ် ဒီးတဲဝဲလၢ
“သုဝဲလၢအမ့ၢ် ပှၤလၢအဖှီၣ်န့ၣ် သုကသးခု, မ့ၢ်လၢ ကစၢ်ယွၤ အဘီအမုၢ်န့ၣ် မ့ၢ်သုတၢ်အဃိလီၤ.+
၂၁ “သုဝဲလၢ အလီၤဘဲ* ခဲအံၤန့ၣ် သုကသးခု, မ့ၢ်လၢ သုကသးမံဘၣ် အဃိလီၤ.+
“သုဝဲလၢ အဟီၣ်ခဲအံၤန့ၣ် သုကသးခု, မ့ၢ်လၢ သုကနံၤဘၣ် အဃိလီၤ.+
၂၂ “ဖဲပှၤသးဟ့သု,+ နီဟးထီၣ်သု,+ ဒုၣ်ဒွဲၣ်သု ဒီးပာ်ဒ့ၣ်ပာ်ကမၣ်သု လၢသုမ့ၢ်ပှၤအၢပှၤသီလၢ ပှၤကညီဖိခွါအံၤ အဃိအခါ သုကသးခုလီၤ.
၂၃ ဖဲမုၢ်နံၤအဝဲန့ၣ် သးခုဒီးဖုကဆဲး လၢတၢ်သးခုအပူၤတက့ၢ်. ကွၢ်မီၤ, သုခိၣ်ဖးလၢမူခိၣ်န့ၣ် ဒိၣ်ဝဲလီၤ. အဝဲသ့ၣ် အမိၢ်ပၢ်ဖံဖု လၢပျၢၤတဖၣ်န့ၣ် မၤဝဲဝံတဖၣ်ဒ်န့ၣ်အသိး စ့ၢ်ကီးလီၤ.+
၂၄ “ဘၣ်ဆၣ် သုဝဲလၢအမ့ၢ် ပှၤထူးပှၤတီၤတဖၣ်န့ၣ် ကလီၤသးအုးလၢ သုဂီၢ်ဒိၣ်မး,+ မ့ၢ်လၢ တၢ်လၢအအိၣ်ဒီးသုခဲအံၤန့ၣ် သုကန့ၢ်ဘၣ်ပှဲၤန့ၣ်လီၤ.+
၂၅ “သုဝဲလၢ အသးမံ ခဲအံၤန့ၣ် ကလီၤသးအုးလၢ သုဂီၢ်ဒိၣ်မး, မ့ၢ်လၢ သုကလီၤဘဲ အဃိလီၤ.
“သုဝဲလၢ အနံၤခဲအံၤန့ၣ် ကလီၤသးအုးလၢ သုဂီၢ်ဒိၣ်မး, မ့ၢ်လၢ သုကသးအုး ဒီးဟီၣ်ဝဲအဃိလီၤ.+
၂၆ “ဖဲပှၤခဲလၢာ် ပတြၢၤသုအခါ ကလီၤသးအုးလၢ သုဂီၢ်ဒိၣ်မး,+ မ့ၢ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် မၤဝဲဝံအဘျၣ်တဖၣ် ဒ်န့ၣ်အသိးစ့ၢ်ကီးလီၤ.
၂၇ “ဘၣ်ဆၣ် သုဝဲလၢ အဒိကနၣ်တၢ်တဖၣ်န့ၣ် ယကတဲဘၣ်သုလၢ ဆဲးအဲၣ် သုဒုၣ်သုဒါတဖၣ် ဒီးမၤဂ့ၤပှၤလၢ အသးဟ့သုတက့ၢ်.+
၂၈ ဆိၣ်ဂ့ၤပှၤလၢ အဆိၣ်အၢသု ဒီးပှၤလၢ အဒုၣ်ဒွဲၣ်စံးအၢသုန့ၣ် ဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်တက့ၢ်.+
၂၉ ပှၤတဂၤဂၤ မ့ၢ်ဒဲနမဲာ် တကပၤန့ၣ် ပျဲဒဲအီၤလၢ အဝဲတကပၤ စ့ၢ်ကီးတက့ၢ်. ဒီးပှၤတဂၤဂၤ မ့ၢ်ဟံးန့ၢ် နဆ့ကၤလၢ အဖီခိၣ်တဘ့ၣ်န့ၣ် တဘၣ်တြီအီၤလၢ အကဟံးန့ၢ်စ့ၢ်ကီး နဆ့ကၤလၢ အဖီလာ်တဘ့ၣ်တဂ့ၤ.+
၃၀ ပှၤလၢအဃ့ နတၢ်ကိးဂၤဒဲးန့ၣ် ဟ့ၣ်အီၤတက့ၢ်.+ ဒီးပှၤလၢအဟံးန့ၢ် နတၢ်တဖၣ်န့ၣ် တဘၣ် က့ၤဃ့ကဒါအီၤ လၢၤတဂ့ၤ.
၃၁ “ဒ်သုအဲၣ်ဒိးလၢ ပှၤဂၤကမၤသုအသိးန့ၣ် မၤအဝဲသ့ၣ် ဒ်န့ၣ်အသိးစ့ၢ်ကီးတက့ၢ်.+
၃၂ “သုမ့ၢ်အဲၣ်ထဲ ပှၤလၢ အအဲၣ်သုန့ၣ် မ့ၢ်အကလီၤပတြၢၤစ့ၢ်ကီးဧါ. ပှၤတၢ်ဒဲးဘးဖိတဖၣ်စ့ၢ်ကီး အဲၣ်ပှၤလၢ အအဲၣ်အဝဲသ့ၣ်လီၤ.+
၃၃ သုမ့ၢ်မၤဂ့ၤထဲ ပှၤလၢ အမၤဂ့ၤသုန့ၣ် မ့ၢ်အကလီၤပတြၢၤစ့ၢ်ကီးဧါ. ပှၤတၢ်ဒဲးဘးဖိတဖၣ်စ့ၢ်ကီး မၤဝဲဒ်န့ၣ်လီၤ.
၃၄ သုမ့ၢ်ဟ့ၣ်လိၢ်တၢ် ထဲလၢ ပှၤလၢသုမုၢ်လၢ်လၢ သုကက့ၤန့ၢ်ဘၣ်က့ၤ တၢ်လၢ အအိၣ်န့ၣ် မ့ၢ်အကလီၤပတြၢၤစ့ၢ်ကီးဧါ.+ ပှၤတၢ်ဒဲးဘးဖိတဖၣ်စ့ၢ်ကီး ဟ့ၣ်လိၢ်တၢ်လၢ ပှၤတၢ်ဒဲးဘးဖိ အဂၤတဖၣ်အအိၣ် ဒ်သိးအဝဲသ့ၣ် ကက့ၤန့ၢ်ဘၣ်က့ၤဝဲ ပှဲၤသိးဒီး အလီၢ်လီၤ.
၃၅ မ့မ့ၢ်သုန့ၣ် ဆဲးအဲၣ်သုဒုၣ်သုဒါ ဒီးမၤဂ့ၤတၢ်တက့ၢ်. ဒီးသုမ့ၢ်ဟ့ၣ်လိၢ်တၢ်န့ၣ် တဘၣ်မုၢ်လၢ်လၢ သုကက့ၤဒိးန့ၢ်ဘၣ်က့ၤတဂ့ၤ.+ သုမ့ၢ်မၤဒ်န့ၣ်န့ၣ် သုကဒိးန့ၢ်ဘၣ် ခိၣ်ဖးဖးဒိၣ်. ဒီးသုကကဲထီၣ် တၢ်ထီကတၢၢ်တဂၤ အဖိခွါတဖၣ်, မ့ၢ်လၢ အသးဂ့ၤလၢ ပှၤလၢအတသ့ၣ်ညါ တၢ်အဘျုးအဖှိၣ် ဒီးပှၤအၢပှၤသီတဖၣ် အဖီခိၣ်ဒၣ်လဲာ် အဃိလီၤ.+
၃၆ ဒ်သုပၢ် သးကညီၤတၢ်အသိး+ သုဝဲစ့ၢ်ကီး သးကညီၤတၢ်ထီဘိတက့ၢ်.
၃၇ “ဒ်သိး သုတဘၣ် တၢ်စံၣ်ညီၣ်တဂ့ၤအဂီၢ်+ တဘၣ်စံၣ်ညီၣ် ပှၤဂၤလၢၤတဂ့ၤ. ဒ်သိး သုတဘၣ် တၢ်ပာ်ဒ့ၣ်ပာ်ကမၣ် သုတဂ့ၤအဂီၢ် ဟးပာ်ဒ့ၣ်ပာ်ကမၣ် ပှၤဂၤလၢၤတဂ့ၤ. ဆဲးပျၢ် ပှၤဂၤအတၢ်ကမၣ် ဒီးသုတၢ်ကမၣ်စ့ၢ်ကီး ကဘၣ်တၢ်ပျၢ်အီၤလီၤ.+
၃၈ ဟ့ၣ်တၢ်ထီဘိ ဒီးပှၤကဟ့ၣ်သုစ့ၢ်ကီးလီၤ.+ အဝဲသ့ၣ် ကလူလီၤဝဲအါအါ ဒီးသုကဖၢဃာ်အီၤလၢ သုဆ့ကၤအပူၤ ဒီးအဝဲသ့ၣ်ကဆီၣ်လီၤဝဲ, ကဂံၤဂုၤဝဲ, ကမၤပှဲၤဝဲ တုၤအလီၤလာ်လီၤ. ဒ်တၢ်ထိၣ်လၢ သုထိၣ်န့ၢ်ပှၤဂၤအသိး အဝဲသ့ၣ် ကထိၣ်န့ၢ်က့ၤ သုစ့ၢ်ကီးလီၤ.”
၃၉ ဒီးယ့ၣ်ၡူး တဲစ့ၢ်ကီးအဝဲသ့ၣ် တၢ်ကတိၤဒိတခါလၢ “ပှၤလၢအမဲာ် တထံၣ်တၢ်တဂၤန့ၣ် အဒုးနဲၣ် ပှၤလၢအမဲာ် တထံၣ်တၢ်အဂၤတဂၤ ကျဲကသ့ဒ်လဲၣ်, အဝဲသ့ၣ်ခံဂၤလၢာ် ကလီၤတဲာ်လၢတၢ်ပူၤ တမ့ၢ်ဧီၤ.+
၄၀ ကၠိဖိန့ၣ်* တအိၣ်လၢ အသရၣ်အဖီခိၣ်ဘၣ်. ဘၣ်ဆၣ် ပှၤကိးဂၤဒဲးလၢ အဘၣ်တၢ်သိၣ်လိအီၤ ဂ့ၤဂ့ၤဘၣ်ဘၣ်န့ၣ်* ကလီၤဂာ်ဒီးအသရၣ်လီၤ.
၄၁ မ့မ့ၢ်ဒ်န့ၣ်န့ၣ် ဘၣ်မနုၤအဃိ နကွၢ်လီၢ်ဘိလၢ အအိၣ်လၢ နဒီပုၢ်ဝဲၢ်ခွါ အမဲာ်ချံပူၤလဲၣ်. သ့ၣ်တဘိအိၣ်လၢ နမဲာ်ချံပူၤန့ၣ် နတသ့ၣ်ညါဧီၤ.+
၄၂ နမ့ၢ်တထံၣ် သ့ၣ်တဘိလၢအိၣ်လၢ နမဲာ်ချံပူၤဘၣ်န့ၣ် နတဲနဒီပုၢ်ဝဲၢ်ခွါလၢ ‘ဒီပုၢ်ဝဲၢ်ခွါဧၢ, ဟ့ၣ်ယၤအခွဲးလၢ ယကထုးထီၣ်ကွံာ် လီၢ်ဘိလၢအအိၣ်လၢ နမဲာ်ချံပူၤ’ န့ၣ်ကသ့ဒ်လဲၣ်. ပှၤပာ်မၤအသးသ့ၣ်ဧၢ, ထုးထီၣ်ဆိကွံာ် သ့ၣ်တဘိလၢ နမဲာ်ချံပူၤတက့ၢ်. နမ့ၢ်မၤဒ်န့ၣ်န့ၣ် နကဘၣ်ထုးထီၣ်ကွံာ် လီၢ်ဘိလၢအအိၣ်လၢ နဒီပုၢ်ဝဲၢ်ခွါ အမဲာ်ချံပူၤ ဒ်လဲၣ်ဒ်လဲၣ်န့ၣ် နကထံၣ်ၡဲၡဲလီၤ.
၄၃ “သ့ၣ်လၢအဂ့ၤန့ၣ် တသၣ်ထီၣ် တၤသၣ်လၢ အအုၣ်ဘၣ် ဒီးသ့ၣ်လၢ အတဂ့ၤဘၣ်န့ၣ် တသၣ်ထီၣ် တၤသၣ်လၢအဂ့ၤဘၣ်.+
၄၄ သ့ၣ်တထူၣ်စုာ်စုာ် အဂ့ၤဧါ တဂ့ၤဧါန့ၣ် ပှၤသ့ၣ်ညါအီၤ ခီဖျိလၢ အသၣ်လီၤ.+ အဒိ ပှၤတလဲၤဒဲး ချၢၣ်ဒၢသၣ်လၢ တပှီာ်တၤဆှုၣ် အလိၤဘၣ် ဒီးပှၤတလဲၤဒဲးစ့ၢ်ကီး စပံးသၣ်လၢ နီၣ်တၤဆှုၣ်အလိၤဘၣ်.
၄၅ ပှၤလၢအဂ့ၤန့ၣ် ပာ်ဖှိၣ်ဃာ်တၢ်လၢအဂ့ၤလၢအသးပူၤ အဃိ အကတဲတၢ်လၢအဂ့ၤလီၤ. မ့မ့ၢ် ပှၤလၢအအၢန့ၣ် ပာ်ဖှိၣ်ဃာ်တၢ်လၢအအၢလၢအသးပူၤ အဃိ အကတဲတၢ်လၢအအၢအသီလီၤ. ဒ်တၢ်အိၣ်လၢ ပသးပူၤအသိးန့ၣ် ပတဲထီၣ်အီၤလီၤ.+
၄၆ “သုကိးယၤလၢ ‘ကစၢ်ဧၢ, ကစၢ်ဧၢ’ ဘၣ်ဆၣ် ဘၣ်မနုၤအဃိ သုတမၤထွဲတၢ်လၢ ယတဲတဖၣ်ဘၣ်လဲၣ်.+
၄၇ ပှၤလၢ အဟဲလၢယအိၣ် ဒီးဒိကနၣ် ယကလုၢ်ဒီးမၤထွဲဝဲန့ၣ် အဝဲသ့ၣ် လီၤဂာ်ဒီး မတဂၤလဲၣ်န့ၣ် ယကတဲဘၣ်သုလီၤ.+
၄၈ အဝဲလီၤဂာ်ဒီး ပှၤတဂၤလၢ အသူၣ်ထီၣ်ဟံၣ် ဒီးခူၣ်လီၤဝဲ တၢ်ပူၤယိာ်ယိာ် တုၤလီၤလၢလၢၢ်ခိၣ် ဒီးဆီလီၤဝဲ အဟံၣ်ထူၣ်လၢ တၢ်ပူၤလီၤ. မ့ၢ်လၢ ဟံၣ်တဖျၢၣ်န့ၣ် ဘၣ်တၢ်တ့အီၤ ကျၢၤကျၢၤအဃိ+ ဖဲထံဒိၣ်ထီၣ်အခါ ထံကျိယွၤလီၤဘၣ်အီၤ ဆူၣ်ဆူၣ်သနာ်က့ ဟံၣ်န့ၣ် တဟူးဝးဝဲဘၣ်.
၄၉ မ့မ့ၢ် ပှၤလၢအနၢ်ဟူတၢ်ဒီး တမၤတၢ် နီတမံၤဘၣ်န့ၣ်+ အလီၤဂာ်ဒီး ပှၤလၢ အသူၣ်ဟံၣ် ဘၣ်ဆၣ် တခူၣ်လီၤဝဲ တၢ်ပူၤယိာ်ယိာ် ဒ်သိးကဆီလီၤ ဟံၣ်ထူၣ်အဂီၢ်ဘၣ်. အဃိ ဖဲထံကျိယွၤလီၤဘၣ် ဟံၣ်ဆူၣ်ဆူၣ်အခါ ဟံၣ်တဖျၢၣ်အံၤလီၤပှီၢ်ဝဲ တဘျီဃီ ဒီးဟးဂီၤဝဲ လၢာ်စီပျီလီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သၣ်ဝံၤ.”
^ မ့ၢ်စ့ၢ်ကီး “အပျဲၢ်အဘီၣ်.”
^ မ့ၢ်စ့ၢ်ကီး “ဘၣ်တၢ်သိၣ်လိအီၤ လၢလၢပှဲၤပှဲၤ.”
