၂ စီၤပၤ ၈:၁-၂၉
၈ စီၤအလံၤၡါ တဲဘၣ် ဖိသၣ်ပိာ်ခွါလၢ အမၤသမူထီၣ်က့ၤဝဲ+ တဂၤန့ၣ် အမိၢ်လၢ “မ့ၢ်လၢ ယဟိဝၤယွၤ တဲဆိပာ်စၢၤဝဲလၢ တၢ်သၣ်ဝံၤလီၤဒိ+ ကအိၣ်လၢကီၢ်ပူၤ နွံနံၣ်အဃိ နၤဒီးနဟံၣ်ဖိဃီဖိန့ၣ် လဲၤအိၣ်ဒ်ပှၤထံဂၤကီၢ်ဂၤဖိအသိး ဖဲတၢ်လီၢ်တတီၤဂ့ၤ တတီၤဂ့ၤလၢ သုလဲၤန့ၢ်ဝဲန့ၣ်တက့ၢ်.”
၂ အဃိ ပိာ်မုၣ်တဂၤန့ၣ် မၤဝဲဒ် ယွၤလၢအမ့ၢ်အတီ အပှၤတဂၤ တဲအီၤအသိးလီၤ. အဝဲဒီး အဟံၣ်ဖိဃီဖိ လဲၤအိၣ်ဝဲလၢ ပှၤဖလ့ၡသးဖိအကီၢ်+ နွံနံၣ်လီၤ.
၃ ဒီးနွံနံၣ် ဝံၤအလီၢ်ခံ ပိာ်မုၣ်တဂၤ လၢအလဲၤအိၣ်လၢ ပှၤဖလ့ၡသးဖိအကီၢ်န့ၣ် ဟဲက့ၤကဒါက့ၤဝဲလီၤ. ဒီးအဝဲ လဲၤဃ့ကညး စီၤပၤ ဘၣ်ဃးဒီး အနီၢ်ကစၢ်အဟံၣ် ဒီးအစံာ်ပျီလီၤ.
၄ ဒီးစီၤပၤ တဲဝဲ စီၤအလံၤၡါ အပှၤမၤစၢၤတၢ်တဂၤ စီၤက့ၤဃစံလၢ “ဝံသးစူၤ တဲဘၣ်ယၤ တၢ်အဒိၣ်အမုၢ်တဖၣ် လၢစီၤအလံၤၡါ မၤတ့ၢ်ဝဲ ခဲလၢာ်တက့ၢ်.”+
၅ ဖဲစီၤက့ၤဃစံ တဲဘၣ်စီၤပၤလၢ စီၤအလံၤၡါ မၤသမူထီၣ်က့ၤ ပှၤသံတဂၤ+ ဒ်လဲၣ်အဂ့ၢ်အခါ ပိာ်မုၣ်တဂၤလၢ အဖိခွါ ဘၣ်တၢ်မၤသမူထီၣ်က့ၤအီၤန့ၣ် ဟဲလၢစီၤပၤအအိၣ် ဒီးဃ့ကညးစီၤပၤ ဘၣ်ဃးဒီး အနီၢ်ကစၢ် အဟံၣ်ဒီးအစံာ်ပျီ အဂ့ၢ်လီၤ.+ တဘျီဃီန့ၣ် စီၤက့ၤဃစံ တဲဝဲလၢ “ကစၢ်စီၤပၤဧၢ, အဝဲအံၤ မ့ၢ်ပိာ်မုၣ်တဂၤန့ၣ် ဒီးလၢအံၤန့ၣ် မ့ၢ်အဖိခွါလၢ စီၤအလံၤၡါ မၤသမူထီၣ်က့ၤအီၤလီၤ.”
၆ ဖဲန့ၣ် စီၤပၤသံကွၢ် ပိာ်မုၣ်တဂၤန့ၣ် ဒီးအဝဲတဲဘၣ် စီၤပၤ တၢ်ဂ့ၢ်ခဲလၢာ်လီၤ. ဒီးစီၤပၤ အးလီၤမူဒါလၢ ပဒိၣ်တဂၤအစုပူၤ ဒီးတဲအီၤလၢ “တၢ်လၢ အကဲပိာ်မုၣ်တဂၤအံၤ အတၢ်န့ၣ် ဟ့ၣ်ကဒါက့ၤအီၤတက့ၢ်. ဒီးတၢ်လၢအမဲထီၣ်သၣ်ထီၣ်လၢ အစံာ်ပျီပူၤခဲလၢာ် စးထီၣ်ဖဲ မုၢ်နံၤလၢ အဝဲဟးထီၣ်လၢ ကီၢ်ပူၤ တုၤခဲအံၤန့ၣ် ဟ့ၣ်ကဒါက့ၤအီၤတက့ၢ်.”
၇ ဖဲကီၢ်စူၤရံ အစီၤပၤဘ့ၣ်ဟဒး+ ဆိးက့အခါ စီၤအလံၤၡါ လဲၤလၢ ဝ့ၢ်ဒၤမ့ၤစ့းလီၤ.+ အဃိ ပှၤတဲဘၣ်အီၤလၢ “ယွၤလၢအမ့ၢ်အတီ အပှၤတဂၤ+ ဟဲဖဲအံၤလီၤ.”
၈ ဒီးစီၤပၤ တဲဘၣ် စီၤဃစ့လးလၢ+ “လဲၤစိာ် တၢ်ဟ့ၣ် ဒီးလဲၤထံၣ်လိာ်သးဒီး ယွၤလၢအမ့ၢ်အတီ အပှၤတဂၤ+ န့ၣ်တက့ၢ်. ဒီးမၢအသံကွၢ်န့ၢ် တၢ်လၢယဟိဝၤယွၤ အအိၣ်လၢ ‘မ့ၢ်ယကဘျါက့ၤလၢ ယတၢ်ဆူးတၢ်ဆါဧါ.’”
၉ အဃိ စီၤဃစ့လး လဲၤထံၣ်လိာ်သး ဒီးအီၤလီၤ. ဒီးအဝဲလဲၤစိာ်ဃုာ်ဒီး တၢ်ဟ့ၣ်လၢအမ့ၢ် တၢ်ဖိတၢ်လံၤ လၢအဂ့ၤ ကိးကလုာ်ဒဲးလၢ အဟဲလၢ ဝ့ၢ်ဒၤမ့ၤစ့း ဒီးအအိၣ်အါ ပှဲၤသိးဒီး တၢ်လၢ ကီၤလၤအူးအဒု ၄၀ တီၣ်ဝဲန့ၢ်န့ၣ်လီၤ. ဒီးအဝဲ လဲၤဆၢထၢၣ်လၢ စီၤအလံၤၡါ အမဲာ်ညါ ဒီးတဲအီၤလၢ “နဖိခွါ စီၤပၤဘ့ၣ်ဟဒး ဆှၢလီၤယၤ ဒ်သိး ယကသံကွၢ်နၤလၢ မ့ၢ်အဝဲ ကဘျါက့ၤလၢ အတၢ်ဆူးတၢ်ဆါန့ၣ်ဧါ.”
၁၀ စီၤအလံၤၡါ တဲဆၢအီၤလၢ “က့ၤတဲဘၣ်အီၤလၢ အဝဲကဘျါက့ၤ သပှၢ်တၢၢ်လီၤ. ဘၣ်ဆၣ် ယဟိဝၤယွၤ ဒုးနဲၣ်ယၤလၢ အဝဲကသံဝဲ သပှၢ်တၢၢ်လီၤ.”+
၁၁ ဒီးစီၤအလံၤၡါ ကွၢ်ထံဝဲ စီၤဃစ့လးတုၤလၢ စီၤဃစ့လး မဲာ်ဆှးန့ၣ်လီၤ. ဝံၤဒီး ယွၤလၢအမ့ၢ်အတီ အပှၤတဂၤန့ၣ် ဟီၣ်ဝဲလီၤ.
၁၂ စီၤဃစ့လး သံကွၢ်ဝဲလၢ “ကစၢ်ဧၢ, ဘၣ်မနုၤအဃိ နဟီၣ်လဲၣ်.” အဝဲတဲဆၢက့ၤလၢ “မ့ၢ်လၢယသ့ၣ်ညါလၢ နကမၤဆါ ပှၤအံၣ်စရ့လးဖိ အဃိလီၤ.+ နကဒွဲၣ်အူထီၣ်ကွံာ် အဝဲသ့ၣ် အဝ့ၢ်လၢအအိၣ်ဒီး အဒူၣ်လၢအကျၢၤတဖၣ်, နကမၤသံ ပိာ်ခွါသးစၢ်လၢ အဂ့ၤကတၢၢ်တဖၣ် လၢနး, နကမၤသဘှံး အဝဲသ့ၣ် အဖိတဖၣ် ဒီးနကဖှဲးသ့ၣ်ဖး ပှၤမိၢ်ဒၢတဖၣ် အဟၢဖၢလီၤ.”+
၁၃ စီၤဃစ့လးတဲဝဲလၢ “ကစၢ်ဧၢ, ယမ့ၢ်ပှၤလၢ အပတီၢ်ဖုၣ်တဂၤ ဒ်သိးထွံၣ်တဒု အဃိ ယမၤတၢ် ဒ်န့ၣ် ကသ့ဒ်လဲၣ်.” ဘၣ်ဆၣ် စီၤအလံၤၡါ တဲဝဲလၢ “ယဟိဝၤယွၤ ဒုးနဲၣ်ယၤလၢ နကကဲထီၣ် စီၤပၤလၢ ကီၢ်စူၤရံ အပူၤလီၤ.”+
၁၄ ဒီးစီၤဃစ့လး ဟးထီၣ်ကွံာ်လၢ စီၤအလံၤၡါ အအိၣ် ဒီးက့ၤကဒါက့ၤလၢ အကစၢ်အအိၣ်လီၤ. အကစၢ်တဲအီၤလၢ “စီၤအလံၤၡါ တဲနၤ မနုၤလဲၣ်.” အဝဲတဲဆၢက့ၤအီၤလၢ “အဝဲ တဲဘၣ်ယၤလၢ နကဘျါက့ၤ သပှၢ်တၢၢ်လီၤ.”+
၁၅ ဘၣ်ဆၣ် လၢခံတနံၤန့ၣ် စီၤဃစ့လး ဟံးန့ၢ်ဝဲ ယၣ်တဘ့ၣ်, စုၣ်လီၤဝဲလၢထံကျါ ဒီးပာ်လီၤဝဲလၢ စီၤပၤအမဲာ်သၣ်အလိၤ တုၤလၢစီၤပၤသံတစုလီၤ.+ ဒီးစီၤဃစ့လး ကဲထီၣ် စီၤပၤလၢအလီၢ်လီၤ.+
၁၆ ဖဲစီၤအၤဃာ်အဖိခွါ လၢအမ့ၢ် အံၣ်စရ့လးအစီၤပၤ စီၤယဟိရၣ်+ ပၢတၢ် ယဲၢ်နံၣ်တနံၣ်န့ၣ် စီၤယဟိၤၡၤဖးအဖိခွါ စီၤယဟိရၣ်+ ကဲထီၣ် ယူဒၤ အစီၤပၤ ဖဲစီၤယဟိၤၡၤဖး မ့ၢ်ဒံးယူဒၤအစီၤပၤ အဆၢကတီၢ်လီၤ.
၁၇ ဖဲအဝဲကဲထီၣ် စီၤပၤအခါ အသးနံၣ်အိၣ်ဝဲ ၃၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ဃိးနံၣ်လီၤ.
၁၈ အဝဲအိၣ်မူပိာ်ထွဲဒ် အံၣ်စရ့လး အစီၤပၤတဖၣ်+ မၤဝဲအသိး ဒီးအိၣ်မူပိာ်ထွဲဒ် စီၤအၤဃာ် အဒူၣ်ဖိထၢဖိ မၤဝဲအသိး,+ မ့ၢ်လၢ အဝဲဟံးန့ၢ်အမါလၢ စီၤအၤဃာ် အဖိမုၣ်အဃိလီၤ.+ ဒီးအဝဲမၤတၢ်လၢ ယဟိဝၤယွၤ ထံၣ်ဝဲလၢအအၢ တလီၢ်လီၢ်လီၤ.+
၁၉ ဘၣ်ဆၣ် ခီဖျိလၢ ယဟိဝၤယွၤ အၢၣ်လီၤပာ်စၢၤ အခ့အပှၤ စီၤဒၤဝံး+ လၢအကဟ့ၣ်လီၤအီၤဒီး အဖိခွါတဖၣ်လၢ အမ့ၣ်အူဒၢတဖျၢၣ်*+ ထီဘိအဃိ အဝဲ တအဲၣ်ဒိးမၤဟးဂီၤ ယူဒၤအဘီမုၢ်ဘၣ်.
၂၀ ဖဲစီၤယဟိရၣ် ပၢတၢ်အဆၢကတီၢ်န့ၣ် ပှၤအဒိၣ်ဖိ ထီဒါဝဲ ယူဒၤအဘီမုၢ်+ ဝံၤဒီး ပာ်ထီၣ်ဝဲ အနီၢ်ကစၢ် အစီၤပၤလီၤ.+
၂၁ အဃိ စီၤယဟိရၣ် လဲၤခီဃီၤ ဃုာ်ဒီး အလ့ၣ်ကဟၣ်တဖၣ်လၢ စၤဧံရၤတၢ်လီၢ် ဒီးပှၤအဒိၣ်ဖိတဖၣ် ကဝီၤဃာ်အီၤ ဒီးအလ့ၣ်ကဟၣ် အသုးခိၣ်တဖၣ်လီၤ. ဘၣ်ဆၣ် လၢမုၢ်နၤခီန့ၣ် စီၤယဟိရၣ် ဂဲၤဆၢထၢၣ် ဒီးဒုးအဝဲသ့ၣ်နၢၤလီၤ. ဒီးသုးဖိတဖၣ်န့ၣ် က့ၤဃ့ၢ်ကွံာ်လၢ အနီၢ်ကစၢ် အဒဲလီၤ.
၂၂ ဘၣ်ဆၣ် ပှၤအဒိၣ်ဖိတဖၣ် ဆဲးထီဒါ ယူဒၤအဘီမုၢ် တုၤလၢ မုၢ်မဆါတနံၤအံၤ ဒီးဖဲန့ၣ်အဆၢကတီၢ် ပှၤလံးဘနၤဖိ+ ထီဒါတၢ် စ့ၢ်ကီးလီၤ.
၂၃ မ့မ့ၢ် စီၤယဟိရၣ် အဂ့ၢ်လၢအဂၤတဖၣ် ဒီးတၢ်လၢအမၤဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၄ ဒီးစီၤယဟိရၣ်န့ၣ် သံဝဲဒ်အမိၢ်ပၢ်ဖံဖု လၢပျၢၤတဖၣ် အသိး ဒီးပှၤခူၣ်လီၤကွံာ်အီၤ ဒီးအမိၢ်ပၢ်ဖံဖု လၢပျၢၤတဖၣ် လၢစီၤဒၤဝံး အဝ့ၢ်ပူၤလီၤ.+ ဒီးအဖိခွါ စီၤအဃၤစယၤ+ ကဲထီၣ်စီၤပၤလၢ အလီၢ်လီၤ.
၂၅ ဖဲစီၤအၤဃာ် အဖိခွါ လၢအမ့ၢ် အံၣ်စရ့လး အစီၤပၤယဟိရၣ် ပၢတၢ် ၁၂ နံၣ်တနံၣ်န့ၣ် ယူဒၤအစီၤပၤယဟိရၣ် အဖိခွါ စီၤအဃၤစယၤ ကဲထီၣ်စီၤပၤလီၤ.+
၂၆ ဖဲစီၤအဃၤစယၤ ကဲထီၣ်စီၤပၤအခါ အသးနံၣ်အိၣ်ဝဲ ၂၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ တနံၣ်လီၤ. အမိၢ်အမံၤ မ့ၢ်ဝဲ နီၢ်ဧသၤလယၤ+ လၢအမ့ၢ် အံၣ်စရ့လးအစီၤပၤဧိၣ်ရံၤ+ အလံၤမုၣ်* န့ၣ်လီၤ.
၂၇ မ့ၢ်လၢ စီၤအဃၤစယၤ ဒီဘူးဒီတံၢ်ဒီး စီၤပၤအၤဃာ်+ အဒူၣ်ဖိထၢဖိ ခီဖျိ တၢ်တ့တၢ်ဖျီအဃိ စီၤအဃၤစယၤ အိၣ်မူပိာ်ထွဲဒ် စီၤအၤဃာ် အဒူၣ်ဖိထၢဖိ မၤဝဲအသိး ဒီးအဝဲမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်စီၤအၤဃာ် အဒူၣ်ဖိထၢဖိ မၤဝဲအသိးလီၤ.+
၂၈ အဃိ စီၤအဃၤစယၤ လဲၤဃုာ်ဒီး စီၤအၤဃာ်အဖိခွါ စီၤယဟိရၣ် ဒီးလဲၤဒုးတၢ်ဒီး ကီၢ်စူၤရံ အစီၤပၤဃစ့လး လၢဝ့ၢ်ရၤမိးကံးလဧးလီၤ.+ ဘၣ်ဆၣ် ပှၤစူၤရံဖိတဖၣ် မၤဘၣ်ဒိ စီၤယဟိရၣ်လီၤ.+
၂၉ မ့ၢ်လီၤ, ဖဲစီၤပၤယဟိရၣ် လဲၤဒုး ကီၢ်စူၤရံအစီၤပၤဃစ့လး+ အခါ ပှၤစူၤရံဖိ မၤဘၣ်ဒိအီၤဖဲ ဝ့ၢ်ရၤမါ* အဃိ အဝဲက့ၤလၢ ဝ့ၢ်ယံးစရ့လး+ ဒ်သိး အတၢ်ပူၤလီၢ်တဖၣ် ကဘျါက့ၤ အဂီၢ်လီၤ. ဒီးယူဒၤဘီမုၢ် အစီၤပၤယဟိရၣ် အဖိခွါစီၤအဃၤစယၤန့ၣ် လဲၤလီၤထံၣ်လိာ်သးဒီး စီၤအၤဃာ်အဖိခွါ စီၤယဟိရၣ်လၢ ဝ့ၢ်ယံးစရ့လးအပူၤ, မ့ၢ်လၢ အဝဲဘၣ်ဒိ* အဃိလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ အစၢၤအသွဲၣ်.
^ အခီပညီလိၤလိၤ “ဖိမုၣ်.”
^ မ့ၢ်ဝဲ တၢ်ကွဲးဖုၣ် “ရၤမိးကံးလဧး.”
^ မ့ၢ်စ့ၢ်ကီး “အဝဲဆိးက့.”
