၂ ပ့းတရူး ၃:၁-၁၈
၃ ဒီပုၢ်ဝဲၢ်သးဘိသ့ၣ်ဧၢ, အဝဲအံၤ မ့ၢ်လံာ်ပရၢလၢ ယကွဲးန့ၢ်သု ခံဘ့ၣ်တဘ့ၣ်လီၤ. ဒ်လံာ်ပရၢ အဆိကတၢၢ်တဘ့ၣ်အသိးန့ၣ် ခဲအံၤ ယဒုးသ့ၣ်နီၣ်ထီၣ်သုလၢ+ တၢ်ဂ့ၢ်တဖၣ်ဒ်သိး အကမၤစၢၤသုလၢ သုဆိကမိၣ်တၢ် လီၤတံၢ်လီၤဆဲးကဘၣ်အဂီၢ်လီၤ.
၂ ယမၤဒ်အံၤန့ၣ် မ့ၢ်ဒ်သိးသုကသ့ၣ်နီၣ်ထီၣ်က့ၤ ဝံစီဆှံအတၢ်ကတိၤလၢညါတဖၣ် ဒီးတၢ်အုၣ်က့ၤခီၣ်က့ၤကစၢ် အတၢ်မၤလိာ် လၢသုနၢ်ဟူ ခီဖျိလၢ တၢ်မၢဖိတဖၣ်လီၤ.*
၃ အဆိကတၢၢ်န့ၣ် သ့ၣ်ညါတၢ်ဂ့ၢ်အဝဲအံၤတက့ၢ်. လၢမုၢ်နံၤခံကတၢၢ်တဖၣ်အပူၤန့ၣ် ပှၤလၢအဒုၣ်ဒွဲၣ်စံးအၢတၢ်တဖၣ် ကဟဲဒုၣ်ဒွဲၣ်စံးအၢတၢ် ဒီးကမၤဝဲဒ် အတၢ်သူၣ်လီသးကွံ အိၣ်ဝဲအသိးလီၤ.+
၄ ဒီးအဝဲသ့ၣ်ကတဲဝဲလၢ “အဝဲအၢၣ်လီၤဝဲလၢ အကဟဲက့ၤအိၣ်ဒီးပှၤ+ ဘၣ်ဆၣ် အအိၣ်ဖဲလဲၣ်. စးထီၣ်လၢ မုၢ်နံၤလၢ ပမိၢ်ပၢ်ဖံဖု လၢပျၢၤတဖၣ်သံဝဲ ဒီးတုၤလၢ ခဲအံၤန့ၣ် တၢ်ခဲလၢာ် ဆဲးလဲၤအသး ဒ်အလီၢ်လီၢ် ဒ်အအိၣ်ဝဲ ဖဲကစၢ်ယွၤတ့လီၤ ပှၤဟီၣ်ခိၣ်ဖိ လၢအခီၣ်ထံးလံၤလံၤ အသိးလီၤ.”+
၅ အဝဲသ့ၣ် ပာ်သးပ့ၤနီၣ်အသးလၢ မူခိၣ်အိၣ်ဝဲဆိးဝဲလၢပျၢၤ ဒီးခီဖျိလၢ ကစၢ်ယွၤ အကလုၢ်အဃိ+ ဟီၣ်ခိၣ်အိၣ် ဂၢၢ်ကျၢၤဝဲလၢ ထံအဖီခိၣ် ဒီးထံန့ၣ်အိၣ်ဝးတရံးအီၤလီၤ.
၆ ဒီးလၢအဃိ ဟီၣ်ခိၣ်လၢအအိၣ်ဝဲလၢ ဆၢကတီၢ်ဖဲန့ၣ်န့ၣ် ဟးဂီၤကွံာ်ဝဲ ဖဲထံလုၢ်ဘၢအီၤအခါလီၤ.+
၇ ဘၣ်ဆၣ် ခီဖျိလၢ ကစၢ်ယွၤအကလုၢ် တမံၤဃီအံၤအဃိ မူခိၣ်ဒီးဟီၣ်ခိၣ်လၢ အအိၣ်ခဲအံၤန့ၣ် ဘၣ်တၢ်ပာ်ဃာ်အီၤလၢ မ့ၣ်အူအဂီၢ် ဒီးကဘၣ်တၢ်ပာ်ဃာ်အီၤ တုၤလီၤလၢ တၢ်စံၣ်ညီၣ်အမုၢ်နံၤ ဖဲတၢ်ကမၤဟးဂီၤကွံာ် ပှၤလၢအတယူးတယီၣ်ယွၤဘၣ် အခါန့ၣ်လီၤ.+
၈ ဘၣ်ဆၣ် ဒီပုၢ်ဝဲၢ်သးဘိသ့ၣ်ဧၢ, တဘၣ်သးပ့ၤနီၣ် တၢ်ဂ့ၢ်တခါအံၤတဂ့ၤ. လၢယဟိဝၤယွၤ* အမဲာ်ညါန့ၣ် တသီမၤအသး ဒ်အနံၣ်တကထိအသိး ဒီးအနံၣ်တကထိန့ၣ် မၤအသး ဒ်တသီအသိးလီၤ.+
၉ ယဟိဝၤယွၤ တမၤယံာ်မၤနီၢ်အသးလၢ အကမၤလၢပှဲၤ အတၢ်အၢၣ်လီၤ+ ဒ်ပှၤတနီၤနီၤ ဆိကမိၣ်ဝဲအသိးဘၣ်. ဘၣ်ဆၣ် အဝံသးစူၤသု မ့ၢ်လၢ အတအဲၣ်ဒိးလၢ ပှၤကတုၤလၢတၢ်ဟးဂီၤ နီတဂၤဘၣ်. ဒီးအအဲၣ်ဒိးဝဲလၢ ပှၤခဲလၢာ် ကပီၢ်ယၢ်လီၤက့ၤအသးလီၤ.+
၁၀ ဘၣ်ဆၣ် ယဟိဝၤယွၤအမုၢ်နံၤ+ ကဟဲဝဲဒ် တၢ်ဘျၣ်အသိးလီၤ.+ ဖဲန့ၣ်အခါ မူခိၣ်ကလီၤမၢ်ကွံာ်ဝဲ+ အိၣ်ဒီးတၢ်သီၣ်ဖးဒိၣ် သတူၢ်ကလာ်တခါလီၤ. တၢ်အမိၢ်ပှၢ်တဖၣ် ကကိၢ်ထီၣ်ဖးဒိၣ်ဒီး ကပှံၢ်လီၤကွံာ်ဝဲ ဒီးဟီၣ်ခိၣ် ဒီးတၢ်မၤတဖၣ်လၢအပူၤန့ၣ် ကဘၣ်တၢ်ပာ်ဖျါထီၣ်အီၤလီၤ.+
၁၁ ခီဖျိလၢ တၢ်သ့ၣ်တဖၣ်အံၤ ကပှံၢ်လီၤကွံာ်ဒ်အံၤ ခဲလၢာ်အဃိ သုကြၢးကဲထီၣ် ပှၤဒ်လဲၣ်န့ၣ် ဆိကမိၣ်ထံတက့ၢ်. သုကြၢးမ့ၢ်ပှၤလၢအအိၣ်ဒီး လုၢ်လၢ်သကဲာ်ပဝးလၢ အစီဆှံ ဒီးမၤတၢ်လၢ အပာ်ဖျါထီၣ်လၢ သုသးတီဒီးကစၢ်ယွၤ
၁၂ ဖဲသုအိၣ်ခိးဒီးကွၢ်လၢ် ယဟိဝၤယွၤ အမုၢ်နံၤ+ အဆၢကတီၢ်လီၤ. ခီဖျိမုၢ်နံၤအံၤအဃိ မူခိၣ်ကဘၣ်တၢ် မၤဟးဂီၤကွံာ်အီၤလၢ+ မ့ၣ်အူလၣ်အပူၤ ဒီးတၢ်အမိၢ်ပှၢ်တဖၣ် ကပှံၢ်လီၤကွံာ်ဝဲလၢ တၢ်ကိၢ်ဖးဒိၣ်အဃိလီၤ.
၁၃ ဘၣ်ဆၣ် ပခိးကွၢ်လၢ် မူခိၣ်အသီ ဒီးဟီၣ်ခိၣ်အသီ ဒ်ကစၢ်ယွၤ အတၢ်အၢၣ်လီၤ အိၣ်ဝဲအသိး+ ဒီးတၢ်တီတၢ်လိၤ ကအိၣ်ဝဲဖဲန့ၣ်လီၤ.+
၁၄ အဃိ ဒီပုၢ်ဝဲၢ်သးဘိသ့ၣ်ဧၢ, ခီဖျိလၢ သုခိးကွၢ်လၢ်တၢ်သ့ၣ်တဖၣ်အံၤအဃိ ဂုာ်ကျဲးစၢး လၢအဂ့ၤကတၢၢ် ဒ်သိးလၢအကတၢၢ်န့ၣ် ကစၢ်ယွၤ ကထံၣ်သုလၢ သုမ့ၢ်ပှၤလၢအကဆှီ, ပှၤလၢ အတၢ်လီၤတူာ်လီၤကာ် တအိၣ်ဘၣ် ဒီးပှၤလၢအပၢၤဃာ် တၢ်ဃူတၢ်ဖိးန့ၣ်တက့ၢ်.+
၁၅ ပာ်ပကစၢ် အတၢ်ဝံသးစူၤ ဒ်တၢ်အုၣ်က့ၤခီၣ်က့ၤ အသိးတက့ၢ်. ပဒီပုၢ်ဝဲၢ်သးဘိ စီၤပီလူး ကွဲးန့ၢ်စ့ၢ်ကီးသုဒ်န့ၣ် ဒ်တၢ်ကူၣ်သ့လၢ အဘၣ်တၢ်ဟ့ၣ်လီၤအီၤအသိးလီၤ.+
၁၆ နီၢ်ကီၢ်န့ၣ် အဝဲကွဲးဝဲဘၣ်ဃးဒီး တၢ်ဂ့ၢ်တဖၣ်အံၤလၢ အလံာ်ပရၢကိးဘ့ၣ်ဒဲးအပူၤလီၤ. ဘၣ်ဆၣ် လၢအလံာ်ပရၢတဖၣ်အပူၤန့ၣ် တၢ်ဂ့ၢ်လၢ ပှၤနၢ်ပၢၢ်အီၤကီ အိၣ်ဝဲတနီၤလီၤ. ဒီးပှၤလၢအသး တဂၢၢ်တကျၢၤလၢ အတနၢ်ပၢၢ် တၢ်ဂ့ၢ်တဖၣ်အံၤဘၣ်န့ၣ် မၤက့ၣ်ကူဝဲ တၢ်ဂ့ၢ်တဖၣ်အံၤ ဒ်အဝဲသ့ၣ်မၤဝဲ တၢ်ကွဲးအသးအဂၤတဖၣ် အသိးလီၤ. လၢတၢ်န့ၣ်အဃိ အဝဲသ့ၣ်ကတုၤလၢ တၢ်ဟးဂီၤလီၤ.
၁၇ ဒီပုၢ်ဝဲၢ်သးဘိသ့ၣ်ဧၢ, သုသ့ၣ်ညါဆိပာ်စၢၤ တၢ်ဂ့ၢ်အံၤအဃိ အိၣ်ပလီၢ်သုသး ဒ်သိး ပှၤအၢပှၤသီတဖၣ်အံၤ သုတဆှၢကမၣ်သု ခီဖျိလၢအဝဲသ့ၣ် အတၢ်ထံၣ်ကမၣ် အဃိတဂ့ၤ ဒီးဒ်သိး သုတၢ်သူၣ်ဂၢၢ်သးကျၢၤ သုတလီၤမၢ်တဂ့ၤအဂီၢ်+ န့ၣ်တက့ၢ်.
၁၈ လၢတၢ်န့ၣ်အလီၢ် ယမုၢ်လၢ်လၢ သုကဒိးန့ၢ်ဘၣ်အါထီၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်သ့ၣ်ညါလၢ အဘၣ်ဃးဒီး ပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ်လီၤ. မ်တၢ်လၤကပီၤအိၣ်ဒီး ယ့ၣ်ၡူးခရံာ် ခဲအံၤ ဒီးအစိၤစိၤ အဃၣ်ဃၣ်တက့ၢ်. အၤမ့ၣ်.
